1. Che preocupassion tanti i ga ancoi?

 FURSI te ghè belche visto che tante persone ancoi le se preocupa sol con lore stesse invesse de preocuparse coi altri. Par esémpio, arquanti i dopera tanto le rede sossiai par farse veder e mostrar ai altri le robe che i ga e quel che i ze drio far. Ma, no ghen’è tanti ancoi che i vol dar glòria a Geovà. Alora, in questo stùdio, ndaremo imparar cossa che vol dir dar glòria a Geovà. Dopo, vederemo come che podemo darghe glòria, parché che ghemo de farlo e come che lu el ndarà glorificar el so nome nel futuro.

COSSA CHE VOL DIR DAR GLÒRIA A GEOVÀ?

2. Come che Geovà el ga mostrà la so glòria nel Monte Sinai? (Varda anca la ilustrassion.)

² Nela Bìblia, la parola “glòria” la ze doperada par mostrar che qualcossa o qualchedun l’è pròpio maraveioso. E Geovà l’è cossita. Par esémpio, varda quel che lu el ga fato par mostrar la so glòria pena dopo de liberar i israeliti del Egito. Ghen’era milioni de israeliti darente el Monte Sinai par scoltar quel che Geovà el ndaria dirghe. Alora, una granda nùvola la ga querto el monte e, de colpo, la tera la ga scominsià a sgorlar. Pol esser che un vulcano lì darente ga scominsià a tremar e a butar fora fogo. E ghen’era anca sciantisi, tronade e l’è vegnesto un forte busnar. (Éso. 19:16-18; 24:17; Sal. 68:8) Sicuro che i israeliti i ze restadi maraveiadi de veder el grando poder de Geovà.

3. Come che podemo dar glòria a Geovà?

³ Anca noantri podemo lodar a Geovà. Come? Una roba che podemo far l’è parlar ai altri sora tuto quel che lu el ga fato e sora le so bele qualità. E se qualchedun vien lodarne par causa  de una roba che ghemo fato, podemo dirghe che sol semo stati boni de farla parché Geovà el ne ga giutà. (Isa. 26:12) Davi l’è un bel esémpio parché sempre el ga dato glòria a Geovà. Quando lu el ga fato una orassion davanti a tuti i israeliti, lu el ga dito: ‘Ò Geovà, ti te sì maraveioso. Te ghè el poder e la glòria, parché tuto quel che ghen’è nel cielo e nela Tera l’è tuo.’ Alora, dopo quela orassion, tuti i israeliti che i era lì i ga lodà a Geovà. — 1 Cró. 29:11, 20.

4. Come che Gesù el ga dato glòria a Geovà?

⁴ Quando Gesù l’era qua nela Tera, lu el ga dato glòria a Geovà parché sempre el disea che sol l’era bon de far i so miràcoli par meso del poder del so Pare. (Mar. 5:18-20) Gesù anca el ga dato glòria a Geovà par meso de quel che el parlea sora lu e de come el tratea i altri. Par esémpio, varda come che Gesù el ga fato questo quando l’era drio insegnar nte una sinagoga. Intrà le persone che le era lì, ghen’era una dona che la era drio sofrir fea 18 ani par causa de un demònio. Questo demònio la ga fata tribolar tanto che fin la caminea sgherla. Veder quela dona ghe ga fato pecà a Gesù. Par quela, lu el ghe ga dito con bontà: ‘Dona, te sì lìbera del to problema.’ Dopo lu el ga fato un miràcolo e ela la ze stata bona de indrissarse. Quela dona la ze restada tanto contenta e la volea ringrassiar a Geovà. Par quela, ‘la ga scominsià a lodar a Dio’. (Luc. 13:10-13) Compagno a quela dona, anca noantri volemo darghe glòria a Geovà par tuto quel che lu el ne ga fato.

PARCHÉ CHE VOLEMO DARGHE GLÒRIA A GEOVÀ?

