STÙDIO 2
CÀNTICO 19 Ricordemo dela morte de Gesù
Paréciate adesso par el giorno pi importante del ano!
“Seité far questo in ricordo de mi.” — LUC. 22:19.
COSSA CHE NDAREMO IMPARAR?
Noantri ndaremo imparar parché la Selebrassion la ze tanto importante, come pareciarse par questo bel giorno e come giutar anca i altri a ndar a questa riunion.
1. De acordo con Luca 22:19, 20, parché che el giorno dela Selebrassion l’è el pi importante del ano?
EL GIORNO dela Selebrassion l’è el pi importante del ano parché la ze la ùnica selebrassion che Gesù el ne ga domandà de far. (Ledi Luca 22:19, 20. a) Adesso, ndaremo veder arquante robe che la Selebrassion la ne giuta a ricordarse.
2. Parché che semo premosi de ndar ala Selebrassion?
2 Parché che semo tanto premosi de ndar ala Selebrassion? Parché se ricordemo che el sacrifìssio de Gesù l’è tanto importante par noantri e vedemo come ringrassiar a Geovà e a Gesù par quel che i ga fato. (2 Cor. 5:14, 15) Nela Selebrassion, noantri anca podemo incoraiarse un al altro. (Rom. 1:12) E tuti i ani, arquanti de quei che i se ga fermà de ndar ale riunion i desside tornar a servir a Geovà dopo ndar ala Selebrassion. E tante persone le desside scominsiar a studiar la Bìblia dopo de quel che le ga visto e le ga scoltà nela Selebrassion. Sicuro che questo giorno l’è tanto importante par noantri!
3. Parché che la Selebrassion la giuta i servi de Dio a esser pi unidi? (Varda anca la ilustrassion.)
3 La Selebrassion anca la giuta i servi de Dio a esser pi unidi. Come? Intanto che el sol el va do, tuti noantri se riunimo par scoltar el discorso che el spiega parché el sacrifìssio de Gesù l’è tanto importante. Dopo, cantemo due càntichi, passemo el pan e el vin e disemo “amen” nele quatro orassion che le ze fate. In sol 24 ore, le congregassion in tuto el mondo le gavarà fato la medèsima roba. Proa pensa come Geovà e Gesù i resta tanto contenti de vederne riunidi par darghe valor a quel che i ga fato.
La Selebrassion la une i servi de Geovà de tuto el mondo (Varda el paràgrafo 3.) l
4. Cossa che ndaremo imparar in questo stùdio?
4 In questo stùdio, noantri ndaremo risponder ale domande: ‘Come che podemo pareciarse par dar ancora de pi valor ala Selebrassion? Come che podemo giutar i altri a vegner ala Selebrassion e a darghe valor a quel che Gesù e Geovà i ga fato? E come che podemo giutar a quei che i se ga fermà de ndar ala riunion e ala predicassion?’ Le risposte a queste domande le ndarà assarne ancora pi premosi par ndar ala Selebrassion.
COME PODEMO DARGHE ANCORA DE PI VALOR ALA SELEBRASSION?
5. (a) Parché che ghemo de pensarghe sora el sacrifìssio de Gesù? (Salmo 49:7, 8) (b) Cossa che te ghè imparà del vìdeo Parché che Gesù l’è morto?
5 Noantri ndaremo dar ancora de pi valor ala Selebrassion se pensemo come la morte de Gesù la ze importante par noantri. Proa pensa: No ghen’era gnente che podarìssino far par salvarne del pecato e dela morte. (Ledi Salmo 49:7, 8; b varda anca el vìdeo Parché che Gesù l’è morto?) c Par quela, Geovà el ga mandà el so Fiol qua ala Tera par morir par noantri. Sicuro che Geovà e Gesù i ga fato un grando sacrifìssio par salvarne. (Rom. 6:23) Se seitemo a pensar in quel che lori due i ga fato par noantri, ghe daremo cada volta de pi valor. Adesso, ndaremo pensarghe sora quel che Gesù el ga fato e parché che l’è stà tanto fadiga par lu e par Geovà.
