1. Parché che i servi de Dio i ga de esser come una pianta? (Varda anca la ilustrassion.)

 TANTE persone le dise che el vento no’l spaca una pianta che la se move un pochetin. Alora, una pianta sol la restarà firme nel so posto se no la ze massa dura. Anca i servi de Dio i ga de esser cossita. Come? Ghemo de cambiar la nostra maniera de pensar e de far le robe quando ghen’è de bisogno. Anca l’è importante rispetar la opinion e le dessision dei altri. Cossita, saremo boni de seitar firmi e de servir a Geovà con alegria.

2. (a) Cossa che pol giutarne a dàrghene fora cole dificoltà? (b) Cossa che ndaremo imparar in questo stùdio?

² Tanti servi de Geovà i ze stati boni de dàrghene fora cole dificoltà dela vita parché i ga cambià quando ghen’è stà de bisogno e i ze stati ùmili e bondosi. In questo stùdio, ndaremo veder come che queste robe le ga giutà altri fradei, come che le pol giutar anca noantri e cossa che podemo imparar del esémpio perfeto de Geovà e de Gesù.

3. Parché che podemo dir che Geovà el càmbia quando ghen’è de bisogno?

³ La Bìblia la dise che Geovà l’è “la Ròcia” parché lu l’è firme. (Deu. 32:4) Magari, Geovà l’è pronto par cambiar quando ghen’è de bisogno. De quando lu el ga creà el mondo fin ancoi, le robe no le ga sucedesto come lu el volea. Ancora cossita, Geovà el ga cambià quel che ghen’era de bisogno par far quel che el gavea prometesto. Come Geovà el ne ga fato cole medèsime qualità che el ga, anca noantri semo boni de cambiar quando ghe vol. Lu anca el ne ga dato i prinsipi dela Bìblia, che i ne giuta quando vien fora una dificoltà che no  speteino mia. Alora, anca se Geovà l’è “la Ròcia” e i so prinsipi i ze sempre i medèsimi, lu l’è pronto par cambiar quando ghen’è de bisogno.

4. Che esémpio ne giuta a capir che Geovà no’l speta massa de noantri? (Levìtico 5:7, 11)

⁴ Tuto quel che Geovà el fà mostra che lu l’è perfeto e echilibrà, o sia, lu no’l speta che le persone le sìpia perfete. Par esémpio, nela època dei israeliti, Geovà no’l ga domandà che i sacrifissi dei siori e dei poareti i fusse compagni. Invesse, tante volte, lu el assea che la persona la desse quel che la podea. — Ledi Levìtico 5:7, b 11. c

5. Parla de un esémpio che mostra la bontà e la umiltà de Geovà.

⁵ Geovà el ne trata cossita parché lu l’è ùmile e bondoso. Varda cossa ga sucedesto quando lu l’era pronto par finir fora la cità de Sodoma. Par meso dei so àngeli, Geovà el ghe ga dito a Lò che lu el gavea de scampar par le montagne. Ma Lò el gavea paura de ndar là, e el ga domandà se lu e la so fameia i podea ndar a Zoar. Magari, Geovà el gavea dessidio de finir fora anca quela cità. Par quela, Geovà el podaria gaver dito de nò a Lò, e farlo ndar ale montagne. Invesse, lu el ga assà che Lò el ndesse a Zoar e no’l ga mia finio fora quela cità. (Gén. 19:18-22) Tanti ani dopo, Geovà el ga mostrà bontà ale persone che le era de star in Nìnive. Lu el gavea mandà che el profeta Giona el ndesse avisar che quele persone rugne le saria finide fora. Ma dopo che le se ga ciamade grame, Geovà el ga desistio de finir fora quela cità. — Giona 3:1, 10; 4:10, 11.

