1-2. Cossa che pol suceder coi servi de Geovà?

 POL ESSER che ne vegna fora robe de colpo e le càmbie del tuto la nostra vita. Par esémpio, un fradel de nome Luis a el ga savesto che el gavea un bruto càncaro e che el gavea sol un per de mesi de vita. Monika e el so omo, che l’era ansiano, i fea tanto nel laoro a Geovà. Ma, un giorno la ga savesto che fea belche tanti ani che so omo l’era drio far un pecato sconto. Olivia, una sorela che no la ze maridada, ghe ga tocà scampar via de casa par causa de una bruta tempesta che la era drio rivar. Quando la ze tornada indrio, so casa la era tuta par tera. La vita de questi fradei la ga cambià del tuto e de colpo. Te ga belche sucedesto una roba cossita?

² Anca se servimo a Geovà, noantri infrontemo dificoltà e malatie compagno a tute le altre persone. Ma pol esser che anca infrontemo perseghission de quei che i ga òdio dei servi de Dio. L’è vera che Geovà el assa che queste robe le suceda, ma lu el promete giutarne. (Isa. 41:10) Se ghemo el aiuto de Geovà, faremo bone dessision e seitaremo a esser contenti anca cole dificoltà. In questo stùdio, vederemo quatro robe che Geovà el fà par giutarne a dàrghene fora coi bruti colpi. Noantri anca vederemo cossa ghemo de far par ricever el so aiuto.

GEOVÀ EL TE PROTEGERÀ

3. Cossa che pol esser fadiga de far quando infrontemo una bruta dificoltà?

³ Cossa che pol suceder quando infrontemo una dificoltà?  Pol esser fadiga pensar dela maniera giusta e far bone dessision quando infrontemo un bruto colpo. Parché? Parché restemo tanto desanimadi e ansiosi. Fursi se sentimo come se fùssino drio caminar nte una strada piena de serasson e no semo gnanca boni de veder ndove semo drio pestar. Varda quel che due sorele che ghemo parlà prima le ga contà. Olivia la ga dito: “Dopo che la tempesta la ga finio fora cola me casa, son restada persa e tanto desanimada.” Monika la ga dito: “Mi son restada tanto desanimada. Me fea tanto mal el cuor che me parea che l’era drio spacarse. Mi no ero pi bona ndar avanti. No me spetea che una roba cossita sucedesse.” Come che Geovà el ne giuta quando semo drio infrontar dificoltà cossita?

4. De acordo con Filipensi 4:6, 7, come che Geovà el ne giuta?

⁴ Come che Geovà el ne giuta? Lu el promete darne la so pace. (Ledi Filipensi 4:6, 7. b) Questa pace la ze una calma che la vien de gaver una forte amicìssia con Geovà, e la ze tanto bela che no semo gnanca boni spiegarla. Fursi te ga belche sucedesto de pregar a Geovà, e pena dopo, sentir una calma che no te eri gnanca bon de capir. Questa la ze la pace de Dio!

5. Come che la pace de Dio la protege el nostro cuor e la nostra mente?

⁵ El medèsimo testo ancora el dise che la “pace de Dio la ndarà proteger el nostro cuor e la nostra mente”. La parola greca doperada par “proteger” in questo testo la era doperada par parlar dei soldadi che protegea una cità dei so nemighi. Quei che i era de star rento la cità i restea tranquili parché i savea che i soldadi i ndaria protégerli. La medèsima roba la sucede quando Geovà el ne dà la so pace, parché se sentimo calmi e protegesti. (Sal. 4:8) E quando restemo pi tranquili, anca semo boni de pensar dela maniera giusta e far bone dessision. Alora, ghemo pace ancora che semo drio tribolar, compagno ga sucedesto con Ana, la so mare de Samuel. — 1 Sam. 1:16-18.

6. Cossa che te ghè de far par gaver la ‘pace de Dio’? (Varda anca la ilustrassion.)

⁶ Cossa che te ghè de far? Quando te sì drio tribolar, seita a pregar a Geovà fin che te te senti in pace. (Luc. 11:9; 1 Tes. 5:17) Luis, che ghemo parlà prima, el ga spiegà come che lu e la so dona i ze stati boni de dàrghene fora quando i ga savesto che lu el  ndaria morir. Lu el ga dito: “Quando sucede una roba cossita, l’è tanto fadiga far bone dessision sora la salute e altre robe. Par quela, ghemo seità a pregar a Geovà e lu el ne ga dato la pace che gaveino de bisogno.” Lori i ga pregà che Geovà ghe desse pace, calma e sabedoria par far bone dessision. E lu el ghe ga dato tuto quel che ghe ocorea. Alora, se anca ti te seiti a pregar a Geovà, lu el ndarà darte la pace che la protegerà el to cuor e la to mente. — Rom. 12:12.

