Gesù l’è deventà Somo Sasserdote quando l’è stà batesà nel ano 29 E.C. Come che savemo de questo? Parché nel so batésimo Gesù el se ga presentà come sacrifìssio nel altar dela volontà de Dio. Quando Gesù el se ga batesà, lu el ga mostrà che el volea far la volontà de Geovà, o sia, dar la so vita come risgate. (Gàl. 1:4; Ebr. 10:5-10) Nel passà, el altar l’era una roba pròpio importante nel témpio. Alora, nel grando témpio spiritual de Dio el altar el ga bio un scomìnsio quando Gesù el se ga batesà. Questo grando témpio spiritual l’è tuto quel che Geovà l’è drio far par meso del sacrifìssio del so fiol Gesù Cristo. Cossita, le persone le ze bone de adorar a Geovà de maniera pura. — Mat. 3:16, 17; Ebr. 5:4-6.

Nel passà, el témpio el gavea bisogno de un somo sasserdote. Alora, anca el grando témpio spiritual el ga bisogno de un Somo Sasserdote. Gesù el gavaria de esser untà par Geovà con “spìrito santo e poder” par esser un Somo Sasserdote. (Ati 10:37, 38; Mar. 1:9-11) Ma, come che podemo esser sicuri che Gesù l’è stà scoliesto come Somo Sasserdote nel so batésimo, vanti dela so morte e ressuression? Podemo capir meio questo quando studiemo sora Aron e sora altri somo sasserdoti.

La lege che Mosè el ga ricevesto la parlea che sol el somo sasserdote el podea ndar rento del Santìssimo del tabernàcolo e pi tardi nel Santìssimo del témpio. In meso del Santo e del Santìssimo ghen’era una coltrina. El somo sasserdote el passea par la coltrina sol nel giorno dela spiassion. (Ebr. 9:1-3, 6, 7) Aron e altri òmini fedeli dopo de lu i ze stati untadi come somo sasserdoti vanti de passar par quela coltrina e ndar rento del Santìssimo. Dela stessa maniera, Gesù vanti de morir el gavea de esser untà come Somo Sasserdote par passar par la coltrina, o sia, la so carne e dopo ndar al cielo. Cossita, la carne umana de Gesù la ze come se fusse una coltrina. Par ricever la vita nel cielo, prima Gesù el gavea de esser untà come Somo Sasserdote. (Ebr. 10:20) Par quela che el apòstolo Paolo el ga dito sora Gesù: “Come Somo Sasserdote lu l’è ndà rento dela tenda pi granda e pi perfeta, nò fata par le man umane ma pròpio nel cielo.” — Ebr. 9:11, 24.

Quando Gesù l’è ritornà al cielo e el ga oferessesto a Dio el valor del so sacrifìssio, el ga fato due robe. Ma par el novo acordo gaver valor l’era bisogno de tre robe. Che tre robe le era queste?

Prima, Gesù el se ga presentà davanti de Geovà. Seconda, Gesù el ga oferessesto el valor del so sacrifìssio a Geovà. Tersa, Geovà el ga acetà el valor del sangue che Gesù el ga dato. El novo acordo el ga scominsià a esser doperà sol dopo de suceder queste tre robe.

La Bìblia no la dise mia quando che Geovà el ga acetà el sacrifìssio de Gesù. Ma savemo che Gesù l’è ndà al cielo diese giorni vanti del Pentecoste. (Ati 1:⁠3) Geovà el ga acetà el sacrifìssio de Gesù dopo che Gesù l’è ndà al cielo e vanti del Pentecoste. (Ebr. 9:⁠12) Una prova che el novo acordo el gavea belche valor l’è stà quel che ga sucedesto nel Pentecoste del ano 33 E.C. (Ati 2:⁠1-⁠4, 32, 33) Alora, no savemo quando el novo acordo el ga bio valor e el ga scominsià a esser doperà, ma sicuro che nel Pentecoste del ano 33 l’era belche drio esser doperà.

Alora, el novo acordo el ga scominsià a gaver valor e esser doperà quando Geovà el ga acetà el valor del sacrifìssio de Gesù e el ga fato che i untadi i fusse parte de questo acordo. Quando el acordo el ga scomìnsia a esser doperà el ga bio Gesù come Somo Sasserdote. — Ebr. 7:25; 8:1-3, 6; 9:13-15.