FEA un bel toco che el pòpolo de Israel el dea contribussion par giutar la vera adorassion. Ma nei giorni de Gesù, no l’era fàcile par i giudei pagar i imposti.

Tuti i giudei i gavea de pagar meso siclo (due monede de dracme) par giutar nela adorassion a Dio nel tabernàcolo e, pi tardi, anca nel témpio. Questo imposto l’era doperà par far tuti i laori nel témpio che Erode el gavea fato. Arquanti giudei i ga domandà a Piero se anca Gesù el paghea questo imposto. E Gesù el ga parlà che no l’era sbalià che i paghesse. Lu el ga anca dito a Piero ndove che lu el podea catar una moneda par pagar quel imposto. — Mat. 17:24-27.

I servi de Dio i gavea anca de pagar nantro imposto, che l’era el dìsimo. Questo l’era 10 parsento de quel che i tolea su o dei soldi che i ciapea. (Lev. 27:30-32; Nùm. 18:26-28) I lìderi religiosi de quela època anca i disea che lori i gavea de pagar el dìsimo de tute le robe, anca dela menta, del fenòcio e del comino. Gesù no’l catea che l’era sbalià pagar el dìsimo. Ma, el ga dito che i scribi e i farisei i metea in pràtica questa lege de maniera sbaliada. — Mat. 23:23.

In quela època, i giudei i era governadi par i romani. Alora, i gavea de pagar tanti imposti a Roma. Par esémpio, quei che i gavea tera i gavea de darghe intorno de 20 a 25 parsento de quel che i guadagnea o de quel che i tolea su. Anca i gavea de pagar nantro imposto che a tute le persone ghe tochea pagar. L’è stà par causa de questo imposto che i farisei i ga domandà a Gesù se l’era giusto pagarlo. Gesù el ghe ga rispondesto che i gavea de pagar a César quel che l’era de César e a Dio quel che l’è de Dio. — Mat. 22:15-22.

Ghen’era anca el imposto sora le robe che se portea a altri posti o che le vegnea de altri posti. El governo romano el domandea questi imposti nei porti, nei ponti, par le strade, quando i ndea rento le cità e nei posti che i comprea robe.

I giudei i gavea de pagar massa imposti a Roma. Tàssito l’era un romano che studiea la stòria. Varda cossa che el ga dito sora el tempo del governo de Tibèrio, che l’era quando Gesù l’era qua nela Tera: “Sìria e Giudea le ga domandà par pagar manco imposti parché le era strache de pagarli.”

L’era fadiga pagar imposti anca par causa dela maniera che i li tolea su. La persona che la paghea de pi la podea comprar el dirito de tor su imposti. Quei che i gavea questo dirito i podea ciapar anca altre persone par laorar par lori e tuti che i laorea i volea guadagnar qualcossa. Par esémpio, pol esser che Zacheo el gàpia ciapà altre persone par tor su i imposti par lu. (Luc. 19:1, 2) Cossita, capimo parché che el pòpolo el restea inrabià con questa maniera de tor su imposti e i odiea quei che i fea cossita.