1. Cossa che Geovà el ga fato par cada un de noantri?

GEOVÀ el ga scoliesto a cada un de noantri par esser so amigo. (Gioani 6:44) Gheto belche pensà sora questo? Lu el ga vardà bilioni de persone in tuto el mondo e el ga visto che te gavei un cuor sinsiero e che te ndarissi amarlo. (1 Cró. 28:9) Alora, Geovà el te cognosse, el te capisse e el te ama. L’è tanto bon saver de questo.

2. Che ilustrassion de Gesù la ne giuta a capir che Geovà el se preocupa tanto con cada un de noantri?

² Geovà el se preocupa con ti, ma anca con tuti i fradei. La ilustrassion de Gesù sora un pastor ne giuta a capir meio questo. Cossa che el pastor, che el ga 100 piégore, el fà se una la se perde? Lu el ‘assa le 99 e e el va in serca de quela che la ze persa’. Quando la cata, lu no’l resta cativo cola piégora, ma el resta contento. Cossa che imparemo? Geovà l’è come el pastor e el ghe vol ben a tute le piégore. Gesù el ga dito: “La voia del me Pare, che l’è nel cielo, la ze che gnanca un de questi pìcoli i se perde.” — Mat. 18:12-14.

3. Cossa che ndaremo veder in questo stùdio?

³ L’è sicuro che no volemo disgustar i nostri fradei. Ma, cossa che ghemo de far par no assarli disgustadi? Cossa che ghemo de far quando restemo disgustadi par causa dei altri? In questo stùdio, ndaremo risponder a queste domande. Ma prima, ndaremo capir meio chi che i ze i pìcoli che Gesù el ga dito in Mateo capìtolo 18.

4. Chi che i ze ‘questi pìcoli’?

⁴ ‘Questi pìcoli’ i ze i dissìpoli de Gesù. Anca che lori i sìpia gióveni o veci, lori i ze come tosatei parché i vol sempre imparar sora Gesù. (Mat. 18:3) Anca che i sìpia de posti e culture difarenti, che no i pensa compagno e i sìpia difarenti un del altro, tuti i ga fede in Gesù Cristo. Par quela che Gesù li ama tanto. — Mat. 18:6; Gioani 1:12.

5. Come che Geovà el se sente quando qualchedun el assa un dei so servi disgustadi?

⁵ Geovà el ghe vol ben a tuti questi pìcoli. Par capir quel che Geovà el sente, pensemo in quel che sentimo par i tosatei. Lori i ze tanto pressiosi par noantri. Volemo sempre protegerli parché no i ga tanta forsa, speriensa e no i sa tuto quel che i pi veci i sa. No ne piase de veder nissun sofrir, ma restemo ancora pi disgustadi o cativi quando vedemo i pìcoli sofrir. Geovà el se sente dela medèsima maniera. Lu el resta disgustà o anca cativo quando qualchedun el assa un dei so servi disgustadi. — Isa. 63:9; Mar. 9:42.

6. De acordo con 1 Corinti 1:26-29, cossa che le persone del mondo le pensa sora i servi de Dio?

⁶ Le persone del mondo le pensa che i servi de Dio i ze pìcoli anca par causa de nantra roba. Quei siori, poderosi e con fama i ze importante par lore. Ma i servi de Geovà quasi sempre no i ze cossita, par quela che no i ze importanti par queste persone. (Ledi 1 Corinti 1:26-29. *) Ma, Geovà no’l pensa cossita.

7. Cossa che Geovà el vol che sentimo par i nostri fradei?

⁷ Geovà el ama a tuti noantri, no importa a quanto tempo lo servimo. Tuti i nostri fradei i ze importanti par Geovà e i ga de esser importanti anca par noantri. Volemo gaver “amor par tuta la nostra fameia de fradei”, e no sol par arquanti de lori. (1 Pie. 2:17, nota.) Ghemo de far quel che ne ocore par proteger e tender dei nostri fradei. Par esémpio, quando assemo qualchedun disgustà, no ghemo de far finta che no ga sucedesto gnente. Gnanca no ghemo de pensar che la persona la ze parmolosa e che la ghe toca desmentegarse de quel che ga sucedesto. Ghemo de ricordarse che arquanti i resta disgustadi par causa de come i ze stati slevadi su e parché i pensa che no i ga valor. Altri, parché fà poco tempo che i ze deventadi servi de Geovà, alora, ghe fà fadiga perdonar a qualchedun. Ma cossa che ghemo de far se un dei nostri fradei l’è restà disgustà con noantri? Ghemo de ndar parlar con lu. Ma, anca la persona che sempre la resta disgustada coi altri la ga de cambiar. Cossita, ghen sarà pace e union nela congregassion.

