STÙDIO 3
CÀNTICO 35 Quel che l’è pi importante
Fà dessision che ghe piase a Geovà
“La prima roba par gaver sabedoria la ze gaver grando rispeto par Geovà, e par capir le robe ghe ocore cognosser a Dio, el Santìssimo.” — PRO. 9:10.
COSSA CHE NDAREMO IMPARAR?
Ndaremo veder cossa che ne ocore par far bone dessision.
1. Cossa che ghemo de far tuti i giorni?
NOANTRI ghemo de far dessision tuti i giorni. Arquante dessision le ze fàcile de far, come par esémpio, cossa magnar par colassion e a che ora ndar in leto. Invesse, altre dessision le ze difìcile de far. Se femo bone dessision, gavaremo pi salute, saremo pi felici, giutaremo la nostra fameia e serviremo meio a Geovà. L’è sicuro che volemo far dessision che le sìpia bone par noantri e par la nostra fameia e che ghe piase a Geovà. — Rom. 12:1, 2.
2. Cossa che ne ocore par far bone dessision?
2 Par far una bona dessision, te ghè de (1) saver tuto quel che te ocore, (2) capir come Geovà el pensa, e (3) pensar se la dessision la ze pròpio bona par ti e par i altri. In questo stùdio, ndaremo veder queste tre robe che ghemo de far, e como che podemo gaver la capacità de pensar. — Pro. 2:11.
VA IN SERCA DE SAVER TUTO QUEL CHE TE OCORE
3. Parché che te ocore ndar in serca de tuto quel che te ocore vanti de far una dessision? Parla de un esémpio.
3 Par far una bona dessision, prima ghemo de saver tuto quel ne ocore. Parché che l’è importante? Proa pensar nte una persona che la va al dotor parché la ga un bruto problema de salute. L’è sicuro che el dotor no’l va dirghe che tratamento che la ga de far sensa gnanca vardarla, o sensa gnanca farghe domande. Alora, compagno al dotor, anca noantri ghemo de saver tuto quel che ne ocore vanti de far una dessision. Come che podemo farlo?
4. De acordo con Proverbi 18:13, come che te pol saver tuto quel che te ocore? (Varda anca la ilustrassion.)
4 Par saver tuto quel che te ocore, te toca far domande. Par esémpio, proa pensar che te sì stà convidà par ndar nte una festa. Come che te pol dessider se te ndarè o nò? Se no te cognossi tanto ben la persona che la te ga convidà e quel che sarà fato, te pol farghe domande cossita: “Ndove e quando la sarà la festa? Quanta gente ndarà? Chi che ndarà tender? Chi che ndarà ala festa? Cossa che sarà fato? Ghen sarà bebide de alcol?” Se te sè tute queste robe, te podarè far una bona dessision. — Ledi Proverbi 18:13. a
Sfòrsate par saver tuto quel che te ocore (Varda el paràgrafo 4.) e
5. Cossa che te ghè de far dopo saver tuto quel che te ocore?
5 Dopo che te ghè savesto tuto quel te ocore, te ghè de pensarghe sora ben. Par esémpio, metemo dir che ghè savesto che persone che no obedisse a prinsipi dela Bìblia le ndarà ala festa, che ghen sarà bebide de alcol o che no ghen sarà nissuni par tender dela festa. Sarà che questa festa la ndarà ben? (1 Pie. 4:3) O proa pensar altre robe: ‘La festa la sarà nela medèsima ora dela riunion? Sarò bon de ndar ala predicassion nel giorno dopo o vao restar massa straco?’ Quando te ghe pensi sora tute queste robe, te sarè bon de far una bona dessision. Ma adesso che te sè tute queste robe te ocore anca saver quel che Geovà el pensa. — Pro. 2:6.
CAPISSI QUEL CHE GEOVÀ EL PENSA
6. De acordo con Tiago 1:5, parché che ghemo de domandar el aiuto de Geovà?
6 Te pol domandar che Geovà el te giute a capir quel che lu el pensa. Geovà el ga prometesto darne sabedoria par giutarne a capir quel che ghe piase a lu vanti che femo una dessision. Geovà el dà sabedoria a tuti de maniera “generosa e con bontà”. — Ledi Tiago 1:5. b
