STÙDIO 4
CÀNTICO 18 Gràssie par el risgate!
Cossa che el sacrifìssio de Gesù ne insegna?
“Podemo veder pròpio ben el amor de Dio par noantri.” — 1 GIOANI 4:9.
COSSA CHE NDAREMO IMPARAR?
Ndaremo veder cossa che el sacrifìssio de Gesù ne insegna sora le so qualità e le qualità de Geovà.
1. Parché che l’è bon ricordarse dela morte de Gesù tuti i ani?
GEOVÀ el ne ga dato un grando presente quando el ga mandà Gesù par dar la so vita par noantri. (2 Cor. 9:15) Par meso de questo sacrifìssio, noantri podemo esser amighi de Geovà e podaremo viver par sempre nel futuro. Sicuro che ringrassiemo tanto a Geovà, che el ga mostrà el so grando amor par meso del sacrifìssio de Gesù. (Rom. 5:8) E par giutarne a seitar a darghe valor e a mai desmentegarse de quel che lu el ga fato, Gesù el ga domandà che ricordessino del so sacrifìssio tuti i ani. — Luc. 22:19, 20.
2. Cossa che ndaremo imparar in questo stùdio?
2 In 2025, la Selebrassion dela Morte de Gesù sarà fata nel sabo, 12 de april. Sicuro che tuti noantri ndaremo sforsarse de esser in questa riunion tanto importante. Sarà tanto bon par tuti torse un tempo vanti e dopo dela Selebrassion par pensarghe sora a tuto quel che Geovà e Gesù i ze drio far par noantri. In questo stùdio, ndaremo imparar cossa che el sacrifìssio de Gesù ne insegna sora lu e sora so Pare, Geovà. Nel pròssimo stùdio, ndaremo capir parché che el sacrifìssio de Gesù l’è importante par noantri e cossa ghemo de far par mostrar che ghe demo tanto valor.
COSSA CHE EL SACRIFÌSSIO DE GESÙ NE INSEGNA SORA GEOVÀ?
3. Come che la morte de un omo podaria giutar tute le persone? (Varda anca la ilustrassion.)
3 El sacrifìssio che Gesù el ga fato ne insegna tanto sora la giustìssia de Geovà. (Deu. 32:4) Come cossita? L’è stà par causa del pecato de Adon che tuti noantri semo deventadi imperfeti e morimo. (Rom. 5:12) Alora, Geovà el ga dato la vita del so fiol par salvarne. Ma come che la morte de un omo perfeto podaria giutar tute le persone? El apòstolo Paolo el ga dito: ‘Par meso dela desobediensa de un sol omo, Adon, tanti i ze deventadi pecadori, dela medèsima maniera, par la obediensa de un sol, Gesù, tanti i deventarà giusti.’ (Rom. 5:19; 1 Tim. 2:6) Paolo l’era drio dir che par meso del pecato de un omo, noantri semo deventadi pecadori e morimo. Ma, par meso dela obediensa de un omo, noantri saremo perfeti e riceveremo la vita eterna.
Cossita come la desobediensa de un omo la ne ga portà el pecato e la morte, la obediensa de un sol omo la ne farà deventar perfeti e gaver vita eterna (Varda el paràgrafo 3.)
4. Parché che Geovà sol no’l ga assà che i fioi de Adon i vivesse par sempre?
4 Ma sarà che Gesù el gavaria pròpio de dar la so vita par noantri? Pol esser che pensemo che saria meio se Geovà sol el assasse che i fioi obedienti de Adon i vivesse par sempre. Ma la giustìssia de Geovà la ze perfeta e lu no’l podaria mia far finta che Adon no’l gavea fato un bruto pecato e che i so fioi i era perfeti. Questo no saria mia giusto!
5. Parché che podemo esser sicuri che Geovà sempre el ndarà far quel che l’è giusto?
5 Se Geovà el assasse che i fioi de Adon i vivesse par sempre ancora che i fusse imperfeti e no’l desse la vita del so Fiol, lu no’l ndaria far quel che l’è giusto. Alora, le persone no le ndaria pi creder nela giustìssia de Geovà gnanca nele so promesse. Invesse, podemo fidarse del tuto in Geovà. Parché? Parché par far quel che l’è giusto, Geovà el ga dato la roba pi importante par lu, che l’è stà la vita del so caro Fiol. Questo ne assa sicuri che Geovà sempre el ndarà far quel che l’è giusto.