8. Cossa che arquanti giudei del tempo de Gesù i pensea?

⁸ Parché che Gesù el ga parlà de ‘questi pìcoli’? L’è stà parché i dissìpoli i ghe gavea domandà: “Chi che l’è el pi importante nel Regno dei cieli?” (Mat. 18:1) I giudei de quela època i volea che i altri li vedesse come persone importante. Un omo che el stùdia tanto el ga dito: “Quele persone le seitea a voler el rispeto, el onor, la aprovassion dei altri e de esser cognosseste par tuti. Se le gavesse de bisogno, lore le moreria par queste robe.”

9. Cossa che i dissìpoli de Gesù i gavaria de far?

⁹ I giudei in quel tempo i seitea a voler esser  un meio che quelaltro. Alora Gesù el savea che i so dissìpoli i gavaria de sforsarse tanto par no pensar come lori. Gesù el ghe ga dito che quel che l’era el pi importante el gavea de esser come el pi gióveno, e quel che el gavea autorità el gavea de esser come quel che serve ai altri. (Luc. 22:26) Quando pensemo che i altri i ze pi importanti che noantri, semo drio far come el pi gióveno. (Fil. 2:3) Se sempre pensemo che i altri i ze pi importanti che noantri, sarà pi fadiga far qualcossa che li disguste.

10. Che consìlio de Paolo volemo gaver sempre in mente?

¹⁰ Quando vardemo le bele qualità dei nostri fradei, l’è fàcile veder che lori i ze meio che noantri in tante robe. Volemo gaver sempre in mente le parole de Paolo ai corinti: “Cossa che te ghè de difarente dei altri? Cossa che te ghè che no te gàpia ricevesto? Se te ghè ricevesto, parché te te comporti come se no te gavessi ricevesto?” (1 Cor. 4:7) Ghemo de star atenti se pensemo che semo pi importanti che i altri o se ne piase farse veder ai altri. Se un fradel el fà bei discorsi o una sorela la ze brava par scominsiar studi bìblichi, lori i ga de darghe el onor a Geovà.

11. Cossa che imparemo dela ilustrassion del rè e del schiavo?

¹¹ Dopo che Gesù el ga dito che i so dissìpoli no i gavea de far gnente che intrighesse i altri de servir a Geovà, lu el ga parlà dela ilustrassion de un rè e de un schiavo. Questo schiavo el gavea de pagar un grando dèbito al rè, ma el rè el ga dito che lu no’l gavea pi bisogno de pagar questo dèbito. Ma pi tardi, questo schiavo no’l ga perdonà un dèbito tanto pi pìcolo de nantro schiavo. Quando el rè el ga savesto de questo, el ga mandà questo schiavo rugno in preson. Cossa che imparemo de questa ilustrassion? Gesù el ga dito: ‘El me Pare nel cielo el ndarà tratarve dela medèsima maniera se no perdoné el vostro fradel de cuor.’ — Mat. 18:21-35.

12. Cossa che sucede quando no volemo perdonar a qualchedun?

¹² Par causa de quel che el schiavo rugno el ga fato, lu el ga sofrio ma anca el ga fato altri sofrir. Prima, lu no’l ga mostrà amor a quel schiavo parché lo ga metesto in preson fin che el ghe paghesse el dèbito. El schiavo rugno el ga fato anca i altri sofrir parché, quando i ga visto quel che gavea sucedesto, i ze restadi disgustadi. La medèsima roba la pol suceder con noantri. Fursi altri i sofre par causa de quel che femo. Par esémpio, se un fradel el ga fato qualcossa che ne ga assà disgustà e noantri no lo perdonemo, cossa che pol suceder? Prima, noantri assaremo la persona disgustada parché fursi no la trataremo con amor e no voleremo parlar con ela. Anca i fradei dela congregassion i ndarà sofrir quando i vede che una roba de questa la ze drio suceder.

