Geovà el vol che quei che i se marida i gàpia un bel matrimònio e che i sìpia felice. (Mat. 19:4-6) E come el ne ga creà, lu el sa quel che ghemo de far par gaver un matrimònio felice. Alora, se te vol maridarte, mete in pràtica i bei consili che Geovà el ne ga dato. Varda arquanti de questi consili.

Prima, ghemo de capir ben che el ‘nostro cuor l’è pericoloso e el pol tradirne’. (Ger. 17:9) Come cossita? Par esémpio, quando due persone le vol maridarse e le ze drio congnosserse, lore le pol passionarse. Quando questo sucede, l’è fadiga far le dessision con sabedoria. Alora, se queste persone le desside far qualcossa sol par causa de quel che le sente, le pol sofrir tanto. (Pro. 28:26) Par quela che no saria bon che due persone le se fesse promesse, o che le se parlesse robe o pensamenti sol soe se no le se cognossesse pròpio ben.

Proverbi 22:3 el dise: “La persona che la ga sabedoria la vede el perìcolo e la va in serca de protession, ma el bauco el va avanti e dopo el sofre.” Sarà che ghen’è perìcoli de doperar la internet par cognosser qualchedun par maridarse? L’è sicuro che si. Par esémpio, tante persone le ga scominsià a cognosser e fin smorosar con qualchedun nela internet e i ze stati imbroiadi. Ghen’è anca quei che i fà finta esser altre persone par imbroiar e ciavar soldi dei altri. Arquanti fin i fà finta esser Testimònie de Geovà.

Varda anca nantro perìcolo de doperar la internet par cognosser persone par smorosar. Arquanti site i dopera càlculi de matemàtica par dir quala saria la meio persona par smorosar. Ma no se sa mia se questo va ben. El matrimònio l’è una roba tanto importante, par quela che ne toca domandarse: ‘Sarà che saria giusto fidarse nte una roba cossita che la ze fata par persone? Sarà che una roba cossita la ze meio che i prinsipi che ghen’è nela Bìblia?’ — Pro. 1:7; 3:5-7.

Varda nantro bel consìlio che ghen’è in Proverbi 14:15: “El bauco el crede in tuto quel che i ghe dise, ma el sàbio el pensa ben vanti de far qualcossa.” Alora, te toca pensar e cognosser una persona tanto ben par saver se la sarà un bon sposo o una bona sposa. Ma l’è tanto fadiga cognosser ben  una persona sol par meso dela internet. Fursi te ghè belche vardà tante robe che la persona la mete nela internet e e gavé discoresto tanto par meso de messagi. Ma, sarà che te pol dir che te la cognossi pròpio ben? Arquanti i ga pensà che si e i se ga spaurà tanto quando i ga visto che la persona la era tanto difarente de quel che i pensea.

Un salmista el ga dito: “No resto insieme de quei che i ze busieri, e gnanca de quei che no i mostra quel che i ze.” (Sal. 26:4) Arquanti i dise busie, i sconde le robe rugne sora lori o i fà finta esser difarenti quando i parla coi altri nela internet. Alora, domàndate: ‘Anca che qualchedun el dise che l’è una Testimònia de Geovà, sarà che l’è pròpio batesà? Sarà che el ga una bona amicìssia con Geovà? I fradei nela congregassion i lo vede come un bravo fradel? O el fà robe rugne e l’è un bruto esémpio?’ (1 Cor. 15:33; 2 Tim. 2:20, 21) ‘Sarà che l’è pròpio lìbero par maridarse de acordo cola Bìblia?’ Fursi te toca parlar con una Testimònia de Geovà che la cognosse pròpio ben questa persona par saver le risposte a queste domande. (Pro. 15:22) L’è sicuro che un servo fedele de Geovà mai el volaria maridarse con una persona che no la serve mia a Dio. — 2 Cor. 6:14; 1 Cor. 7:39.

Come ghemo visto, pol esser un perìcolo doperar la internet par cognosser persone par smorosar. Ma ndove te pol catar un bravo fradel o sorela? Quando se pol star insieme con tante persone, le Testimònie de Geovà le se cata nele congregassion, assemblee, in congressi o quando i va a spasso.

Ma adesso, no podemo catarse in questi posti par causa dela COVID-19. Quando robe cossita le sucede, noantri se riunimo par meso dela internet. Nele riunion, i fradei e le sorele che no i ze maridadi i pol cognosser altri fradei e sorele, veder le so parte, i so discorsi e i so comentari. (1 Tim. 6:11, 12) Te pol anca parlar cola persona che te vol cognosserla meio dopo dela riunion quando l’è fato grupi par i fradei ciacolar. Te pol anca catarte nela internet con altre Testimònie de Geovà in altre ore. Cossita, te sarè bon de veder come questa persona la trata i altri e questo te giutarà a cognosserla meio. (1 Pie. 3:4) Dopo che valtri ve cognossé meio, saré boni de saver se volé far le medèsime robe nela vita e se sì intesi.

Alora, cossa i ga de far quei che i vol gaver un matrimònio e una vita felice? Lori i ga de meter in pràtica i bei prinsipi che ghen’è nela Bìblia. Cossita, sucederà con lori quel che dise Proverbi 18:22: ‘Quel che el cata una brava sposa [o un bravo sposo] el cata una roba tanto bona, e Geovà el resta contento con lu.’