Son nassesto in 22 de disembre de 1929. Son stà slevà in colònia, darente de Bastogne, nela region de Ardena, nela Bèlgica. Go tanti bei ricordi de quando ero pìcolo coi me genitori in colònia. Mi e me fradel Raymond mondeino le vache cole man tuti i giorni e giuteino nela racolta in colònia. Ndove èrino de star, le persone le se giutea tanto una al’altra.

I me genitori, Emile e Alice, i era ben catòlichi. Lori i ndea a messa tute le doméneghe. Ma, intorno del ano 1939, arquanti pionieri dela Inglatera i ze vegnesti ndove èrino de star e i ghe ga dito a me pare che el podea ricever tuti i mesi la revista Consolação (ancoi la ga nome Sté atenti!). Me pare el ga suito capio che quel che le reviste le disea l’era la verità e el ga scominsià a leder la Bìblia. Quando lu el se ga fermà de ndar a messa, i nostri visigni, che una volta i era cari, i ga scominsià a vegnerne contra. Lori i parlea a me pare che lu el gavea de seitar catòlico e i ghe disea su parché i volea farlo cambiar de idea.

Go sofrio tanto de veder me pare esser tratà de quela maniera. L’è par quela che go fato la orassion che go parlà prima. Son restà tanto contento quando, pin pianeto, i nostri visigni i se ga fermà de dirne su. Questo me ga giutà a esser sicuro che Geovà l’è ‘quel el scolta le orassion’.

In 10 de maio de 1940, i nazisti i ze vegnesti rento la Bèlgica e tante persone le ze scampade via del paese. Mi e la me fameia semo ndati via par el sud dela Fransa. El viaio l’è stà tanto bruto parché, dele volte, passeino in meso a posti pericolosi ndove i nazisti i era drio far guera coi francesi.

Un tempo dopo, quando semo tornadi casa, ghemo visto che quasi tute le nostre robe le era  state ciavade. Ghen’era sol el nostro can Bobbie. Queste brute robe me ga fato pensar: ‘Parché che ghen’è tante brute robe e sofrimento?’

In quela época, el fradel Emile Schrantz, a che l’era un pioniero e ansiano, el ne visitea e el ne incoraiea tanto. Lu el doperea la Bìblia par spiegarne parché che ghen’è sofrimento e el rispondea a altre domande che mi gavea sora la vita. Go scominsià a gaver una amicìssia pi forte con Geovà e a esser sicuro che lu l’è un Dio de amor.

Anca se la guera no la era gnancora finida, mi e la me fameia èrino boni de parlarse e vederse con altri fradei. In agosto de 1943, el fradel José-Nicolas Minet l’è vegnesto visitarne par far un discorso. Lu el ga domandà: “Chi che vol batesarse?” Alora, mi e me pare ghemo alsà la man, e se ghemo batesà nte un pìcolo rio darente la nostra tera.

In disembre de 1944, ghen’è stà la batàlia de Bulge, che l’è stà la ùltima volta che i nazisti i ga proà vinser la guera. Noantri èrino de star darente ndove i ga fato questa batàlia. Par quela, par un mese, ghemo bio de restar nela cantina dela nostra casa. Un giorno, son ndato fora par darghe de magnar ale bèstie. In quela ora, una bomba la ze cascada e la ga fato fora el querto del paiol. Un soldà americano l’era darente de ndove che meteino via le bèstie el me ga osà: “Bùtate in tera!” Go scominsià a corer e me go trato par tera darente de lu. Cossita, lu el me ga metesto el so capassete nela me testa par protegerme.

Dopo dela guera, semo stati boni de parlarse coi fradei dela congregassion de Liège, intorno de 90 chilòmetri dela nostra casa. Col tempo, ghemo scominsià a gaver un pìcolo grupo de stùdio in Bastogne. Go scominisà a laorar nte un scritòrio, e cossita, go bio la oportunità de studiar par deventar advogado. Dopo, go laorà nte un cartòrio. In 1951, ghemo fato una assemblea de sircuito in Bastogne, e tante persone le ze vegneste. Intrà queste, ghen’era anca una brava pioniera, Elly Reuter. Ela la gavea fato 50 chilòmetri de bissicleta par vegner ala assemblea. Se ghemo suito passionà e ghemo dessidio de maridarse. Elly la gavea ricevesto un convite par ndar far la Scola de  Gileade nei Stati Unidi. Alora, ela la ga scrito ala sede mondial par spiegar parché ela no la podaria acetar quel convite. El fradel Knorr, che l’era drio tender del laoro de predicassion dele Testimònie de Geovà in quela època, el ga scrito de maniera amorosa che un giorno fursi la podaria far la scola col so omo. Mi e Elly se ghemo maridadi in febraro de 1953.

