STÙDIO 25
CÀNTICO 7 Geovà, nostra forsa e poder
Ricòrdate che Geovà l’è el “Dio che el vive”
‘Geovà el vive!’ — SAL. 18:46.
COSSA CHE NDAREMO IMPARAR?
Ricordarse che adoremo a Geovà, “el Dio che el vive” ndarà giutarne tanto.
1. Cossa che pol giutarne a seitar a adorar a Geovà?
LA BÌBLIA belche la disea che i nostri giorni i saria “difìcili de soportar”. (2 Tim. 3:1) Noantri ghemo i problemi compagno ale persone che no le serve a Geovà, ma anca ghemo de dàrghene fora con quei che i ne vien contra e cola perseghission. Ma se semo sicuri che Geovà l’è el ‘Dio che el vive’, saremo boni de seitar a adorarlo e de infrontar anca queste dificoltà. — Ger. 10:10; 2 Tim. 1:12.
2. Come che Geovà el mostra che l’è el Dio che el vive?
2 Geovà l’è una persona che la sa quel che semo drio infrontar e che l’è sempre pronto par giutarne. (2 Cró. 16:9; Sal. 23:4) Quando se ricordemo che el Dio che el vive l’è sempre pronto par giutarne, saremo boni de infrontar qualche dificoltà. Ndemo veder come Geovà el ga giutà el rè Davi.
3. Cossa che Davi el ga volesto dir cole parole “Geovà el vive”?
3 Davi el cognossea ben a Geovà e el se fidea del tuto in lu. Par esémpio, quando el rè Saul e altri nemighi i era drio proar coparlo, Davi el ga pregà par domandar aiuto a Geovà. (Sal. 18:6) Dopo che Geovà lo ga salvà, Davi el ga dito: “Geovà el vive.” (Sal. 18:46) Cossa che Davi el volea dir? Un libro che el spiega tante robe sora la Bìblia el ga dito che Davi el volea mostrar che el se fidea che Geovà l’è el ‘Dio che el vive e che l’è sempre pronto par giutar i so servi’. Davi el cognossea a Geovà e el savea che el ndaria sempre giutarlo. Par quela, lu el ga seità a servir e a lodar a Geovà. — Sal. 18:28, 29, 49.
4. Cossa che ndarà suceder se semo sicuri che Geovà l’è el Dio che el vive?
4 Se noantri semo sicuri che Geovà l’è el Dio che el vive, saremo boni de meterghela tuta nela nostra adorassion a lu e sempre volaremo esser so amighi. Anca gavaremo forsa par dàrghene fora con qualche dificoltà e faremo el nostro meio a lu.
EL DIO CHE EL VIVE EL TE DARÀ FORSA
5. De acordo con Filipensi 4:13, cossa che ndarà giutarne a ricordarse che semo boni de dàrghene fora con qualche dificoltà?
5 Se se ricordemo che Geovà l’è el Dio che el vive e che sempre el ndarà giutarne, saremo boni de dàrghene fora con qualche dificoltà, no vol dir se la ze pìcola o granda. Geovà l’è el Dio Tuto Poderoso, e no ghen’è gnanca un problema che el sìpia massa grando par lu. Ghemo anca de ricordarse che lu el ndarà darne la forsa che ne ocore. (Ledi Filipensi 4:13. a) Alora, podaremo infrontar le nostre dificoltà con coraio. E quando vedemo che Geovà el ne giuta a dàrghene fora coi problemi pi pìcoli, saremo sicuri che lu el ndarà giutarne anca coi pi bruti.
6. Che robe ga sucedesto intanto che Davi l’era gióveno che lo ga fato esser sicuro che Geovà el ndaria giutarlo?
6 Vedemo due robe che ga sucedesto con Davi che lo assea sicuro che Geovà sempre el ndaria giutarlo. Quando lu l’era un gióveno pastor, lu l’è stà bon de copar un orso che el gavea ciapà una dele piégore de so pare. Dopo, lu l’è stà bon de copar anca un leon par salvar una piégora. Davi el ga mostrà tanto coraio. Ma invesse de pensar che lu l’è stà bon de salvar le piégore lu lu sol, Davi el savea che Geovà lo gavea giutà. (1 Sam. 17:34-37) Davi sempre el se ricordea de quel che gavea sucedesto. Pensarghe sora queste robe lo ga fato esser sicuro che el Dio che el vive el ndaria sempre giutrarlo.
