1-2. (a) Come che fursi se sentimo quando pensemo in quel che Gesù el ga fato? (b) Cossa che ndaremo imparar in questo stùdio?

 NOANTRI sofrimo tanto quando more qualchedun che amemo. De scomìnsio, pol esser che se sentimo tanto disgustadi quando pensemo in quel che ga sucedesto, ancora de pi se la persona la ga sofrio vanti de morir. Magari, col tempo, pol esser che restemo contenti nantra volta quando se ricordemo de qualcossa che ela la ga fato, de quel che la ne ga insegnà o de una roba che la ga dito par incoraiarne.

² Fursi se sentimo pròpio cossita nela època dela Selebrassion, parché pensemo ancora de pi nela morte de Gesù. Pol esser che se sentimo disgustadi quando pensemo come Gesù el ga sofrio vanti dela so morte. (1 Cor. 11:24, 25) Ma restemo contenti quando se ricordemo de tuto quel che Gesù el ga insegnà e el ga fato quando l’era qua nela Tera. E quando pensemo sora quel che lu l’è drio far adesso e quel che el ndarà far nel futuro, restemo tanto incoraiadi. In questo stùdio, ndaremo veder come podemo mostrar che ghe demo valor a tuto quel che Gesù el ga fato par noantri e al amor che el ne ga mostrà.

3. Parché che ghe demo valor al sacrifìssio de Gesù?

³ Quando l’era qua nela Tera, Gesù el ga insegnà ale persone sora le benedission che gavaremo par meso del Regno de Dio. E sicuro che ghe demo tanto valor al so sacrifìssio. Par causa del sacrifìssio de Gesù, podemo esser amighi de  lu e del so Pare, Geovà. E quei che i ga fede in Gesù, anca i ga la speransa de viver par sempre e de veder nantra volta quei che i ze morti. (Gioani 5:28, 29; Rom. 6:23) Noantri no meritemo gnanca una de queste benedission e mai saremo boni de pagar tuto quel che Dio e Gesù i ga fato par noantri. (Rom. 5:8, 20, 21) Quando ghe pensemo sora tuto quel che Gesù el ga fato, sicuro che volemo mostrar che ghe demo tanto valor. Ma come che podemo farlo?

4. Come che Maria Madalena la ga mostrà che la ghe dea valor a quel che Gesù el gavea belche fato? (Varda la ilustrassion.)

⁴ Varda quel che ga sucedesto con Maria Madalena. Ela la era drio sofrir tanto parché sete demoni i seitea intrigarla, e fursi la pensea che nissuni i saria boni de giutarla. Alora, pensa come la ze restada contenta quando Gesù el ga parà via quei demoni. Par ringrassiarlo, Maria la ga scominsià a ndar drio a lu e la ga doperà el so tempo, la so forsa e tuto quel che la gavea par giutarlo. (Luc. 8:1-3) Maria fursi no la savea che Gesù el ndaria dar la so vita come sacrifìssio par darne la speransa de viver par sempre. (Gioani 3:16) Ancora cossita, ela la era tanto leal parché la ghe dea valor a tuto quel che Gesù gavea belche fato. Par esémpio, quando Gesù l’era nel pal de tortura, ela la ze restada dela so banda parché la era preocupada con lu e la volea consolar i altri. (Gioani 19:25) Dopo dela morte de Gesù, Maria e altre due done le ze ndate nela so tomba pareciar el corpo de Gesù. (Mar. 16:1, 2) Sicuro che Geovà el ga benedio so la lealtà, parché dopo che Gesù l’è stà ressussità, lu no l’è stà bon de parlar con tuti i so dissìpoli, ma el ga parlà con Maria. — Gioani 20:11-18

5. Come che podemo mostrar che ghe demo valor a quel che Geovà e Gesù i ze belche drio far par noantri?

 ⁵ Anca noantri podemo mostrar che ghe demo tanto valor a tuto quel che Geovà e Gesù i ze belche drio far. Come? Podemo doperar el nostro tempo, la nostra forsa e i nostri soldi par servir a Geovà. Par esémpio, podemo giutar a far su e rangiar i posti ndove adoremo a Dio.

6. Parché che te pol dir che Gesù l’è morto par ti?

⁶ El apòstolo Paolo el savea che Gesù el gavea dato la so vita anca par lu. Par quela, el ga dito: ‘El Fiol de Dio el me ga amà e el ga dato la so vita par mi.’ (Gàl. 2:20) Anca el to amor a Geovà e a Gesù el resta ancora pi forte quando te capissi che Gesù el ga dato la so vita par ti. Par causa del so sacrifìssio, l’è come se Geovà el te gavesse ciamà par esser so amigo. (Gioani 6:44) Proa pensa: Geovà el ga dato la vita de Gesù parché el ga visto qualcossa de bon in ti e el ga volesto esser to amigo! No te resti contento de capir come l’è grando el amor de Geovà e de Gesù par ti? Quando te capissi che lori i te ama tanto, anca ti te li amarè ancora de pi e te volarè mostrarghelo. (1 Gio. 4:10, 19) Ma cossa questo amor el te motivarà a far?

