1. Cossa che Davi l’era drio infrontar?

DAVI l’era drio scampar via de Saul. Saul, el rè de Israel, el volea copar Davi. Nela cità de Nobe, Davi el ga domandà che el sasserdote Aimeleche el ghe desse sinque pan a lu. Cossita, lu e i so òmini i gavaria qualcossa de magnar. (1 Sam. 21:1, 3) Davi e i so òmini anca i ga bio de sconderse rento una caverna. (1 Sam. 22:1) Parché che Davi l’era drio infrontar quela dificoltà?

2. Che robe Saul el ga fato? (1 Samuel 23:16, 17)

² Saul el gavea tanta invìdia parché Davi el gavea vinsesto arquante guere e parché le persone le ghe volea tanto ben. Lu el gavea desobedio a Geovà. Par causa de questo, Geovà no’l volea pi che Saul el fusse rè de Israel e el ga scoliesto Davi par esser el pròssimo rè. (Ledi 1 Samuel 23:16, 17. *) Parché Davi el gavea de scampar via? Parché Saul el gavea un grando esèrsito e el aiuto de tante persone. Ma sarà che Saul el pensea che el podaria intrigar Geovà e no assar che Davi el fusse el pròssimo rè? (Isa. 55:11) La Bìblia no la risponde mia a questa domanda. Ma podemo esser sicuri che gnanca un rè e gnanca qualche altra persona la saria bona de vinser a Geovà.

3. Anca che Davi el fusse drio sofrir, cossa che lu no’l ga fato?

³ Davi l’era una persona ùmile. L’è stà Geovà che lo ga scoliesto par esser rè de Israel. (1 Sam. 16:1, 12, 13) Ma Saul lo odiea tanto. Sarà che Davi el ga dato la colpa a Geovà par  causa de quel che lu l’era drio patir? Sarà che lu el ga sbrontolà parché ghe ga mancà de magnar o parché ghe ga tocà sconderse nte una caverna? Nò, lu no’l ga mia fato questo. Fursi l’è stà in quel tempo che Davi el ga scrito le parole del testo de questo ano: “No ghe mancarà gnente de bon a quei che i se fida in Geovà.” — Sal. 34:10.

4. Che domande ndaremo risponder in questo studio, e parché che l’è importante pensar sora lore?

⁴ Dele volte, tanti servi de Geovà no i ga tanto de magnar o quel che ghe ocore par viver. * Par causa dela pandemia dela COVID-19, le robe le ze restade ancora pedo. Ghemo anca de ricordarse che come semo cada volta pi darente dela granda tribolassion, ndaremo tribolar cada volta de pi. (Mat. 24:21) Cossa pol giutarne a infrontar tute queste robe? Pensar nele risposte a queste domande: ‘Parché che podemo dir che ‘no ghe ga mancà gnente de bon a Davi’? Parché che ghemo de imparar a restar contenti con quel che ghemo? Parché che podemo fidarse che Geovà el ndarà tender de noantri? E come podemo pareciarse par infrontar le robe che le ndarà suceder nel futuro?’ Vedemo le risposte a queste domande.

5-6. Come che el Salmo 23 el ne giuta a capir le parole del testo de questo ano?

⁵ Davi el ga dito che no ghe mancarà gnente de bon a quei che i serve a Geovà. Lu el ga dito la medèsima roba nel Salmo 23. Alora, pensarghe sora questo Salmo ndarà giutarne a capir el Salmo 34. (Ledi Salmo 23:1-6. *) Nel Salmo 23, Davi el ga  dito: “Geovà l’è el me Pastor. No me mancarà gnente.” Dopo, Davi el ga parlà de arquante bele robe che ghe sucedea parché Geovà l’era el so Pastor. Par esémpio, anca che dele volte, Davi el restesse desanimà, lu el savea che Geovà l’era sempre con lu e che sempre lo giutea a far quel che l’è giusto. Davi el pensea che servir a Geovà l’era come butarse do nte un bel prà. Anca se Davi el savesse che el ndaria infrontar problemi e che el gavaria nemighi, lu el savea che Geovà l’era el so Pastor e che no ghe tochea gaver paura.

⁶ Alora, parché che podemo dir che ‘no ghe ga mancà gnente de bon a Davi’? Parché Davi el gavea tuto quel che ghe ocorea par esser amigo de Geovà. Lu no’l gavea bisogno de tante robe par esser contento. Le benedission e la protession de Geovà le era le robe pi importante par Davi e quel che lo assea contento.

