1. Come podemo doperar el nostro tempo par star insieme con Geovà?

TUTI noantri restemo contenti de star insieme de quei che amemo. Par esémpio, quei che i ze maridadi i ghe piase de star insieme, i gióveni i resta contenti de star insieme coi so amighi e tuti noantri ghemo caro de star insieme coi fradei dela congregassion. Ma ne piase ancora de pi doperar el nostro tempo par star insieme con Geovà. Come che femo questo? Quando preghemo a Geovà, ledemo la Bìblia e pensemo nele so promesse e nele so bele qualità. Sicuro che questo tempo el ga tanto valor par noantri! — Sal. 139:17.

2. Parché pol esser fadiga star insieme con Geovà?

² Noantri restemo contenti de doperar el nostro tempo par star insieme con Geovà, o sia, pregar, studiar e pensarghe sora. Ma dele volte, no l’è fàcile far questo parché ghemo tanti laori de far. Par esémpio, ghemo de laorar, tender dela nostra fameia e far tanti altri mestieri.

3. Cossa che pol intrigarne de far pi forte la nostra amicìssia con Geovà?

³ Ghemo anca de star atenti col tempo che doperemo par far altre robe. Pol esser che queste robe no le sìpia sbaliade. Ma se doperemo massa del nostro tempo par farle, no saremo boni de far pi forte la nostra amicìssia con Geovà. Par esémpio, l’è bon riposar o far robe che ne piase. Ma se doperemo massa del nostro tempo par farle, restaremo sensa tempo par adorar a Geovà. Alora, ghemo  de ricordarse che la nostra amicìssia con Geovà la ze la roba pi importante. — Pro. 25:27; 1 Tim. 4:8.

4. Cossa ndaremo veder in questo stùdio?

⁴ In questo stùdio, ndaremo veder parché che ghemo de dessider quel che l’è pi importante nela nostra vita. Ndaremo anca veder la meio maniera de doperar el nostro tempo con Geovà e parché che ghemo de far questo.

5. Come Efesi 5:15-17 pol giutar i gióveni a doperar ben la so vita?

⁵Dopera ben la to vita. Quasi tuti i gióveni i resta preocupadi sora cossa i ndarà far nela so vita. Pol esser che i so maestri e persone dela so fameia che no i serve a Geovà i ghe dise che i ga de far una università par gaver un bel laoro. Sicuro che ghe vol tanto tempo par far una università. Ma pol esser che i so genitori e i amighi nela congregassion li incoraie a doperar la so vita par far de pi par Geovà. Cossa pol giutar un gióveno che el ama a Geovà a far la meio scólia? Lu el pol leder Efesi 5:15-17. (Ledi. *) Dopo, el pol domandarse: ‘Cossa che Geovà el pensa che l’è meio par mi? Cossa ndarà assar Geovà contento? Che scólia ndarà giutarme a doperar ben el me tempo?’ I gióveni i ga de ricordarse che, come el testo de Efesi el dise, i giorni i ze rugni e che el governo de Sàtana suito el ndarà finirse. Par quela che la meio scólia la ze far quel che ghe piase a Geovà.

6. (a) Cossa Maria la ga scoliesto far? (b) Parché podemo dir che la ga fato la meio scólia?

⁶Ghemo de scòlier quel che l’è pi importante. Metemo dir che ghemo due robe che ne piaseria far e tute due le ze giuste. Ma come ghemo tempo par far sol una, ghemo de scòlier far quela che la ze pi importante. Varda quel che ga sucedesto quando Gesù l’è ndato visitar Marta e Maria. Marta la era tanto contenta e la volea far un bel magnar. Ma so sorela, Maria, la se ga sentà do ai pié de Gesù par scoltar quel che el ndaria insegnar. Marta la volea far una bela roba, ma Maria la ga scoliesto far la roba pi importante. (Luc. 10:38-42) Parché? Dopo de un tempo, Maria fursi la se ga desmentegà de quel che la ga magnà, ma sicuro che mai la se ga desmentegà de quel che la ga imparà de Gesù. Maria la ghe dea tanto valor al tempo che la podea star insieme a Gesù. Anca noantri ghe demo tanto valor al tempo che ghemo par pregar a Geovà, studiar e pensarghe sora quel che imparemo de lu. Come che podemo doperar ben questo tempo?

7. Parché che ghemo de pregar, studiar e pensarghe sora?

⁷Ricòrdate che par adorar a Geovà te ghè anca de pregar, studiar e pensarghe sora. Quando preghemo, parlemo col nostro Pare, che el ne ama tanto. (Sal. 5:7) Quando studiemo la Bìblia, imparemo de pi sora Dio, che l’è la persona che la ga de pi sabedoria. (Pro. 2:1-5) Quando pensemo sora, imparemo ancora de pi sora le bele qualità de Geovà e sora le so promesse par el futuro. L’è tanto bon che doperemo del nostro tempo par far  queste robe. Ma fursi l’è fadiga farle ben parché ghemo tanti laori de far. Alora, come che podemo doperar ben el tempo che ghemo par pregar, studiar e pensarghe sora?