6. Come che Gesù l’è stà bon de ciapar indrio quel che Adon el gavea perso?
6 Podemo dir che el sacrifìssio de Gesù el ga pagà indrio quel che Adon el gavea perso. Come cossita? Quando Adon l’è stà creà, lu l’era perfeto. Ma dopo che el ga desobedio a Geovà, lu e tuti i so fioi i ze deventadi imperfeti e i ga perso la vita eterna. Alora, quando Gesù el ga dato la so vita perfeta come sacrifìssio, lu l’è stà bon ciapar indrio quel che Adon el gavea perso. (1 Pie. 2:22) Cossita, quando Gesù l’è morto, lu el ga dato una vita perfeta compagna a quela che Adon el gavea. — 1 Cor. 15:45; 1 Tim. 2:6.
7. Che dificoltà Gesù el ga infrontà quando l’era qua nela Tera?
7 Quando Gesù l’era qua nela Tera, lu el ga sempre obedio a Geovà, anca quando l’era fadiga. Ancora che so pare e so mare no i fusse mia perfeti, lu li ga sempre obedidi. (Luc. 2:51) Quando Gesù l’era un toso, pol esser che ghen’era persone intorno che ghe disea de far robe sbaliade o de desobedir ai so genitori. E quando l’è vegnesto pi grando, lu el ga infrontà brute dificoltà, parché Sàtana no’l volea che lu el desse la so vita perfeta par salvar le persone. Par quela, Gesù el ga bio de sforsarse tanto par mai cascar nele tràpole de Sàtana. — Mat. 4:1-11.
8. Che altre dificoltà Gesù el ga infrontà?
8 Ma Gesù el ga bio de infrontar anca altre dificoltà. Par esémpio, i so nemighi i seitea a perseghirlo e i ga fin proà coparlo. (Luc. 4:28, 29; 13:31) Lu anca el ga bio de dàrghene fora coi sbali che i so dissìpoli sempre i fea. (Mar. 9:33, 34) E quando lu l’è stà giulgà, i so nemighi ghe ga dato bote e ghe ga dito su. Dopo, lu el ga tribolà tanto vanti de morir. (Ebr. 12:1-3) Gesù el ga bio de infrontar queste dificoltà nel fin dela so vita sensa la protession de Geovà. d — Mat. 27:46.
9. Come te te senti dopo pensarghe sora quel che Gesù el ga fato par ti? (1 Piero 1:8)
9 Sicuro che Gesù el ga sofrio tanto par dar la so vita par salvarne. E quando pensemo in tuto quel che ghe ga tocà far, lo amemo ancora de pi. — Ledi 1 Piero 1:8. e
10. Parché che l’è stà fadiga par Geovà mandar el so Fiol qua ala Tera?
10 Ma e Geovà? Che dificoltà galo bio par mandar Gesù qua ala Tera? Geovà e Gesù i ga el amor e la amicìssia pi forte che ghen’è. (Pro. 8:30) Alora, proa pensa come Geovà el ga sofrio de veder tuto quel che so Fiol l’era drio infrontar. Sicuro che lu l’è restà tanto disgustà de veder che Gesù el ga ciapà bote, l’è stà odià par le persone e el ga sofrio tanto.
11. Parla de un esémpio che mostra come Geovà el se ga sentio de veder el so Fiol sofrir e morir.
11 Anca se credemo nela ressuression, tuti noantri sofrimo tanto quando perdemo qualchedun che amemo nela morte. Alora, proa pensa el dolor che un pare e una mare i sente se el so caro fiol el more. Pensar sora questo ne giuta a capir quel che Geovà el ga sentio de veder el so caro Fiol sofrir e morir. f — Mat. 3:17.
12. Cossa che podemo far de adesso avanti?
12 De adesso avanti, stùdia de pi sora el sacrifìssio de Gesù quando te ledi la Bìblia o nela to adorassion in fameia. Te pol doperar el Guia de Pesquisa para Testemunhas de Geovà o altre publicassion. g Proa anca leder i versìcoli dela Bìblia par la Selebrassion che ghen’è nela Programassion par la Riunion Vivemo e Insegnemo come Gesù. E quando riva el giorno dela Selebrassion, ricòrdate de vardar la Adorassion Matinal Spessial. Se pensemo sora el sacrifìssio de Gesù, semo boni de giutar anca i altri a darghe valor a quel che el ga fato. — Esd. 7:10.
