1. Cossa podemo far par assar Geovà contento?

 METEMO dir che te dè un presente a una persona che te ghe vol tanto ben. Questo presente l’è pròpio bel e ndarà giutarla tanto. Sicuro che te restarissi tanto disgustà se ela lo tresse nte un canton e no la se ricordesse pi de quel bel presente. Ma, te restarissi contento se la persona lo doperesse ben e la te ringrassiesse. Cossa che questo ne insegna? Geovà el ne ama tanto e el ne ga dato un presente tanto bel che l’è stà la vita del so fiol. Alora, l’è sicuro che lu el resta tanto contento quando mostremo che ghe demo valor a questo presente. — Gio. 3:16; Rom. 5:7, 8.

2. Cossa che ndaremo imparar in questo stùdio?

² Pol esser che pin pian se desmenteghemo come el sacrifìssio de Gesù l’è importante par noantri. Se questo sucede, saria come trar el bel presente che Geovà el ne ga dato nte un canton. Pol esser che fin restemo contenti de gaverlo, ma no pensemo mai in questo presente. Sicuro che no volemo mia che una roba cossita suceda. Invesse, volemo seitar a pensarghe sora quel che Geovà e Gesù i ga fato par noantri. In questo stùdio, vederemo le bele robe che ghemo ancoi e che gavaremo nel futuro par causa del sacrifìssio de Gesù. Anca ndaremo imparar cossa podemo far par mostrar che ghe demo valor al amor de Geovà, ancora de pi nele stimane vanti e dopo dela Selebrassion.

BELE ROBE CHE GHEMO BELCHE ADESSO

3. Che bela roba ghemo belche adesso par causa del sacrifìssio de Gesù?

³ Belche adesso ghemo tante bele robe par causa de quel che Geovà e Gesù i ga fato par noantri. Par esémpio, par causa del sacrifìssio de Gesù, Geovà el perdona i nostri pecati. E lu no’l ne perdona parché ghe toca, ma parché el vol. El salmista el ga mostrà  che el ghe dea tanto valor al perdon de Geovà. Lu el ga dito: “Parché ti, ò Geovà, te sì bon e te sì sempre pronto par perdonar.” — Sal. 86:5; 103:3, 10-13.

4. Par chi che Geovà el ga mandà el so fiol? (Luca 5:32; 1 Timòteo 1:15)

⁴ Pol esser che arquanti de noantri i pensa che no meritemo el perdon de Geovà. E l’è vero che no lo meritemo mia. Anca Paolo el se sentia cossita. Lu el ga dito che no’l meritea mia esser ciamà apòstolo, e che ‘l’era quel che lu l’era par via dela maraveiosa bontà de Dio’. (1 Cor. 15:9, 10) Alora, se noantri no meritemo el perdon de Geovà, parché che lu el ne perdona? Parché lu el ne ama tanto. Alora, se te scominsi a restar desanimà parché te pensi che no te mèriti el perdon de Geovà, ricòrdate che lu el ga mandà so fiol nò par persone perfete, ma par pecadori che se ciama grami. — Ledi Luca 5:32; a 1 Timòteo 1:15. b

5. Sarà che saria giusto pensar che meritemo el perdon de Geovà? Spiega.

⁵ Anca se ghemo belche servio a Geovà tanti ani, no ghemo mai de pensar che lu el ga obrigassion de perdonarne o che meritemo el so perdon. L’è vera che Geovà el dà valor a tuto quel che femo par lu nel so laoro. (Ebr. 6:10) Ma lu el ga mandà el so Fiol come un presente, e nò par pagarne par el nostro laoro. Alora, saria tanto bruto pensar che meritemo el perdon de Geovà parché ghemo fato qualcossa par lu. Se pensemo cossita, saria come dir che no ghe ocorea che Gesù el morisse par noantri. — Varda anca Gàlati 2:21.

6. Parché che Paolo el ga seità sforsarse de far el so meio nel so laoro a Dio?

⁶ Ancora che Paolo el savesse che mai el meritaria el perdon de Geovà, lu el ga seità sforsarse de far el so meio. Parché? Parché lu el volea mostrar che el ghe dea valor ala misericòrdia e ala bontà de Geovà, e no lo fea par proar meritar el so perdon. (Efe. 3:7) Cossa che imparemo? Compagno a Paolo, ghemo de seitar a far el nostro meio a Geovà parché volemo mostrarghe che ghe demo valor a tuto quel che el ga fato, e nò par proar meritar el so perdon.

