“El fruto del spìrito l’è amor, alegria, pace, passiensa, benignità, bontà, fede, benevolensa, autocontrolo.” Ma questo no vol dir che el spìrito santo el va giutarne a gaver sol queste qualità.

Varda quel che el apòstolo Paolo el ga scrito nei versìcoli vanti: “Le òpere dela carne . . . le ze imoralità sessual, impuressa, atitùdine sensa rispeto, idolatria, spiritismo, mostrar òdio, barufe, gelosia, colpi de fùria, discòrdie, seghir insegni dei òmini, invìdia, bever massa, feste sensa controlo e robe come queste.” (Gàl. 5:19-21) Quando Paolo el ga dito “robe come queste”, vol dir che nele òpere dela carne podea gaver altre òpere, come quele mensonade in Colossensi 3:5. El stesso ga sucedesto quando Paolo el ga parlà dele nove qualità del fruto del spìrito: “Contra queste robe no ghen’è lege.” Nela léngua original, la spression “queste robe” la vol dir robe come queste. Questo vol dir che no l’è sol nove qualità che fà parte del fruto del spìrito.

Questo el resta ciaro quando femo una comparassion con quel che Paolo el ga scrito ala congregassion de Èfeso: “Parché el fruto che la luce la produse l’è tuti tipi de bontà, giustìssia e verità.” (Efe. 5:8, 9) Si, la bontà, insieme dela giustìssia e verità le ze parte del “fruto dela luce”, ma anca lore le fà parte del “fruto del spìrito”.

Podemo capir meio questo, quando Paolo el ga insentivà Timòteo a gaver “la giustìssia, la devossion a Dio, la fede, el amor, la perseveransa e la benevolensa” — sei bele qualità. (1 Tim. 6:11) De queste bele qualità sol tre le fà parte del fruto del spìrito (la fede, el amor e la benevolensa). Ma l’è sicuro che Timòteo el gavea bisogno anca del spìrito santo par gaver quele altre tre qualità, la giustìssia, la devossion a Dio e la perseveransa. — Vedi anca Col. 3:12; 2 Pie. 1:5-7.

Alora, noantri capimo che in Gàlati 5:22, 23 no ghen’è tute le qualità cristiane. L’è vera che el spìrito de Dio el va giutarne a gaver le nove qualità del fruto del spìrito. Se volemo esser cristiani mauri, ghen’è tante altre qualità che ghemo de bisogno “par gaver la nova personalità che la ze stata creada de acordo cola volontà de Dio, de acordo cola vera giustìssia e lealtà.” — Efe. 4:24.