1. De acordo con 3 Gioani 3, 4, cossa che ne assa contenti?

EL APÒSTOLO Gioani el ga giutà tante persone a imparar la verità. Queste persone le era come se le fusse fioi par lu. Intanto che lore passea par dificoltà, Gioani el se sforsea tanto par giutar a far la fede de lore pi forte. Sicuro che Gioani l’è restà pròpio contento de vederli continuar leai a Geovà. Anca noantri restemo contenti quando vedemo i nostri fioi e altri che ghemo insegnà la Bìblia, dedicar la so vita a Geovà e continuar a servirlo de maniera fedele. — Ledi 3 Gioani 3, 4. *

2. Parché che Gioani el ga scrito le carte?

² Fursi nel ano 98 E.C., Gioani l’era de star in Èfeso o darente de lì. Pol esser che lu l’è ndà a quela cità dopo de star in preson nela ìsola de Patmo. L’è stà in quela època che el spìrito de Geovà el ga motivà Gioani a scriver le carte. Gioani el ga scrito queste carte par giutar i cristiani fedeli a no perder la fede in Gesù e a continuar a caminar nela verità.

3. Che domande ndemo risponder in questo stùdio?

³ Gioani l’era el ùnico apòstolo che l’era vivo e lu el se preocupea tanto con quel che i apòstati, o falsi istrutori, i fea par influensar i altri nela congregassion. * (1 Gio. 2:18, 19, 26) Questi apòstati i parlea che i cognossea a Dio ma no i obedia i comandamenti de Geovà. Alora, ndemo veder i consili che el apòstolo Gioani el ga scrito. In questo stùdio, ndemo veder la risposta de tre domande. Cossa vol dir caminar nela verità?  Parché che pol esser fadiga caminar nela verità? Come che podemo giutar un al altro a seitar fedele?

4. De acordo con 1 Gioani 2:3-6 e 2 Gioani 4, 6, cossa che ghemo de far par caminar nela verità?

⁴ Se volemo caminar nela verità, ghemo de cognosser la verità che la ze nela Parola de Dio e anca obedir i comandamenti de Geovà. (Ledi 1 Gioani 2:3-6; * 2 Gioani 4, 6. *) Una maniera de obedir a Geovà la ze seghir el esémpio de Gesù, parché lu el ga obedio de maniera perfeta a Geovà. — Gioani 8:29; 1 Pie. 2:21.

5. Cossa che ghemo de esser sicuri?

⁵ Par continuar a caminar nela verità, ghemo de esser sicuri che tuto quel che Geovà el parla l’è la verità. E queste verità le ze nela so Parola, la Bìblia. Anca ghemo de esser sicuri che Gesù l’è el Messia e el rè del Regno de Dio. Gioani el ga avisà che tanti i ndaria imbroiar quei che no i era ben pareciadi par difender la verità sora Geovà e Gesù. (2 Gio. 7-11) Gioani el ga scrito che ‘quel che no’l crede che Gesù l’è el Cristo l’è un busier’. (1 Gio. 2:22) Ghemo de studiar tanto la Parola de Dio e no esser imbroiadi. (Gioani 17:3) Cossita, saremo sicuri che quel che cognossemo l’è la verità.

6. Parché che pol esser fadiga par i gióveni caminar nela verità?

⁶ Tuti i cristiani i ga de esser atenti par no esser imbroiadi par el saver dei òmini. (1 Gio. 2:26) I gióveni i ga de esser pròpio atenti par no cascar nela tràpola del saver dei òmini. Alexia, * una sorela dela Francia de 25 ani la dise: “Quando mi era pi gióvena mi gavea dubi sora la teoria dela evolussion e de altre robe che mi imparea nela scola. Me piasea de tante robe che mi imparea. Ma anca mi pensea che l’era giusto scoltar quel che Geovà  el insegnea.” Alora, Alexia la ga studià el libro A Vida — Qual a Sua Origem? A Evolução ou a Criação?. In poco tempo, ela la era sicura dela verità. Ancora la dise: “Mi go studià la Bìblia e son stà sicura che la Bìblia la ga la verità. Anca go capio che far quel che ela la insegna ne dà alegria e pace.”

7. (a) Cossa che pol suceder se semo imbroiadi par el saver dei òmini? (b) Parché che l’è una tràpola pensar che podemo servir a Geovà e al medèsimo tempo far quel che l’è sbalià?

