1. Cossa che quele persone in Gerusalen le gavaria de far?

PROA ricordarte de quel che ga sucedesto in Gerusalen. Tante persone de altri paesi e che le parlea altre léngue le ze ndate a Gerusalen. In quel giorno, ga sucedesto una roba che le ga assade maraveiade. Arquanti dissìpoli de Gesù, che i era giudei, i ga scominsià a parlar nele léngue de quele persone. Ma quel che ghe ga piasesto de pi l’è stà quel che el apòstolo Piero e i altri dissìpoli i ghe ga dito. Lore le ze restade maraveiade de saver che quei che i gavesse fede in Gesù Cristo i podaria esser salvi. Alora, le ga domandà: ‘Cossa che ghemo de far?’ Piero el ga rispondesto: “Tuti valtri gavé de esser batesadi.” — Ati 2:37, 38.

2. Cossa che ndaremo imparar in questo stùdio? (Varda el ritrato dela prima pàgina.)

² Dopo, ga sucedesto nantra roba de maraveiarse. In quel giorno, intorno de 3 mila i ze stati batesadi e i ze deventadi dissìpoli de Gesù. E questo l’è stà sol el scomìnsio de un grando laoro che Gesù el gavea dito de far. Ancoi, quei che i va drio a Gesù i seita a far dissìpoli. Ma una persona no la impara la verità e nel medèsimo giorno la ze batesada. Un studiante el pol meterghe mesi, un ano o fin de pi tempo par batesarse. Se te ghè studi bìblichi, te capissi che ghe vol sforso par giutar una persona a deventar un servo de Geovà. In questo stùdio, ndaremo imparar sora come che podemo giutar un studiante a batesarse.

3. De acordo con Mateo 28:19, 20, cossa che el studiante el ga de far vanti de batesarse?

³ Vanti che un studiante el se batese, el ga de far quel che l’è drio imparar nel stùdio dela Bìblia. (Ledi Mateo 28:19, 20. *) Quando el fà questo el mostra che l’è come el omo sàbio dela ilustrassion de Gesù. Questo omo el cava fondo par far la so  casa sora el sasso. (Mat. 7:24, 25; Luc. 6:47, 48) Come che podemo giutar el nostro studiante a far quel che l’è drio imparar? Ndaremo veder tre robe che podemo far.

4. Come che podemo giutar el studiante a far quel che ghe ocore par esser batesà? (Vedi anca el quadro “ Giuta el to studiante a pensar in quel che el pol meter in pràtica e come el pol far”.)

⁴ Giuta el to studiante a pensar come el pol meter in pràtica quel che l’è drio imparar. Parché che te ghè de far questo? Proa imaginar che te ndarè far un longo viaio de auto. Fursi te pensi che sarà pi fàcile farlo se te te fermi in arquanti posti par la strada. L’è cossita anca col studiante. Se lu el mete in pràtica quel che el impara un poco ala volta, lu ndarà veder che el sarà bon de batesarse. Dopera la parte “Sfòrsate par . . .” del libro Te pol viver felice par sempre! par mostrar al studiante cossa che el pol meter in pràtica e parché che l’è importante far questo. E se te cati che el ga de meter in pràtica nantra roba, te pol domandar che el scriva nela parte “far anca”. Dopera questa parte del libro par discorer col studiante sora come far quel che el ga imparà nela so vita, sìpia adesso o pi avanti.

5. De acordo con Marco 10:17-22, cossa che Gesù el ga dito par un omo sior far, e parché?

⁵ Giuta el to studiante a far grandi cambiamenti nela so vita. (Ledi Marco 10:17-22. *) Pol esser che se tiremo indrio par parlarghe sora i cambiamenti che el ga de far, parché pensemo che ancora no’l sarà bon de farli. L’è vera che ghe mete tempo par fermarse de far robe sbaliade e scominsiar a far quel che Geovà el domanda. (Col. 3:9, 10) Ma se suito parlemo quel che el studiante el pol cambiar, suito el ndarà scominsiar a farli. Varda el esémpio de Gesù.  Lu el savea che ghe fea fadiga a una persona siora vender tuto quel che la gavea. (Mar. 10:23) Anca cossita el ga incoraià un omo a far questo grando cambiamento. Parché? Parché lu lo amea. Alora, anca noantri mostremo amor par el nostro studiante quando ghe parlemo sora i cambiamenti che el ga de far. — Sal. 141:5; Pro. 27:17.

6. Parché che ghemo de far domande che giute el studiante a parlar quel che el pensa?

⁶ Le domande ne giutarà a saver se el studiante l’è drio capir e creder in quel che l’è drio imparar. L’è tanto importante far domande che lo giute a parlar sora quel che el pensa. Se sempre femo questo, sarà pi fàcile discorer col studiante sora le robe che ghe fà fadiga cambiar. Nel libro Te pol viver felice par sempre! ghen’è tante domande che giuta el studiante a parlar quel che el pensa. Par esémpio, nela lession 4 ghen’è la domanda: “Come che te pensi che Dio el se sente quando te doperi el so nome?” Nela lession 9, ghen’è la domanda: “Sora che robe te piaseria parlar a Dio?” Podemo anca giutarlo a pensar nei testi dela Bìblia che ledemo e pensar sora le ilustrassion che ghen’è nela lession. Nel scomìnsio, fursi ghe farà fadiga risponder le domande, ma se seitemo a far questo, el sarà bon de farlo.

