STÙDIO 2
CÀNTICO 132 Semo una sol carne
Come che el omo el pol mostrar amor e rispeto ala so dona?
‘Ti sposo, daghe onor.’ — 1 PIE. 3:7.
COSSA CHE NDAREMO IMPARAR?
In questo stùdio, ndaremo veder come che un omo el pol mostrar amor e rispeto ala so dona par meso de quel che el parla e el fà.
1. Parché che Geovà el ga fato el matrimònio?
GEOVÀ l’è el “Dio felice”. (1 Tim. 1:11) Lu el ne ga dato tante bele robe par goder la vita parché el vol che anca noantri semo felici. (Tia. 1:17) Una dele bele robe che Geovà el ne ga dato la ze el matrimònio. Quando un omo e una dona i se marida, lori i promete amarse e rispetarse un al altro. Se el omo e la dona i se sforsa de gaver un grando amor nel matrimònio, lori i ze felici. — Pro. 5:18.
2. Cossa che sucede con tanti matrimoni ancoi?
2 Tanti ancoi no i ze mia felici nel so matrimònio parché no i bada mia la promessa che i ga fato de amarse e rispetarse un al altro. Studiosi i ga dito che tanti òmini i ghe dà bote ala so dona, ghe parla robe pròpio brute e la fà sofrir anca de altre maniere. Ghen’è de quei che i fà finta esser un bon omo davanti dei altri, ma i trata mal la so dona casa. E tante done no le ze felice e le pensa che el so omo no le ama mia parché lu el varda pornografia.
3. Parché che fursi un omo el trata mal la so dona?
3 Parché che fursi un omo el trata mal la so dona? Arquanti no i pensa che l’è sbalià tratar mal la so dona parché i ga sempre visto le done esser tratade cossita. Pol esser che so pare el ga sempre tratà mal la so mare o che i òmini ndove i ze de star i trata le so done cossita. Arquanti fursi i pense che i ga de mostrar a forsa chi che comanda casa, e altri òmini no i ga mia imparà a controlar i so sentimenti e i resta sempre suito cativi. E ghen’è òmini che no i ze boni de tratar la so dona dela maniera giusta parché i seita a vardar pornografia. Studiosi i ga dito che nela pandemia dela COVID-19 ancora de pi òmini i ga scominsià a tratar mal le so done. Ma no importa mia quel che ga belche sucedesto nela vita de questi òmini, lori no i pol mia tratar mal la so dona.
4. Con cossa i fradei ancoi i ga de star atenti, e parché?
4 El apòstolo Paolo el ga dito ai fradei in Roma che lori i gavea de ‘fermarse de esser moldadi de acordo con questo mondo’. (Rom. 12:1, 2) Anca se quei fradei i era drio servir a Geovà fea tanti ani, le parole de Paolo le mostra che arquanti de lori ancora i era drio pensar e far robe compagno le persone del mondo. Par quela che Paolo el ga dito che i gavea de cambiar. El consìlio del apòstolo Paolo l’è importante anca par noantri ancoi. Alora, i fradei i ga de star atenti a quel che i pensa sora le done par mai ndarghe drio la maniera che el mondo le trata. a Parché? Parché quel che una persona la pensa, la fà. E ghen’è tanti ancoi che i ze ndati drio la maniera de pensar del mondo e i ze drio tratar la so dona dela maniera sbaliada. b Ma come che Geovà el vol che un omo el trate la so dona? El testo de questo stùdio el risponde questa domanda.
5. De acordo con 1 Piero 3:7, come che el omo el ga de tratar la so dona?
5 Ledi 1 Piero 3:7. c Geovà el vol che el omo el dae onor ala so dona, o sia, la trate con tanto rispeto. Un omo che ghe dà onor ala so dona el ndarà tratarla con bontà e amor. In questo stùdio, ndaremo veder come che el omo el pol darghe onor ala so dona, e cossa che lu no’l pol mia far.
NO STÀ FAR LA TO DONA SOFRIR
6. Cossa che Geovà el sente par un omo che l’è violento cola so dona? (Colossensi 3:19)
6 Un omo no’l pol mia esser violento cola so dona. Geovà el òdia una persona che la ze violenta, e el restà pròpio disgustà quando el vede che un omo l’è violento cola so dona. (Sal. 11:5; Mal. 2:16; ledi Colossensi 3:19. d) El testo de 1 Piero 3:7 el mostra che un omo che no’l trata ben la so dona no’l pol esser amigo de Dio. Geovà no’l ndarà gnanca scoltar le so orassion.