5. Parché che ghemo tanto rispeto par Geovà?

⁵ Volemo darghe glòria a Geovà parché ghemo tanto rispeto par lu. E ghen’è tante robe che ne fà rispetarlo. Par esémpio, Geovà l’è el Tuto Poderoso e el so poder no’l se finisse mai. (Sal. 96:4-7) Lu l’è leal e vedemo la so granda sabedoria par meso de quel che el ga creà. (Apo. 15:4) Anca l’è stà Geovà che el ne ga dato la vita e tuto quel che ne ocore par seitar vivi. (Apo. 4:11) E lu sempre l’è bon de far tuto quel che el vol e sempre el fà quel che el ga prometesto. (Gios. 23:14) L’è stà par quela che el profeta Geremia el ga dito: ‘Nissun l’è come ti, ò Geovà. Intrà quei che i ga sabedoria nele nassion e in tuti i regni, no ghen’è nissuni come ti.’ (Ger. 10:6, 7) Ghemo tanti boni motivi par rispetar el nostro caro Pare. Ma noantri no ghemo mia sol rispeto par Geovà, anca ghemo tanto amor.

6. Parché che noantri amemo a Geovà?

⁶ Noantri volemo darghe glòria a Geovà parché lo amemo tanto. Varda arquante bele qualità de Geovà che ne fà amarlo. Lu el ga misericòrdia e compassion. (Sal. 103:13; Isa. 49:15) Lu anca el capisse i nostri sentimenti. Alora, quando sofrimo, anca lu el sofre. (Zac. 2:8) Geovà el ne giuta a rivarse darente a lu e deventar so amighi. (Sal. 25:14; Ati 17:27) Lu anca el ga tanta umiltà. La Bìblia fin la dise che lu ‘el se sbassa par vardar el cielo e la Tera e el leva su el ùmile dela polver’. (Sal. 113:6, 7) Par causa de queste bele qualità, noantri volemo darghe glòria al nostro caro Dio. — Sal. 86:12.

7. Cossa che noantri podemo far?

⁷ Noantri demo glòria a Geovà parché volemo che i altri lo cognossa. Tante persone no le sa la verità sora Geovà parché le crede in tante busie de Sàtana. (2 Cor. 4:4) Lu el ga dito che Geovà l’è un Dio cativo, che no ghe bada quel che sucede con noantri, e che l’è lu che ne fà sofrir. Invesse, noantri savemo la verità sora Dio. Par quela, podemo contarghe  ale persone come Geovà l’è bon, e lore le podarà lodarlo insieme a noantri. (Isa. 43:10) El Salmo 96 el parla tanto sora come dar glòria a Geovà. Adesso, ndaremo imparar de pi sora questo Salmo e ndaremo veder come che noantri podemo dar a Geovà la glòria che lu el mèrita.

COME CHE PODEMO DAR A GEOVÀ LA GLÒRIA CHE LU EL MÈRITA?

8. Come che noantri podemo dar glòria a Geovà? (Salmo 96:1-3)

⁸ Ledi Salmo 96:1-3. a Noantri podemo dar glòria a Geovà par meso de quel che parlemo sora lu. In questo testo, vedemo che podemo dar glòria al nostro caro Pare quando ‘cantemo a lu’, ‘benedimo el so nome’, ‘proclamemo le bone notìssie de salvassion’ e ‘parlemo dela so glòria a tute le nassion’. Nel passà, i giudei fedeli e i primi dissìpoli de Gesù i era premosi de parlar ai altri sora le bele qualità de Geovà e spiegarghe come che lu li gavea giutadi. (Dan. 3:16-18; Ati 4:29) Come che noantri podemo far compagno?

9-10. Cossa che te ghè imparà con quel che ga sucedesto con Angelina? (Varda anca el ritrato.)