7. Come che podemo capir cossa che Geovà el pensa? Parla de un esémpio.
7 Dopo che te preghi par domanda el aiuto de Geovà, te ghè de star atento ala so risposta. Come cossita? Dopo de domandar el aiuto de Geovà, proa studiar le lege e i prinsipi dela Bìblia par capir la risposta de Geovà. Par giutarte a capir meio, pensa in questa ilustrassion. Metemo dir che te sì drio far un viaio e te sì perso nte un posto che no te cognossi mia. Alora, te vedi una persona che la ze de star lì e te ghe domandi aiuto. Sicuro che no te ndarissi via sensa scoltar la so risposta. Dela stessa maniera, dopo che domandemo aiuto a Geovà, ghemo de star atenti par capir la so risposta. Pensa nantra volta nela festa che ghemo parlà prima. Vanti de dessider acetar el convite, saria bon che prima te pensessi cossa che la Bìblia la dise sora far feste, sora gaver brute compagnie e sora meter el Regno in primo posto nela nostra vita. — Mat. 6:33; Rom. 13:13; 1 Cor. 15:33.
8. Cossa che te pol far se te ocore de aiuto par catar la risposta de Geovà? (Varda anca el ritrato.)
8 Ma, dele volte, te gavarè bisogno de aiuto par catar fora la risposta che te ocore. Te pol domandar aiuto a un bravo fradel o a una brava sorela. Ma te pol ndar in serca dela risposta anca ti ti sol. Come? Te pol doperar el Guia de Pesquisa para Testemunhas de Jeová o el libro Princípios Bíblicos para a Vida Cristã. Ma ricòrdate che el pi importante l’è esser bon de far una dessision che ndarà contentar a Geovà.
Proa capir quel che Geovà el pensa (Varda el paràgrafo 8.) f
9. Come che te pol esser sicuro che la to dessision ndarà contentar a Geovà? (Efesi 5:17)
9 Come che te pol esser sicuro che la to dessision la ndarà contentar a Geovà? Prima de tuto, te ghè de cognosserlo ben. La Bìblia la dise che, par gaver sabedoria, ne ocore cognosser a “Dio, el Santìssimo”. (Pro. 9:10) Alora, par gaver sabedoria, ne ocore saver quel che ghe piase a Geovà, quel che lo disgusta, le so qualità e quel che lu el vol far. Te pol domandarte: ‘Con tuto quel che mi cognosso sora Geovà, sarà che questa dessision ndarà contentarlo?’ — Ledi Efesi 5:17. c
10. Parché che i prinsipi dela Bìblia i ze pi importanti che quel che le persone le pensa o la nostra cultura?
10 Ma pol esser che le dessision che femo par contentar a Geovà no ndarà piaserghe a quei dela nostra fameia o ai amighi. Par esémpio, pensa nte un pare e una mare che i vol che la so fiola la se maride con un fradel che l’è sior, ma che no l’è mia un bravo servo de Geovà. Sicuro che lori i vol che la so fiola la gàpia una bona vita. Ma sarà che quel fradel el sarà bon de giutarla a gaver una forte amicìssia con Geovà? Cossa che Geovà el pensa sora questo? Podemo catar la risposta in Mateo 6:33. Lì dise che noantri ghemo de ‘meter el Regno nel primo posto’. Alora, anca se rispetemo el nostro pare, mare e quei che ne vol ben, ghemo de ricordarse che la roba pi importante la ze far quel che contenta a Geovà.
PENSA BEN VANTI DE FAR UNA DESSISION
11. De acordo con Filipensi 1:9, 10, cossa che pol giutarne a far una bona dessision?
11 Dopo de capir i prinsipi dela Bìblia te gavarè de pensar ben in quel che te ndarè far. (Ledi Filipensi 1:9, 10. d) Esser bon de capir quel che l’è bon e quel che no l’è mia ndarà giutarte a pensar in quel che ndarà suceder dopo de far la dessision. Dele volte, l’è fàcile dessider cossa far e saver cossa che ndarà suceder, ma arquante dessision le ze fadiga de far. Alora, esser bon de capir quel che l’è bon ndarà giutarte a far una bona dessision.
12-13. Come che capir quel che l’è giusto e sbalià ndarà giutarte a far una bona dessision sora laoro?
12 Proa pensar che te sì in serca de un laoro par dar ala to fameia quel che ghe ocore. Te ghè catà due laori difarenti e tuti i due i ze de acordo con quel che la Bìblia la dise. Alora, te pensi cossa che te ndarè far in questo laoro, quanto tempo te tocarà doperar e quanto distante cada laoro l’è dela to casa. Pol esser che te pensi in scòlier quel che te piase e che te ndarè guadagnar de pi. Ma ghen’è ancora altre robe che te toca pensar vanti dessider che laoro scòlier.
