STÙDIO 26
“Ritorné a mi”
“Ritorné a mi e mi vao ritornar a valtri.” — MAL. 3:7.
CÀNTICO 102 Giutemo i fiachi
COSSA CHE NDAREMO IMPARAR? *
1. Cossa che Geovà el sente quando una piégora la ritorna a Lu?
NOANTRI ghemo visto nel stùdio passà che Geovà l’è come un bon pastor che el ama e el tende tanto dele so piégore. Geovà el va in serca dela piégora che la ze persa. Par esémpio, Geovà el ga dito ai israeliti che no i servia mia pi a Lu: “Ritorné a mi e mi vao ritornar a valtri.” E noantri podemo esser sicuri che Geovà ancora el pensa cossita, parché Lu el ga dito che ‘no’l càmbia’. (Mal. 3:6, 7) Gesù el ga dito che Geovà e anca i àngeli i resta pròpio contenti quando una persona ritorna servir a lu. — Luc. 15:10, 32.
2. Cossa che ndaremo imparar in questo stùdio?
2 In questo stùdio, ndaremo veder tre ilustrassion che Gesù el ga fato. Ndaremo imparar cossa che ghemo de far par giutar i inativi e anca che qualità le ze tanto importante mostrar. Anca ndaremo veder che gavaremo boni resultadi se giutemo questi fradei che i ze distanti de Geovà.
LA DONA CHE LA ZE NDATA IN SERCA DELA MONEDA PERSA
3-4. De acordo cola ilustrassion de Luca 15:8-10 parché che la dona la fà pròpio sforso par catar la so moneda?
3 Se noantri volemo catar le piégore perse de Geovà, ghemo de far tanto sforso. Nel libro de Luca, Gesù el ga fato una ilustrassion sora una dona che la ga perso una moneda de dracma. Questa moneda la era una roba de tanto valor par ela. La roba pi importante che podemo imparar de questa ilustrassion la ze el sforso che la dona la ga fato par catar la moneda. — Ledi Luca 15:8-10. *
4 Nei giorni de Gesù, una dona fursi la guadagnea diese monede de dracme nel giorno del so matrimònio. Fursi la moneda che la dona dela ilustrassion la ga perso la ze stata una de quele che la so mare ghe gavea dato. E la dona la ga pensà che la moneda la ze cascada par tera. Alora la dona impissa una làmpada e la va in serca. Ma no la ze bona de catar gnente. Dopo che la scoa la casa, la vede che ghen’è qualcossa che la ze drio slusar. Nela ilustrassion, Gesù el conta come che la dona la se ga sentio quando la ze stata bona de catar la so pressiosa moneda. La ze restada pròpio contenta che la ga ciamà fin i so visini e le so amighe par contarghe la bona notìssia.
5. Parché che ghe vol far tanto sforso par catar i inativi?
5 Noantri ghemo imparà nela ilustrassion de Gesù che par noantri catar qualcossa che la ze persa, ghemo de far tanto sforso. Ghemo de far el medèsimo quando che ndemo in serca dei inativi. Ghemo de far pròpio sforso parché fursi fà belche ani che lori no i va pi ale riunion. E ancora altri i ze ndati de star in nantro posto e i fradei de là fursi gnanca i li cognosse. Ma podemo esser sicuri che tanti de questi fradei i vol ritornar a Geovà. Lori i vol servir a Geovà insieme dei so fradei e sorele. Ma lori i ga bisogno de aiuto.
6. Come che tuti nela congregassion i pol giutar a ndar in serca dei inativi?
6 Chi che pol giutar a ndar in serca dei inativi? Tuti noantri. I ansiani, pionieri, quei che fà parte dela fameia e predicadori dela congregassion i pol giutar a catar questi fradei. Fursi te ghè qualche amigo o parente che l’è restà inativo? Gheto catà qualche inativo quando te eri drio predicar de casa in casa o nel testimònio pùblico? Fursi questa persona la vol ricever una vìsita dei ansiani. Te pol domandar se te pol dar el contato de questa persona ai ansiani dela to congregassion.