GEOVÀ EL TE GIUTARÀ A RESTAR FIRME

7. Cossa che fursi sentimo quando infrontemo una bruta dificoltà?

⁷ Cossa che pol suceder quando infrontemo una dificoltà? Quando infrontemo una dificoltà, pol esser fadiga controlar quel che pensemo, sentimo e fin quel che femo. Proa pensar nte un barco che l’è trato de una banda al’altra nel mar par causa de un temporal. Fursi se sentimo pròpio cossita, quando i nostri sentimenti i càmbia tanto e de colpo. Maria, so dona de Luis, la ga contà che la se ga sentio pròpio cossita dopo che Luis l’è morto. Ela la ga dito: “Mi me sentia tanto avelia parché pensea che no ero bona infrontar una roba cossita. Dele volte, restea anca cativa.” Ela anca la se ga sentio ela sola e tanto disgustada parché ghe ga tocà tuto a ela far dessision che prima l’era so omo che el fea. Dele volte, ghe parea che la fusse nte un temporal in meso el mar. Come che Geovà el ne giuta quando sentimo robe cossita?

8. De acordo con 1 Piero 5:10, cossa che Geovà el fà par giutarne?

⁸ Cossa che Geovà el fà? Lu el ne assa sicuri che el ndarà giutarne a controlar i sentimenti e a tegnerse a steca. (Ledi 1 Piero 5:10. c) Pensa nantra volta nel barco. Tanti barchi i resta firmi e no i se sfonda mia nte una tempesta parché i ga mestieri dele bande che li fà star su sensa moverse massa de una banda al’altra. Cossita, le persone che le ze rento el barco le resta pi tranquile. Ma questi mestieri i laora meio se el barco el seita a ndar avanti. Dela medèsima maniera, Geovà el ndarà giutarne a restar firmi e a controlar quel che sentimo nte una dificoltà se seitemo a servirlo.

9. Come che le publicassion e i vìdei pol giutarte? (Varda anca la ilustrassion.)

⁹ Cossa che te ghè de far? Quando te sì drio  infrontar una dificoltà, sfòrsate de seitar a pregar, predicar e ndar ale riunion. L’è vera che fursi no te sarè mia bon de far tuto quel che te fei prima. Ma ricòrdate che Geovà no’l speta che te fè de pi de quel che te sì bon. (Varda anca Luca 21:1-4.) Alora, sfòrsate de sempre leder la Bìblia e pensarghe sora. Geovà el dopera la so organisassion par darne bei artìcoli e vìdei che i ne giuta a controlar quel che pensemo e quel che sentimo. Par esémpio, te pol ndar in serca de quel che te ocore nel JW Library^®, nel Índice de Publicações da Torre de Vigia e Guia de Pesquisa das Testemunhas de Jeová. Monika, che ghemo belche parlà, la ga dito che la ga doperà queste robe par esser bona de controlar i bruti sentimenti che la gavea. Ela la ze ndata in serca dele parole “ràbia”, “traission” e “lealtà”. Dopo, ela la ledea fin che la se sentia meio. Monika la ga dito: “Quando go scominsià a ndar in serca de questi assunti, mi ero tanto ansiosa. Ma dopo che go seità a leder e a studiar, me parea che Geovà l’era drio darme un strucon. Go anca visto che Geovà el capia quel che ero drio sentir e che l’era drio giutarme.” Geovà el pol giutar anca ti a controlar i to sentimenti e a pensar dela maniera giusta intanto che te sì drio tribolar. — Sal. 119:143, 144.

GEOVÀ EL NDARÀ DARNE FORSA

10. Come fursi se sentimo dopo un bruto colpo?

¹⁰ Cossa che pol suceder quando infrontemo una dificoltà? Pol esser che dopo che infrontemo un bruto colpo nela vita, se sentimo sensa forse e tanto desanimadi. Podemo sentirse come una persona che la era bona de corer nele competission de carere, ma dopo un tempo, la ze restada sgherla. Pol esser che no semo pi boni far i laoreti che feino prima gnanca le robe che ne giutaria a restar pi contenti. Fursi se sentimo compagno a Elia, che no l’era bon levarse su e che el volea sol dormir. (1 Rè 19:5-7) Vedemo adesso cossa che Geovà el promete far quando se sentimo cossita.

11. De acordo con Salmo 94:18, come ancora Geovà el ne giuta?

¹¹ Cossa che Geovà el fà? Lu el promete darne la forsa che ne ocore. (Ledi Salmo 94:18. d) Cossita come una persona che la ze  sgherla la ghe ocore aiuto par caminar, ghemo bisogno de aiuto par seitar a servir a Geovà. Alora, proa ricordarte dela promessa de Geovà: “Mi, Geovà, el to Dio, te tegno par la to man drita. Son quel che te dise: ‘No stà mia gaver paura. Mi vao giutarte.’” (Isa. 41:13) El rè Davi el ga sentio che Geovà lo ga giutà pròpio cossita. Quando lu l’era drio tribolar par causa dei so nemighi e de altre dificoltà, lu el ga dito a Geovà: ‘La to man drita la me ga tegnesto su.’ (Sal. 18:35) Ma come che Geovà el ne giuta ancoi?