⁷ Quei che i ze imbroiadi par el saver dei òmini, i pol seitar servir a Geovà e al medèsimo tempo far quel che l’è sbalià. Ma tuti noantri, i gióveni o quei de pi età i ga de seitar servir a Geovà. Gioani el ga dito che no podemo caminar nela verità e al medèsimo tempo gaver una vita imoral. (1 Gio. 1:6) Se volemo gaver la aprovassion de Geovà par sempre, ghemo de ricordar che lu el vede tuto quel che noantri femo. In verità, no ghen’è pecato che l’è sconto de Geovà. — Ebr. 4:13.

8. Cossa che mai ghemo de acetar?

⁸ No volemo mai acetar la maniera de pensar del mondo sora el pecato. El apòstolo Gioani el ga dito: “Se noantri disemo che no ghemo gnanca un pecato, semo drio imbroiar a noantri stessi.” (1 Gio. 1:8) Nei giorni de Gioani, i apòstati i disea che i podea far un pecato aposta e ancora cossita esser amigo de Dio. Ancoi, l’è ancora compagno, le persone le dise che le crede in Dio, ma no le ze mia de acordo con quel che Lu el dise sora el sesso. Quel che Geovà el dise che l’è un pecato, le persone le dise che l’è una maniera de viver che cada un el pol scòlier.

9. Che benefissi i gióveni i ga quando i fà quel che l’è giusto?

⁹ Pol esser fadiga par i gióveni pensar dela maniera che Geovà el pensa sora el pecato. Parché? Par causa de quel che i coleghi de laoro o dela scola i fà. L’è stà questo che ga sucedesto con Aleksandar. Lu el ga dito: “Arquante  tose dela scola le seitea domandarme de far sesso con lore. Lore le parlea che come mi no gavea una morosa, mi no ghe piasea de done.” Sito drio infrontar una situassion cossita? Una roba che pol giutarte l’è ricordar che ghen’è tanti benefissi quando te fè quel che l’è giusto. Se te fè quel che la Bìblia la dise te vè sentirte ben, te gavarè una bona salute, una bona amicìssia con Geovà e no te gavarè sentimenti de colpa de far quel che l’è sbalià. Quando te infronti una situassion cossita, te sarà ancora pi forte par infrontar la pròssima. No stà mia desmentegarte che la maniera sbaliada de pensarghe sora el sesso l’è vegnesta de Sàtana. Alora quando te pensi dela maniera giusta sora el pecato, te sì drio ndar ‘contra Sàtana’. — 1 Gio. 2:14.

10. De acordo con 1 Gioani 1:9, cossa che ne giuta a servir Geovà con una cossiensa neta?

¹⁰ Noantri savemo che Geovà el ga el dirito de parlar quel che l’è giusto e quel che l’è sbalià. Alora noantri se sforsemo par no far quel che l’è sbalià. Ma se femo quel che l’è sbalià, noantri confessemo in orassion a Geovà. (Ledi 1 Gioani 1:9. *) E se femo un bruto pecato ndemo in serca del aiuto dei ansiani. Lori i ze stati designadi par Geovà par tender de noantri. (Tiago 5:14-16) Ma, una roba che ghemo de star atenti l’è de no gaver sentimenti de colpa par causa dei sbali che ghemo fato nel passà. E ghemo de ricordarse che Geovà el ga dato el so fiol par el perdon dei nostri pecati. E se Geovà el dise che el ga perdonà un sbàlio che ghemo fato, podemo pròpio fidarse. Cossita, poderemo servir a Geovà con una cossiensa neta. — 1 Gio. 2:1, 2, 12; 3:19, 20.

11. Come che podemo proteger la nostra mente dei insegnamenti falsi?

¹¹ Par proteger la nostra mente, ghemo de  star distante dei insegnamenti falsi dei apòstati. Del scomìnsio dela congregassion cristiana el Diaol el proa far che i servi de Dio i reste in dubi de quel che l’è la verità sora Dio. Alora, ghemo de esser sicuri de quel che l’è la verità e de quel che l’è busia. * Par via dela internet e dele rede sossiai, i apòstati i proa far pi fiaca la nostra fede in Geovà e el nostro amor ai fradei. Alora, ricorda che l’è Sàtana che l’è par de drio de tuto questo e stà distante de queste busie! — 1 Gio. 4:1, 6; Apo. 12:9.

12. Parché che ghemo de far pi forte la nostra fede?

¹² Se no volemo cascar nele tràpole de Sàtana ghemo de far pi forte la nostra fede in Gesù e esser sicuri de che Geovà l’è drio doperarlo par far la so volontà. Ghemo de fidarse che Geovà l’è drio doperar el schiavo fedele e prudente par orientar el so pòpolo qua nela tera. (Mat. 24:45-47) Podemo far pi forte la nostra fede par studiar sempre la Parola de Dio, la Bìblia. Alora, la nostra fede la restarà come una pianta che la ga le radise profonde. Paolo el ga dito ala congregassion in Colosso che lori i seitaria a caminar insieme de Cristo, se lori gavesse le radise profonde in Lu cola firme fede. (Col. 2:6, 7) Quando femo sforso par gaver la fede ben forte, sarà pi fàcile de seitar caminar nela verità. E Sàtana, gnanca i altri i sarà boni de fermarne. — 2 Gio. 8, 9.