7. Cossa che ga giutà Davi a esser bon de ndar contra Golia?
7 Un tempo dopo, quando Davi fursi l’era ancora un gióveno, lu l’è ndato visitar el acampamento del esèrsito de Israel. Lu el ga visto che tuti i era pròpio spauradi par causa de Golia, un filisteo pròpio grando che l’era drio ‘sfidar i soldadi de Israel’. (1 Sam. 17:10, 11) I soldadi i gavea tanta paura parché i vedea sol quel che Golia l’era drio parlar e quanto grando l’era. (1 Sam. 17:24, 25) Invesse de vardar queste robe, Davi el savea che Golia l’era drio sfidar el esèrsito de Israel e anca el ‘esèrsito del Dio che el vive’. (1 Sam. 17:26) Davi el ghe pensea in Geovà e el savea che lu el ndaria giutarlo compagno el gavea fato quando l’era un pastor. Par quela Davi l’è stà bon de ndar contra Golia e de coparlo. — 1 Sam. 17:45-51.
8. Cossa che podemo far par esser sicuri che Geovà sempre el ndarà giutarne? (Varda anca el ritrato.)
8 Se semo sicuri che el Dio che el vive l’è sempre pronto par giutarne, anca noantri saremo boni de dàrghene fora con qualche dificoltà. (Sal. 118:6) Come? Podemo pensar sora quel che Geovà el ga fato nel passà. Alora, ledi la Bìblia e ricòrdate de tuto quel che Geovà el ga fato par salvar i so servi. (Isa. 37:17, 33-37) Te pol anca leder nel jw.org sora quel che Geovà l’è drio far ancoi par giutar i fradei e sorele. Anca proa pensar sora quel che lu el ga belche fato par giutarte. Pol esser che lu no’l gàpia fato una roba de maraveiarse, come giutarte a ndar contra un orso o un leon. Ma te pol esser sicuro che Geovà el ga belche fato tante robe par ti. Par esémpio, l’è stà lu che el ga volesto esser to amigo. (Gio. 6:44) E lu l’è drio giutarte a seitar fedele. Alora proa domandarghe che el te giute a ricordar le volte che el ga rispondesto ale to orassion, el te ga giutà nela ora giusta e el te ga tendesto nei to bruti colpi. Se te pensi sora queste robe, te sarè ancora pi sicuro che Geovà sempre el ndarà giutarte.
Quel che femo quando infrontemo una dificoltà pol assar Geovà contento o disgustà (Varda i paràgrafi 8 e 9.)
9. Cossa che ghemo de ricordarse quando semo drio infrontar una dificoltà? (Proverbi 27:11)
9 Veder Geovà come el Dio che el vive ndarà giutarne a pensar dela maniera giusta sora le nostre dificoltà. Come cossita? Quando infrontemo una dificoltà, ghemo de pensar in quel che l’è pi importante. Sàtana el ga dito che quando infrontessino qualche dificoltà no seitarìssino a adorar a Geovà. (Giò 1:10, 11; ledi Proverbi 27:11. b) Se seitemo leai nele dificoltà, assemo ciaro che amemo a Geovà e mostremo che Sàtana l’è un busier. Fursi te sì drio infrontar un bruto problema, perseghission del governo, dificoltà coi soldi, o pol esser che le persone ndove te predichi no le vol scoltarte. Alora, ricòrdate che quel che te fè pol contentar tanto a Geovà. Nantra roba che ne ocore gaver in mente la ze che Geovà mai el ndarà assar che te infronti una dificoltà che no te sì bon de soportar. (1 Cor. 10:13) Sicuro che Geovà sempre el ndarà darte la forsa che te ocore par dàrghene fora.
