1. Cossa che te vien in mente quando te pensi sora Geovà?

 GHETO belche pensà come che Geovà l’è? Quando te preghi a lu, cossa che te vien in mente? Anca se no podemo mia veder a Geovà, la Bìblia la dise che lu l’è come ‘un fogo che el brusa’, come ‘el sol e come un scudo’. (Sal. 84:11; Ebr. 12:29) Un scritor dela Bìblia el ga visto Geovà nte una vision, e el ga dito che Dio el se someia a un ‘sasso de safira’, a un ‘metal che slusea’ e a un bel ‘arco-ìris’. (Eze. 1:26-28) Alora, quando pensemo in Geovà de queste maniere, pol esser che restemo pròpio maraveiadi o fin se sentimo sensa valor.

2. Parché che pol esser fadiga creder che Geovà el ne ama?

² Come no podemo mia veder a Geovà, pol esser che sìpia fadiga creder che lu el ne ama. Arquanti fursi i ga infrontà bruti colpi nela vita o no i ga mai bio un pare che el ghe volesse ben. Ma Geovà el capisse ben quel che sentimo, e el vol giutarne. Par quela, lu el ne fà cognosserlo par meso dela Bìblia.

3. Parché che l’è importante pensarghe sora el amor de Geovà?

³ La Bìblia la dise che Dio l’è amor. (1 Gio. 4:8) Questa la ze la qualità pi bela che lu el ga parché tuto quel che el fà l’è con amor. E lu el mostra so amor a tuti, fin a quei che no i lo serve mia. (Mat. 5:44, 45) In questo stùdio, ndaremo veder parché che l’è importante pensarghe sora el amor de Geovà. Cossita, lo amaremo ancora de pi.

GEOVÀ EL NE AMA TANTO

4. Come che el amor de Geovà el te fà sentirte? (Varda anca el ritrato.)

⁴ “Geovà el ga tanto amor e misericòrdia.” (Tia. 5:11) Nela Bìblia, Geovà el dise che lu l’è compagno una mama che ghe  vol tanto ben a so picinin. (Isa. 66:12, 13) Proa pensa nte una mama che la tende con tanto amor del so bambin. Ela lo tien in brasso e la parla con lu con calma e bontà. Se el piande o el ga mal, ela la fà de tuto par tenderlo e darghe quel che ghe ocore. Dela stessa maniera, quando semo drio sofrir, podemo esser sicuri che Geovà el ne tende con amor. La Bìblia la dise: “Quando i me pensieri i ze stati massa rento de mi, ti te me ghè consolà e me ghè cocolà.” — Sal. 94:19.

5. Come te te senti quando te ghe pensi sora el amor leal de Geovà?

⁵ Geovà l’è leal parché lu no’l ne assa de banda gnanca quando femo qualcossa de sbalià. (Sal. 103:8) Pensa nela nassion de Israel. Lori i ga disgustà a Geovà una volta drio man l’altra. Ma quando i se ciamea grami, Geovà sempre li perdonea e ghe mostrea che ghe volea ben. Lu el ga dito che ‘lori i era tanto importanti e che li amea’. (Isa. 43:4, 5) E Geovà l’è ancora compagno. Par quela, podemo fidarse sempre in lu. Anca se sbaliemo, lu mai el ndarà assarne de banda. Se se ciamemo grami e se sforsemo par tornar a lu, el so amor par noantri el sarà ancora compagno. La Bìblia la dise che Geovà el ndarà perdonarne del tuto e che el ne darà pace. — Isa. 55:7; Ati 3:19.

6. Cossa che Zacaria 2:8 ne insegna sora Geovà?

⁶ Ledi Zacaria 2:8. a Geovà el ne ama tanto che ga dito che l’è come se noantri fùssino so òcio. El òcio l’è una parte pròpio importante del corpo, e se va rento qualcossa, sentimo suito. Alora, l’è come se Geovà el gavesse dito: ‘Se qualchedun el ve fà mal, l’è drio farghe mal a una roba tanto importante par mi.’ Par quela, lu el capisse suito quel che sentimo e el ne protege. Lu el resta disgustà quando sofrimo. Alora, podemo esser sicuri che lu el ndarà scoltarne se preghemo: ‘Tendi de mi come se fusse el to òcio.’ — Sal. 17:8.

7. Parché che te ghè de esser sicuro che Geovà el te ama?

⁷ Geovà el vol che te sìpie sicuro che lu el te ama. Ma lu el sa che, par causa dele dificoltà che te ghè adesso o che te ghè bio nel passà,  fursi te fè fadiga creder che lu el te ama del bon. Alora, come che te pol esser pròpio sicuro che Geovà el te ama? Te ghè de imparar come Geovà el mostra che el ama a Gesù, i untadi e tuti noantri.

COME CHE GEOVÀ EL MOSTRA EL SO AMOR?