6. Che nantra qualità Geovà el ga mostrà quando el ne ga dato so Fiol? (1 Gioani 4:9, 10)
6 El sacrifìssio de Gesù ne giuta a capir la giustìssia de Geovà, ma anca ne insegna che lu el ne ama tanto. (Gio. 3:16; ledi 1 Gioani 4:9, 10. b) Questo ne giuta a capir che Geovà el vol che vivemo par sempre e che femo parte dela so fameia. Quando Adon el ga pecà, lu el ga assà de far parte dela fameia de Geovà. Par quela, tuti noantri semo imperfeti e no femo pi parte dela so fameia. Ma, par causa del sacrifìssio de Gesù, tuti quei che i ga fede in Geovà e ghe obedisse i podarà far parte dela so fameia. E l’è par causa de questo sacrifìssio che belche adesso Geovà el perdona i nostri pecati e podemo gaver una bela amicìssia con lu e coi nostri cari fradei e sorele. Semo sicuri che Geovà el ne ama tanto! — Rom. 5:10, 11.
7. Come che Geovà el ga mostrà che el ne ama quando Gesù el ga sofrio?
7 Sàtana el ga dito che gnanca un servo de Geovà el seitaria leal se fusse fadiga obedirghe. Ma par mostrar che lu l’è un busier, Geovà el ga assà che so Fiol el sofrisse tanto vanti dela so morte. (Giò 2:1-5; 1 Pie. 2:21) Geovà el ga visto quando le persone lo ga tolto in giro, i soldadi ghe ga dato bote e lo ga picà su nte un pal de tortura. Lu el ga visto come Gesù el ga sofrio fin la so morte. (Mat. 27:28-31, 39) Arquante persone ghe ga dito a Gesù: ‘Se Dio l’è contento con ti, che lu el te salve.’ (Mat. 27:42, 43) E Geovà el gavea el poder par salvar so Fiol. Ma se lu el gavesse fato qualcossa, Gesù no’l gavaria dato la so vita come sacrifìssio par salvarne e no ghen saria speransa par noantri. Par quela che Geovà el ga assà che el so caro Fiol el sofrisse tanto fin la so morte. Pensarghe in come l’è stà fadiga par Geovà veder el sacrifìssio de Gesù ne assa pròpio sicuri che lu el ne ama tanto.
8. Sarà che Geovà el ga sentio qualcossa quando el ga visto el sofrimento del so Fiol? Spiega. (Varda anca la ilustrassion.)
8 Geovà el ne ga creà con sentimenti compagno a quei che lu el ga. Alora, ancora che Geovà el sìpia el Dio Tuto Poderoso, anca lu el ga sentimenti. Par esémpio, la Bìblia la dise che lu el se ga sentio “disgustà”. (Sal. 78:40, 41) E par giutarte a capir come che Geovà el se ga sentio cola morte del so Fiol, proa pensar in quel che ga sucedesto con Abraon e Isache. Geovà el gavea domandà che Abraon el desse so ùnico fiol come sacrifìssio. (Gén. 22:9-12; Ebr. 11:17-19) Pensa come che Abraon el se ga sentio triste e disgustà quando el ga pensà de copar so caro fiol. Sicuro che Geovà el ga sofrio ancora de pi quando el ga visto so caro Fiol esser maltratà e copà! — Varda el vìdeo Mostra fede compagno a lori — Abraon, Parte 2 nel jw.org.
Geovà el ga sofrio tanto quando Gesù l’è stà maltratà e l’è morto (Varda el paràgrafo 8.)
9. Cossa che imparemo sora el amor de Geovà in Romani 8:32, 38, 39?
9 El sacrifìssio de Gesù ne insegna che nissun ne ama tanto quanto Geovà. Lu el te ama de pi che i to amighi o qualchedun dela to fameia. (Ledi Romani 8:32, c 38, 39. d) Geovà el te ama tanto de pi che ti stesso. Proa pensar: Ti te vol viver par sempre? Geovà l’è ancora pi premoso de darte la vita eterna. Ti te vol gaver perdon dei to pecati? Geovà el vol perdonarte ancora de pi. E quel che lu el speta de ti l’è che te mostri fede, che te sìpia obediente e che te ghe dè valor al sacrifìssio del so Fiol. Sicuro che el sacrifìssio de Gesù el ne insegna tanto sora el amor de Geovà. In Paradiso, ndaremo imparar ancora de pi sora questo grando amor. — Ecl. 3:11.
COSSA CHE QUESTO SACRIFÌSSIO NE INSEGNA SORA GESÙ?