EL DIO CHE EL VIVE EL NDARÀ BENEDIRTE
10. Cossa che Geovà el dà a quei che i ze leai a lu?
10 Geovà sempre el benedisse quei che i ze leai a lu. (Ebr. 11:6) Par esémpio, lu el ne dà pace e felicità ancoi e el ne darà la vita eterna nel futuro. Noantri se fidemo del tuto in Geovà parché savemo che lu el vol e el pol giutarne. Par quela, volemo seitar a far el nostro meio a lu, compagno a arquanti dei so servi del passà. Vedemo adesso el bel esémpio che Timòteo el ga dato. — Ebr. 6:10-12.
11. De acordo con 1 Timòteo 4:10, parché che Timòteo el fea el so meio par Geovà e par giutar i so fradei?
11 Ledi 1 Timòteo 4:10. c Timòteo el ga fato el so meio nel laoro a Geovà e el ga giutà tanto i so fradei parché l’era sicuro che Geovà el ndaria benedirlo. Che bele robe el ga fato? Lu el se ga sforsà par insegnar ben nela congregassion e nela predicassion, cossita come Paolo el ghe gavea dito. Timòteo anca el ga fato el so meio par esser un esémpio par i fradei pi gióveni e anca pi veci. E lu el ga bio de far tanti laori difìcili, come darghe forti consili con amor a quei che ghe ocorea. (1 Tim. 4:11-16; 2 Tim. 4:1-5) L’è vera che fursi i fradei no i vedea tuto quel che Timòteo el fea. Ma lu l’era sicuro che Geovà l’era drio veder el so laoro e che el ndaria benedirlo. — Rom. 2:6, 7.
12. Parché che i ansiani i dà el so meio par tender dela congregassion? (Varda anca el ritrato.)
12 Ancoi, anca i ansiani i pol esser sicuri che Geovà li vede e che lu el resta tanto contento con tuto el laoro che i fà. I ansiani i incoraia i fradei dela congregassion, i ghe insegna e i fà el so meio nela predicassion. Arquanti de lori anca i giuta a far su Saloni del Regno e i giuta i fradei quando sucede desgràssie. Altri i fà vìsite ai fradei maladi in ospedal o i fà parte dela Comission de Contato coi Ospedai. Questi bravi ansiani i sa che la congregassion la ze de Geovà e che la organisassion no la ze mia de òmini. Par quela, lori i fà el so laoro con tuto el cuor e i ze sicuri che Geovà el ndarà benedirli. — Col. 3:23, 24.
No stà mai desmentegarte che Geovà el ndarà benedirte par tuto el laoro che te fè par lu (Varda i paràgrafi 12 e 13.)
13. Cossa che Geovà el sente quando femo el nostro meio par lu?
13 L’è vera che gnanca tuti i pol esser ansiani. Ma tuti noantri podemo dar el nostro meio a Geovà. El nostro caro Dio el resta tanto contento quando se sforsemo de servirlo del tuto. Par esémpio, lu el vede quando ghe demo dei nostri soldi par giutar nel laoro de predicassion, anca se l’è poco. Lu anca el vede quando mostremo coraio par levar su la man par far un comentàrio nela riunion. E lu el resta contento quando el vede che semo stati boni de perdonar un fradel che ne ga ofendesto. Alora, anca se te no te pol far tuto quel che te volarissi par Geovà, sìpia sicuro che lu el dà tanto valor a tuto quel che te fè. Lu el te vol tanto ben e el ndarà benedirte. — Luc. 21:1-4.
SEITA A ESSER AMIGO DEL DIO CHE EL VIVE
14. Come che la nostra amicìssia con Geovà pol giutarne a seitar leai a lu? (Varda anca el ritrato.)
14 Se ghemo una forte amicìssia con Geovà, sarà pi fàcile seitar leai a lu. Ricòrdate che Giusepe no’l ga volesto far imoralità sessual. Lu l’era amigo de Geovà e no’l volea far gnente che lo assesse disgustà. (Gén. 39:9) Ma cossa ghemo de far par gaver una amicìssia forte cossita con Geovà? Ne ocore torse el tempo par pregar a lu e studiar la Bìblia. Cossita, saremo cada volta pi amighi de Dio. Se la nostra amicìssia con Geovà la ze forte, mai volaremo far gnente che lo disguste. — Tia. 4:8.