8. Parché che Gesù l’era sicuro che so Pare lo amea tanto?

⁸ Geovà e so Fiol i ze insieme fà bilioni de ani. E in tuto questo tempo che i ze insieme nel cielo, lori i ga fato cada volta pi forte el amor e la amicìssia intrà de lori. Geovà sempre el ga mostrà che el amea so Fiol. Par quela, quando el ga parlà del cielo, lu el ga mostrà che el amea tanto a Gesù. In Mateo 17:5, Geovà no’l ga sol dito che l’era contento con quel che Gesù l’era drio far. Invesse, lu el ga dito: “Questo l’è el me Fiol, el amà.” Dio el volea che tuti i savesse che lu l’era pròpio contento con so Fiol. (Efe. 1:7) Gesù l’era sicuro che so Pare el ghe volea tanto ben, e tante volte, el ga parlà che el se fidea nel so amor. — Gio. 3:35; 10:17; 17:24.

9. De acordo con Romani 5:5, come che savemo che Geovà el ama tanto i untadi?

⁹ Ledi Romani 5:5. b El testo el dise che Dio el ne ama tanto. E quando la Bìblia la ze stata scrita, el scritor el ga doperà parole che fà comparassion a un rio pien de àqua che el vien par sora. Questo vol dir che Geovà el ama pròpio tanto i untadi, e el vol che lori i sìpie sicuri del so amor. I untadi i sa che Geovà el ghe vol tanto ben. (Giuda 1) Par quela che el apòstolo Gioani el ga scrito: “Vardé che el Pare el ne ga amà tanto che el ne ciama fioi de Dio.” (1 Gio. 3:1) Ma Geovà no’l ama sol i untadi. Lu el mostra el so amor anca par tuti noantri.

10. Parché che podemo esser pròpio sicuri che Geovà el ne ama?

¹⁰ El sacrifìssio de Gesù el ne assa pròpio sicuri che Geovà el ne ama tanto. (Gio. 3:16; Rom. 5:8) Come Geovà el ga mandà el so caro Fiol par morir par noantri, tuti podemo esser so amighi e gaver el perdon dei pecati. (1 Gio. 4:10) Se seitemo a pensar in quel che Geovà e Gesù i ga fato par noantri, saremo pròpio sicuri che lori i ne vol tanto ben. (Gàl. 2:20) Geovà no’l ga dato el so Fiol par morir par noantri sol parché l’è un Dio giusto, ma parché el ne ama. Par quela, lu el ga scoliesto la persona che el ghe volea pi ben par morir par noantri.

11. Cossa gheto imparà de Geremia 31:3?

¹¹ Come ghemo visto, Geovà el ga caro de mostrar che lu el ne ama. (Ledi Geremia 31:3. c) Lu el ga volesto che fùssino i so amighi parché lu el ne ama. (Varda anca Deuteronómio 7:7, 8.) No ghen’è gnente o nissuni che fae Geovà assar de amarne. (Rom. 8:38, 39) Quando te ghe pensi sora questo, come te te senti? Proa leder Salmo capìtolo 23, e varda come che Davi el se ga sentio quando el ga capio che Geovà el ghe volea tanto ben.

COME TE TE SENTI DE SAVER CHE GEOVÀ EL TE AMA?

12. De che che el Salmo 23 el parla?

¹² Ledi Salmo 23:1-6. Nel Salmo 23, Davi el ga mostrà che l’era sicuro che Geovà lo amea e lo tendea. Lu el ga parlà dela amicìssia che ghen’era intrà de lori e el ga parlà che Geovà l’era el so “Pastor”. Davi el ga parlà cossita parché el se fidea del tuto in Geovà e  el savea che Dio sempre el ghe diseria quel che el gavea de far. Davi el savea che Geovà el seitaria a amarlo par sempre. Cossa che lo ga giutà a esser sicuro cossita? d

13. Parché che Davi l’era sicuro che Geovà el ndaria tenderlo?

¹³ “No me mancarà gnente.” Davi l’era sicuro che Geovà l’era drio tenderlo. Parché? Parché Geovà sempre el ghe ga dato quel che el gavea de bisogno, l’era so amigo e el mostrea che l’era contento con Davi. Alora, no importa quel che sucedesse, Davi l’era sicuro che Geovà sempre el ndaria giutarlo. Anca se tante dificoltà le ze vegneste fora, Davi el seitea contento parché el se fidea che Geovà el ghe volea tanto ben e el ndaria giutarlo. — Sal. 16:11.

14. Come che Geovà el mostra che el ne tende con amor?

¹⁴ Geovà el ne tende con amor, ancora de pi se l’è drio suceder robe brute nela nostra vita. Varda cossa che ga sucedesto con Claire, e una sorela che la ga laorà in Betel par de pi de 20 ani. Ela la ze restada pròpio preocupada parché tante dificoltà le ze vegneste fora de colpo nela so fameia. So sorela la ga assà de esser Testimònia de Geovà, a so pare ghe ga dato un derame, so fameia ghe manchea soldi e i ga perso anca la casa. Come che  Geovà el ga tendesto con amor de Claire e so fameia? Ela la ga contà: “Geovà sempre el ne ga dato quel che gaveino de bisogno. Tuto quel che lu el ne ga dato l’è stà ancora meio de quel che mi spetea. Mi sempre ghe penso sora tute le volte che go visto el amor de Geovà. L’è questo che me giuta quando son drio tribolar.”