GIUTA I ALTRI A NDAR ALA SELEBRASSION
13. Quala zela la prima roba che te ghè de far par giutar i altri a vegner ala Selebrassion?
13 Come che te pol giutar i altri a ndar ala Selebrassion? La prima roba che te ghè de far l’è convidarli. Te pol scriver do el nome dele persone che te vol convidar, come quei dela to fameia, del laoro o dela scola. Anca se no te ghè mia conviti stampadi par tuti, proa mandarghe el link del convite che ghen’è nel site. Fursi te restarè maraveià de veder che tanti i ndarà acetar el convite. — Ecl. 11:6.
14. Parla de un esémpio che el mostra che l’è tanto importante dar el convite in man par le persone.
14 Quando convidemo una persona par la Selebrassion e ghe demo el convite in man, sarà pi fàcile che la acete ndar. Varda quel che ga sucedesto con una sorela che el so omo no’l serve mia a Geovà. Ela lo gavea belche convidà tante volte par ndar ala Selebrassion. Ma lu no l’era mai ndato. Alora, un giorno, ela la ze restada tanto contenta quando lu el ga dito che el ndaria ala Selebrassion de quel ano. Parché el ga acetà ndar? Lu el gavea ricevesto el convite in man de un ansiano che el cognossea. Lu l’è ndato a quela Selebrassion e a tante altre.
15. De che volemo ricordarse quando convidemo qualchedun par ndar ala Selebrassion?
15 Noantri ghemo de ricordarse che quei che convidemo par la Selebrassion fursi i ne fae domande. Par quela, podemo pensar nele domande che lori i pol farne e esser pareciadi par risponderghe. (Col. 4:6) O noantri podemo domandarghe: ‘Te volarissi saver qualcossa sora la Selebrassion?’ Fursi la persona la ne domande: ‘Come sarà questa riunion? Ghe meterà quanto tempo? Mi posso doperar le robe che mi vui mi? Me toca pagar qualcossa? Valtri ndaré tor su limòsina?’ Alora, podemo doperar i vìdei Ricorda dela Morte de Gesù e Cossa che sucede in un Salon del Regno? par giutar la persona a capir come le ze le riunion. Podemo anca vardar la lession 28 del libro Te pol viver felice par sempre!, ndove ghen’è bele robe che podemo spiegar ala persona.
16. Che domande quei che i ze ndati ala Selebrassion fursi i gàpia?
16 Pol esser che quei che i ze ndati ala Selebrassion i gàpia domande de farne. Fursi lori i vol saver parché sol un per de persone o nissuni ga magnà del pan e bevesto del vin, quante volte al ano femo la Selebrassion e se tute le riunion dele Testimònie de Geovà le ze cossita. L’è vera che el discorso el ga parlà sora arquante de queste robe. Ma pol esser che la persona la gàpia voia de imparar de pi. Alora, te pol doperar el artìcolo del jw.org La Sena del Signor – Parché le Testimònie de Geovà le fà questa Selebrassion de maniera difarente? Sfòrsate de doperar del to tempo vanti e anca dopo dela Selebrassion par giutar tute le persone che te pol. — Ati 13:48.
GIUTA A QUEI CHE I SE GA FERMÀ DE VEGNER ALE RIUNION
17. Come che i ansiani i pol giutar a quei che i se ga fermà de vegner ale riunion? (Ezechiel 34:12, 16)
17 Nela època dela Selebrassion, i ansiani i pol giutar tanto a quei che i se ga fermà de ndar ale riunion. Alora, se te sì un ansiano, cossa che te pol far? Mostra a questi fradei che te ghe vol ben e che te te preocupi con lori. (Ledi Ezechiel 34:12, h 16. i) Par esémpio, vanti dela Selebrassion, sfòrsate de parlar con tuti quei che te pol e mostra che te ghè caro de giutarli. Dopo, convidali par ndar ala Selebrassion, e se lori i va, proa riceverli ben. Dopo dela Selebrassion, seita a parlar con questi cari fradei e fà tuto quel che te pol par incoraiarli a tornar a servir a Geovà. — 1 Pie. 2:25.