7. De acordo col ritrato de questa pàgina, come che podemo mostrar che amemo a Geovà e a Gesù? (2 Corinti 5:14, 15; 6:1, 2)

⁷ Se amemo a Geovà e a Gesù, volaremo mostrar amor anca ale persone. (Ledi 2 Corinti 5:14, 15; b 6:1, 2. c) Podemo mostrarghe el nostro amor quando predichemo.  Par quela, se sforsemo de parlar con tuti e e li tratemo dela stessa maniera no importa la so rassa o el so paese. E mai femo difarensa se lori i ze siori e studiadi o poareti e sensa stùdio. Femo compagno a Geovà “che el vol che tuti i tipi de persone i sìpie salvi e i gàpie la cognossensa giusta dela verità”. — 1 Tim. 2:4.

8. Come che podemo mostrar che amemo i nostri fradei?

⁸ Se amemo a Geovà e a Gesù, mostraremo amor anca ai nostri fradei. (1 Gio. 4:21) Come che podemo farlo? Quando lori i ze drio infrontar una dificoltà, femo quel che podemo par giutarli. Par esémpio, quando i perde qualchedun che i ama, ghe demo consolo, quando lori i ze maladi, li visitemo, e quando i ze desanimadi, li incoraiemo. (2 Cor. 1:3-7; 1 Tes. 5:11, 14) Anca mostremo che amemo i nostri fradei quando preghemo par lori, sicuri che la nostra orassion la pol giutarli. — Tia. 5:16.

9. Che nantra roba podemo far par mostrar che amemo i nostri fradei e sorele?

⁹ Noantri anca podemo mostrar che amemo i nostri fradei e sorele se proemo star in pace con lori. Ghemo de far compagno al esémpio de Geovà, parché lu el perdona le persone. Varda sol: Geovà el ga dato la vita del so Fiol par perdonar i to pecati. Alora, sarà che ti no te gavarissi de perdonar qualchedun che el te ga disgustà? Sicuro che no volemo mia far compagno al esémpio de quel schiavo rugno dela stòria che Gesù el ga contà. Ancora che el so paron el gavesse perdonà el grando dèbito che lu el gavea, quel schiavo rugno no’l ga mia perdonà el pìcolo dèbito de nantro schiavo. (Mat. 18:23-35) Alora, se te ghè bio un problema con un fradel, va ti parlar con lu par far la pace vanti dela Selebrassion. (Mat. 5:23, 24) Se te fè cossita, te mostri che te ghè tanto amor par Geovà e par Gesù.

10-11. Come che i ansiani i mostra che i ama a Geovà e a Gesù? (1 Piero 5:1, 2)

¹⁰ E come che i ansiani i pol mostrar che i ama a Geovà e a Gesù? Quel che Gesù el ga domandà a Piero mostra cossa lori i ga de far. Piero el gavea dito tre volte che no’l cognossea a Gesù. Alora, dopo che l’è stà ressussità, Gesù el ghe ga domandà: “Simon, fiol de Gioani, te me ami?” Sicuro che Piero el volea mostrar che el amea tanto al so Signor. Alora, Gesù el ghe ga dito: “Tendi dele me piegorete.” (Gioani 21:15-17) Par tuta la so vita, Piero el ga mostrà che el amea a Gesù parché el ga tendesto dele so piegorete. Dela medèsima maniera, i ansiani i pol mostrar che i ama a Geovà e a Gesù quando i tendi dei so fradei. — Ledi 1 Piero 5:1, 2. d

¹¹ Nele stimane vanti e dopo dela Selebrassion, come che i ansiani i pol mostrar che quel che Gesù el ga dito a Piero l’è importante par lori? I ansiani i pol doperar del so tempo par incoraiar i fradei e giutar quei che i se ga fermà de servir a Geovà a tornar a farlo. (Eze. 34:11, 12) Nantra roba che i pol far l’è ricever ben quei che i ga acetà el convite de vegner ala Selebrassion e incoraiar quei che stùdia la Bìblia. Quel che i ansiani i fà pol giutar queste persone a deventar dissìpoli de Gesù.

12. Parché che quel che Gesù el ga dito ne dà coraio? (Gioani 16:32, 33)

¹² Gesù el ga bio coraio davanti i so nemighi e el ga seità fedele fin la so morte parché el se fidea del tuto in Geovà. Lu el savea che anca i so dissìpoli i ndaria infrontar tante dificoltà. Par quela, el ga domandà che Geovà li giutesse. (Gioani 17:11) E nela note vanti de morir, Gesù el ga dito ai so dissìpoli: “Valtri ndaré tribolar nel mondo, ma coraio! Mi go vinsesto el mondo.” (Ledi Gioani 16:32, 33. e) Parché che quel che Gesù el ga dito ne dà coraio? Parché Geovà el sa tuto e l’è pi poderoso che i nostri nemighi. (1 Gio. 4:4) Alora, semo sicuri che Geovà el ne giutarà a gaver coraio e a dàrghene fora con tute le nostre paure.