7. De acordo con Luca 21:20-24, cossa che i giudei i ga bio de far?

⁷ Come ghemo visto, Davi el ga dito che Geovà l’è el nostro Pastor e gnente ne mancarà. L’è vera che no l’è sbalià gaver soldi e altre robe, ma no ghemo de meterli in primo posto nela nostra vita. Arquanti giudei i ga visto che l’è tanto importante far questo. (Ledi Luca 21:20-24. *) Parché? Parché Gesù el gavea dito che quando lori i vedesse i esèrsiti acampadi intorno de Gerusalen, i ghe tocaria scampar par i monti. Anca che i gavesse de assar indrio tante robe, lori i ndaria salvar la so vita. Arquanti ani indrio, La Sentinela la ga dito sora questi giudei: “Lori i ga bio de abandonar le so case, le so tere e le robe che i gavea, ma adorar a Geovà l’era la roba pi importante par lori. Par quela che i se ga fidà in Geovà e nela so protession.”

8. Cossa che imparemo dei giudei del primo sècolo?

⁸ Cossa che podemo imparar de quel che ga sucedesto con questi giudei? Varda cossa che La Sentinela anca la ga dito: “Nel futuro, pol esser che infrontaremo dificoltà che ne tocarà scòlier se la roba pi importante la ze la nostra salvassion o le robe e i soldi. Quando rivarà el fin, ndaremo infrontar arquante dificoltà e ne tocarà assar tante robe indrio. Alora, ghemo de far compagno ai giudei del primo sècolo e far tuto quel che ghe vol par seitar a esser leai.” *

9. De acordo con Ebrei 13:5, 6 de cossa podemo esser sicuri?

⁹ Sicuro che no l’è stà fàcile par questi giudei scominsiar la so vita in nantro posto sensa gaver gnente. Ma cossa che li ga giutà? La fede che Geovà el ndaria darghe quel che i gavea de bisogno. Nantra roba che li ga giutà l’è stà el consìlio che Paulo el ga dato ai ebrei sinque ani vanti. Lu el ga dito: “Che la vostra maniera de viver la mostre che no amé mia i soldi. Sté contenti cole robe che valtri gavé. Parché lu el ga dito: ‘Mi mai vao assarte e mai vao abandonarte.’ Cossita, podemo parlar con tuto el coraio: ‘Geovà l’è quel che  me giuta, no gavarò mia paura. Cossa che pol farme i òmini?’” (Ebr. 13:5, 6) Questo consìlio li ga giutà a viver con ben manco robe e a esser sicuri che Geovà sempre el ndaria tenderli. E le parole de Paulo le assa anca noantri sicuri che Geovà sempre el ne darà quel che ghemo de bisogno.

10. De acordo con quel che Paulo el ga dito, cossa che ndarà assarne felici?

¹⁰ El apòstolo Paolo el ga dito a Timòteo: “Alora, se ghemo de magnar e robe de vestir, semo contenti con queste robe.” (1 Tim. 6:8) Anca noantri ghemo de meter in pràtica questo consìlio. Ma sarà che questo vol dir che no podemo magnar qualcossa che ne piase, gaver bele robe de meter su o una bela casa? Nò. Invesse, Paolo el volea dir che sol saremo felici se semo contenti con quel che ghemo, sìpia tanto o poco. (Fil. 4:12) Ghemo sempre de ricordarse che la roba pi importante la ze la nostra amicìssia con Geovà e nò le robe che ghemo. — Aba. 3:17, 18.

11. Cossa che imparemo de quel che Moisè el ga dito?

¹¹ Pol esser che pensemo che ghemo tanto de bisogno de una roba. Ma sarà che anca Geovà el pensa che ghemo de bisogno? Noantri podemo imparar tanto con quel che Moisè el ga dito ai israeliti dopo de 40 ani nel deserto. Lu el ga dito: “Geovà, el to Dio, el te ga benedio in tuto quel che te ghè fato. Lu el sà pròpio ben  del to viaio par questo grando deserto. Geovà, el to Dio, l’è sempre stà con ti in tuti questi 40 ani, e no te ga mancà gnente.” (Deu. 2:7) Geovà el ga tendesto dei israeliti in tuto quel tempo. Par esémpio, lu el ghe ga dato de magnar e le so robe no le ze restade vècie. (Deu. 8:3, 4) Fursi arquanti no i era mia contenti con queste robe, ma Moisè el ghe ga dito che i gavea tuto quel che ghe ocorea. Alora, cossa che imparemo? Ghemo de restar contenti cole robe che ghemo. Ghemo anca de dar valor ale robe pi pìcole e ricordarse sempre che l’è stà Geovà darne tuto quel che ghemo. Cossita, assaremo el nostro Dio contento.