8. (a) Cossa Gesù el ga fato nel deserto? (b) Cossa che imparemo col esémpio de Gesù?

⁸Proa catar un posto tranquilo. L’è stà questo che Gesù el ga fato vanti de scominsiar a predicar. Lu l’è ndato al deserto e l’è restà là 40 giorni. (Luc. 4:1, 2) In quel posto tranquilo, lu l’è stà bon de pregar e pensar in quel che Geovà el volea che el fesse. Sicuro che questo ga dato forsa a Gesù par infrontar quel che ndaria suito suceder. Cossa che podemo imparar del esémpio de Gesù? Proa catar un posto tranquilo par pregar a Geovà. Se te ghè una fameia granda e no ghen’è un posto cossita rento casa, te pol ndar nte un posto che sìpia tranquilo. Varda el esémpio dela sorela Julie, che la ze de star nela Frància. Come no la ze bona de catar un posto tranquilo rento casa, la va caminar tuti i giorni nte una piassa. Cossita, la ze bona de restar ela sola e parlar con Geovà.

9. Come Gesù el ga mostrà che el ghe dea tanto valor ala so amicìssia con Geovà?

⁹ Gesù el laorea tanto e le persone le seitea a ndar drio a lu parché le volea scoltarlo. Anca cossita, lu el tolea el tempo par parlar con Geovà. Par esémpio, quando tute le persone de una cità le era drio spetar par scoltarlo, Gesù l’è ndato fin nantro posto par restar lu sol e pregar a Geovà. — Mar. 1:32-35.

10-11. (a) Cossa che Gesù el ga parlà ai apòstoli in Mateo 26:40, 41? (b) Cossa che ga sucedesto?

¹⁰ Nela note vanti de morir, Gesù l’è ndato fin el giardin de Getsémani, che l’era un posto tanto tranquilo. Lu el ga fato questo par pregar a Geovà e pensarghe sora. (Mat. 26:36) In quela note, Gesù el ga anca parlà una roba tanto importante sora pregar ai so dissìpoli.

¹¹ Pensa in quel che ga sucedesto nel giardin de Getsémani. Quando Gesù e i so dissìpoli i ze rivadi nel giardin, fursi l’era de pi de mesa note. Par quela, Gesù el ga dito che lori i gavea de star atenti, e l’è ndato pregar. (Mat. 26:37-39) Ma quando lu l’è tornà, i apòstoli i era drio dormir. Alora, lu el ghe ga dito nantra volta: ‘Seité a star atenti e seité a pregar.’ (Ledi Mateo 26:40, 41. *) Gesù l’è stà bondoso parché el savea che i era  strachi, tanto preocupadi e che “la carne la ze fiaca”. Ma cossa ga sucedesto dopo? Gesù l’è ndato pregar ancora due volte, e quando l’è tornà lori i era drio dormir. — Mat. 26:42-45.

12. Cossa te pol far se te te senti straco o massa preocupà par pregar?

¹²Scoli la ora giusta. Dele volte, se sentimo strachi o massa preocupadi che pensemo che no semo gnanca boni de pregar a Geovà. Se questo sucede con ti, cossa te pol far? Se sempre te preghi vanti de dormir, proa pregar un pochetin pi bonora. Cossita, te sarè manco straco. O fursi te pol indenociarte o sentarte do par pregar. Ma cossa te pol far se te sì massa preocupà e desanimà che te pensi che no te sì bon de pregar a Geovà? Parla a Geovà quel che te senti. L’è sicuro che Geovà, che l’è misericordioso, el ndarà capirte. — Sal. 139:4.

13. Come el telèfono o altre robe eletróniche pol intrigarne quando preghemo, studiemo o ndemo ale riunion?

¹³Quando te sì drio studiar, no stà assar che altre robe le te intrighe. Studiar la Bìblia e ndar ale riunion ndarà giutarte a far pi forte la to amicìssia con Geovà. Alora come che te pol doperar ben el tempo che te ghè par far queste robe? Domàndate: ‘Cossa me intriga quando son drio studiar o vardar le riunion?’ Fursi te te nicordi che l’è meio assar el telèfono altre robe eletróniche de una maniera che no i sone. Par quela che nele assemblee e congressi semo sempre ricordadi a far questo. Cossita, no intrighemo ai altri e gnanca a noantri. Alora, se qualchedun el te ciama par telèfono, el te manda messagi o un e-mail, questo no ndarà intrigarte. L’è vera che tute queste robe le ne giuta tanto, ma arquanti studiosi i ga dito che quando ghemo un telèfono darente, no semo boni de star pròpio atenti a quel che semo drio far. Par esémpio, un maestro el ga dito che no semo boni de star pròpio atenti a quel che semo drio far e l’è come se fùssino in nantro posto.