7. Che nantra bela roba ghemo belche adesso par causa del sacrifìssio de Gesù? (Romani 5:1; Tiago 2:23)

⁷ Vedemo nantra bela roba che ghemo belche adesso par causa de quel che Geovà e Gesù i ga fato par noantri. Come ghemo visto nel stùdio prima, noantri no semo nassesti come amighi de Dio. Ma, par causa del sacrifìssio de Gesù, podemo gaver una forte amicìssia con Geovà c e esser in “pace con lu”. — Ledi Romani 5:1; d Tiago 2:23. e

8. Parché che ghe demo valor ale orassion?

⁸ Come ghemo una amicìssia con Geovà, podemo parlar con lu in orassion. E Geovà el ne scolta quando preghemo insieme ai altri fradei, intanto che lo adoremo e quando semo noantri soli. Quando preghemo a Geovà restemo pi tranquili e ghemo pi pace. Ma el pi importante l’è che femo pi forte la nostra amicìssia con lu. (Sal. 65:2; Tia. 4:8; 1 Gio. 5:14) Quando Gesù l’era qua nela Tera, lu sempre el preghea a Geovà, parché el savea che l’era drio scoltarlo. Lu anca l’era sicuro che le orassion lo giutaria a gaver una amicìssia forte col so Pare. (Luc. 5:16) Sicuro che semo tanto contenti che podemo pregar a Geovà e esser so amighi. Noantri sol ghemo queste robe par causa del sacrifìssio de Gesù.

 BELE ROBE CHE GAVAREMO NEL FUTURO

9. Cossa che gavaremo nel futuro par causa del sacrifìssio de Gesù?

⁹ Par causa del sacrifìssio de Gesù, gavaremo bele robe anca nel futuro. Par esémpio, podaremo gaver la vita eterna. Tanti i pensa che no se pol mia viver par sempre, parché tuti i vien veci e i more. Ma Geovà el ga sempre volesto che vivessino par sempre. L’è vera che pol esser fadiga creder che podaremo viver par sempre, ma ghemo de pensar che se Adon no’l gavesse pecà, noantri viverissino par sempre. E ghemo anca de ricordarse che Geovà el ga dato la vita del so caro Fiol, una roba de tanto valor, par darne la vita eterna. — Rom. 8:32.

10. Che speransa i untadi e i altri servi de Geovà i ga?

¹⁰ Anca se podaremo gaver la vita eterna sol nel futuro, Geovà el vol tanto che pensemo sora questa benedission belche adesso. Par esémpio, i untadi i pol pensar come sarà bel viver in cielo e governar insieme de Gesù. (Apo. 20:6) E tuti i altri servi de Geovà i pol pensar come sarà bel viver in Paradiso sensa pi sofrimento e dolor. (Apo. 21:3, 4) Se te ghè la speransa de viver par sempre qua nela Tera, no stà pensar che la to speransa la ze manco importante dela speransa de viver in cielo. Invesse, ricòrdate che Geovà el ga creà le persone par viver qua nela Tera. Alora, sìpia sicuro che viver par sempre in Paradiso te farà tanto contento.

11-12. Che robe podemo pensar sora la nostra vita in Paradiso? (Varda anca la ilustrassion.)

¹¹ Proa pensar come va esser la to vita in Paradiso. No te gavarè pi paura de morir o de restar malà, e Geovà el ndarà darte tuto quel che te vol. (Isa. 25:8; 33:24) Anca, te podarè imparar a far bele robe. Par esémpio, te podarè imparar de pi sora i oseleti e altre bèstie, a sonar un strumento e a desegnar. In Paradiso, noantri anca gavaremo bisogno de brave persone che le fà progeti de case e che le sa farle su. Anca ne ocorerà persone par far de magnar, far feramente e tender dei giardini. (Isa. 35:1; 65:21) Come te viverè par sempre, te gavarè tuto el tempo che te vol par imparar a far bele robe.

¹² Pensa come sarà bel imparar sora Geovà e  sora le bele robe che lu el ga creà, e ricever quei che i ndarà ressussitar! (Ati 24:15; Sal. 104:24; Isa. 11:9) E restaremo tanto contenti de adorar a Geovà sensa sentirse in colpa par causa de sbali. La nostra vita in Paradiso la sarà tanto bona. Alora, ghemo de seitar a esser leai a Geovà, invesse de ndarghe drio ale voie sbaliade che fursi ghemo. Parché? Parché sol se seitemo leai podaremo gaver questa bela vita. Podemo esser sicuri che la nostra vita in Paradiso la sarà tanto meio de tuto quel che podemo gaver in questo mondo. (Ebr. 11:25) E la vita in Paradiso no la ze sol una bela roba che volemo che suceda. Invesse, la ze una roba che semo sicuri che la ndarà suceder nel futuro. Ma sol podaremo gaver questa bela vita in Paradiso parché Geovà el ne ga amà tanto e el ne ga dato la vita del so caro Fiol.

