STÙDIO 30
Fà el to amor par Geovà e par i altri cada volta pi forte
‘Seitemo a far el nostro amor cada volta pi forte.’ — EFE. 4:15.
CÀNTICO 2 El to nome l’è Geovà
COSSA CHE NDAREMO IMPARAR? a
1. Cossa che te ghè imparà quando te ghè scominsià a studiar la Bìblia?
RICÒRDITO de quando te ghè scominsià a studiar la Bìblia? Fursi te sì restà maraveià de saver che Dio el ga un nome e che lu no’l fà le persone sofrir nte un inferno de fogo. Sicuro che te sì restà anca tanto felice de saver che te podarè catarte con quei che te ami che i ze belche morti e che podaré viver par sempre nte un paradiso qua nela Tera.
2. Cossa gheto fato intanto che te eri drio imparar sora la Bìblia? (Efesi 5:1, 2)
2 Intanto che te eri drio studiar la Bìblia, el to amor par Geovà el restea cada volta pi grando. E par causa de questo amor, te ghè volesto meter in pràtica quel che te eri drio imparar. Te ghè fato meio dessision nela vita parché te ghè scominsià a ndar drio a quel che la Bìblia la dise. E te ghè imparà a pensar e a far quel che l’è giusto par contentar a Geovà. Cossita, compagno a un toseto che el proa ndar drio el esémpio de so pare, ti te ghè proà far compagno a Geovà. — Ledi Efesi 5:1, 2. b
3. Che domande l’è importante farse?
3 Ancora cossita, saria bon che te te domandessi: ‘Sarà che el me amor par Geovà l’è pi grando adesso che quando go imparà la verità? Sarà che ancoi son pi bon de pensar e far le robe compagno a Geovà che dela època che son stà batesà? Son bon de mostrar cada volta pi amor ai me fradei e sorele?’ Magari, se el amor che te gavei prima el se ga sfredà, no stà restar desanimà. Nel passà, ga sucedesto una roba compagna con arquanti dissìpoli de Gesù, e lu li ga giutadi compagno el vol giutarne ancoi. (Apo. 2:4, 7) Gesù el sa che el to amor el pol tornar a esser grando come l’era nel scomìnsio.
4. Cossa che ndaremo imparar in questo stùdio?
4 In questo stùdio, ndaremo veder come che podemo seitar a far cada volta pi grando el nostro amor par Geovà e par i altri. Dopo, ndaremo imparar che benedission ghen sarà par noantri e par i altri se femo pi forte el nostro amor.
FÀ PI FORTE EL TO AMOR PAR GEOVÀ
5-6. (a) Che dificoltà el apòstolo Paolo el ga infrontà? (b) Parché che Paolo l’è stà bon de seitar a servir a Geovà?
5 El apòstolo Paolo el ga bio tanta alegria de servir a Geovà. Magari, lu el ga infrontà tante dificoltà. Par esémpio, in quela època, no l’era mia fàcile far un viaio, e ghe tochea viaiar tanto e a posti pròpio distanti. In questi viai, Paolo el infrontea ‘perìcoli de rii, perìcoli de ladroni’ e tante persone le ndea contra lu e ghe dea bote. (2 Cor. 11:23-27) Fin altri dissìpoli de Gesù, dele volte, no i ghe dea valor a tuto quel che Paolo el gavea fato par giutarli. — 2 Cor. 10:10; Fil. 4:15.
6 Alora, parché che Paolo l’è stà bon de seitar a servir a Dio? Parché el amea tanto a Geovà. Par via de quel che ga sucedesto nela so vita e de quel che el gavea studià nele Scriture, Paolo l’è stà bon de cognosserlo tanto ben. Cossita, lu l’era sicuro che Dio lo amea tanto. (Rom. 8:38, 39; Efe. 2:4, 5) Par quela, lu el ga volesto mostrar el so amor a Geovà par ‘servir i santi e continuar a servirli’. — Ebr. 6:10.
7. Cossa che te pol far par amar a Geovà ancora de pi?
7 Anca noantri podemo far ancora pi forte el nostro amor par Geovà se seitemo a leder e studiar la Bìblia. Quando te sì drio leder la Bìblia, proa pensarghe sora cossa quela parte la te insegna sora Geovà. Alora, domàndate: ‘Come quel che go ledesto mostra che Geovà el me ama? Come che questo me giuta a amar a Geovà ancora de pi?’
8. Come che pregar a Geovà fà el nostro amor a lu ancora pi forte?
8 Noantri ghemo anca de pregar a Geovà e parlarghe sora i nostri pensieri e sora quel che sentimo. Cossita, quando vedemo che lu l’è atento e che el ne risponde, el nostro amor par lu el resta ancora pi forte. (Sal. 25:4, 5; 1 Gio. 3:21, 22) L’è pròpio questo che ga sucedesto con Khanh, una sorela dela Àsia. c Ela la ga dito: “De scomìnsio, mi amea a Geovà par via de quel che gavea imparà sora lu. Ma quando go visto che lu el risponde ale me orassion, el me amor l’è deventà ancora pi forte. Cossita, go volesto ancora de pi far robe che ghe piase a lu.”
