1-3. Parché che dele volte piandemo?

TE TE ricordi dela ùltima volta che te ghè piandesto? Fursi l’è stà parché te eri tanto contento o parché te eri drio sofrir. Par esémpio, pol esser che te ghè piandesto quando l’è morto qualchedun che te ami. Varda cossa che Laura, una sorela dei Stati Unidi, la ga dito: “Mi ero drio sofrir tanto par causa dela morte dela me fiola e me parea che gnente podea darme consolo. Me fea tanto mal che me parea de morir.” *

² Fursi piandemo par causa de altre robe. Varda el esémpio de Hiromi, una pioniera nel Giapon. Ela la ga dito: “Dele volte, resto tanto desanimada parché le persone no le vol imparar dela Bìblia. Mi piando e prego a Geovà che el me giute a catar una persona che la vol scoltar.”

³ Pol esser che se sentimo come Laura o Hiromi. (1 Pie. 5:9) L’è vera che volemo servir a Geovà contenti, ma dele volte, piandemo par causa dele robe che infrontemo. Par esémpio, fursi restemo desanimadi parché l’è morto qualchedun che amemo, o infrontemo dificoltà che ne fà fadiga seitar leai a Dio. (Sal. 6:6; 100:2) Cossa che pol giutarne a infrontar queste robe?

4. Cossa ndaremo imparar in questo stùdio?

⁴ Gesù el ga infrontà brute dificoltà, e par causa de questo, el ga piandesto arquante volte. (Gioani 11:35; Luc. 19:41; 22:44; Ebr. 5:7) In questo stùdio, ndaremo parlar sora tre volte che Gesù el ga piandesto, e cossa che podemo imparar de lore. Ndaremo anca veder quel che pol giutarne a dàrghene fora cole robe che ne fà piander.

5. Cossa che te ghè imparà sora quel che Gesù el ga fato in Gioani 11:32-36?

⁵ Ledi Gioani 11:32-36. * Gesù el amea tanto Làsaro e le so sorele, Marta e Maria. Ma nel ano 32, el so caro amigo Làsaro l’è restà malà e l’è morto. (Gioani 11:3, 14) Marta e Maria le ga sofrio tanto par causa dela morte del so fradel. Dopo che Làsaro l’è morto, Gesù el ga viaià fin Betània. Quando Marta la ga savesto che Gesù l’era drio rivar, la ze ndata de carera catarlo. Proa pensar in quel che la era drio sentir quando la ga dito: “Signor, se te fussi stà qua, me fradel no’l saria morto.” (Gioani 11:21) Quando Gesù el ga visto che Maria e altri i era drio piander, anca lu el ga scominsià a piander.

6. Parché che Gesù el ga piandesto?

⁶ Parché che Gesù el ga piandesto? El Estudo Perspicaz das Escrituras dise: “Gesù el ga piandesto par causa dela morte del so amigo, Làsaro, e par causa del sofrimento dele so sorele.” * Fursi Gesù el gàpia pensà come Làsaro el ga sofrio par causa de quela malatia e come el se ga sentio de saver che l’era drio morir. Sicuro che Gesù anca el ga piandesto de veder el sofrimento de Marta e Maria. L’è morto qualchedun dela to fameia o che te ami tanto? Alora, te capissi quel che Gesù l’era drio sentir. Adesso, ndaremo imparar tre robe de quel che ga sucedesto con Gesù.

7. Gesù el ga piandesto par causa dei so amighi. Cossa che questo ne insegna sora Geovà?

⁷Geovà el capisse quel che sentimo. La Bìblia la dise che Gesù el fà le robe compagno al so Pare, Geovà. (Ebr. 1:3) Cossita, capimo che anca Geovà el resta disgustà e el sofre quando more qualchedun che  amemo. (Gioani 14:9) Alora, se l’è morto qualchedun che te ami, ricòrdate che Geovà el capisse quel che te sì drio sentir e l’è drio sofrir insieme con ti. Lu el vol tanto tenderte e giutarte a sentirte meio. — Sal. 34:18; 147:3.

8. Parché che podemo esser sicuri che Gesù el ndarà ressussitar quei che i ze morti?

⁸Gesù el vol tanto ressussitar le persone che te ami. Vanti de piander, Gesù el ga assà Marta sicura che Làsaro el ndaria tornar a viver, e Marta la credea in Gesù. (Gioani 11:23-27) Marta la era fedele a Geovà, e par quela la savea che i profeti Elia e Eliseo i gavea belche ressussità persone nel passà. (1 Rè 17:17-24; 2 Rè 4:32-37) Marta anca la savea dele ressuression che Gesù el gavea fato. (Luc. 7:11-15; 8:41, 42, 49-56) Alora, ti te pol esser sicuro che quei che te ami i sarà ressussitadi. Parché? Parché quando Gesù el ga piandesto insieme cola fameia de Làsaro lu el ga anca mostrà che el vol tanto ressussitar quei che i ze morti.

