1-2. Parché che noantri ndemo ala Selebrassion tuti i ani?

 QUASI 2 mila ani indrio, Gesù l’è morto par noantri. Par quela, ghemo la speransa de viver par sempre. Nela note vanti de morir, Gesù el ga dito che i so dissìpoli i doperesse el pan e el vin par ricordarse de quel che el ga fato. — 1 Cor. 11:23-26.

² Gesù el ga domandà che i so dissìpoli i se ricordesse dela so morte, e noantri lo obedimo parché lo amemo tanto. (Gioani 14:15) Par quela, nele stimane vanti e dopo dela Selebrassion, se tolemo el tempo par pregar a Geovà e pensarghe sora come la morte de Gesù la pol giutarne. Noantri anca restemo contenti de predicar ancora de pi par convidar le persone par questa riunion tanto importante. Sicuro che volemo far tuto quel che podemo no perder la Selebrassion.

3. Cossa che ndaremo imparar in questo stùdio?

³ I servi de Geovà i se sforsa tanto par far la Selebrassion dela Morte de Cristo tuti i ani. In questo stùdio, ndaremo imparar che (1) lori i fà la Selebrassion compagno Gesù el ga insegnà, (2) i convida altri par ndar a questa riunion tanto importante, e (3) i va ala Selebrassion anca se i infronta dificoltà.

4. (a) Che verità imparemo nela Selebrassion dela morte de Gesù? (Luca 22:19, 20) (b) Parché che ghemo de darghe valor a queste verità?

⁴ Tuti i ani, nela Selebrassion, noantri scoltemo un discorso che el spiega nela Bìblia arquante robe sora la morte de Gesù. Par esémpio, imparemo parché che gaveino bisogno del so sacrifìssio e come che la so morte la pol salvar a tuti. Noantri anca imparemo cossa vol dir el pan e el vin e chi che pol magnarlo e beverlo. (Ledi Luca 22:19, 20. b) E anca imparemo sora le benedission che ghen sarà par quei che i ndarà viver nela Tera par sempre. (Isa. 35: 5, 6; 65:17, 21-23) Parché che ghemo de darghe valor a queste verità? Parché no volemo esser come quele persone che no le capisse, no le ghe dà valor al sacrifìssio de Gesù, gnanca le fà la Selebrassion come lu el ga insegnà. Come cossita?

5. Cossa che ga sucedesto pena dopo che quasi tuti i apòstoli i ze morti?

⁵ Dopo che quasi tuti i apòstoli i ze morti, persone che le fea finta de ndar drio a Cristo le ze ndate rento la congregassion. (Mat. 13:24-27, 37-39) Queste persone le insegnea busie parché le volea che i altri i ghe ndesse drio. (Ati 20:29, 30) Una dele busie la era che el sacrifìssio de Gesù el gavaria de esser fato diverse volte. Ma la Bìblia la dise che el so sacrifìssio l’è stà fato sol una volta par salvar a tanti. (Ebr. 9:27, 28) Ancoi, ghen’è tanti che i crede in queste busie. Lori i va ale ciese tute le stimane, e dele volte, tuti i giorni par far quel che i dise che l’è la Santa Messa. c Altre religion le se ricorda tanto cossita dela morte de Gesù. Ma tanti no i capisse mia cossa che vol dir el so sacrifìssio. Fursi arquanti i se domanda: ‘Sarà che el sacrifìssio de Gesù el pol pròpio pagar i me pecati?’ Pol esser che i se fà questa domanda parché i ga imparà che el sacrifìssio de Gesù no’l basta mia par pagar i so pecati. Come che i dissìpoli de Gesù i ga giutà altri a capir parché che lu l’è morto e quala che la ze la maniera giusta de ricordarse dela so morte?

6. Cossa che un grupo de studianti dela Bìblia i ga capio nel ano 1872?

⁶ Nel ano 1870, Charles Russel e un grupo de studianti dela Bìblia i ga scomìnsia a studiarla tanto. Lori i volea capir la verità sora el sacrifìssio de Gesù e come i gavaria de ricordarse dela so morte. Alora, nel ano 1872, quel grupo de persone el ga capio che la Bìblia la insegna che Gesù l’è morto par salvar a tuti. Lori i ga proà parlar de queste verità a tuti par meso de libri, giornai e reviste. Un tempo dopo, lori i ga scominsià a far la Selebrassion dela Morte de Cristo una volta al ano compagno i primi dissìpoli i fea.