10. (a) Parché che Gesù l’era ansioso vanti dela so morte? (b) Come che Gesù el ga mostrà che Sàtana l’è un busier? (Varda anca el quadro “ El sacrifìssio de Gesù el ga mostrà che Geovà l’è giusto”.)
10 Gesù el se preocupa con quel che le persone le pensa sora el so Pare. (Gio. 14:31) Vanti de esser morto, Gesù l’è stà acusà de esser un criminoso e de bestemar contra el nome de Dio. Lu l’è restà massa preocupà che le persone le pensesse robe brute del so Pare. Par quela, lu el ga pregà: “Me Pare, se te pol, fà che questo càlisse el vae distante de mi.” (Mat. 26:39) Cossita, Gesù el ga mostrà che Sàtana l’è un busier, parché el ga seità fedele fin la so morte.
11. Come che Gesù el ga mostrà el so grando amor par le persone? (Gioani 13:1)
11 El sacrifìssio de Gesù ne insegna che lu el se preocupa tanto cole persone, ancora de pi coi so dissìpoli. (Pro. 8:31; ledi Gioani 13:1. e) Par esémpio, Gesù el savea che el gavaria tante dificoltà qua nela Tera e che el ndaria sofrir tanto vanti dela so morte. Ancora cossita, lu el ga fato tuto quel che Geovà ghe gavea domandà, parché el ne ama. Lu el ga mostrà questo amor quando el ga predicà, el ga insegnà e el ga giutà le persone. Nel ùltimo giorno dela so vita qua nela Tera, Gesù el ga lavà i pié dei so apòstoli par insegnarghe e incoraiarli. (Gio. 13:12-15) Quando l’era nel pal de tortura, Gesù el ga dato speransa a quel criminoso e el ga dito che lu el saria in Paradiso. Dopo, lu el ga domandà che Gioani el tendense dela so mare. (Luc. 23:42, 43; Gio. 19:26, 27) Sicuro che Gesù el ga mostrà so grando amor, nò sol quando el ga dato la so vita, ma par meso de tuto quel che el ga fato intanto che l’era qua nela Tera.
12. Cossa che Gesù el seita a far par giutarne?
12 Anca se Gesù el ga belche dato la so vita par noantri, lu el seita a far sacrifissi e a laorar par giutarne. (Rom. 6:10) Come cossita? Lu l’è drio laorar come el nostro Rè, el sasserdote pi importante e lu el tende de tute le congregassion. (1 Cor. 15:25; Efe. 5:23; Ebr. 2:17) Anca l’è Gesù che l’è drio riunir i untadi e quei che i ndarà viver par sempre qua nela Tera. Questo laoro sol ndarà finirse un pochetin vanti del fin dela Granda Tribolassion. f (Mat. 25:32; Mar. 13:7) Gesù anca l’è drio doperar el schiavo fedele e prudente par darne quel che ne ocore par seitar fedeli in questi ùltimi giorni. (Mat. 24:45) E nel so Governo de Mila Ani, lu el seitarà a laorar par giutarne. Podemo dir che Geovà el ne ga pròpio dato el so caro Fiol.
SEITA A IMPARAR
13. Come che te pol seitar a imparar sora el amor de Geovà e Gesù?
13 Se te pensi sora quel che Geovà e Gesù i ga fato par ti, te sarè bon de seitar a imparar sora el amor che i ga. Questo ano proa leder un o ancora de pi Vangeli vanti e anca dopo dela Selebrassion. Ma invesse de leder massa robe nte un colpo sol, proa leder con atension. Sfòrsate de capir e pensarghe sora quel che pol giutarte a amar ancora de pi a Geovà e a Gesù. Dopo, parla ai altri sora quel che te ghè imparà.
14. De acordo con Salmo 119:97, cossa che podemo far par seitar a imparar sora el sacrifìssio de Gesù e altre robe? (Varda anca el ritrato.)
14 Se fà belche ani che te sì un servo de Geovà, fursi te te domandi se ancora ghen’è robe nove par imparar sora la giustìssia de Geovà, el so amor e el sacrifìssio de Gesù. Ma ghemo de ricordarse che sempre podaremo imparar ancora de pi sora queste robe. Alora, cossa che te pol far? Dopera ben le nostre publicassion. Se te ledi qualcossa nela Bìblia e no te capissi ben, stùdia de pi. Dopo, in quel giorno, seita a pensarghe sora quel che te ghè studià e quel che te ghè capio sora Geovà, Gesù e el grando amor che i ga par ti. — Ledi Salmo 119:97. g
Anca se fà tanti ani che servimo a Geovà, sempre podemo imparar robe nove che ne giutarà a dar ancora de pi valor al sacrifìssio de Gesù (Varda el paràgrafo 14.)