18. Come che tuti i pol giutar a quei che i se ga fermà de ndar ale riunion? (Romani 12:10)
18 Come tuti nela congregassion i pol giutar a quei che i se ga fermà de vegner ale riunion? Noantri ghemo de tratarli con amor, bontà e rispeto. (Ledi Romani 12:10. j) Ghemo de ricordarse che lori fursi i ga fato fadiga vegner ala riunion. Pol esser che i ga paura che i fradei no li riceva mia ben! k Alora, no stà parlar robe che ndaria assarli con vergogna o disgustadi. (1 Tes. 5:11) Questi fradei ancora i ze servi de Geovà e restaremo contenti de tornar a adorarlo insieme nantra volta. — Sal. 119:176; Ati 20:35.
19. Parché che ndar ala Selebrassion l’è bon par noantri?
19 Noantri savemo che el sacrifìssio de Gesù l’è tanto importante. Par quela, restemo contenti de far la Selebrassion tuti i ani. (Isa. 48:17, 18) Quando ndemo ala Selebrassion, el nostro amor par Geovà e par Gesù el resta pi forte, mostremo che ghe demo valor a quel che i ga fato, e restemo pi unidi coi nostri fradei. Anca semo boni de giutar i altri a imparar de pi sora el sacrifìssio de Gesù e a gaver la bela speransa che Geovà el ne dà par el futuro. Alora, volemo sforsarse par convidar tute le persone che podemo par la Selebrassion dela Morte de Gesù, che l’è el giorno pi importante del ano!
COME CHE PODEMO . . .
-
darghe ancora de pi valor ala Selebrassion?
-
giutar ai altri a darghe valor ala Selebrassion?
-
giutar a quei che i se ga fermà de vegner ale riunion?
CÀNTICO 18 Gràssie par el risgate!
a (Luca 22:19, 20) E el ga ciapà el pan, el ga dato grassie, el ga spartio e el ga dato a lori, drio dir: “Questo vol dir el me corpo, che sarà dato in vostro benefìssio. Seité far questo in ricordo de mi.” 20 Dopo dela sena, el ga fato el stesso col bicier. Lu el ga dito: “Questo bicier el rapresenta el novo acordo che el ga valor par meso del me sangue, che sarà dato par valtri.
b (Salmo 49:7, 8) Nissuni de lori i pol de gnanca una maniera risgatar un fradel, e gnanca dar a Dio un risgate par lu, 8 (El prèssio del risgate dela so vita l’è tanto pressioso, che mai se pol rivar)
c Par catar i artìcoli e vìdei che ghen’è in questo stùdio, va rento el jw.org e scrivi el nome del artìcolo o vìdeo nela casseta “Va in serca”.
d Varda “Domande dei Letori” nela Sentinela de april de 2021.
e (1 Piero 1:8) Anca se valtri no lo gavé mai visto, valtri lo amé. Anca se valtri no lo vedé adesso, gavé fede in lu, e resté tanto contenti con una gloriosa e maraveiosa alegria.
f Varda el libro Achegue-se a Jeová, cap. 23, par. 8 e 9.
g Varda el quadro “ Bele robe de far intanto che te studi la Bìblia”.
h (Ezechiel 34:12) Vao tender dele me piégore come un pastor che el cata le so piégore perse e el ghe dà de magnar. Vao ricuperarle de tuti i posti che le ze state spaiade nel giorno de nùvole e scuridon.
i (Ezechiel 34:16) “Mi vao in serca de quela che la ze persa. Vao giutar a ritornar quela che la se ga ciapà in drio. Vao meter fasse in quela che la se ga fato mal. Vao giutar la fiaca a vegner pi forte. Ma mi vao finir fora cola gorda e cola forte. Queste mi vao giulgar e darghe la punission che le mèrita.”
j (Romani 12:10) Con amor de fameia, gavé de volerve ben de cuor un al altro. Sìpie premosi de dar onor un al altro.
k Varda le ilustrassion e el quadro “ Cossa i fradei i ga de far?” Un fradel che el se gavea fermà de ndar ale riunion l’è tanto ansioso prima de ndar rento el Salon. Ma l’è bon de dàrghene fora cola paura e i fradei i lo riceve tanto ben!
l ILUSTRASSION: Intanto che servi de Geovà i fà la Selebrassion nte una parte del mondo, fradei de altre parte i se parecia.