In quel ano, mi e la me dona semo ndati nte una assemblea nel Stàdio Yankee in Nova York. Intanto che èrino là, go catà un fradel che el me ga dito che el me daria un laoro se me cambiesse par i Stati Unidi. Alora, mi e la me dona ghemo pregà sora questo a Geovà. Ghemo dessidio de no acetar questo convite e de tornar ala Bèlgica par giutar un pìcolo grupo de diese fradei in Bastogne. Nel ano dopo, semo restadi tanto contenti quando l’è nassesto el nostro fioleto, Serge. Ma sete mesi dopo, el se ga malà e l’è morto. Noantri semo restadi tanto tristi. Par quela, ghemo pregà tanto a Geovà, e lu el ne ga consolà cola speransa dela ressuression.

In otobre de 1961, go catà un laoro de mesa giornada. Cossita, gavaria podesto esser pioniero. Ma in quel giorno, el fradel che el tendea del Betel dela Bèlgica el me ga telefonà. Lu el me ga domandà se podea laorar come servo de sircuito, che adesso ga nome superintendente de sircuito. Mi ghe go domandà: “Podarìssino seitar come pionieri prima de deventar superintendenti de sircuito?” Lori i ga dito che podarìssino far cossita. Alora, semo stati pionieri par oto mesi, e in setembre de 1962, ghemo scominsià a esser superintendenti de sircuito.

Dopo de servir come superintendenti de sircuito par due ani, semo stati convidadi par servir nel Betel de Bruxelas in 1964. Noantri ghemo ricevesto tante benedission là. Par esémpio, un tempo dopo che el fradel Knorr el ga visità el Betel in 1965, son restà tanto contento de esser stà convidà par tender dela filial. Dopo, quel che el fradel Knorr el gavea parlà 13 ani prima se ga pròpio realisà, parché mi e Elly semo stati convidadi par far parte dela turma 41 dela Scola de Gileade. Dopo la Scola, semo tornadi al Betel dela Bèlgica.

Mi go anca podesto doperar quel che savea sora le lege par difender la libertà dei nostri fradei dela Europa e de tanti altri posti. (Fil. 1:7) Par quela, go podesto cognosser autorità de de pi de 55 paesi ndove i nostri fradei no i era pròpio lìberi de adorar a Geovà. Invesse de dir a queste autorità quel che mi savea sora le lege, mi sempre ghe disea che ero “un omo de Dio”. Mi me go sempre fidà in Geovà parché savea che ‘el cuor del rè, o del giuis, l’è come àque nele so man, e lu el ghe ga la diression che el vol’. — Pro. 21:1.

Ancora me ricordo tanto ben de quel che ga sucedesto quando go proà catar una autorità tanto importante dela Europa. Mi gavea belche domandà  tante volte de discorer con lu. Dopo tanto tempo, lu el ga acetà riceverme. Ma lu el ga dito: “Mi go sol sinque minuti.” Alora, mi go sbassà la testa e go scominsià a pregar. Par quela lu el me ga domandà cossa che ero drio far. Mi ghe go rispondesto: “Mi ero drio ringrassiar a Dio parché ti te sì una dele autorità che le ze al so servìssio.” Lu el me ga dito: “Cossa vol dir?” Alora, mi ghe go mostrà Romani 13:4. Come lu l’era dela religion Protestante, lu el cognossea e el rispetea tanto la Bìblia. Quel che ga sucedesto dopo l’è stà tanto bel. Noantri ghemo discoresto par mesa ora e lu el ga dito che el rispetea el laoro dele Testimònie de Geovà.

Fà belche tanti ani che le Testimònie de Geovà le ga de ndar ai tribunai parché no le ga volesto meterse nele robe del governo, par causa de imposti o de altre robe. Mi resto tanto contento de gaver giutà in arquante de queste volte e de veder come Geovà el ne ga sempre benedio. El Supremo Tribunal Europeo dei Diriti dele Persone el ne ga dato quel che gaveino domandà de pi de 140 volte.