7. Parché che l’è bon saver quel che i studianti dela Bìblia i ga capio?

⁷ Geovà el ga giutà quei studianti dela Bìblia a capir robe tanto importante che le ne giuta fin ancoi. Cossita, semo  boni de capir la verità sora el sacrifìssio de Gesù e sora quel che el pol far par noantri. (1 Gio. 2:1, 2) Noantri anca imparemo che quei che i assa Geovà contento i pol gaver la speransa de viver nel cielo o nela Tera. Quando pensemo sora come Geovà el ga mostrà che el ne ama e come el sacrifìssio de Gesù el pol giutarne, restemo ancora pi amighi de Geovà. (1 Pie. 3: 18; 1 Gio. 4:9) Par quela, ghemo de far compagno a quei fradei del passà, e convidar a tuti par far la Selebrassion come Gesù el ne ga insegnà.

8. Cossa che i servi de Dio i ze drio far fin ancoi par convidar le persone par la Selebrassion? (Varda el ritrato.)

⁸ L’è belche tanti ani che i servi de Geovà i ze drio convidar le persone par la Selebrassion dela Morte de Cristo. Par esémpio, nel ano 1881, la Sentinela la ga convidà fradei e sorele dei Stati Unidi par far la Selebrassion nela casa de un fradel in Allegheny, Pennsylvania. Dopo de un tempo, cada congregassion la ga scominsià a far la so Selebrassion. In marso de 1940, i predicadori i ga scominsià a convidar anca altre persone che le volesse ndar. Nel ano 1960, l’è stà la prima volta che Betel la ga stampà conviti par dar ale persone. De là in qua, ghemo dato bilioni de conviti. Ma parché che se sforsemo tanto cossita par convidar le persone?

9-10. Parché che noantri seitemo a convidar i altri par ndar ala Selebrassion? (Gioani 3:16)

⁹ Noantri convidemo le persone par la Selebrassion parché volemo che lore le impare sora tuto quel che Geovà e Gesù  i ze drio far par noantri. Pol esser che quei che i vien ala Selebrassion dopo i gàpia voia de imparar de pi, e noantri volemo pròpio questo. Ma volemo che anca altre persone le vegna ala Selebrassion. — Ledi Gioani 3:16. d

¹⁰ Noantri convidemo par la Selebrassion anca quei che i se ga fermà de ndar ale riunion e ala predicassion. Noantri li convidemo par giutarli a ricordarse che Geovà li ama. Restemo tanto contenti parché arquanti de lori i vien ala Selebrassion. Cossita, lori anca i se ricorda de come i era contenti quando i adorea a Geovà. Varda el esémpio dela sorela Monica. e Ela la se gavea fermà de predicar insieme ai fradei, ma la ze tornada a farlo in meso la pandemia dela COVID-19. Dopo de ndar ala Selebrassion de 2021, ela la ga dito: “Questa Selebrassion la ze stata tanto importante par mi, parché dopo de 20 ani, mi son tornada a parlar de Geovà e a convidar le persone par ndar ala Selebrassion. Mi me go sforsà tanto de farlo parché volea mostrar che ghe dao valor a tuto quel che Geovà e Gesù i ga fato par mi.” (Sal. 103:1-4) Noantri seitemo a convidar a tute le persone anca se tante de lore no le vien ala Selebrassion. Parché? Parché savemo che Geovà el resta tanto contento con quel che femo.

11. Come che Geovà l’è drio benedir el sforso che femo par convidar le persone par la Selebrassion? (Ageo 2:7)

¹¹ Geovà l’è drio benedir el sforso che femo par convidar i altri par la Selebrassion. Par esémpio, varda quel che ga sucedesto nel ano 2021. Anca cola pandemia, 21.367.603 persone le ze ndate ala Selebrassion, che l’è de pi che el dópio de Testimònie de Geovà in tuto el mondo. L’è vera che Geovà el resta tanto contento che tute queste persone le ze vegneste ala Selebrassion, ma lu anca l’è atento al sforso che cada una la ga fato par esser là. (Luc. 15:7; 1 Tim. 2:3, 4) Semo sicuri che, quando convidemo i altri, Geovà l’è drio giutarne a catar quei che i vol pròpio cognosserlo. — Ledi Ageo 2:7. f