6. Parla de esempi che i mostra che Gesù el fea compagno a Geovà.

⁶ Compagno a Geovà, Gesù no l’era massa duro gnanca el spetea che le persone le fusse perfete. Par esémpio, l’è vera che Gesù l’era ‘stà mandà sol ale piégore perse de Israel’, ma lu el ga scoltà una dona che no la era mia israelita, e el ga curà so fiola. (Mat. 15:21-28) Anca quel che ga sucedesto con Piero mostra che Gesù no’l spetea massa dele persone. Gesù el gavea dito: ‘Mi vao dir che no cognosso mia quei che i dise che no i me cognosse.’ (Mat. 10:33) Ma dopo che Piero el ga dito tre volte che no lo cognossea mia, Gesù lo ga perdonà, parché el ga visto che Piero el gavea fede e el se gavea ciamà gramo. Dopo, quando Gesù l’è stà ressussità, lu l’è ndato parlar con Piero par assarlo sicuro che lo gavea perdonà e che lo amea. — Luc. 24:33, 34.

7. De acordo con Filipensi 4:5, cossa che Geovà el vol che femo?

⁷ Come ghemo visto, Geovà e Gesù no i ze mia massa duri e sempre i càmbia quando  ghe vol. Geovà el vol che anca noantri femo cossita. (Ledi Filipensi 4:5. d) Alora, podemo domandarse: ‘Sarà che i altri i me vede come una persona mansa, che la aceta la opinion dei altri e che la càmbia quando ghe vol? O sarà che i me vede come una persona dura, che la vol sempre gaver rason? Sarà che vui sempre far le robe dela me maniera, come mi penso che l’è giusto? O mi scolto i altri quando i parla quel che i pensa, e fao come lori i vol sempre che se pol?’ Se mostremo echilìbrio in queste robe, saremo drio far compagno a Geovà e a Gesù. Adesso, ndemo veder cossa ghemo de far quando le robe nela nostra vita le càmbia o quando la opinion e le dessision dei altri le ze difarente dele nostre.

8. Cossa che pol giutarne se la nostra vita la càmbia? (Varda anca la nota.)

⁸ La nostra vita la pol cambiar e pol esser che vegna fora dificoltà che no spetéino mia. Alora, ghemo de esser pronti par cambiar quando ghe vol. Fursi tribolemo par causa de una malatia, problemi nel governo del nostro paese o parché ne manca i soldi. (Ecl. 9:11; 1 Cor. 7:31) Anca pol esser fadiga se càmbia el laoro che femo nela organisassion. Quando la nostra vita la càmbia, ghen’è quatro robe che podemo far: (1) acetar che le robe no le ze pi come una volta, (2) pensar nel futuro, (3) pensar nele robe bone dela vita, e (4) giutar i altri. e Ndemo veder arquanti esempi de fradei e sorele che i ga fato queste quatro robe.

9. Come che Emanuele e Francesca i ze stati boni de dàrghene fora cole dificoltà?

⁹ Aceta che le robe no le ze pi come una volta. Dopo che Emanuele e Francesca i ze stati mandadi de missionari a nantro paese, lori i era drio imparar la léngua e cognosser i fradei. Ma ga scominsià la pandemia del COVID-19, e lori no i podea mia star insieme dele persone. E de colpo, la mama de Francesca la ze morta. Alora, ela la volea tanto restar insieme dela so fameia, ma no la podea mia viaiar par tornar casa par causa dela pandemia. Come che lori i ze stati boni de dàrghene fora con questi bruti colpi? Prima, tuti i giorni, Emanuele e Francesca i preghea insieme par domandar che Geovà el ghe giutesse a dàrghene fora cole dificoltà de cada giorno. E lori i ga visto la risposta de Geovà tante volte, come quando un fradel el ga dito nte un vìdeo: “Gavemo de acetar presto quel che semo drio infrontar. Cossita, tornaremo a esser contenti e saremo boni de servir a Geovà e giutar i altri.” f Seconda, lori i se ga sforsà par predicar meio par telèfono, e i ze stati boni de scominsiar un stùdio dela Bìblia. Tersa, lori i ga acetà el aiuto de altri fradei. Par esémpio, par un ano, una sorela ghe ga mandà un testo dela Bìblia tuti i giorni par incoraiarli. Alora, cossa che podemo imparar? Se acetemo che la nostra vita la ga cambià, gavaremo alegria con quel che semo boni de far.