9. Come podemo giutar quei che i ze drio sofrir par causa dela morte de qualchedun? Parla un esémpio.

⁹Te pol giutar quei che i ze drio sofrir par causa dela morte de qualchedun. Gesù el ga piandesto con Marta e Maria, ma lu le ga anca scoltà e consolà. Noantri podemo far come Gesù. Varda cossa che Dan, che l’è un ansiano dela Austràlia, el ga dito: “Dopo che la me dona la ze morta, go bio bisogno de tanto aiuto. Arquante fameie le me ga dito che mi podea dirghe quel che me ocorea. Quando mi ero insieme con lori, mi podea parlarghe tuto quel che ero drio sentir e piander. Lori anca i preghea con mi. Nei giorni che no ero bon de far gnente, lori i netea el me auto, i fea compre e i me fea de magnar. Lori i ga mostrà che i era veri amighi e che i volea giurtarme in questo bruto colpo.” — Pro. 17:17.

10. Parla de quel che ga sucedesto in Luca 19:36-40.

¹⁰ Nel giorno 9 de nisan del ano 33, Gesù l’è ndato a Gerusalen. Quando lu l’era drio ndar rento la cità, arquante persone le ze ndate catarlo. Alora, le ga cavà via arquante dele so robe e le ga metesto par la strada che Gesù el ndaria passar. Lore le ga fato questo parché le volea mostrar che Gesù l’era el so Rè. (Ledi Luca 19:36-40. *) Sicuro che tuti i era tanto contenti. Ma quando Gesù el ga vardà la cità, el ga piandesto. Pol esser che i dissìpoli i se gàpia domandà parché Gesù l’era drio piander. Alora, Gesù el ghe ga dito quel che ndaria suceder cole persone de Gerusalen. — Luc. 19:41-44.

11. Parché che Gesù el ga piandesto in Gerusalen?

¹¹ Gesù el ga piandesto parché el savea che quasi tute le persone in Gerusalen no le ndaria scoltarlo. Alora, Gesù el ga dito che Gerusalen la saria destruta e che arquanti giudei i saria menadi come schiavi. (Luc. 21:20-24) E questo el ga pròpio sucedesto parché lori no i lo ga scoltà. Fursi nel posto che te sì de star, le persone anca no le vol scoltar le bone notìssie. Se questo l’è drio suceder con ti, varda tre robe che te pol imparar col esémpio de Gesù.

12. Gesù el ga piandesto par causa dele persone de Gerusalen. Cossa che questo ne insegna sora Geovà?

¹²Geovà el se preocupa cole persone. Capimo questo parché Gesù el ga piandesto  quando le persone in Gerusalen no le ga volesto scoltarlo. Par quela che la Bìblia la dise: ‘Geovà no’l vol che gnanca un el sìpia destruto, ma el vol che tuti i se ciame grami.’ (2 Pie. 3:9) Anca noantri mostremo che se preocupemo e che amemo le persone quando le giutemo a imparar sora le bone notìssie. — Mat. 22:39. *

13-14. (a) Come Gesù el ga mostrà che el amea le persone e che le ghe fea pecà? (b) Come podemo far compagno a Gesù?

¹³Gesù el fea el meio che el podea nela predicassion. Gesù el amea le persone e lore le ghe fea pecà. Par quela che lu el predichea a tute lore. (Luc. 19:47, 48) Par esémpio, dele volte Gesù e i so dissìpoli no i gavea gnanca tempo par magnar parché le persone le volea scoltar le parole de Gesù. (Mar. 3:20) E quando un omo el ga domandà che Gesù ghe insegnesse de note, Gesù lo ga fato. (Gioani 3:1, 2) L’è vera che quasi tute le persone no le ze ndate drio a Gesù, ma tute lore le ga podesto scoltar le bone notìssie. Anca noantri ghemo caro che tute le persone le scolte le bone notìssie. (Ati 10:42) Sarà che podemo cambiar qualcossa par esser boni de parlar con de pi persone nela predicassion?

¹⁴Ghemo de predicar nele ore che l’è pi fàcile catar le persone. Varda quel che Matilda, che la ze pioniera la ga dito: “Mi e me omo predichemo in arquante ore difarente. De matina bonora, predichemo nel comèrsio, de mesdì, doperemo el careto parché ghen’è tante persone par la strada, e de sera, predichemo de casa in casa.” Alora invesse de predicar sempre nela medèsima o nela meio ora par noantri, ghemo de farlo quando saremo boni de catar de pi persone. Se femo questo, sarà pi fàcile catar quei che i vol imparar sora la Bìblia. Cossita, assaremo Geovà tanto contento.