14. De acordo con Filipensi 4:6, 7, cossa pol giutarne a star atenti quando semo drio studiar?

¹⁴Domanda a Geovà che el te giute a star pròpio atento a quel che te sì drio studiar. L’è tanto importante star atenti  quando semo drio imparar sora Geovà. Ma pol esser che se sentimo desanimadi, ansiosi, o fin pensemo in altre robe intanto che semo drio studiar o semo nele riunion. Se questo sucede con ti, cossa te pol far? Prega a Geovà e domàndaghe che el te dae la so pace. Alora, la pace de Dio la ndarà proteger ‘el to cuor e la to mente’. — Ledi Filipensi 4:6, 7. *

15. Parché che l’è importante tor del nostro tempo par parlar con Geovà, studiar e pensarghe sora?

¹⁵ L’è tanto importante tor del nostro tempo par parlar con Geovà, studiar la Bìblia e pensarghe sora. Parché? Prima, parché saremo boni de far le meio dessision e assar Geovà contento. La Bìblia la dise che se stemo insieme con quei che i ga sabedoria, anca noantri la gavaremo. (Pro. 13:20) Alora, se te doperi el to tempo par star insieme con Geovà, che l’è la persona che la ga de pi sabedoria, anca ti te la gavarè.

16. Parché che pregar, studiar e pensarghe sora ne giuta a insegnar meio i altri?

¹⁶ Secondo, te ndarè insegnar cada volta meio. Quando preghemo a Geovà, studiemo e pensemo sora, lo amemo cada volta de pi. Cossita, semo boni de giutar anca un studiante a amar a Geovà. Gesù l’è stà bon de farlo quando el insegnea le persone sora Geovà. Lu el parlea con tanto amor sora so Pare che anca i so dissìpoli i ga volesto amar a Geovà. — Gioani 17:25, 26.

17. Parché che pregar a Geovà e studiar fà pi forte la nostra fede?

¹⁷ Terso, la to fede la restarà pi forte. Tute le volte che Geovà el te risponde quando te ghe domandi aiuto e consolo, la to fede la resta pi forte. (1 Gio. 5:15) Nantra roba che la ndarà giutarte a far pi forte la to fede l’è studiar la Bìblia. La Bìblia la dise che quando la studiemo, femo pi forte la nostra fede. (Rom. 10:17) Ma ghemo de far de pi che sol studiar par gaver una fede pi forte. Che nantra roba ghemo de far?

18. Come el Salmo 77 el mostra che l’è tanto importante pensarghe sora?

¹⁸ Ghemo de pensarghe sora quel che imparemo sora Geovà. Varda quel che ga sucedesto col scritor del Salmo 77. Lu l’è restà tanto preocupà parché el pensea che Geovà no’l volea pi che i israeliti i fusse el so pòpolo. Par causa de questo, no l’era gnanca bon de dormir. (Versìcoli 2-8) L’è vera che el savea cossa Geovà  el gavea belche fato par el so pòpolo, ma anca cossita, lu el ga dito: ‘Te te ghè desmentegà de giutarne o sarà che te te sì fermà de mostrar misericòrdia parché te sì restà cativo?’. (Versìcolo 9) Cossa che el ga fato dopo de questo? Lu el ga dito che el ndaria pensarghe sora tuto quel che Geovà el gavea belche fato. (Versìcolo 12) Alora, lu el ga pensà sora questo e sora la misericòrdia che Geovà el gavea belche mostrà al so pòpolo. (Versìcolo 11) Come questo lo ga giutà? Pensarghe sora lo ga assà sicuro che Geovà mai el ndaria abandonar el so pòpolo. (Versìcolo 15) Se anca ti te pensi sora quel che Geovà el ga belche fato par el so pòpolo e par ti, te ndarè far pi forte la to fede.

19. Cossa ndarà suceder se preghemo, studiemo e pensemo sora?

¹⁹ Quarto, noantri ndaremo amar cada volta de pi a Geovà. Cossita, voleremo obedirghe, seitar a far quel che l’è giusto e far quel che ghe piase anca quando no l’è fàcile. (Mat. 22:37-39; 1 Cor. 13:4, 7; 1 Gio. 5:3) El nostro amor par Geovà e la nostra amicìssia con lu le ze le robe pi importante par noantri. — Sal. 63:1-8.

20. Cossa te vol far par doperar ben el tempo che te sì drio pregar, studiar e pensarghe sora?

²⁰ Ricòrdate che quando te preghi, te studi e te pensi sora, te sì drio adorar a Geovà. Alora, fà come Gesù e proa catar un posto tranquilo par far queste robe. Intanto che te le fè, sfòrsate de star pròpio atento e domàndaghe a Geovà che el te giute a far questo. Se te doperi el to tempo dela meio maniera che ghen’è, Geovà el te darà la vita eterna in Paradiso. — Mar. 4:24.