13 Par esémpio, sarà che questo laoro ndarà intrigarte de ndar ale riunion? Sarà che questo laoro ndarà tor el tempo che te ocore de star insieme dela to fameia, giutarla a gaver una forte amicìssia con Geovà e a esser felice? Queste domande le ndarà giutarte a esser sicuro dele robe che le ze pi importante. Alora, te sarè bon de pensar prima nela to adorassion a Geovà e nela to fameia invesse de pensar sol in guadagnar de pi. Cossita, te farè la meio dessision, e Geovà el ndarà benedirte.
14. Come che capir quel che l’è giusto e mostrar amor pol giutarte a no ofender i altri?
14 Capir quel che l’è bon e quel che no l’è mia ndarà giutarte a far una dessision sensa ofender i altri. (Fil. 1:10) Questo l’è tanto importante quando dessidimo che robe ndaremo meter su, e come che ndaremo postarse. Par esémpio, pol esser che un fradel o una persona che no la serve mia a Geovà pensa che l’è sbalià le robe che te piase meter su e la maniera che te sì drio postarte. Alora, se te capissi quel che l’è bon, te sarè bon de mostrar rispeto par i so sentimenti. El amor el te giutarà a esser ùmile e a pensar in quel che l’è bon par i altri. (1 Cor. 10:23, 24, 32; 1 Tim. 2:9, 10) Cossita, le to dessision ndarà mostrar el to amor e el to rispeto par i altri.
15. Cossa che te ocore vanti de far una dessision tanto importante?
15 Se te ocore far una dessision tanto importante, quel che Gesù el ga dito pol giutarte. Lu el ga dito che ne ocore ‘sentarse e pensar quanto che ndaremo guastar’. (Luc. 14:28) Cossa che le so parole ne insegna? Te ghè de pensar nel tempo, nei soldi e nel sforso che te ocorerà doperar par far quel che te ghè dessidio. Pol esser che te gavarè anca de parlar cola to fameia e spiegar come cada un el podarà giutar. Parché che l’è importante far questo? Parché pol esser che te gavarè de cambiar un per de robe che te gavei pensà, o che qualchedun el pense nte una roba meio. Se te ghe domandi quel che la to fameia la pensa e te la scolti con atension, sarà pi fàcile che tuti i gàpia caro de giutar. — Pro. 15:22.
FÀ LA MEIO DESSISION
16. Cossa che te ocore par far una bona dessision? (Varda anca el quadro “ Come far una bona dessision?”)
16 Se te fè tuto quel che ghemo visto in questo stùdio, te farè una bona dessision. Noantri ghemo visto che l’è importante ndar in serca de saver tuto quel che te ocore e pensar sora prinsipi dela Bìblia che i ndarà giutarte a far una dessision che ghe piaserà a Geovà. Dopo, te pol domandar che Geovà el te giute che tuto vae ben.
17. Cossa che ne ocore ricordarse par far bone dessision?
17 Pol esser che te ghè fato belche bone dessision nel passà. Ma no stà desmentegarte che, par far bone dessision, te ocore fidarte nela sabedoria de Geovà e no in quel che te pensi. Sol Geovà el pol darte la vera sabedoria, o sia, sol lu el pol giutarte a gaver el vero saver e a esser bon de capir quel che l’è bon e quel che no l’è mia bon. (Pro. 2:1-5) Se te fè cossita, Geovà el ndarà giutarte a far dessision che lo asse contento. — Sal. 23:2, 3.
CÀNTICO 28 Come esser amigo de Geovà
a (Proverbi 18:13) Quel che risponde vanti de scoltar i fati l’è stùpido e l’è una umiliassion par lu.
b (Tiago 1:5) Alora, se ghe manca sabedoria a qualchedun de valtri, el ga de seitar a domandarla a Dio, parché lu ghe la dà a tuti de maniera generosa e con bontà.
c (Efesi 5:17) Par quela, fermeve de esser bauchi, ma gavé de capir quala che la ze la volontà de Geovà.
d (Filipensi 1:9, 10) Ghen’è arquante robe che seito domandar in orassion. Domando che el vostro amor el sìpia cada volta pi grando cola cognossensa giusta e tuta la capassità de capir. 10 Domando che sìpie sicuri de quale che le ze le robe pi importante par esser sensa difeti e no far altri far un pecato, fin el giorno de Cristo.