⁹ Varda quel che ga sucedesto con Angelina, b una sorela che la ze de star nei Stati Unidi. Ela la ga parlà con coraio sora Geovà nel so laoro. I so paroni i ga convidà Angelina e altre persone che le gavea scominsià a laorar lì par contarghe un pochetin sora la so vita. Alora, Angelina la gavea parecià arquanti ritrati che mostrea come la era contenta de esser una Testimònia de Geovà. I coleghi i ga scominsià a parlar un dopo quelaltro. El colega che el parlea prima de Angelina el ga contà che i so genitori i ze Testimònie de Geovà e che i gavea proà insegnarghe la Bìblia. Ma lu el ga scominsià a parlar robe rugne de noantri e de quel che credemo. Angelina la ga dito: “Mi son restada spaurada, ma no podea mia assar che le persone le credesse nele busie che lu l’era drio contar. Me tochea parlarghe la verità sora Geovà.”

¹⁰ Quando quel colega de laoro el ga finio de parlar, Angelina la ga fato presto domandar el  aiuto a Geovà. Dopo, ela la ga dito a quel omo con bontà: “Seto che anca i me genitori i ze Testimònie de Geovà? E mi seito servir a Geovà fin ancoi.” Anca se no l’è stà mia fàcile, Angelina la ze stata bona de seitar calma. Ela la ga doperà quei ritrati par mostrar come la era contenta de servir a Geovà e la ga parlà con rispeto sora quel che la credea. (1 Pie. 3:15) Cossa che ga sucedesto? Dopo che la ga finio de parlar, quel omo l’era pi calmo. Lu el ga parlà de arquante bele robe che gavea sucedesto quando l’era gióveno e el ndea ale riunion. Angelina la ga dito: “Geovà el mèrita che parlemo la verità sora lu e sora el so nome. L’è un grando onor parlar del nome de Geovà ai altri.” Quando qualchedun el parla qualcossa contra Geovà, restemo tanto contenti de parlar la verità sora lu e sora le bele robe che lu el ga fato.

11. De acordo con Salmo 96:8, come che i servi de Geovà i ga doperà quel che i gavea par darghe glòria?

¹¹ Ledi Salmo 96:8. c Noantri podemo dar glòria a Geovà par meso de quel che ghemo. I servi de Geovà sempre ghe ga dato glòria cossita. (Pro. 3:9) Par esémpio, i israeliti i ga dato soldi e altre robe par far su e par rangiar el témpio. (2 Rè 12:4, 5; 1 Cró. 29:3-9) Quando Gesù l’era qua nela Tera, arquanti dissìpoli i ga doperà quel che i gavea par giutar a lu e ai so apòstoli. (Luc. 8:1-3) E nel primo sècolo, altri dissìpoli de Gesù i ga doperà i so soldi par giutar fradei e sorele che i era drio patir la fame. (Ati 11:27-29) Ancoi, tuti noantri podemo dar glòria a Geovà par meso dei nostri donativi.

12. Come che i nostri donativi i dà glòria a Geovà? (Varda anca el ritrato.)

¹² Nel ano de 2020, quasi no ga piovesto nel Zimbàbue. Par quela, tante persone le ga patio la fame. Intrà queste persone ghen’era una sorela de nome Prisca. Ma, anca in quela bruta situassion, Prisca la ga seità a predicar tuti i mèrcore e vendre, anca quando l’era la època de pareciar la tera. Par quela, i so visigni i ghe ridea drio e i disea: “Te ndarè morir de fame.” Ma come Prisca la se fidea in Geovà, la ghe ga dito: “Geovà mai el ga abandonà i so servi.” Poco tempo dopo, i fradei i ga dato a Prisca magnar e altre robe che ghe ocorea. Lori ze stati boni de giutarla par causa dei nostri donativi. Par quela, i visigni de Prisca i ze restadi maraveiadi e i ghe ga dito: “El to  Dio no’l te ga mai abandonà. Anca noantri volemo imparar sora lu.” Alora, sete de quei visigni i ga scominsià a ndar ale riunion.