10. Cossa che ga giutà una sorela quando ghe ga tocà cambiar de congregassion?

¹⁰ Pensa nel futuro e nele robe bone dela vita. Una sorela de nome Christina, che la ze ndata de star nel Giapon, ghe ga despiasesto quando la congregassion de inglese la ze stata serada. Magari, ela no la ga seità a pensar in quel che gavea sucedesto. Invesse, la ze ndata par la congregassion  de giaponese e la ga seità a far el so meio nela predicassion. Christina anca la ga domandà a una colega del laoro par giutarla a imparar giaponese par meso dela revista Te pol viver felice par sempre!. Cossita, Christina la ga imparà a parlar meio el giaponese, e quela dona la ga volesto saver de pi dela Bìblia. Cossa che podemo imparar? Se noantri pensemo nel futuro e nele robe bone dela vita, ndaremo nicorderse che arquanti cambiamenti ne darà benedission.

11. Come che un casal l’è stà bon de dàrghene fora quando ghe ga mancà soldi?

¹¹ Proa giutar i altri. Varda cossa ga sucedesto con un casal de fradei che l’è de star nte un posto ndove l’è proibio adorar a Geovà. Par causa de problemi econòmichi che ghen’era nel paese, ghe ga mancà soldi. Alora, cossa gali fato? Lori i ga proà guastar manco, e invesse de pensar nei problemi che i gavea, i se ga sforsà par far de pi nela predicassion. (Ati 20:35) El fradel el ga dito: “Come noantri gaveino tanto de far nela predicassion, no ghemo bio pi tempo par pensar nei nostri problemi e semo stati boni de far de pi par Geovà.” Cossa che podemo imparar? Quando le robe nela nostra vita le càmbia, ghemo de ricordarse che l’è tanto importante giutar i altri, ancora de pi par meso dela predicassion.

12. Come che el esémpio del apòstolo Paolo el pol giutarne nela predicassion?

¹² Quando predichemo, noantri catemo persone che le vien de diversi posti e che le crede e le pensa in robe pròpio difarente una del’altra. Par quela, ghemo de esser sempre pronti par cambiar quel che ndemo dir. El apòstolo Paolo el fea pròpio cossita, e podemo imparar tanto col so esémpio. Gesù el ga scoliesto Paolo par esser un ‘apòstolo par le nassion’. (Rom. 11:13) Alora, Paolo el predichea ai giudei, ai grechi, ale persone che le gavea stùdio, a quei che no i era mia studiadi, ale autorità del governo e anca ai rè. Come Paolo el volea tocar el cuor de quei che i lo scoltea, lu l’è deventà “tute le cose par persone de tuti i tipi”. (1 Cor. 9:19-23) Paolo el restea atento par saver cossa che le persone le credea, de ndove le vegnea e come le era state slevade. Cossita, lu l’è stà bon de cambiar quel che parlea e de giutar le persone a cognosser a Dio. Anca noantri podemo predicar ancora meio se stemo atenti a quel che le persone le pensa e cambiemo quel che parlemo.

13. De acordo con 1 Corinti 8:9, cossa che pol suceder se no rispetemo la maniera de pensar dei altri?

¹³ Invesse de voler sempre gaver la rason, ghemo de rispetar la maniera de pensar dei altri. Par esémpio, ghen’è tante sorele che ghe piase pintarse, ma altre nò. Arquanti i beve un pochetin, ma ghen’è altri che i pensa che l’è meio no bever gnente. E savemo che tuti noantri volemo gaver una bona salute, ma ghen’è diverse maniere de tenderla. Magari, se sempre volemo gaver la rason e spetemo che i altri i pense come noantri, podemo far i fradei strabucarse e finir cola union intrà de noantri. Sicuro che mai volemo far una roba de queste! (Ledi 1 Corinti 8:9; g 10:23, 24) Alora, ndemo veder due esempi che i mostra come che podemo meter in pràtica prinsipi dela Bìblia che i ne giuta a rispetar i altri e mantegner la pace.