13. Cossa che imparemo de quel che ga sucedesto con Crystal?

¹³ Quando perdonemo i nostri fradei e sorele, tuti i resta contenti. Una pioniera de nome Crystal la ga visto pròpio questo. Una sorela la ghe gavea disgustà. Crystal la se ricorda: “Le parole de quela sorela le taiea come un cortel e par quela mi sofria tanto. Quando ndéino predicar, mi no volea gnanca ndar rento el medèsimo auto che ela. Mi no gavea pi alegria e gnanca voia de ndar ala predicassion.” Ma, anca che quela sorela la gavesse fato quele robe, Crystal la ga dessidio no seitar disgustada o farse pecà de ela stessa. Crystal la ze stata ùmile e la ga fato quel che la ga ledesto nela Sentinela de 15 de otobre de 1999, che parlea sora perdonar de cuor.  Crystal la ga perdonà quela sorela. Ela la ga dito: “Adesso son bona de capir che tuti semo drio sforsarse par meter su la nova personalità e che Geovà el seita a perdonarne tuti i giorni. Me go sentio pròpio tranquila e era contenta nantra volta.”

14. (a) De acordo con Mateo 18:21, 22, che dificoltà el apòstolo Piero fursi el infrontea? (b) Cossa che pol giutarne se infrontemo la medèsima roba?

¹⁴ Noantri savemo che perdonar la ze la roba giusta de far. Anca cossita pol esser difìcile far questo. El apòstolo Piero fursi el se ga sentio cossita. (Ledi Mateo 18:21, 22. *) Se te te senti cossita, cossa che pol giutarte? Prima, pensa in quante volte Geovà el te ga belche perdonà. (Mat. 18:32, 33) Geovà l’è sempre pronto par perdonarne, anca che no meritemo. (Sal. 103:8-10) Ghemo anca de ricordarse che ghemo de amar un al altro. Alora, par far questo ghemo de perdonar. (1 Gio. 4:11) Seconda, pensa in quel che sucede quando te perdoni ai altri. Quando te perdoni, te giuti la persona che la ga sbalià, te giuti che ghen sìpia union nela congregassion, la to amicìssia con Geovà la resta pi forte, e te resti pi tranquilo. (2 Cor. 2:7; Col. 3:14) Tersa, domanda che Geovà el te giute. L’è lu che el ne domanda de perdonar e el vol giutarne a far questo. No stà assar che Sàtana el finissa cola pace che ghen’è intrà i fradei. (Efe. 4:26, 27) Alora, col aiuto de Geovà, no te ndarè cascar in questa tràpola del Diaol.

15. De acordo con Colossensi 3:13, cossa che ghemo de far se semo disgustadi con un fradel?

¹⁵ Ma, cossa che ghemo de far se semo disgustadi par causa de qualcossa che un fradel el ga fato contra noantri? Ghemo de far tuto  quel che podemo par mantegner la pace nela congregassion. Ghemo de parlar dei nostri sentimenti a Geovà. Ghemo anca de domandar a Geovà che el benedissa la persona che la ne ga disgustà e che el ne giute a veder le so bele qualità. (Luc. 6:28) Se ghemo bisogno de parlar cola persona, ghemo de pensar nela meio maniera de far questo. No ghemo de pensar che el fradel el ne ga disgustà aposta. (Mat. 5:23, 24; 1 Cor. 13:7) Quando ndemo parlar con questo fradel, ghemo de ricordarse de questo. Se lu no’l vol risolver el problema, ghemo de seitar soportarlo. No ghemo de desister dei nostri fradei. (Ledi Colossensi 3:13. *) L’è tanto importante no seitar disgustà cola persona. Questo podaria intrigar la nostra amicìssia con Geovà. No ghemo de assar che gnente ne intrighe de far el nostro meio a lu. Cossita, mostraremo che el nostro amor a Geovà l’è la roba pi importante par noantri. — Sal. 119:165.

16. Cossa che tuti noantri ghemo de far?

¹⁶ Noantri restemo tanto contenti de servir a Geovà coi nostri fradei nte “un sol grupo e con un sol pastor”! (Gioani 10:16) Nela pàgina 165 del libro Organizados para Fazer a Vontade de Jeová, dise: “Te piase viver in union, alora anca ti te ghè de giutar a mantegnerla.” Ghemo de imparar a veder i nostri fradei dela medèsima maniera che Geovà. Par Geovà, tuti i so servi i ze pressiosi. Sarà che anca noantri pensemo cossita? Geovà el vede e el dà tanto valor a quel che femo par giutar e par tender dei nostri fradei. — Mat. 10:42

17. Cossa che te vol far?

¹⁷ Noantri amemo i nostri fradei, par quela, no volemo far gnente che li asse disgustadi. (Rom. 14:13) Noantri volemo sempre pensar che lori i ze pi importanti che noantri e volemo perdonarli. No stà assar che gnente te intrighe de far el to meio a Geovà. Pitosto, sìpia dessidio a far tuto quel che te pol par giutar e par viver in pace coi fradei. — Rom. 14:19.