12. Parché che fursi l’è fadiga ndar ala Selebrassion? (Varda el ritrato.)

¹² Gesù el ga dito che nei ùltimi giorni, ndarìssino infrontar tante dificoltà. Par esémpio, pol esser che sofrimo par causa de perseghission, guere, brute malatie o parché la fameia la ne vien contra. (Mat. 10:36; Mar. 13:9; Luc. 21:10, 11) Par quela, pol esser fadiga ndar ala Selebrassion. Alora, come che i nostri fradei e sorele i ze drio farlo anca cole dificoltà, e come che Geovà l’è drio giutarli?

13. Come che Geovà el ga benedio Artem?

¹³ In preson. I nostri fradei che i ze in preson i se sforsa tanto par far la Selebrassion dela Morte de Cristo. Varda el esémpio del fradel Artem. Nel ano 2020, lu l’era in preson e ghe tochea star  insieme a altri sinque presoneri nte un posto tanto pìcolo. Lu l’è stà bon de catar quel che ghe ocorea par far la Selebrassion, e l’era drio pareciarse par far el discorso. Ma quei òmini i fumea tanto e i parlea robe tanto sporche. Alora, cossa galo fato? Artem el ga domandà se i podea fermarse de fumar e de parlar robe sporche par un per de ore, e lori i ga acetà. Artem el ga proà spiegarghe parché che el ndaria far la Selebrassion, ma lori no i ga volesto saverghene. Magari, dopo dela Selebrassion, lori i ga fato arquante domande a Artem.

14. Come che le Testimònie de Geovà le ze state bone de far la Selebrassion nela pandemia?

¹⁴ Pandemia dela COVID-19. Par causa dela pandemia, le Testimònie de Geovà no le podaria far la Selebrassion insieme. Alora, come gale fato? g Le congregassion che le gavea internet la ga fato par vìdeo. Ma e quele che no le gavea internet? I Betei de arquanti paesi i ga passà el discorso dela Selebrassion nela television e nel ràdio. E arquanti Betei anca i ga fato la tradussion del discorso in de  pi de 500 léngue difarente, e bravi fradei i ga portà queste gravassion fin i posti che i ze tanto distanti.

15. Cossa gheto imparà col esémpio de Sue?

¹⁵ Quando la fameia la ne vien contra. Arquanti fradei i ghe fà fadiga ndar ala Selebrassion parché so fameia la ghe vien contra. Varda quel che ga sucedesto con una studiante dela Bìblia de nome Sue. Nel ano 2021, un giorno vanti dela Selebrassion, Sue la ga dito ala sorela che la ghe insegnea la Bìblia che no la podaria veder la Selebrassion par causa dela so fameia. Alora, la sorela la ghe ga ledesto el testo de Luca 22:44 e la ga spiegà che ghemo de ndar drio el esémpio de Gesù anca quando infrontemo dificoltà. Ela la ga dito che ghemo de pregar a Geovà e fidarse del tuto in lu. Cossita, nel giorno dela Selebrassion, Sue la ga parecià el pan e el vin e la ga visto la Adorassion Matinal Spessial par quel giorno. In quela sera, Sue la ze stata bona de restar ela sola e de vardar la Selebrassion nel so telèfono. Dopo Sue la ga dito a quela sorela che la ghe insegnea la Bìblia: “Gieri, ti te me ghè incoraià tanto. Mi me go sforsà par veder la Selebrassion e Geovà el me ga giutà a farlo. Mi son tanto contenta, e son drio ringrassiar a Geovà.” Se te sì drio infrontar una roba cossita, pénsito che Geovà el pol giutar anca a ti?

16. Parché che podemo esser sicuri che Geovà el ndarà benedirne se se sforsemo de ndar ala Selebrassion? (Romani 8:31, 32)

¹⁶ Geovà el resta tanto contento quando se sforsemo de ndar ala Selebrassion dela Morte de Cristo. Podemo esser sicuri che lu el ndarà benedirne quando mostremo che ghe demo valor a quel che el ga fato par noantri. (Ledi Romani 8:31, 32. h) Alora, volemo sforsarse tanto par convidar le persone e par esser nela riunion pi importante del ano, che la ze la Selebrassion.