12. Chi che Geovà el pol doperar par darne la forsa che ne ocore?

¹² Geovà el pol doperar la nostra fameia, amighi e i ansiani par darne la forsa che ne ocore. Lu el ga fato cossita con tanti dei so servi del passà. Par esémpio, quando Davi l’è restà tanto desanimà, el so caro amigo Gionatan l’è ndato incoraiarlo. (1 Sam. 23:16, 17) Geovà anca el ga doperà Eliseo par incoraiar Elia. (1 Rè 19:16, 21; 2 Rè 2:2) Ma pol esser che quando semo desanimadi, volemo star sempre noantri soli. Tanti de quei che i infronta dificoltà i se sente cossita. Alora, come che podemo gaver el aiuto de Geovà?

13. Cossa che te ocore far par gaver el aiuto de Geovà? (Varda anca la ilustrassion.)

¹³ Cossa che te ghè de far? Aceta el aiuto dei altri e no stà restar sempre ti ti sol. Se passemo massa tempo noantri soli, scominsiemo a pensar sol in noantri stessi e nei nostri problemi. Alora, no saremo gnanca boni de far le dessision dela maniera giusta. (Pro. 18:1) L’è vera che quando passemo bruti colpi, ghemo bisogno de star un pochetin noantri soli. Ma se restemo massa tempo distante dei altri, no gavaremo el aiuto de Geovà. Alora, proa veder la to fameia, i to amighi e i ansiani come el aiuto che Geovà l’è drio darte. — Pro. 17:17; Isa. 32:1, 2.

GEOVÀ EL NDARÀ CONSOLARTE

14. Che dificoltà pol farne gaver paura?

¹⁴ Cossa che pol suceder quando infrontemo una dificoltà? Fursi restemo spauradi par causa dele nostre dificoltà. La Bìblia la parla de arquanti servi de Geovà che i ga bio paura par causa dei so nemighi e dele dificoltà. (Sal. 18:4; 55:1, 5) Anca noantri fursi sentimo paura se ghemo una bruta malatia o se infrontemo perseghission nela scola, nel laoro, dela fameia o del governo. Pol esser che no semo boni de far gnente e se sentimo  compagno un bambin. Alora, come che Geovà el ne giuta a infrontar questi bruti colpi?

15. De acordo col Salmo 94:19, de cossa che podemo esser sicuri?

¹⁵ Cossa che Geovà el fà? Lu el ne dà consolo e el ne giuta a restar pi calmi. (Ledi Salmo 94:19. e) Par capir meio cossa che questo testo vol dir, proa pensar nte una bambina che no la ze bona de dormir par causa de una bruta tempesta. Alora, el so pare la ciapa in brasso fin che la dorme. Ancora che la tempesta no la se ga mia finio, la bambina no la sente pi paura parché so pare l’è drio protegerla. Cossita come questa bambina, quando semo drio infrontar dificoltà, ghemo bisogno del aiuto e protession del nostro Pare. L’è come se Geovà el ne tegnesse in brasso fin che passe via le dificoltà. Ma come che podemo gaver aiuto e protession de Geovà?

16. Cossa che te ocore far par gaver el consolo de Geovà? (Varda anca la ilustrassion.)

¹⁶ Cossa che te ghè de far? Ghemo de seitar a pregar a Geovà e a leder la Bìblia. (Sal. 77:1, 12-14) Cossita, quando te sì preocupà, la prima roba che te ndarè far sarà domandar el aiuto de Geovà. Alora, conteghe tuto quel che te assa spaurà, e scolta quel che el te dise par meso dela Bìblia. (Sal. 119:28) Arquanti testi dela Bìblia i pol darte tanto consolo. Par esémpio, i libri de Giò, Salmo, Proverbi e le parole de Gesù in Mateo capìtolo 6 pol giutarte tanto. Cossita, se te preghi a Geovà e te ledi la so Parola, te gavarè el consolo che te ocore.

17. De che che podemo esser sicuri?

¹⁷ Noantri podemo esser sicuri che Geovà mai el assarà noantri soli e sempre el ndarà giutarne a infrontar le dificoltà nela nostra vita. (Sal. 23:4; 94:14) Geovà anca el promete che el ndarà giutarne a pensar dela maniera giusta e darne pace, forsa e consolo. Isaia 26:3 dise: “Te ndarè proteger quei che i se fida del tuto in ti. Ti te ndarè darghe pace par sempre parché i se fida in ti.” Alora, fìdate in Geovà e aceta el aiuto che lu el vol darte. Cossita, te gavarè la forsa che te ocore par dàrghene fora con tute le dificoltà.