14. Che prinsipi dela Bìblia i pol giutarne quando ndemo vestirse e rangiarse i cavei?

¹⁴ La maniera de vestirse e rangiarse i  cavei. Geovà no’l ne dise mia la maniera che ghemo de vestirse. Magari, lu el ne ga dato prinsipi che i ne giuta a vestirse de una maniera che ghe dae onor, che mostre modèstia, bon giudìssio e sensa esser massa duri. (1 Tim. 2:9, 10; 1 Pie. 3:3) Par quela, no volemo mia vestirse par farse veder. I prinsipi dela Bìblia anca i ndarà giutar i ansiani a no crear règole sora come i fradei i ga de vestirse o rangiarse i cavei. Varda quel che ga sucedesto nte una congregassion. I ansiani i volea giutar arquanti gióveni che i taiea i cavei curti, ma li assea tuti spaventadi. Quei ansiani no i volea mia crear règole. Alora, el superintendente el ghe ga parlà una roba che i podea dirghe ai gióveni. Lu el ga dito: “Se te sì drio far una parte o un discorso, e le persone le ghe dà de pi atension ale to robe e ai to cavei invesse de quel che te parli, ghen’è qualcossa che no va mia tanto ben.” Cossita, quei ansiani i ze stati boni de dàrghene fora con un problema sensa far una règola. h

15. Che lege e prinsipi dela Bìblia i pol giutarne quando ndemo scòlier come tender dela salute? (Romani 14:5)

¹⁵ La maniera che tendemo dela salute. Nela Bìblia, catemo lege che le dise che ghemo de restar distante del sangue e del spiritismo. Alora, quando ndemo scòlier come tender dela salute, mai ndaremo doperar queste robe. (Ati 15:20; Gàl. 5:19, 20) Magari, la Bìblia no la ga altre lege sora questo. Par quela, cada un el ga de dessider che tratamento el vol far. (Gàl. 6:5) Par esémpio, tanti fradei i pensa che l’è meio ndar al dotor, e doperar rimedi. Ma ghen’è fradei ghe piase de far altri tratamenti. Ancora che pensemo che ghemo fato la meio scólia, ne ocore rispetar el dirito che i nostri fradei e  sorele i ga de far le so dessision. Par quela, ghemo de ricordarse de queste quatro robe: (1) Sol el Regno de Dio el ndarà finir fora cole malatie e el ndarà darne una salute perfeta. (Isa. 33:24) (2) Cada un el ga de esser sicuro de cossa che l’è meio par lu stesso. (Ledi Romani 14:5. i) (3) No podemo giulgar i altri par le so dessision gnanca farli strabucarse. (Rom. 14:13) (4) Ne ocore mostrar amor e ricordarse che la union dela congregassion la ze pi importante de quel che pensemo. (Rom. 14:15, 19, 20) Se ghemo in mente queste robe, ndaremo gaver una bona amicìssia coi nostri fradei e sorele e giutaremo che ghen sìpia pace nela congregassion.

16. Come che i ansiani i mostra che i ze pronti par cambiar e che no i vol gaver sempre la rason? (Varda anca la ilustrassion)

¹⁶ I ansiani i ga de esser un bel esémpio de cambiar quando ghe ocore e no voler sempre gaver la rason. (1 Tim. 3:2, 3) Lori i sa che Geovà el pol doperar tuti quanti par far una bona dessision. Par quela, un ansiano no’l speta che i altri sempre i acete la so opinion sol parché l’è pi vècio che i altri. E quando quasi tuti i ansiani i ga fato una dessision che no la va contra la Bìblia, i altri ansiani i aceta, anca che no i sìpia mia de acordo.

17. Che benedission gavaremo se semo pronti par cambiar e no volemo sempre gaver la rason?

¹⁷ Se semo pronti par cambiar e no volemo sempre gaver la rason, gavaremo tante benedission. Par esémpio, gavaremo una bela amicìssia coi altri, giutaremo che ghen sìpia pace nela congregassion e gavaremo pròpio caro de star in meso de persone che le ga difarente culture e maniere de pensar. Meio ancora, gavaremo alegria de saver che semo drio far compagno al nostro Dio, Geovà.