13. Cossa che savemo e parché?

¹³ Noantri savemo che el mondo el òdia noantri. (1 Gio. 3:13) Gioani el ne ricorda che ‘Sàtana l’è el governante de questo mondo’. (1 Gio. 5:19) Sàtana el resta cada volta pi inrabià parché el sa che el ga poco tempo. Alora, lu el proa fermar el laoro de predicassion e far pi fiaca la nostra fede. (Apo. 12:12) Ghemo visto fin adesso che Sàtana el proa far che femo pecati e che ndemo drio dele busie dei apòstati. Anca vedemo che lu el ataca el pòpolo de Geovà par meso de brute perseghission. Par quela che in tanti paesi la nostra òpera la ze proibia. Ma i nostri fradei seita a perseverar. Lori i ze drio provar che no importa quel che Sàtana l’è drio far, noantri podemo vinser.

14. Come che podemo giutar i nostri fradei a continuar a caminar nela verità?

¹⁴ Se volemo giutar i nostri fradei a continuar a caminar nela verità, ghemo de mostrar compassion par lori. (1 Gio. 3:10, 11, 16-18) Noantri ghemo de mostrar amor un ai altri ancora de pi nele brute situassion. Par esémpio, podemo dar consolo e aiuto par qualche fradel che el ga perso qualchedun nela morte. Podemo anca giutar qualche fradel che el ga de far su nantra volta la so casa o anca podemo giutar a far su i saloni del Regno par causa de una desgràssia. La meio maniera de mostrar che amemo i nostri fradei e mostrar compassion par lori l’è par giutarli.

15. De acordo con 1 Gioani 4:7, 8, cossa che ghemo de far?

¹⁵ Quando mostremo amor un ai altri, semo drio imitar el nostro Pare, Geovà. (Ledi 1 Gioani 4:7, 8. *) Una maniera de mostrar amor par i nostri fradei l’è par perdonar un ai altri. Par esémpio, pol suceder de i altri disgustar a noantri e domandarne scusa. Alora, mostremo amor quando lo perdonemo e no restemo pi disgustadi par causa del assunto. (Col. 3:13) Un fradel che el se ciama Aldo el ga passà par una situassion cossita quando un  fradel el ga parlà mal dela so cultura. Aldo el ga dito: “Mi go fato tante orassion a Geovà par no pensar mal sora quel fradel.” Lu el ga anca dessidio convidar el fradel par ndar ala predicassion insieme. Alora, Aldo el ga spiegà al fradel come che el se sentia col comentàrio che lu el gavea fato. Aldo el dise: “Quando el fradel el ga visto come che mi me sentia lu el me ga domandà scusa. Par la so maniera de parlar, mi ero sicuro che el se gavea ciamà gramo. Noantri ghemo parlà sora el assunto e semo stati boni de assar indrio tuto quel che gavea sucedesto.”

16-17. Cossa che ghemo de sforsarse de far?

¹⁶ El apòstolo Gioani el amea tanto i so fradei e el se preocupea tanto cola relassion de lori con Geovà. Vedemo el amor par i so fradei quando ledemo i consili che el ga dato ai fradei nele so tre carte. Sicuro che restemo contenti de saver che persone amorose come Gioani, le ndarà governar insieme con Gesù nel cielo! —1 Gio. 2:27.

¹⁷ L’è tanto importante meter in pràtica i consili che ghemo imparà in questo stùdio. Fà sforso par continuar a caminar nela verità e obedir a Geovà in tuto quel che te fè. Stùdia la Bìblia e sìpia sicuro che quel che te impari l’è la verità. Fà la to fede in Gesù restar cada volta pi forte. No stà mia acetar el saver dei òmini e i insegnamenti falsi dei apòstati. No stà mia pensar che te pol servir a Geovà e al medèsimo tempo far quel che l’è sbalià. Fà pròpio sforso par no pensar dela medèsima maniera del mondo sora el pecato, ma pensa dela medèsima maniera de Geovà. Giuta anca i to fradei a continuar a caminar nela verità par perdonar quei che i te ga disgustà e giutarli in quel che lori i ga de bisogno. Cossita, no importa le dificoltà che infrontemo, noantri saremo boni de continuar a caminar nela verità.