Seitar a gaver una forte amicìssia con Geovà te giutarà a esser fedele (Varda i paràgrafi 14 e 15.)
15. Cossa che quel che i israeliti i ga fato ne insegna? (Ebrei 3:12)
15 Quei che i assa de fidarse in Geovà fursi anca i assa de esser leai. Varda quel che ga sucedesto coi israeliti quando i era nel deserto. Lori i credea in Geovà, ma i ga scominsià a gaver dubi se lu el ndaria pròpio tenderli. Lori i ga fin domandà: “Geovà elo con noantri, o nò?” (Éso. 17:2, 7) Par quela, un tempo dopo, lori i ga scominsià a ndar contra Dio. Sicuro che mai volemo far compagno i israeliti e desobedir a Geovà. — Ledi Ebrei 3:12. d
16. Parché che no l’è mia fàcile seitar a gaver una forte amicìssia con Geovà ancoi?
16 Parché che pol esser fadiga seitar a gaver una forte amicìssia con Geovà ancoi? In questo bruto mondo, tante persone no le crede in Dio. E pol esser che ne par che le ga una vita bona, anca se no le fà quel che Geovà el vol. Ancora che no assaremo de creder in Geovà, pol esser che scominsiemo a gaver dubi se lu el ndarà pròpio giutarne. El scritor del Salmo 73 el se ga sentio pròpio cossita. Lu el vedea che le persone dela so època le fea tante robe sbaliade, e ancora cossita, le gavea una bona vita. Par quela, lu el ga scominsià a domandarse se servir a Geovà l’era pròpio la meio roba de far. — Sal. 73:11-13.
17. Cossa che ne giutarà a seitar fedeli a Geovà?
17 Cossa che ga giutà el salmista a cambiar la so maniera de pensar? Lu el ga pensà sora quel che sucede con quei che i se fermea de fidarse in Geovà e nele benedission che lu el gavea. (Sal. 73:18, 19, 24, 27) Cossa che noantri imparemo? Anca noantri ghemo de pensarghe sora come saria la nostra vita se no servìssino a Geovà e nele robe bone che ghemo nela vita quando lo adoremo. Cossita, saremo boni de seitar leai a lu e ancora pi sicuri che ‘rivar pi darente de Dio l’è bon par noantri’. — Sal. 73:28.
18. Parché che podemo esser sicuri che saremo boni de infrontar tute le dificoltà?
18 Noantri semo sicuri che saremo boni de infrontar tute le dificoltà avanti parché semo “schiavi par el vero Dio che el vive”. (1 Tes. 1:9) Geovà el ne vol tanto ben e el ndarà sempre giutarne. Cossita come el ga tendesto dei so servi nel passà, lu el ndarà far la medèsima roba par noantri ancoi. Suito ndaremo infrontar la pi granda tribolassion che ghen sarà in tuta la Tera. Ma no saremo noantri soli, parché Geovà el sarà dela nostra banda. (Isa. 41:10) Par quela, tuti noantri podemo parlar con tuto el coraio: “Geovà l’è quel che el me giuta, no gavarò mia paura.” — Ebr. 13:5, 6.
CÀNTICO 3 Geovà, me forsa, confiansa e speransa
a (Filipensi 4:13) Par tute le robe go forsa gràssie a quel che el me dà poder.
b (Proverbi 27:11) Sìpia sàbio, me fiol, e fà contento el me cuor. Cossita, risponderò a quel che me sfida.
c (1 Timòteo 4:10) L’è par questo che noantri laoremo tanto e se sforsemo, parché la nostra speransa la ze nte un Dio che el vive, che l’è Salvador de tuti i tipi de persone, spessialmente de quei che i ze fedeli.
d (Ebrei 3:12) Fradei, sté atenti de mai restar distante del Dio che el vive parché se nò, el vostro cuor el deventarà rugno e sensa fede.