7. De acordo con Efesi 4:31, 32, cossa che el omo no’l pol mia far? (Varda anca “Par capir meio”.)
7 El omo no’l pol osar cola so dona gnanca parlarghe robe rugne. Arquanti òmini i parla cativi cola so dona e ghe dise robe pròpio brute. Ma Geovà el òdia una persona che la parla con ‘ràbia’, che la ‘osa’ coi altri e che la ‘parla robe che ofende’. e (Ledi Efesi 4:31, 32. f) Ghemo de ricordarse che Geovà el scolta tuto. Lu l’è atento anca ala maniera che el omo el parla cola so dona casa, quando no ghen’è nissuni intorno. Un omo che el parla cativo cola so dona el rovina el so matrimònio e anca la so amicìssia con Geovà. — Tia. 1:26.
8. Cossa che Geovà el pensa sora la pornografia, e parché?
8 No stà vardar pornografia. Geovà el òdia la pornografia. Parché? Un omo che el varda robe imorai el rovina la so amicìssia con Geovà e no’l mostra rispeto ala so dona. g Geovà el vol che el omo el sìpia leal ala so dona par meso de quel che el fà e de quel che el pensa. E Gesù el ga dito che un omo che el varda una dona e el pensa robe sbaliade el ga belche fato adultèrio nel so cuor. h — Mat. 5:28, 29.
9. Parché che Geovà el òdia quando un omo el obriga la so dona a far robe che no la vol mia?
9 El omo no’l pol mia obrigar la so dona a far robe che no la vol mia quando i ze drio far sesso. Arquanti òmini i vol obrigar la so dona a far un per de robe che la pensa che le ze sbaliade e che no la vol mia. Geovà el vol che el omo el trate la so dona con amor e bontà e che el rispete i so sentimenti. (Efe. 5:28, 29) E Geovà el òdia quando el omo sol pensa in lu stesso e no’l mostra bontà ala so dona. Alora, cossa che el omo el ga de far se el ga fato una roba cossita cola so dona o el ga belche vardà pornografia? Come che el pol cambiar la so maniera de pensar e quel che el fà?
COSSA CHE POL GIUTAR EL OMO A FERMARSE DE TRATAR MAL LA SO DONA?
10. Come che el esémpio de Gesù pol giutar un fradel che l’è maridà?
10 Cossa che pol giutar un omo a fermarse de tratar mal la so dona? Lu el ga de imparar dela maniera che Gesù el ga tratà i so dissìpoli e sforsarse de tratar la so dona compagno a lu. (Efe. 5:25) Anca se Gesù no’l se ga mai maridà, lu l’è un bel esémpio par i òmini. Adesso, ndemo veder cossa che el omo el pol imparar dela maniera che Gesù el ga tratà e el ga parlà coi so apòstoli.
11. Come che Gesù el tratea i so apòstoli?
11 Gesù sempre el mostrea bontà e rispeto ai so apòstoli. Lu mai el restea cativo gnanca el parlea robe brute a lori. Anca se lu el gavesse de pi poder e autorità che i so apòstoli, lu mai el ga proà farli sentirse fiachi o spauradi. Invesse, lu l’era ùmile e sempre el fea quel che lori i gavea de bisogno. (Gio. 13:12-17) Lu el ga dito ai so dissìpoli: “Imparé de mi, parché mi son manso e ùmile de cuor, e gavaré ànimo par valtri stessi.” (Mat. 11:28-30) Gesù l’era pròpio manso, e una persona mansa no la ze mia fiaca. Parché? Parché ghe vol tanta forsa par controlar quel che la sente. Anca quando la ze disgustada, la ze bona de restar calma e controlar i so sentimenti.
12. Come che Gesù el parlea coi altri?
12 Gesù sempre el parlea quel che ndaria consolar e incoraiar i altri. Lu mai el ga dito su ai so dissìpoli. (Luc. 8:47, 48) Quando i so nemighi i ga proà farlo restar cativo, ‘lu mai el ghe ga dito su indrio’. (1 Pie. 2:21-23) E tante volte, Gesù el ga dessidio taser invesse de dirghe su ai altri. Sicuro che Gesù l’è un bel esémpio par i fradei maridadi. — Mat. 27:12-14.
