1. Cossa che Davi el ga dito sora Geovà nel Salmo 18:46?

 ANCOI, pol suceder una roba de colpo che la ne fà tribolar tanto o fin una roba che la càmbia tanto la nostra vita. Ancora cossita, semo tanto contenti parché savemo che el nostro Dio el ndarà giutarne. Nel ùltimo stùdio, ghemo visto che Geovà l’è el Dio che el vive e che l’è sempre pronto par darne quel che ne ocore. E quando lu el ne giuta, vedemo che lu l’è pròpio el ‘Dio che el vive’. (Ledi Salmo 18:46. a) Ma, pena dopo dir che Geovà l’è el Dio che el vive, Davi el ga dito che Geovà l’era la ‘so Ròcia’, una roba sensa vita. Parché?

2. Cossa che ndaremo imparar in questo stùdio?

² In questo stùdio, ndaremo veder parché la Bìblia la dise che Geovà l’è come una ròcia e cossa che podemo imparar de questo. Dopo, ndaremo veder come far de Geovà la nostra ròcia e quel che ghemo de far par gaver le qualità che lu el ga.

PARCHÉ CHE GEOVÀ L’È COME UNA RÒCIA?

3. Parla de esempi che mostra che Geovà l’è come una “ròcia”. (Varda la ilustrassion.)

³ La Bìblia la ciama Geovà de “Ròcia” par giutarne a cognosser arquante dele so bele qualità. Arquanti servi de Dio del passà i disea che Geovà l’è compagno a una ròcia quando i lo lodea. La prima volta che vedemo questo l’è in Deuteronómio 32:4, ndove dise che ‘Geovà l’è la Ròcia’. Nela orassion che Ana la ga fato, ela la ga dito che ‘no ghen’è ròcia compagno al nostro Dio’. (1 Sam. 2:2) Abacuche el ga dito che ‘Geovà l’era la so Ròcia’. (Aba. 1:12) El scritor del Salmo 73 el ga dito che ‘Geovà l’era la ròcia del so cuor’. (Sal. 73:26) E fin Geovà el ga dito che lu l’è compagno a una ‘ròcia’. (Isa. 44:8) Adesso, ndemo veder tre qualità che mostra che Geovà l’è come una ròcia  e cossa che ghemo de far par far de Geovà ‘la nostra Ròcia’. — Deu. 32:31.

4. Come che Geovà l’è un refùgio? (Salmo 94:22)

⁴ Geovà l’è un refùgio. Compagno una granda ròcia la pol proteger una persona in meso una tempesta, Geovà el pol protegerne quando ghemo dele dificoltà. (Ledi Salmo 94:22. b) Lu el ne giuta e el ga prometesto che nel futuro el ndarà finir fora con tuto quel che pol farne mal. (Eze. 34:25, 26) Alora, Geovà no’l assarà che gnanca una roba la ne fae mal par sempre.

5. Come podemo far de Geovà el nostro refùgio?

⁵ Par far de Geovà el nostro Refùgio ghemo de pregar. Quando preghemo a Geovà, lu el ne dà ‘la so pace che protege el nostro cuor e la nostra mente’. (Fil. 4:6, 7) Varda quel che ga sucedesto con Arten, un fradel che l’è stà metesto in preson par causa dela so fede. Nela preson, un polissial el seitea farghe domande e lo maltratea par spaurarlo. Arten el ga dito: “L’era massa fadiga tute le volte che quel polissial el me ciamea. Mi preghea a Geovà e ghe domandea che el me giutesse a seitar calmo e a gaver sabedoria. Col so aiuto, l’era come se mi fusse de drio de una granda muràlia de sasso. Alora, anca cole brute robe che quel polissial el fea, son stà bon de seitar calmo.”

6. Parché che podemo sempre fidarse in Geovà? (Isaia 26:3, 4)

⁶ Geovà l’è leal e mai el ne abandonarà. Compagno una granda ròcia la ze sempre nel stesso posto, Geovà sempre el sarà lì par giutarne. Podemo fidarse in lu parché l’è “la Ròcia eterna”. (Ledi Isaia 26:3, 4. c) Come lu l’è eterno e l’è sempre vivo, el ndarà far quel che el ga prometesto, scoltar quel che ghe domandemo e giutarne con quel che ne ocore. Anca podemo fidarse in Geovà parché lu l’è leal ai so servi. (2 Sam. 22:26) Lu mai el ndarà desmentegarse de quel che ghemo fato par lu e sempre el ndarà benedirne. — Ebr. 6:10; 11:6.

7. Cossa che ndarà suceder se se fidemo del tuto in Geovà? (Varda anca el ritrato.)

⁷ Geovà el deventarà la nostra Ròcia se se fidemo del tuto in lu. Se seitemo obedirghe anca quando l’è fadiga, questo sarà bon par nontri. (Isa. 48:17, 18) E quando vedemo che lu sempre el ne giuta, la nostra confiansa la deventa ancora pi granda. Quando infrontemo una situassion che nissun pol giutarne, saremo boni de veder che Geovà l’è pròpio de fidarse. Varda quel che un fradel de nome Vladimir el ga dito: “Nel tempo che son restà in preson, la me amicìssia con Geovà la ze restada tanto pi forte. Go imparà a fidarme del tuto in Geovà parché ero mi mi sol e nissun altro podea giutarme.”