7. Come che podemo doperar el esémpio de altri fradei e sorele par giutar el nostro studiante?

⁷ Dopo che el studiante el ga capio cossa che el ga de cambiar, podemo doperar esempi de fradei e sorele par giutarlo a farlo. In arquante lession del libro Te pol viver felice par sempre!, ghen’è tanti esempi de fradei nele parte “Vuto saver de pi?”e “Impara de pi!”. * Par esémpio, se el studiante no’l va ancora ale riunion, podemo mostrarghe el vìdeo Geovà el me ga sempre tendesto nela parte “Vuto saver de pi?” dela lession 14. Ma, ghemo de star atenti par no mostrar un vìdeo e dopo dir: “Gheto visto, se questo fradel o sorela l’è stà bon de cambiar, anca ti te sarè.” L’è meio che lu el capissa questo lu sol. Saria meio parlar dele robe che ga giutà el fradel o la sorela a far i cambiamenti o parlar de un testo dela Bìblia o altra roba che li ga giutà. Proa sempre mostrar come che Geovà li ga giutà.

8. Come che podemo giutar el studiante a amar a Geovà?

⁸ Giuta el to studiante a amar a Geovà. Come che podemo far questo? Ghemo sempre de parlarghe sora le bele qualità de Geovà. Ghemo de giutarghe a capir che Geovà l’è un Dio felice e che lu sempre el giuta a quei che i lo ama. (1 Tim. 1:11; Ebr. 11:6) Ghemo de giutar el studiante a capir che quel che la Bìblia la dise l’è el meio e che l’è una prova che Geovà lo ama. (Isa. 48:17, 18) De pi che el studiante el ama a Geovà, de pi voia el gavarà de cambiar quel che ghe ocore. — 1 Gio. 5:3.

9. De acordo con Marco 10:29, 30, cossa che pol giutar un studiante a far i cambiamenti che ghe vol par batesarse?

⁹ Vanti de batesarse, un studiante el ga de far arquanti cambiamenti come quel omo sior  che Gesù el ga parlà el gavaria de far. Gesù el ghe ga dito che ghe tochea vender le so robe par ndar drio a lu. Par esémpio, se un studiante el ga un laoro che ghe toca far qualcossa che disgusta a Geovà, fursi el gàpia de cambiar el so laoro. O pol esser che lu el gàpia amighi che no i ama a Geovà, alora el gavarà de fermarse de ndar insieme con lori. O anca fursi la so fameia no la parle pi con lu parché no la ghe piase dele Testimònie de Geovà. Gesù el ga dito che no saria fàcile far questi cambiamenti par arquante persone. Ma lu el ga anca dito che la persona che la fesse questo mai la se ciamaria grama e la saria benedida con una fameia de fradei che la amaria tanto. (Ledi Marco 10:29, 30. *) Come che te pol giutar el to studiante a far parte de questa fameia?

10. Cossa che te ghè imparà col esémpio de Manuel?

¹⁰ Sìpia amigo del to studiante. L’è tanto importante mostrar al nostro studiante che ghe volemo ben. El esémpio de Manuel, del Mèssico, ne giuta a capir parché che l’è importante far questo. Lu el se pensa de quando l’era drio studiar la Bìblia. Lu el ga dito: “Quasi sempre, vanti del me stùdio, el me istrutor el me domandea come che mi stea. Mi podea veder che el me volea ben, el me scoltea e me sentia ben de parlar sora qualche roba con lu.”

11. Parché che l’è bon el istrutor tor del so tempo par star col so studiante?

¹¹ Ghemo de tor del nostro tempo par star coi nostri studianti come Gesù el fea coi so dissìpoli. (Gioani 3:22) Par esémpio, podemo convidar un studiante, che l’è drio far i cambiamenti che ghe vol, par bever un cafè, magnar qualcossa insieme o veder el programa dela TV JW. Podarìssino far questo nte un giorno che le persone del mondo le ze drio far qualche selebrassion. Cossita, el nostro studiante no’l ndarà sentirse lu sol. Kazibwe, dela  Uganda, el ga dito: “Mi go imparà sora Geovà nel me stùdio dela Bìblia, ma go anca imparà tanto quando stea col me istrutor in altre ore. Questo me ga giutà a veder che Geovà el ghe vol tanto ben ai so servi, che lori i ze felici e che l’era questa la vita che mi volea.”

12. Parché che l’è meio convidar altri fradei par ndar insieme far un stùdio?

¹² Convida altri fradei par ndar insieme far el stùdio. Fursi pensemo che l’è pi fàcile ndar noantri soli far el stùdio o convidar sempre el medèsimo fradel. Ma, par el studiante, sarà meio se convidemo altri fradei par ndar insieme. Dmitrii, dela Moldàvia, el ga dito: “Cada un che el vegnea insieme far el stùdio me giutea a capir qualcossa de difarente, e questo me ga giutà a imparar de pi. Questo me ga anca giutà a nò gaver massa vergogna par ndar ala prima riunion, parché belche cognossea arquanti fradei.”