13. Come che un omo el se une ala so dona? (Mateo 19:4-6) (Varda anca el ritrato.)
13 Quando l’era qua nela Tera, Gesù el ga dito che Geovà el vol che el omo ‘el se una ala so dona’. (Ledi Mateo 19:4-6. i) In questo versìcolo, la parola “se unirà” nel greco la vol dir “tacarse”. Alora, el amor intrà un omo e una dona el ga de esser pròpio forte, come se lori i fusse tacadi. Se un de lori el proa finir con questa union, tuti i due i ndarà sofrir. Cossita, un omo che el se une ala so dona mai el ndarà vardar ‘robe sensa valor’, o sia, tuti tipi de pornografia. (Sal. 119:37) Podemo dir che lu el ‘fà un acordo coi so oci’ de mai ‘vardar una dona e pensar in robe sbaliade’. — Giò 31:1.
Un omo leal mai el varda pornografia (Varda el paràgrafo 13. ) k
14. Cossa che un omo el ga de far par tornar a gaver una forte amicìssia con Geovà e un bel matrimònio?
14 Un omo che el trata mal la so dona el ga de far un per de robe par tornar a gaver una forte amicìssia con Geovà e un bel matrimònio. Che robe lu el ga de far? Prima, lu el ga de capir che quel che l’è drio far l’è pròpio sbalià, e che Geovà el varda tuto quel che el fà e el scolta tuto quel che el dise. (Sal. 44:21; Ecl. 12:14; Ebr. 4:13) Seconda, lu el ga de fermarse de tratar mal la so dona e cambiar. (Pro. 28:13) Tersa, lu el ga de domandar scusa ala so dona e a Geovà. (Ati 3:19) Lu anca el ga de domandar che Geovà lo giute a gaver voia de cambiar e a esser bon de controlar quel che el pensa, quel che el parla e quel che el fà. (Sal. 51:10-12; 2 Cor. 10:5; Fil. 2:13) Quarta, lu el ga de mostrar che el vol cambiar e imparar a odiar robe violente e parole brute. (Sal. 97:10) Quinta, lu el ga de domandar suito el aiuto dei ansiani. (Tia. 5:14-16) Sesta, lu el ga de pensar in quel che el ga de far par mai pi tratar mal la so dona. Se el omo el ga vardà pornografia, lu el ga de far queste medèsime robe. Sicuro che Geovà el ndarà giutar qualchedun che l’è drio sforsarse par cambiar. (Sal. 37:5) Ma el omo el ga de far de pi che sol fermarse de tratar mal la so dona. Lu anca el ga de imparar a darghe onor. Adesso, ndemo veder come che el omo el pol darghe onor ala so dona.
COME CHE EL OMO EL POL DARGHE ONOR ALA SO DONA?
15. Come che el omo el pol mostrar che ghe vol ben ala so dona?
15 Mostra che te ghe vol ben. Arquanti fradei che i ze maridadi i se sforsa de mostrar tuti i giorni che i ghe vol pròpio ben ala so dona. (1 Gio. 3:18) Te pol mostrar che te ami la to dona par meso de pìcole robe che te fè. Par esémpio, te pol ciaparghe par la man e darghe un strucon. O te pol mandarghe un messàgio par dirghe che te sì premoso de vederla o par domandarghe come che la va. Te pol anca scriverghe un carton par dirghe che te ghe vol tanto ben. Quando un omo el fà robe cossita, lu el ghe dà onor ala so dona e el fà pi forte el amor del matrimònio.
16. Parché che l’è bon che el omo el lode la so dona?
16 Dighe ala to dona che ela la ze tanto importante par ti. Un omo che el ghe dà onor ala so dona el parla robe che ndarà giutarla a sentirse ben e contenta. Par esémpio, lu el pol ringrassiar la so dona par tuto quel che ela la fà par giutarlo. (Col. 3:15) Quando un omo el loda la so dona, ela la resta pi contenta e la vede che lu la ama, che el vol protegerla e che el ghe dà valor. — Pro. 31:28.