In quela època, i nostri fradei no i gavea mia tanta libertà de adorar a Geovà in Cuba. Alora, nei ani 90, mi go laorà insieme ai fradei Philip Brumley, dela sede mondial, e del fradel Valter Farneti, dela Itàlia, par giutar questi cari fradei de Cuba. Mi go scrito ala autorità de Cuba che la era nela Bèlgica par domandarghe se podarìssino catarse par discorer. Ma quando se ghemo catà, no semo stati boni de spiegarghe ben come l’era el laoro dele Testimònie de Geovà e de esser pròpio intesi.

Dopo de pregar a Geovà, noantri ghemo domandà ale autorità de Cuba se podarìssino mandarghe 5.000 Bìblie ai nostri fradei. Le autorità le ga acetà che mandessino. Alora, ghemo visto che Geovà l’era drio benedir el nostro laoro. Par quela, anca ghe ghemo domandà se podarìssino mandar altre 27.500 Bìblie, e nantra volta, le autorità le ne ga assà mandarle. Mi son restà tanto contento de gaver giutà i nostri fradei in Cuba.

Mi son ndato diverse volte a Cuba par giutar i nostri fradei che i gavea de ndar al tribunal. Alora, mi son stà bon far amicìssia con arquante autorità del governo.

In 1994, de pi de 1 milion de persone le ze state copade parché le era de una tribo de nome Tutsi. Anca tanti fradei e sorele i ze stati copadi.  Par quela, arquanti fradei i ze stati convidadi par ndar giutar i fradei in Ruanda.

Quando semo rivadi a Kigali, che l’è la capital del paese, ghemo visto che el Scritòrio de Tradussion e el posto ndove i metea via le publicassion i era pieni de busi de bale. Noantri ghemo scoltà stòrie tanto brute sora i fradei che i ze stati copadi con faconi. Noantri anca ghemo scoltà stòrie de fradei che i ga mostrà tanto amor parché i ga giutà un al altro. Par esémpio, ghemo cognossesto un fradel tutsi che el se gavea sconto nte un buso par 28 giorni nela casa de fradei che i era hutu. Nela riunion che semo ndati in Kigali, semo stati boni de incoraiar de pi de 900 fradei e sorele.

Dopo, ghemo passà la frontiera e semo rivadi a Zaire, che ancoi ga nome Repùblica Democràtica del Congo. Èrino in serca de un grando grupo de Testimònie de Geovà de Ruanda che le era nte un campo de refugiadi darente la cità de Goma. Ma noantri no semo stati boni de catarli. Alora ghemo fato una orassion a Geovà e ghe ghemo domandà aiuto. Pena dopo, ghemo visto un omo che l’era drio caminar fin noantri. Noantri ghe ghemo domandà se lu el cognossea qualche Testimònia de Geovà. E lu el ga dito: “Si, mi son una Testimònia de Geovà. Go caro de portarve ndove l’è el grupo de fradei che i ze drio giutar qua.” Alora, ghemo fato una riunion par incoraiar tanto questi fradei. Dopo, ghemo fato una riunion con intorno de 1.600 fradei refugiadi par darghe consolo e incoraiamento. Noantri ghe ghemo ledesto una carta del Corpo Governante. I fradei e le sorele i ze restadi tanto contenti con quel che el Corpo Governante el ga scrito: “Valtri sì sempre nele nostre orassion. Savemo che Geovà no’l ve abandonarà mai.” E questo l’è pròpio vera parché ancoi ghen’è de pi de 30.000 Testimònie de Geovà in Ruanda. Le parole de Corpo Governante le ze state pròpio vere.

Dopo de quasi 58 ani de maridadi, in 2011, la me cara Elly la ze morta. Mi parlea a Geovà che me sentia tanto triste, e lu el me ga consolà tanto. Nantra roba che me ga giutà e me ga dato consolo la ze stata predicar le bone notìssie ai altri.

Anca se go de pi de 90 ani, mi seito a predicar tute le stimane. Son tanto contento parché posso anca giutar el Departamento Giurìdico del Betel dela Bèlgica cola me speriensa e incoraiar i gióveni de Betel.

Intorno de 84 ani indrio, go fato la me prima orassion a Geovà. De lì avanti, go bio una vita maraveiosa e me sento cada volta pi darente de lu. Ringràssio tanto a Geovà parché lu el ga sempre scoltà le me orassion in tuta la me vita. — Sal. 66:19. b