13. Come che Giusepe de Arimatea el ga mostrà coraio?

¹³ Varda el esémpio de Giusepe de Arimatea. Le persone lo rispetea tanto parché lu el fea parte del Sinèdrio, che l’era el tribunal pi importante dei giudei. Ma lu el gavea paura che le persone no lo rispetesse pi. Fin Gioani el ga scrito che Giusepe el gavea paura che i giudei i savesse che lu l’era un dissìpolo. (Gioani 19:38) Ma dopo che Gesù l’è morto, Giusepe el ga mostrà coraio. Parché? Parché lu l’è ndato “davanti de Pilato e el ghe ga domandà el corpo de Gesù”. (Mar. 15:42, 43) Cossita, Giusepe el ga assà che le persone le savesse che lu l’era un dissìpolo de Cristo.

14. Cossa che te pol far se te ghè paura?

¹⁴ Compagno Giusepe de Arimatea, gheto belche bio paura dei òmini? Gheto belche sentio vergogna de dir che te sì una Testimònia de Geovà nela scola o nel laoro? Sito drio meterghe tanto par ndar predicar o par batesarte parché te ghè paura de quel che i altri i ndarà pensar? No stà assar che la paura la te intrighe de far quel che te sè che l’è giusto. Alora, se te ghè paura, cossa che pol giutarte? Prega a Geovà, dighe tuto quel che te sì drio sentir e domandeghe che el te dae coraio. Dopo, quando te vedi che Geovà l’è drio risponderte, te gavarè ancora de pi coraio. — Isa. 41:10, 13.

15. Dopo che Gesù el se ga fato veder ai so dissìpoli, cossa che lori i ga seità a far? (Luca 24:52, 53)

¹⁵ Quando Gesù l’è morto, i so dissìpoli i ze restadi tanto disgustadi e desanimadi. Proa imaginar come che i se ga sentio. Lori no i gavea sol perso un caro amigo, ma l’era come se i gavesse perso anca la speransa. (Luc. 24:17-21) Magari, quando Gesù el se ga fato veder a lori, lu li ga giutadi a capir come ga sucedesto tute le professie sora lu e el ghe ga dato un importante laoro de far. (Luc. 24:26, 27, 45-48) Gesù l’è tornà al cielo 40 giorni dopo, ma i so dissìpoli no i era pi desanimadi o disgustadi. Invesse, lori i era pròpio contenti de saver che Gesù l’era vivo e pronto par giutarli a far el laoro che el ghe gavea mandà. Par quela, lori i ga seità a adorar a Geovà tanto contenti. — Ledi Luca 24:52, 53; f Ati 5:42.

16. Cossa che tuti noantri ghemo de far?

¹⁶ Cossa che tuti noantri ghemo de far? Compagno i dissìpoli de Gesù, ghemo de seitar a adorar a Geovà contenti tuto el ano, nò sol nela època dela Selebrassion. Par quela, ghemo de meter el Regno de Dio in primo posto nela nostra vita. Par esémpio, arquanti i ze drio laorar manco par far de pi nela predicassion, ndar ale riunion e far la so adorassion in fameia. Tanti i ga scoliesto viver con manco robe e manco soldi par giutar de pi nela so congregassion o ndove ghen’è bisogno de predicadori. L’è vera che ghemo de sforsarse par seitar a servir a Geovà, ma podemo esser sicuri che lu el ndarà benedirne tanto. — Pro. 10:22; Mat. 6:32, 33.

17. Cossa che te pol scominsiar a far ancora adesso? (Varda el ritrato.)

¹⁷ Semo pròpio premosi par far la Selebrassion nel marti, giorno 4 de april. Ma invesse de spetar fin là, scomìnsia adesso a pensarghe sora tuto quel che Gesù el ga fato e nel amor che lu e so Pare i ga mostrà par ti. Par esémpio, ledi el quadro che ghen’è nela Programassion de april de 2019, pàgina 4, che el spiega cossa ga sucedesto nela ùltima stimana de Gesù qua nela Tera. Intanto che te lo ledi, va in serca de testi dela Bìblia che i farà pi forte el to amor, coraio e alegria, e i te giutarà a darghe de pi valor a quel che Gesù el ga fato. Dopo, proa pensar come che ti te pol ringrassiar a Gesù e a Geovà. Te pol esser sicuro che Gesù el sarà tanto contento de veder che te sì drio ricordarte de lu nela època dela Selebrassion. — Apo. 2:19.