13. De acordo con Salmo 96:9, cossa che ghemo de far par dar glòria a Geovà?

¹³ Ledi Salmo 96:9. d Noantri podemo dar glòria a Geovà par meso de quel che femo. Nel passà, i sasserdoti che i laorea nel témpio i gavea de lavarse par esser neti. (Éso. 40:30-32) Ancoi, noantri ghemo de far quel che l’è giusto par esser neti. (Sal. 24:3, 4; 1 Pie. 1:15, 16) Par quela, la Bìblia la dise che ghemo de cavar via la “vècia personalità” e vestirse cola “nova personalità”. Come cossita? Ghemo de fermarse de far tuto quel che disgusta a Geovà, e sforsarse de pensar come lu e ndar drio al so bel esémpio. (Col. 3:9, 10) Col aiuto de Geovà, fin una persona che ga fato tante robe brute la pol cambiar e meter su la nova personalità.

14. Cossa che podemo imparar con quel che ga sucedesto con Jack? (Varda anca el ritrato.)

¹⁴ Varda el esémpio de Jack, un omo che l’era cognossesto come “el Demònio” parché l’era tanto violento. Par causa dele brute robe che el gavea fato, Jack l’è stà condanà ala morte. Ma intanto che el spetea el giorno dela so morte, Jack el ga acetà studiar la Bìblia con un fradel che el predichea ai prisioneri. Anca se el gavesse fato tante brute robe, Jack l’è stà bon de cavar via la so vècia personalità, e l’è stà batesà come una Testimònia de Geovà. Come lu l’era deventà una persona pròpio meio, nel giorno che l’è stà copà, fin arquanti polissiai che i laorea nela preson i ga piandesto. Un de lori el ga dito: “Jack l’era el pedo prisionero qua, ma lu el ga cambià e l’è deventà un dei meio.” Nela stimana dopo dela so morte, el fradel che ghe insegnea la Bìblia l’è tornà lì par far la riunion. Lu el ga visto che un prisionero l’era ndato nela riunion par la prima volta. Quel omo l’era restà maraveià de  veder come Jack el gavea cambià e el ga volesto studiar la Bìblia anca lu. Sicuro che podemo dar tanta glòria a Geovà par meso de quel che femo. — 1 Pie. 2:12.

COME CHE GEOVÀ EL NDARÀ DAR GLÒRIA AL SO NOME?

15. Come che Geovà el ndarà dar glòria al so nome? (Salmo 96:10-13)

¹⁵ Ledi Salmo 96:10-13. e El fin del Salmo 96 el mostra che Geovà l’è un Rè e un Giuis che giulga de maniera giusta. Lu el darà glòria al so nome quando el ndarà giulgar a tuti. Presto lu el ndarà finir fora con Babilònia, la Granda, che la ze drio far tante robe brute e insegnar tante busie sora Dio. (Apo. 17:5, 16; 19:1, 2) Arquanti i volarà adorar a Geovà insieme dei so servi dopo che Babilònia, la Granda, la sarà finida fora. Nel Armagedon, Geovà el ndarà finir fora col mondo de Sàtana e con tuti quei che i lo òdia e che i conta busie sora lu. Ma Geovà el ndarà salvar tuti quei che ghe obedisse e che i vol darghe glòria. (Mar. 8:38; 2 Tes. 1:6-10) Alora, nel fin del Governo de Mila Ani de Cristo, Geovà el ndarà santificar el so nome davanti a tuti. (Apo. 20:7-10) Nel futuro, ‘cossita come ghen’è àqua in tuto el mar, in tuta la Tera, ghen sarà persone che le saverà la verità sora Geovà’. — Aba. 2:14.

16. Cossa che te vol far? (Varda anca la ilustrassion.)

¹⁶ Sarà tanto bel quando tute le persone le ndarà viver par dar a Geovà la glòria che lu el mèrita. Ma, par intanto, podemo dar glòria a Geovà par meso de quel che femo e de quel che parlemo. Par ricordarne come questo l’è importante, el Corpo Governante el ga scoliesto el Salmo 96:8 come el testo del ano de 2025: “Deghe a Geovà la glòria che el so nome el mèrita.”