12. Come Davi el ga mostrà che el se fidea in Geovà e nò in lu stesso?

¹² Davi el se fidea del tuto in Geovà. Lu l’era sicuro che Geovà l’è leal e che el ndarà sempre tender de quei che i lo ama. Quando Davi el ga infrontà una dificoltà, lu el ga dito che un àngelo de Geovà l’era de star intorno de lu. (Sal. 34:7) Quando Davi el ga scrito questo Salmo, fursi l’è vegnesto in mente un soldà che l’è sempre parecià par proteger qualchedun dei so nemighi. Davi l’era sicuro che el àngelo sempre el ndaria tender de quei che i serve a Geovà. Davi l’era un omo coraioso e anca el savea che el saria el pròssimo rè. Ma lu el se fidea in Geovà e nò nele so abilità de doperar la fionda o la spada par copar i nemighi. (1 Sam. 16:13; 24:12) Ancoi, no spetemo che Geovà el fae miràcoli par protegerne. Anca cossita, se fidemo del tuto in Geovà e semo sicuri che, anca se morimo, lu el pol farne tornar a viver e darne la vita eterna.

13. (a) Parché Goghe de Magoghe ndarà pensar che semo sensa protession? (b) Parché che no ne ocore gaver paura? (Varda la ilustrassion dela prima pàgina.)

¹³ Noantri gavaremo de fidarse del tuto in Geovà quando Goghe de Magoghe, che sarà un grupo de nassion, volerà finir col pòpolo de Dio. Pol esser che lore le ndarà pensar che semo come le piégore sensa protession. (Eze. 38:10-12) Lore le ndarà pensar questo parché no savemo lotar, gnanca doperemo arme. Fursi anca noantri ndaremo pensar che no ghemo protession. Ma ghemo de esser sicuri che Geovà el pol e el ndarà protegerne. Sol noantri saremo boni de veder che ghen’è miliari de àngeli intorno de noantri par protegerne. Proa imaginar quel che le nassion le ndarà pensar quando i àngeli i ndarà protegerne! — Apo. 19:11, 14, 15.

14. Cossa che ghemo de far par pareciarse par quel che ndaremo infrontar?

¹⁴ Cossa che ghemo de far par pareciarse par quel che ndaremo infrontar? Ghemo de ricordarse sempre che la roba pi importante nela nostra vita la ze la nostra amicìssia con Geovà. Ne toca esser contenti con quel che ghemo. No volemo mai dar massa valor ai soldi e ale altre robe, parché gavaremo de assarli indrio. Cossita, saremo ancora de pi sicuri che Geovà el ndarà protegerne quando Goghe de Magoghe la volerà finir fora col pòpolo de Dio.

15. Parché che Davi l’era sicuro che el podea fidarse in Geovà?

¹⁵ Nantra roba che ga giutà Davi a infrontar le dificoltà l’è stà quel che l’è scrito nel Salmo 34:8. Questo testo el dise: “Proé e vedé che Geovà l’è bon. Felice l’è el omo che el va in serca de lu par gaver protession.” Le parole de Davi le mostra che lu  l’era sicuro che el podea fidarse in Geovà. Lu el ga fato questo e Geovà mai lo ga abandonà. Par esémpio, quando Davi el ndaria lotar contra Golia, lu el ga dito che Geovà el ndaria giutarlo a copar quel nemigo. (1 Sam. 17:46) Dopo, Davi el ga dito che Geovà l’era con lu quando Saul el volea coparlo. (1 Sam. 18:12) Davi el savea che Geovà sempre el ndaria giutarlo a infrontar le dificoltà, e anca noantri podemo esser sicuri de questo.

16. Quando che podarìssino proar e veder che Geovà l’è bon?

¹⁶ Se imparemo a fidarse in Geovà del tuto adesso, saremo sicuri che el ndarà tender de noantri anca nel futuro. Podemo mostrar che se fidemo in Geovà ancoi de arquante maniere. Par esémpio, quando domandemo al nostro paron un giorno par ndar a una assemblea o a un congresso. Podemo anca mostrar che se fidemo in Geovà quando ghe domandemo par cambiar la ora del nostro laoro par ndar ale riunion e ala predicassion. Ma metemo dir che el paron no l’è de acordo con quel che ghemo domandà a lu e el ne mande via del laoro. Sarà che gavaremo fede in Geovà e ndaremo fidarse che lu ndarà tender de tuto quel che ghemo de bisogno? (Ebr. 13:5) Tanti de quei che i dopera la so vita par far de pi nel laoro a Geovà i parla che Geovà el ga sempre tendesto de lori.

17. Che testo l’è stà scoliesto par el ano de 2022, e parché?

¹⁷ Se la nostra amicìssia con Geovà la ze la roba pi importante nela vita, lu no’l ndarà mai abandonarne. Alora, no ne ocore gaver paura de quel che ndarà suceder nel futuro. Par ricordarne sempre de questo e par pareciarne par quel che ndarà suceder nel futuro, el Corpo Governante el ga scoliesto el Salmo 34:10 come el testo del ano de 2022. Questo testo el dise: “No ghe mancarà gnente de bon a quei che i se fida in Geovà.”