7. Cossa che te ghè imparà de quel che el ansiano Thomas el ga parlà?
7 Cossa che i ansiani i pol far par catar i inativi che i vol ritornar a Geovà? Varda quel che Thomas *, un ansiano dela Spagna, che ga belche giutà 40 inativi a ritornar a Geovà, el fà: “Prima de tuto mi domando ai fradei se lori i cognosse inativi e se i sa ndove che i ze de star. O anca domando ai publicadori se lori i se ricorda de qualche fradel che no vien pi ale riunion. Tanti fradei dela congregassion i ghe piase de questo, parché anca lori i pol giutar a ndar in serca de questi fradei. Dopo quando fao una vìsita a un inativo, domando anca se ghen’è fioi o altri parenti. Arquanti inativi i gavea parenti che ndea ale riunion e fursi questi i ze stati predicadori. Anca lori i ga de esser giutadi a ritornar a Geovà.”
GIUTA LE PIÉGORE PERSE A RITORNAR A GEOVÀ
8. Come el pare el tende del fiol che se ga ciamà gramo, de acordo cola ilustrassion de Luca 15:17-24?
8 Che qualità ghemo de bisogno par giutar quei che i vol ritornar a Geovà? Podemo imparar dela ilustrassion de Gesù sora el fiol che el va via de casa. (Ledi Luca 15:17-24. *) Gesù el ga dito quel che sucede quando che el fiol el va via de casa e dopo el ritorna. El pare el va in serca del fiol, lo struca ben forte mostrando el so amor par lu. El sentimento che el fiol el ga l’è de colpa parché el pensa che no’l mèrita mia esser tratà come un fiol. Lu el dise al so pare come che el se sente. El so pare el se mete nel so posto e lo capisse. De diverse maniere, el pare el mostra che l’è contento che el fiol l’è ritornà casa, nò come un empregado, ma come parte dela fameia. Par farlo capir meio questo, el pare el parécia una festa par el fiol che se ga ciamà gramo e el ghe dà robe dela meio qualità.
9. Che qualità ghemo de mostrar par giutar quei che i vol ritornar a Geovà? (Vedi el quadro “ Come giutar una persona che la vol ritornar.”)
9 Geovà l’è come el pare dela ilustrassion. Lu el ama tanto i nostri fradei e sorele inativi e el vol che lori i ritorne a Lu. Par seghir el so esémpio ghemo de giutar questi fradei. Ghemo de mostrar passiensa, méterse nel posto dei altri e mostrar amor. Parché che ghemo de mostrar queste qualità e come che podemo far questo?
10. Parché che ghe vol passiensa par giutar un inativo a ritornar a Geovà?
10 Par giutar una persona a ricuperar la so spiritualità ghe vol passiensa. Tanti che i ze stati inativi nel passà i sa che i ze stati boni de ritornar ala congregassion dopo che i fradei e i ansiani i ghe ga fato tante vìsite. Una sorela dela Àsia che la se ciama Nancy la dise: “Una granda amiga dela congregassion la me ga giutà tanto. Ela la me amea come una sorela pi vècia. La me ga giutà a ricordar del tempo che noantri ghemo fato robe insieme. La me scoltea con tanta passiensa intanto che mi parlea dei me sentimenti. Ela la me dea consili che mi gavea de scoltar. La me ga mostrà che la era una amiga de verità, pronta par giutarme in qualche situassion.”
11. Parché che méterse nel posto dei altri pol giutar una persona inativa?
11 Méterse nel posto dei altri l’è come un bon remèdio che el pol giutar la persona a restar meio. Arquanti inativi i ze disgustadi con qualchedun nela congregassion e questo pol far che no i gàpia voia de ritornar. O pol esser che lori i pensa che lori i ze stati tratadi de maniera ingiusta. Questi inativi i ga bisogno de qualchedun che li scolte e che i sìpie boni de capir i so sentimenti. (Tiago 1:19) Maria che la ze restada inativa par un tempo la dise: “Mi gavea bisogno de un amigo par scoltarme, una man par giutarme e qualchedun par piander insieme.”