15. De acordo con Luca 22:39-44, cossa ga sucedesto con Gesù nela note de 14 de nisan del ano 33?

¹⁵ Nela note del 14 de nisan del ano 33, Gesù l’è ndato fin el giardin de Getsémani e el ga parlà tuto quel che l’era drio  sentir a Geovà. (Ledi Luca 22:39-44. *) Intanto che el preghea, el suplichea a Geovà e el piandea. (Ebr. 5:7) Cossa Gesù el ga domandà a Geovà nela note vanti de morir? Lu el ga domandà che Geovà lo giutesse a gaver la forsa par esser obediente e par seitar leal. Geovà el ga scoltà a Gesù e el ga mandà un àngelo par darghe forsa.

16. Parché che Gesù l’era tanto preocupà nel giardin de Getsémani?

¹⁶ Gesù el ga piandesto nel giardin de Getsémani parché l’era tanto preocupà. Lu el savea che arquanti i ndaria dir che lu no’l gavea mostrà rispeto par Dio o par so nome. Lu anca el savea che el gavea de seitar leal e giutar a provar che Geovà l’è el meio governante. Fursi anca ti te sì drio infrontar una bruta dificoltà che te toca sforsarte tanto par seitar leal a Geovà. Se questo l’è drio suceder con ti, varda tre robe che te pol imparar col esémpio de Gesù.

17. Geovà el ga scoltà quando Gesù el ga pregà a lu. Cossa che imparemo de questo?

¹⁷Geovà el ne scolta quando preghemo. Parché che Geovà el ga scoltà quando Gesù el ga pregà a lu? Parché la roba pi importante par Gesù la era seitar leal a Geovà e mostrar che le robe rugne che le persone le parlea sora so Pare no le era vere. Se questa la ze la roba pi importante anca par noantri, Geovà el ndarà scoltarne quando ghe domandemo aiuto. — Sal. 145:18, 19.

18. Parché che Gesù l’è come un amigo?

¹⁸Gesù el ne capisse tanto ben. Quando semo drio infrontar una dificoltà, l’è tanto bon parlar con un amigo che el ne capisse o che el ga belche infrontà la medèsima roba. Gesù l’è come questo amigo parché el sa come l’è sentirse sensa forsa e gaver bisogno del aiuto dei altri. Alora, lu el capisse quel che infrontemo e el ndarà far tuto quel che el pol par giutarne nela ora giusta. (Ebr. 4:15, 16) Quando Gesù l’era nel giardin de Getsémani, Geovà el ga mandà un àngelo  par giutarlo e Gesù l’è restà contento col so aiuto. Cossa che imparemo? Ghemo de acetar el aiuto che Geovà el ne dà. Par esémpio, lu el pol giutarne par meso de una publicassion, de un vìdeo, de un discorso, de un ansiano o de un amigo.

19. Cossa pol giutarne a infrontar le dificoltà? Parla de un esémpio.

¹⁹Dio el te darà la so pace. Questa pace la ze pi granda de quel che podemo capir e la ne giuta a infrontar le dificoltà. Come che femo par gaverla? Ghemo de pregar a Dio. (Fil. 4:6, 7) Cossita, saremo boni de restar pi tranquili e tornar a pensar dela maniera giusta. La sorela Luz la ga sentio pròpio questo. Ela la ga dito: “Mi sofro parché me sinto tanto sola. Dele volte, mi resto tanto desanimada che penso che Geovà gnanca el me ama. Quando questo sucede, suito mi prego a Geovà e ghe parlo quel che son drio sentir. Pregar a Geovà me giuta tanto a sentirme meio.” El esémpio dela sorela Luz el ne giuta a capir che, quando preghemo a Dio, sentimo la so pace.

20. Ghemo studià sora tre volte che Gesù el ga piandesto. Cossa che ghemo imparà de lore?

²⁰ Ghemo imparà arquante robe de queste tre volte che Gesù el ga piandesto. Ghemo visto come che podemo giutar una persona che la ze drio sofrir par causa dela morte de qualchedun e che Geovà e Gesù i ndarà giutarne se questo sucede con noantri. Ghemo anca imparà come mostrar amor ale persone nela predicassion col esémpio de Geovà e Gesù. Questo stùdio anca el ne ga ricordà che Geovà e Gesù i capisse quel che sentimo e quel che infrontemo, e i vol giutarne. Ricordarse de questo ne ga dato tanto consolo. Alora volemo seitar a far quel che ghemo imparà in questo stùdio fin el giorno che Geovà el ndarà finir con tute le robe rugne che ne fà piander. — Apo. 21:4.