15. Parché che Davi el ga bio forsa? (Varda anca la ilustrassion.)

¹⁵ “Lu el me giuta a gaver forsa nantra volta.” Tante volte, Davi l’è restà preocupà par causa dele dificoltà che l’era drio infrontar. (Sal. 18:4-6) Ma, lu el ga bio forsa parché el ga visto che Geovà lo tendea con amor. L’era come se Geovà lo fesse ‘butarse do nte un bel prà e lo fesse riposar in posti ndove ghen’è tanta àqua’. Cossita, Davi el ga bio forsa par seitar a servir a Geovà contento. — Sal. 18:28-32.

16. Come che Geovà el te ga belche giutà?

¹⁶ Geovà el giuta anca noantri ancoi compagno el ga giutà Davi. Quando semo drio tribolar, ‘no semo mia finidi fora par via del amor leal de Geovà’. (Lam. 3:22; Col. 1:11) Varda quel che ga sucedesto con Rachel. Nela pandemia del COVID-19, el so omo el se ga fermà de servir a Geovà e no la ga pi volesta. Ela la ga contà come Geovà la ga giutada: “Geovà el me ga mostrà che el me amea tanto. Lu el ga doperà cari amighi che i ga passà tempo insieme de mi, che i me ga portà de magnar, che i me ga mandà testi dela Bìblia e i me scrito bele robe. Questi fradei i me ga tratà con bontà e i me ga giutà a ricordarme che Geovà el se preocupa con mi. Mi seito a ringrassiar a Geovà parché el me ga dato questa cara fameia.”

17. Parché che Davi no’l gavea paura de gnente?

¹⁷ “Mi no gavarò paura de gnente parché ti te sì con mi.” Davi l’era sempre in perìcolo e el ga bio tanti nemighi poderosi. Ma, par meso del so amor, Geovà lo ga giutà a esser sicuro che lu l’era drio tenderlo e protegerlo. Davi l’era bon de veder che Geovà l’era drio giutarlo. Par quela, lu el ga cantà: ‘Par causa de Geovà, adesso, no go pi paura.’ (Sal. 34:4) Ancora che dele volte Davi el gavesse tanta paura, lu l’è stà bon de dàrghene fora parché el savea che Geovà lo amea.

18. Come che el amor de Geovà el pol giutarte quando te sì drio tribolar?

¹⁸ Come che el amor de Geovà el ne dà forsa  quando semo drio tribolar? Una pioniera de nome Susi la ga contà come che ela e so omo i se ga sentio dopo che so fiol el se ga copà. Ela la ga dito: “Quando una roba pròpio bruta sucede nela to vita, no te sè gnanca cossa far, e te ghè paura che altre robe brute le suceda. Ma Geovà el ne fà sentir la so protession par via del so amor.” Rachel, che ghemo parlà prima, la ga dito: “Una sera, mi ero tanto desanimada e spaurada. Alora, go scominsià a piander forte, e go pregà a Geovà. Suito me go sentio pi calma compagno un picinin che l’è nei brassi de so mare. Mai pi vao desmentegarme de quela sera.” Un ansiano de nome Tasos l’è stà metesto in preson par 4 ani parché no’l volea ndar al esèrsito. Lu el ga contà come Geovà lo ga giutà. Lu el ga dito: “Geovà el me ga dato de pi de quel che gavea de bisogno. Cossita, son restà sicuro che podea fidarme in lu. Par meso del so spìrito santo, Geovà el me ga giutà a restar contento in quel posto bruto. Questo me ga giutà a veder che se seito a fidarme in Geovà, lu el me amarà ancora de pi. Par quela, go scominsià a laorar come pioniero regolar ancora in preson.”

RESTA ANCORA PI AMIGO DEL TO CARO PARE

19. (a) Parché che l’è importante ricordarse che Geovà el ne ama quando preghemo? (b) Che testo che el parla del amor leal de Geovà te piase de pi? (Varda anca el quadro “ Testi che ne giuta a capir el amor de Geovà”.)

¹⁹ Tuti i esempi che ghemo visto i mostra che “el Dio de amor” el se preocupa con noantri e l’è sempre dela nostra banda. (2 Cor. 13:11) Semo sicuri che ghemo el so amor leal. (Sal. 32:10) Par quela, ghemo de seitar a pensarghe sora come che Geovà el mostra che el ne ama. Cossita, ndaremo esser ancora pi sicuri che lu el se preocupa con noantri e restaremo cada volta pi darente de lu. Alora, podemo seitar a pregar sensa gaver paura. Noantri podemo dirghe tuto quel che sentimo parché savemo che lu el ne capisse e l’è premoso de giutarne. — Sal. 145:18, 19.

20. Parché che l’è bon gaver el amor de Geovà?

²⁰ Cossita come l’è bon star darente el fogo nte un giorno fredo, l’è tanto bon esser cada volta pi darente Geovà quando ghemo dificoltà. El amor de Dio el pol darte consolo e pace. Semo tanto contenti de saver che Geovà el ne ama, mia vera? Sicuro che tuti noantri volemo dir: “Mi amo a Geovà!” — Sal. 116:1.