12. Che ilustrassion la ne giuta a capir che Geovà el dopera el so amor par tirar darente de Lu i inativi?
12 La Bìblia la fà una comparassion del amor de Geovà par el so pòpolo con una soga. Ma in che senso? Pénseghe nela ilustrassion: Imagina che te sì nte un mar ben cativo e te sì drio negarte, e qualchedun el te dà una roba che te giuta a nò negarte. Ma sol questo no’l ndaria salvarte parché la àqua la ze massa freda. Alora te sarè bon de continuar vivo sol se qualche persona la te dà una soga par giutarte a rivar fin el barco. Geovà el ga dito ai israeliti che i ze restadi distanti: ‘Go seità doperar el amor e la bontà come soghe par tirarve darente de mi.’ (Oseia 11:4) Dio el sente el medèsimo con quei che i se ga fermà de servir a Lu e che i ze drio sfondarse in problemi e ansietà. Geovà el pol doperarte par giutar quei che i ze inativi a ritornar a Lu.
13. Come che el esémpio de Pablo el ne giuta a veder che mostrar amor ai inativi pol giutarli tanto?
13 L’è importante parlar ai inativi che noantri li amemo e che anca Geovà li ama. Nel stùdio vanti, ghemo parlà sora Pablo che, l’è restà inativo par de pi de 30 ani. Lu el ga dito: “Un giorno quando mi ero drio ndar via de casa de matina, mi go catà una cara sorela de età. Ela la me ga parlà con tanto amor che go scominsià a piander. Mi ghe go dito: ‘Mi penso che l’è stà Geovà mandarte par parlar con mi.’ L’è stà in quela situassion che mi go dessidio ritornar a Geovà.”
GIUTA I INATIVI CON AMOR
14. Cossa che el pastor el ga fato dopo che el ga catà la piégora persa de acordo con Luca 15:4, 5?
14 Dopo che semo boni de catar i inativi, ghemo de continuar darghe el aiuto che lori i ga de bisogno. Cossita come el fiol che se ga perso dela ilustrassion de Gesù, lori i ga tanti sentimenti negativi e i ze drio sofrir. E fursi no i ga pi una forte relassion con Geovà. Par via de tuto el tempo che i ze stati nel mondo de Sàtana, ghemo de giutarli a gaver nantra volta la fede in Geovà. Nela ilustrassion dela piégora persa, Gesù el ga dito che el pastor el mete la piégora sora le spale e la porta insieme ale altre piégore. El pastor el gavea belche doperà tanto tempo e sforso par catar la piégora persa, ma el savea che ela sola no la saria mia bona de ritornar ale altre piégore e che lu el gavaria de portarla. — Ledi Luca 15:4, 5. *
15. Cossa che fursi ghemo de far par giutar un inativo a ritornar a Geovà? (Vedi el quadro “ Una publicassion che la ga tanto valor.”)
15 Fursi ghemo de doperar el nostro tempo e energia par giutar i inativi a infrontar le so dificoltà. El spìrito santo de Dio, la so Parola e le publicassion dela so organisassion i ndarà giutarli a gaver nantra volta una relassion con Geovà. (Rom. 15:1) Come che podemo far questo? Un ansiano pròpio speriente el dise: “Dopo che i inativi i vol ritornar a Geovà, lori i ga bisogno che qualchedun el stùdie la Bìblia con lori.” * Alora se i ansiani i te domanda par far el stùdio con un inativo, saria tanto bon acetar questo privilègio. El ansiano anca el dise: “El predicador che el fà el stùdio, el ga de esser un bon amigo, una persona che el inativo el pol fidarse.”
LA ALEGRIA QUANDO UN INATIVO EL RITORNA
16. Come che savemo che ghemo el aiuto dei àngeli?
16 Noantri ghemo el aiuto dei àngeli par catar i inativi. (Apo. 14:6) Podemo esser sicuri che ghemo el aiuto dei àngeli, parché tante speriense le prova questo. Una dele speriense la ze del Sìlvio del Equador. Lu el ga fato una orassion a Geovà par domandarghe che lo giutesse a ritornar ala congregassion. Intanto che lu l’era drio far la orassion, due ansiani i ga sonà la so campanela. I ansiani i ze restadi pròpio contenti de giutar Sìlvio a ritornar a ndar ale riunion.