17. Come che el omo el pol mostrar rispeto ala so dona?
17 Mostra bontà e rispeto ala to dona. Un omo che el ama la so dona el ndarà darghe valor e vederla come un presente tanto bel che Geovà el ghe ga dato. (Pro. 18:22; 31:10) Par quela, lu el ndarà sempre tratarla con bontà e rispeto. Alora, quando lori i ze drio far sesso, lu no’l ndarà mai obrigarla a far robe che la pensa che le ze sbaliade o che no la vol mia far. j E anca el omo no’l ga mia de far robe che lu el pensa che le ze sbaliade. — Ati 24:16.
18. Cossa che i òmini i ga de sforsarse de far? (Varda anca el quadro “ Come che el omo el pol mostrar rispeto ala so dona?”)
18 Se te sì drio sforsarte par darghe onor ala to dona, ricòrdate che Geovà l’è drio veder tuto quel che te sì drio far. Alora, seita a sforsarte par tratarla con amor, rispeto, e no stà far gnente che ndarà farla sofrir. Cossita, te ndarè mostrar ala to dona che te ghe vol ben e che la ze tanto importante par ti. Se te la trati sempre con amor e rispeto, te pol esser sicuro che te gavarè un bel matrimònio e una bela amicìssia con Geovà. — Sal. 25:14.
CÀNTICO 131 Quei che Geovà el marida
a L’è bon che i òmini i leda el artìcolo “Te trati le done come Geovà el vol?” nela Sentinela de genaro de 2024.
b Se la persona che te sì maridà la te trata mal, te pol leder “Aiuto par le vìtime de violensa domèstica” nei artìcoli in “Altri assunti” nel site jw.org o nel JW Library®.
c (1 Piero 3:7) Dela medèsima maniera, ti, sposo, seita a viver cola to sposa e te ghè de cognósserla ben. Daghe onor parché le done le ze come un vaso pi fàcile de spacar. Se no te fè cossita, Dio no’l ndarà scoltar le to orassion parché anca le done le ga la speransa de vita eterna, che la ze un presente de Dio che no meritemo mia.
d (Colossensi 3:19) Seité amar le vostre spose e no gavé de esser rabiosi con lore.
e PAR CAPIR MEIO: “Robe che ofende” le ze quel che qualchedun el parla a una persona par farla sentirse mal e desanimada. Una persona che la parla robe che ofende anca la seita a contar ai altri robe che no ghe piase mia sora quel’altra. Alora, se un omo el parla robe che fà la so dona sentirse triste o disgustada, lu l’è drio parlar “robe che ofende”.
f (Efesi 4:31, 32) Gavé de cavar via de rento tuto el rancor, la ràbia, el furor, el osar, el parlar che ofende, insieme con tuta la cativeria. 32 Ma sìpie bondosi un coi altri, e dimostré afeto e compassion. Gavé de perdonarve un al altro del tuto, cossita come Dio el ve ga perdonà del tuto par meso de Cristo.
g Varda el artìcolo “A pornografia pode destruir seu casamento” nel jw.org o nel JW Library.
h Se el omo de una dona el varda pornografia, ela la podarà leder el artìcolo “Cossa che te pol far se el to omo el varda pornografia?” nela Sentinela de agosto de 2023.
i (Mateo 19:4-6) Lu el ga rispondesto: “Valtri no gavé mia ledesto? Nel scomìnsio, quel che li ga creadi li ga fati omo e dona, 5 e el ga dito: ‘Par quela, el omo el assarà so pare e so mare, e se unirà ala so sposa, e i due i sarà una sol carne’. 6 Cossita no i ze mia pi due, ma una sol carne. Partanto, quei che Dio el ga unio, el omo no’l pol spartir.”
j La Bìblia no la parla mia se ghen’è robe giuste o sbaliade che un omo e una dona maridadi i fà quando i ze drio far sesso. El omo e la dona i ga de far dessision che le mostra che i vol darghe onor a Geovà, piaserghe un al altro e che no li fà sentirse in colpa. Queste dessision no le ze una roba che el omo e la dona maridadi ghe ocore parlar coi altri.
k ILUSTRASSION: Coleghi de laoro de un fradel i proa farlo veder pornografia nte una revista.