8. (a) Parché che podemo dir che Geovà no’l càmbia mia? (b) Parché che l’è bon saver che Geovà l’è la nostra Ròcia? (Salmo 62:6, 7)

⁸ Geovà no’l càmbia mia. Compagno a una granda ròcia, Geovà l’è firme e no’l càmbia  quel che lu l’è, la so personalità e quel che lu el vol far. (Mal. 3:6) Par esémpio, quando Adon e Eva i ze ndati contra Geovà nel giardin del Èden, lu no’l ga cambià quel che el volea par le persone. E quel che el apòstolo Paolo el ga scrito in 2 Timòteo 2:13 ne giuta a capir che no importa quel che suceda o quel che i altri i fà, Geovà mai el ndarà cambiar le so qualità, la so volontà e quel che lu l’è. Par quela, podemo fidarse che quando ghen’è dele dificoltà, Geovà el ndarà giutarne parché lu no’l càmbia mia. — Ledi Salmo 62:6, 7. d

9. Cossa che te ghè imparà de quel che ga sucedesto con Tatyana?

⁹ Quando pensemo sora le qualità de Geovà e in quel che lu el vol far par tute le persone, semo boni de far de lu la nostra Ròcia. Cossita, saremo boni de seitar calmi e fedeli, anca cole dificoltà. (Sal. 16:8) L’è pròpio questo che ga sucedesto con una sorela de nome Tatyana, che la ze stata condanada par causa dela so fede a restar casa come se la fusse in preson. Ela la ga dito: “Mi ero mi mi sola e l’è stà tanto fadiga. Dele volte, mi me sentia tanto desanimada.” Ma quando Tatyana la ga scominsià a pensar sora Geovà e sora quel che lu el ndarà far, la se ga ricordà parché che l’è tanto importante che la seite a perseverar. Ela la ga dito: “Go capio che sol ero drio tribolar parché volea seitar fedele a Geovà. Cossita, son stata bona de fermarme de pensar in mi stessa.”

10. Cossa che pol giutarne par far de Geovà la nostra Ròcia?

¹⁰ Presto ndaremo infrontar tante dificoltà e ne tocarà fidarse in Geovà come mai prima. Par quela, adesso ghemo de far pi forte la nostra confiansa che Geovà sempre el ndarà giutarne se seitemo leai. Cossa pol giutarte? Ledi la Bìblia par capir come che Geovà el ga giutà i so servi nel passà. Anca, ledi come che Geovà l’è drio giutar to fradei e sorele ancoi. Proa capir le bele qualità che Geovà sempre el mostra quando el giuta i so servi e sfòrsate de torte el tempo par pensarghe sora. Cossita, te sarè bon de far de Geovà la to Ròcia.

SFÒRSATE DE GAVER LE MEDÈSIME QUALITÀ DE GEOVÀ

11. Cossa che podemo far par gaver le medèsime qualità che Geovà? (Varda anca el quadro “ Cossa che i fradei gióveni i pol far?”)

¹¹ Fin adesso ghemo visto arquante qualità che mostra che Geovà l’è pròpio come una ròcia. Adesso, ndaremo veder cossa che noantri ghemo de far par gaver queste bele qualità. Quando se sforsemo de far compagno a Geovà, saremo boni de incoraiar i nostri fradei e sorele. Par esémpio, Gesù el ga dato a Simon el nome de Cefa (che l’è tradusio come “Piero”). Questo nome vol dir un “toco de ròcia”. (Gio. 1:42) Cossita, Gesù el ga mostrà  che Piero el ndaria far pi forte la fede dei so fradei e sorele e che el ndaria consolarli. La Bìblia la dise che i ansiani i ze “come la ombria de un grando sasso”, o sia, lori i protege i so fradei e sorele. (Isa. 32:2) Ma no l’è mia sol i ansiani che ghe toca gaver queste qualità. Pitosto, tuti noantri ghemo de sforsarse de gaver le medèsime qualità che Geovà e incoraiar i nostri cari fradei e sorele. — Efe. 5:1.

12. Come che podemo giutar i nostri fradei e sorele?

¹² Sìpia sempre pronto par giutar i to fradei e sorele. Come semo nei “ùltimi giorni”, sicuro che i nostri fradei e sorele i gavarà cada volta de pi bisogno del nostro aiuto. (2 Tim. 3:1) Alora, ghemo de star pronti par giutarli con quel che ghe ocore o fin farli vegner nela nostra casa quando sucede una desgràssia dela naturesa o guere. Noantri anca podemo darghe el consolo e el amor che i ga de bisogno. L’è tanto fadiga viver in questo mondo che le persone le trata tanto mal un al’altra. Par quela, volemo parlar, darghe atension e consolar i nostri cari fradei e sorele quando i ze nele riunion insieme a noantri. Volemo che lori i se sinta incoraiadi e che i sìpia sicuri del nostro amor.