17. Cossa che sentimo quando giutemo i inativi?
17 Giutar una persona ritornar a Geovà ne dà tanta alegria. Un pioniero, che el se ciama Salvador, el fà pròpio sforso par giutar i inativi. Lu el dise: “Dele volte resto tanto contento che me vien fin de piander. L’è un privilègio pròpio grando laorar insieme con Geovà par giutar le piégore perse a ritornar a Lu.” — Ati 20:35.
18. Se te sì inativo, te pol esser sicuro de che?
18 Se ti te ghè fermà de ndar ale riunion, te pol esser sicuro de una roba: Geovà ancora el te ama. Lu el vol che te ritorni a Lu. L’è sicuro che te gavarè de far sforso. Ma te gavarè tante benedission. Parché Geovà el va ricéverte compagno el pare dela ilustrassion de Gesù. Geovà el vol tanto e l’è pròpio premoso che te ritorni.
CÀNTICO 103 Os anciãos são um presente de Jeovà
^ paràgrafo 5 Geovà el vol che quei che i ze distante de Lu i ritorne ala congregassion. E noantri podemo giutar i inativi a ritornar a Geovà. Questo stùdio ndarà mostrar cossa che podemo far par giutarli.
^ paràgrafo 3 (Luca 15:8-10) “Che dona che, gavendo diese dracme e la perde una dracma, no impissa una làmpada, scoa la casa e la va in serca con atension fin che la cata? 9 E, quando la cata, la riune le so amighe e visine, e la dise: ‘Resté contente con mi, parché go catà la dracma che mi gavea perso.’ 10 Mi ve digo che anca i àngeli de Dio i resta contenti quando una persona che la ga fato un pecato la se ciama grama.”
^ paràgrafo 7 Arquanti nomi i ze stati cambiadi.
^ paràgrafo 8 (Luca 15:17-24) “Quando el se ga nicorto de quel che el gavea fato, el ga dito: ‘Intanto che quei che i laora par me pare i ga tanto pan par magnar, mi son qua che moro de fame! 18 Mi vao ritornar a casa de me pare e vao dirghe: “Pare, go fato un pecato contra el cielo e contra ti. 19 Mi no mèrito mia esser ciamà to fiol. Fà con mi come te fè con un che laora par ti”’. 20 Cossita, lu l’è ndato via par catar el so pare. Quando lu no l’era gnancora rivà, el so pare lo ga visto e el ghe ga fato pecà. Lu l’è ndato de carera e el ghe ga dato un strucon e lo ga basà con tanto amor. 21 El fiol el ghe ga dito: ‘Pare, go fato un pecato contra el cielo e contra ti. Mi no mèrito mia esser ciamà to fiol.’ 22 Ma el pare el ga dito ai so schiavi: ‘Svelti! Porté in qua e meteghe su la meio roba longa che ghen’è. E meteghe un anel nela man e sandàlie nei pié. 23 Anca porté in qua quel vedel gordo e copelo.Ndemo magnar e far festa, 24 parché questo me fiol l’era morto e adesso lu l’è tornà a viver. Lu l’era perso e l’è stà catà.’ E i ga scominsià a far festa.
^ paràgrafo 14 (Luca 15:4, 5) “Se un omo intrà de valtri el ga 100 piégore e una la se perde, lu no’l assaria le 99 là nel deserto e ndaria in serca de quela che la se ga perso fin catarla? 5 E quando lu la cata, lu la mete nele so spale e el resta contento.
^ paràgrafo 15 Con arquanti inativi pol esser meio studiar parte del libro Continue a Amar a Deus. Con altri pol esser meio studiar nantra volta capìtoli del libro Achegue-se a Jeová. La comission de servìssio dela congregassion la ndarà scòlier el fradel o la sorela par far el stùdio.
^ paràgrafo 71 ILUSTRASSION: Tre fradei i ze drio giutar un inativo che el vol ritornar a Geovà. Lori sempre i parla con lu. Lori i lo assa sicuro che tanto Geovà come la congregassion i lo ama e i lo scolta atenti.