15. Parché che l’è importante seitar a studiar la Bìblia?
15 Ma no stà restar desanimà se no te sì bon de capir robe nove tute le volte che te ledi o che te studi la Bìblia. Studiar la Bìblia l’è compagno a ndar in serca de oro. La persona la ga de laorar arquante ore o fin giorni par catar fora un pìcolo tocheto de oro. Ancora cossita, ela la seita a sforsarse parché la sa che quel tocheto de oro el ga tanto valor. Dela medèsima maniera, noantri seitemo a studiar parché savemo che tute le robe nove che capimo val tanto de pi che el oro! (Sal. 119:127; Pro. 8:10) Par quela, gàpia passiensa e seita a sforsarte par catar bele robe nela Bìblia. — Sal. 1:2.
16. Come che podemo ndar drio el esémpio de Geovà e de Gesù?
16 Intanto che te studi, pensa come che te pol meter in pràtica quel che te sì drio imparar. Par esémpio, se te sì drio studiar sora la giustìssia de Geovà, pensa come che te pol tratar i altri compagno a lu. Se te sì drio studiar sora el amor de Gesù par Geovà e par tute le persone, te pol far compagno a lu. Come? Te ghè de obedir del tuto a Geovà e giutar i altri quando i ga de bisogno. Anca te pol far compagno a Gesù quando te predichi ale persone. Cossita, lore le podarà imparar sora le bele robe che Geovà l’è drio far par giutarne e gaver fede nel sacrifìssio de Gesù.
17. Cossa che ndaremo imparar nel pròssimo stùdio?
17 Se seitemo a imparar sora el sacrifìssio de Gesù e ghe demo valor a questo bel presente, el nostro amor par Geovà e par Gesù restarà cada volta pi grando. Cossita, anca Geovà e Gesù i ndarà amarne ancora de pi. (Gio. 14:21; Tia. 4:8) Par quela, volemo doperar tuto quel che Geovà el ne ga dato par seitar a imparar de pi sora el sacrifìssio del so Fiol. Nel pròssimo stùdio, ndaremo veder altre benedission che ancora gavaremo nel futuro e come che podemo mostrar che semo tanto contenti de sentir el amor de Geovà.
CÀNTICO 107 Geovà el ne insegna a amar
a PAR CAPIR MEIO: “Pensarghe sora” vol dir seitar a pensar sora una roba e sforsarse par imparar e capir tuto sora quel che te sì drio pensar.
b (1 Gioani 4:9, 10) Podemo veder pròpio ben el amor de Dio par noantri, parché Dio el ga mandà el so ùnico Fiol al mondo, e cossita podemo guadagnar la vita par meso de lu. 10 El amor el vol dir che no semo noantri che ghemo amà a Dio, ma l’è stà lu che el ne ga amà e che el ga mandà so Fiol come sacrifìssio par i nostri pecati, un sacrifìssio par far pace con lu.
c (Romani 8:32) Lu el ga fin dato el so caro Fiol par morir par tuti noantri. Sarà che no’l ne darà anca tute le altre robe de volentiera?
d (Romani 8:38, 39) Parché mi son sicuro de che gnanca la morte, gnanca la vita, gnanca àngeli, gnanca governi, gnanca cose adesso, gnanca cose par vegner, gnanca poderi, 39 gnanca altessa, gnanca profondità, gnanca qualche altre creassion i sarà boni de spartirne del amor de Dio che l’è in Cristo Gesù, nostro Signor.
e (Gioani 13:1) Vanti dela Festività dela Pàscoa, Gesù belche el savea che la era rivada la ora de assar questo mondo par tornar col Pare. Cossita come lu el ga sempre amà i so dissìpoli che i era nel mondo, lu el ga seità amarli fin el fin.
f In Efesi 1:10, Paolo el parla sora ‘riunir le robe nel cielo’. Questo l’è difarente de quel che Gesù el ga dito in Mateo 24:31 e Marco 13:27 sora riunir i ‘scoliesti’. Paolo el ga parlà sora quando Geovà scoli i untadi col so spìrito santo. Invesse, Gesù l’era drio parlar sora riunir i untadi che i sarà ancora qua nela tera nela granda tribolassion e portarli al cielo.
g (Salmo 119:97) Mi amo tanto la lege de Dio! Mi ghe penso sora quel che la dise tuto el giorno.