13. Parché che ghemo de giutar el nostro studiante a ndar ale riunion?

¹³ Giuta el to studiante a ndar ale riunion. Parché che l’è importante che el studiante el vae ale riunion? Parché Geovà el ga dito che i so servi i ga de riunirse. Alora, le riunion le fà parte dela nostra adorassion a lu. (Ebr. 10:24, 25) El studiante anca el ga de ndar ale riunion parché là ghen’è i nostri fradei che i pol deventar la so fameia. Esser coi fradei nele riunion l’è come se fùssino drio goder de un bel magnar tuti insieme. Alora, le riunion le ze tanto importante par giutar i studianti a batesarse. Ma se ghe fà fadiga, el libro Te pol viver felice par sempre! el pol giutarli. Come?

14. Come che podemo giutar el nostro studiante a ndar ale riunion?

¹⁴ Podemo doperar la lession 10 del libro Te pol viver felice par sempre! par giutar el nostro studiante a ndar ale riunion. Vanti de vegner fora questo libro, arquanti fradei i ze stati convidadi par doperar questa lession coi so studianti. Lori i ga fato questo e i ga dito che li ga giutà a ndar ale riunion. Ma podemo convidarli anca vanti de rivar nela lession 10 del libro e l’è importante seitar a convidarli. Ghemo anca de star atenti ale dificoltà che el nostro studiante el ga par ndar ale riunion. Cossita, saremo boni de saver come giutarlo. E se lu ghe mete pi tempo che spetemo, no ghemo de restar desanimadi. Ghemo bisogno de passiensa e de seitar a convidarlo.

15. Fursi el nostro studiante el gàpia paura de che robe?

¹⁵ Ricòrdito de quando te sì deventà Testimònia de Geovà? Te gavei qualche paura? Par esémpio, te pensei che mai te sarissi bon de ndar predicar? O te gavei paura che la to fameia o i to amighi i restesse disgustadi con ti? Se te ghè sentio questo, alora te capissi el to studiante. Gesù el ga dito che arquanti i gavaria paura de queste robe. E lu anca el ga dito ai so dissìpoli par no assar de servir a Geovà par causa dela paura. (Mat. 10:16, 17, 27, 28) Ma cossa che Gesù el ga fato par giutarli a infrontar la paura? Come che podemo giutar i nostri studianti?

16. Come che podemo giutar el studiante a parlar sora quel che l’è drio imparar?

¹⁶ Giuta el to studiante a parlar sora quel che lu l’è drio imparar. Quando Gesù el ga mandà i dissìpoli predicar, pol esser che i ze restadi con paura. Ma Gesù li ga giutà. Come? Lu el ghe ga dito a chi parlar e cossa parlar. (Mat. 10:5-7) Come che podemo far come Gesù? Ghemo de giutar el nostro studiante a pensar a chi lu el podaria predicar. Podemo domandarghe: “Te cognossi a qualchedun che ghe piaseria saver de questa verità dela Bìblia?” Dopo, giùtalo a pensar in cossa el podaria parlar  a questa persona. Podemo doperar anca le parte “Fursi te ghè belche scoltà” e “Fursi qualchedun el te domande” del libro Te pol viver felice par sempre!. El studiante o el istrutor el podaria far finta de esser el predicador e quelaltro el paron de casa. Alora, el istrutor el pol giutar el studiante a doperar la Bìblia par risponder a una domanda de maniera sémplisse e amorosa.

17. Come che podemo doperar Mateo 10:19, 20, 29-31 par giutar el nostro studiante a fidarse in Geovà?

¹⁷ Giuta el to studiante a fidarse in Geovà. Gesù el ga assà i so dissìpoli sicuri che Geovà li amea e che sempre li giutaria. (Ledi Mateo 10:19, 20, * 29-31. *) Anca noantri ghemo de giutar el nostro studiante a esser sicuro che Geovà el ndarà giutarlo. Par esémpio, podemo pregar insieme con lu sora quel che el ga dessidio far par Geovà. Franciszek, dela Polònia, el ga dito: “El me istrutor sempre el parlea nele orassion sora quel che mi gavea dessidio far par Geovà. E quando go visto che Geovà l’era drio giutarme, anca mi go scominsià a pregar a lu. Geovà el me ga giutà quando go cambià de laoro e go bio de parlar col me paron sora i giorni par ndar al congresso e ale riunion.”

18. Cossa che Geovà el sente par quei che insegna la Bìblia ai altri?

¹⁸ Geovà el ghe vol tanto ben ai nostri studianti dela Bìblia. Geovà anca el ama tanto i istrutori parché el sa che lori i laora tanto par giutar i altri a capir la verità sora Dio. (Isa. 52:7) Se no te ghè un stùdio dela Bìblia, te pol ndar insieme coi fradei che i ga. Cossita anca ti te pol giutar questi studianti a batesarse.