MOSTRA CHE TE DÈ VALOR AL AMOR CHE GEOVÀ EL TE GA MOSTRÀ

13. Come che podemo mostrar che ghe demo valor al amor che Geovà el ne ga mostrà? (2 Corinti 6:1)

¹³ Come che podemo mostrar che ghe demo valor al sacrifìssio de Gesù e a quel che Geovà el ga fato par noantri? Ghemo de meter el so laoro in primo posto nela nostra vita. (Mat. 6:33) El testo de 2 Corinti 5:15 dise che Gesù l’è morto par tuti, e cossita tuti “quei che i vive no i ga pi de viver par lori stessi, ma par quel che l’è morto par lori e l’è stà ressussità”. Geovà el ne ga perdonà e el ne ga mostrà tanta bontà. Alora, quando femo el nostro meio par servirlo, mostremo che capimo tuto quel che el ga fato e che ghe demo valor. — Ledi 2 Corinti 6:1. f

14. Come che podemo mostrar che se fidemo nele orientassion de Geovà?

¹⁴ Noantri anca mostremo che ghe demo valor al amor che Geovà el ne mostra quando se fidemo e obedimo ale so orientassion. Alora, quando ndemo far una dessision nela vita, ghemo de sforsarse de saver quel che Geovà el vol che femo. (1 Cor. 10:31; 2 Cor. 5:7) Par esémpio, ghemo de pensar nei consili che Geovà el ne dà quando ndemo scòlier un laoro o quando ghemo de dessider se ndemo far una università o nò. Quando noantri se fidemo in Geovà e obedimo ale so orientassion, la nostra fede e la nostra amicìssia con lu le resta pi forte e restemo ancora pi sicuri che quel che lu el promete ndarà realisarse. — Rom. 5:3-5; Tia. 2:21, 22.

15. Come che podemo mostrar che ghe demo valor al amor che Geovà el ga mostrà nele stimane prima e dopo dela Selebrassion?

¹⁵ Ghen’è anca nantra maniera de mostrar che ghe demo valor al amor che Geovà el ne ga mostrà. Noantri podemo doperar le stimane prima e dopo dela Selebrassion par mostrar che el sacrifìssio de Gesù l’è tanto importante par tuti noantri. Come? Volemo sforsarse par ndar nela Selebrassion e par convidar tute le persone che podemo. (1 Tim. 2:4) Intanto che semo drio convidar le persone par vegner ala Selebrassion, podemo spiegarghe come che la va esser e mostrarghe  i vìdei Ricorda dela morte de Gesù e Parché che Gesù l’è morto?, nel site jw.org. I ansiani i pol sforsarse de convidar i fradei che no i ze pi vegnesti ale riunion e ala predicassion. Sicuro che tuti nel cielo e nela Tera i restarà tanto contenti de veder una persona tornar a servir a Geovà. (Luc. 15:4-7) Alora, quando semo nela Selebrassion, volemo saludar nò sol i nostri fradei, ma anca quei che i vien par la prima volta ala Selebrassion o che fea tempo che no i vegnea pi ale riunion. Volemo che lori i veda che semo contenti de gaverli insieme! — Rom. 12:13.

16. Parché che l’è bon far de pi par Geovà nele stimane prima e dopo dela Selebrassion?

¹⁶ Cossa pénsito de far de pi nel laoro a Geovà nele stimane prima e dopo dela Selebrassion? Se te fè cossita, te ndarè mostrar che te dè valor a tuto quel che Geovà e Gesù i ga fato par ti. E quando te te sforsi de far de pi par Geovà, te sarè ancora pi sicuro che te pol fidarte in lu e che lu el ndarà sempre giutarte. (1 Cor. 3:9) E no stà desmentegarte de far la letura dela Bìblia par la Selebrassion che ghen’è nel Testo del giorno o nela Programassion dela riunion de meso la stimana. Dopo, te pol far anca peschise sora i versìcoli che te ghè ledesto.

17. Cossa che assa Geovà contento? (Varda anca el quadro “ Come che te pol mostrar che te dè valor al amor che Geovà el ga par ti?”)

¹⁷ Fursi, no te sì bon de meter in pràtica tuto quel che ghemo imparà in questo stùdio par causa dela to situassion. Ma ricòrdate che Geovà no’l fà mia comparassion intrà quel che ti te sì bon de far e quel che i altri i fà. Invesse, lu el varda quanto grando l’è el to amor par lu. Lu el resta tanto contento quando el vede che te ghe dè valor al bel presente che lu el te ga dato, o sia, la vita del so caro Fiol. — 1 Sam. 16:7; Mar. 12:41-44.

18. Parché che ghe demo valor a tuto quel che Geovà e Gesù i ga fato par noantri?

¹⁸ Noantri sol podemo esser perdonadi dei nostri pecati, gaver una amicìssia con Geovà e gaver la speransa dela vita eterna par causa del sacrifìssio che Gesù el ga fato. Geovà el ga dessidio mandar el so Fiol ala Tera par dar la so vita par noantri parché el ne ama tanto. Volemo mostrar che ghe demo valor a tute le bele robe che Geovà el ne ga dato. (1 Gio. 4:19) Volemo mostrar che ghe demo valor anca a tuto quel che Gesù el ga fato par noantri. Par causa del so grando amor, lu el ga dato la so vita par tuti noantri! — Gio. 15:13.