13. Come che i ansiani i pol giutar i fradei e sorele che i ze drio infrontar dificoltà? (Varda anca el ritrato.)

¹³ I ansiani i pol darghe consolo e aiuto ai fradei che i ze drio infrontar dificoltà. Par esémpio, i ansiani i fà presto giutar i so fradei e sorele quando sucede una desgràssia dela naturesa o quando i ghe ocore de aiuto par tender dela so salute. Lori anca i dopera la Bìblia par incoraiarli. L’è pi fàcile che una sorela o un fradel el domande aiuto a un ansiano che sempre el mostra bontà, che lo scolta e che el proa capir i so sentimenti. Queste qualità giuta i fradei a sentir che i ze amadi. Cossita, sarà pi fàcile che lori i se sforse de meter  in pràtica le orientassion che i riceve dei ansiani. — 1 Tes. 2:7, 8, 11.

14. Come che podemo mostrar che semo persone de fidarse?

¹⁴ Sìpia una persona de fidarse. Volemo che i altri i sàpia che i pol domandar el nostro aiuto quando ghe ocore. (Pro. 17:17) Ma come che podemo mostrar che semo persone de fidarse? Ghemo de sforsarse de far compagno a Geovà tuti i giorni. Par esémpio, ne toca far pròpio quel che ghemo prometesto e sforsarse de rivar sempre nela ora giusta. (Mat. 5:37) Podemo anca esser sempre pronti par giutar i fradei e sorele quando ghe ocore. Anca l’è importante far i laori che ghemo ricevesto nela congregassion de acordo cole orientassion.

15. Quando i ansiani i ze persone de fidarse come che i pol giutar la congregassion?

¹⁵ L’è tanto bel quando i ansiani i ze pròpio de fidarse. Come che lori i pol esser persone de fidarse? Lori i ga de esser sempre pronti par giutar i fradei quando ghe ocore. Cossita i fradei e le sorele i resta pi calmi parché i sa che i pol domandarghe aiuto ai ansiani sempre  che ghe ocore e i se sentirà amadi. E i ansiani i ga de doperar la Bìblia e le publicassion par dar un consìlio, invesse de dir quel che i pensa, far pròpio quel che i ga prometesto e no parlar in volta robe personai che i sa. Cossita tuti i se fidarà ancora de pi in lori.

16. Parché che sempre far quel che Geovà el vol l’è bon par i altri e anca par noantri?

¹⁶ Fà sempre quel che Geovà el dise che l’è giusto. Quando semo obedienti a Geovà e femo le dessision de acordo con quel che la Bìblia la dise, semo un bon esémpio par i altri. Anca semo boni de giutar quei che i ze drio infrontar problemi e dificoltà. (1 Tes. 3:2, 3) Quando studiemo la Bìblia e femo pi forte la nostra fede in Geovà, semo boni de seitar leai e far quel che lu el vol. Anca semo boni de mai ndarghe drio ale idee false de questo mondo. (Efe. 4:14; Tia. 1:6-8) E la nostra fede in Geovà e nele so promesse ne giutarà a restar calmi quando sucede un bruto colpo. — Sal. 112:7, 8.

17. Come che i ansiani i pol giutar i fradei dela congregassion a seitar calmi e a gaver fede in Geovà?

¹⁷ I ansiani i ga de esser organisadi, gaver bon giudìssio e esser echilibradi in quel che i fà e in quel che i speta dei altri. E quando i ansiani i ze ‘fedeli ala Parola’, lori i podarà giutar i so fradei e sorele a seitar calmi e a gaver una forte fede in Geovà. (Tito 1:9; 1 Tim. 3:1-3) Quando i ansiani i dà un bon esémpio e i tende dela congregassion, i fradei i sarà pi incoraiadi a seitar ndar ale riunion, ala predicassion e a studiar la Bìblia. Quando i fradei e le sorele i ga de dàrghene fora con bruti colpi o i resta ansiosi, i ansiani li giuta a fidarse del tuto in Geovà e a gaver in mente le so promesse.

18. Parché che volemo lodar a Geovà e esser so amighi? (Varda anca el quadro “ Una maniera de esser ancora pi amighi de Geovà”.)

¹⁸ Dopo de studiar arquante qualità de Geovà, podemo dir la stessa roba che el rè Davi el ga dito: ‘Che Geovà, la me Ròcia, el sìpia lodà.’ (Sal. 144:1) Sicuro che sempre podemo fidarse del tuto in lu. Anca se vegnemo veci, savemo che el ndarà giutarne a seitar so amighi. Alora, anca noantri podemo dir: ‘Geovà l’è la me Ròcia’. — Sal. 92:14, 15.