FÀ PI FORTE EL TO AMOR PAR I ALTRI
9. Come che Timòteo el mostrea che l’era drio far pi forte el so amor par i fradei?
9 Un tempo dopo che Paolo l’è deventà un dissìpolo de Gesù, lu el ga cognossesto un gióveno de nome Timòteo. Questo gióveno el amea tanto a Geovà e ai fradei. Par quela, Paolo el ga dito ai fradei filipensi: “No go nissun altro cola disposission compagna ala soa. Lu el ve tenderà pròpio ben.” (Fil. 2:20) Paolo no l’era drio parlar dei bei discorsi che Timòteo el fea o che el tendea ben dei laori che ghen’era nela congregassion. Invesse, lu l’è restà maraveià de veder che Timòteo el gavea tanto amor ai so fradei e sorele. Sicuro che tuti nele congregassion i era premosi de ricever una vìsita de Timòteo. — 1 Cor. 4:17.
10. Come che Anna e so omo i ga mostrà amor par i so fradei e sorele?
10 Anca noantri podemo ndar in serca de maniere de giutar i nostri fradei e sorele. (Ebr. 13:16) Varda el esémpio de Anna e del so omo, che ghemo parlà nel ùltimo stùdio. Dopo de una bruta tempesta, lori i ga visità una fameia de Testimònie de Geovà e i ga visto che la tempesta la gavea finio fora el querto dela so casa. Par quela, quela fameia no la gavea mia robe nete par meter su. Anna la ga dito: “Ghemo ciapà le so robe de vestir par lavarle e sopressarle. Par noantri, quel che ghemo fato no l’è stà fadiga, ma ne ga giutà a gaver una bela amicìssia fin ancoi.” Anna e so omo i ga mostrà tanto amor ai so cari fradei e sorele parché i ze ndati in serca de robe che i podea far par giutarli. — 1 Gio. 3:17, 18.
11. (a) Come che i altri i pol sentirse quando ghe mostremo amor? (b) De acordo con Proverbi 19:17, cossa che Geovà el ndarà far se mostremo amor ai altri?
11 Quando mostremo amor e bontà ai altri, lori i vede che semo drio sforsarse par far compagno al bel esémpio de Geovà. Fursi noantri mai savaremo, ma i nostri fradei i dà tanto valor a quel che femo. Khanh, che ghemo parlà vanti, la se ricorda dele sorele che la ga giutada. Ela la ga dito: “Mi dao tanto valor ale care sorele che le me convidea par ndar predicar insieme. Lore le me tolea casa par predicar, magneino qualcossa insieme, e dopo, le me assea qua casa in seguransa. Ancoi, mi sò che l’è stà un grando laoro par quele sorele, ma lore le fea con tanto amor.” Khanh anca la ga dito: “Mi volea far qualcossa par ringrassiar la bontà che quele sorele le me ga mostrà. Ma no sò gnanca ndove lore le ze de star ancoi. Par quela, mi prego a Geovà e domando che lu el benedissa queste care sorele.” Quel che Khanh la ga dito l’è pròpio bel. Magari, gnanca tuti i ndarà ringrassiarne o darghe valor a tuto quel che femo. Ma ghemo de ricordarse che Geovà l’è atento e el vede fin le pìcole robe che femo par mostrar bontà ai altri. Lu el dà tanto valor al nostro sforso che l’è come se el gavesse un dèbito par pagarne. — Ledi Proverbi 19:17. d
Quei che i vol far de pi par Geovà i se sforsa de giutar i altri (Varda el paràgrafo 12.)
12. Come che i fradei i pol mostrar amor ai altri nela congregassion? (Varda anca le ilustrassion.)
12 Se ti te sì un fradel, cossa te pol far par mostrar amor ai altri e giutarli? Varda quel che ga sucedesto con un gióveno de nome Jordan. Lu el ga domandà a un ansiano cossa che el podaria far par giutar de pi nela so congregassion. El ansiano lo ga lodà par quel che lu l’era belche drio far e el ghe ga dato arquanti consili. Par esémpio, lu el ga dito che Jordan el podaria rivar pi bonora nele riunion par saludar e parlar coi fradei, far de pi comentari, predicar insieme del so grupo de predicassion e catar fora maniere de giutar i altri. Jordan el ga acetà questi consili, e invesse de sol imparar a far meio i laori nela congregassion, lu el ga fato pi grando el so amor par i fradei. Lu anca el ga imparà che quando un fradel el deventa un servo ministerial, invesse de scominsiar a giutar i altri, lu seita a giutarli. — 1 Tim. 3:8-10, 13.
13. Come che el amor ga giutà Christian a laorar come ansiano nantra volta?
13 Pol esser che ti te eri un servo ministerial o ansiano, ma adesso no te sì pi. Alora, cossa che ti te pol far? Ricòrdate che Geovà el se pensa del amor che te ghè mostra in tuto quel che te ghè fato. (1 Cor. 15:58) E lu ancora l’è atento al amor che te seiti a mostrar. Varda quel che ga sucedesto col fradel Christian. Lu l’è resta disgustà quando el ga assà de servir come ansiano. Ma lu el ga dito: “Ancora che no fusse pi un ansiano, go dessidio de far el meio nela me adorassion a Geovà.” Dopo un tempo, lu l’è deventà ansiano nantra volta. Christian el ga dito: “De scomìnsio, mi go bio un pochetin de paura. Magari, go pensà che Geovà el me gavea mostrà so misericòrdia e el me gavea scoliesto par esser ansiano nantra volta. Par quela, go dessidio acetar laorar come ansiano nantra volta par causa del me amor a Geovà e ai fradei e sorele.”
14. Cossa che te ghè imparà con quel che Elena la ga dito?
14 I servi de Geovà anca i mostra amor ai so visigni. (Mat. 22:37-39) Par esémpio, Elena, una sorela che la ze de star nela Georgia, la ga dito: “Prima, mi ndea predicar sol par causa del me amor par Geovà. Come el me amor par Geovà el restea cada volta pi grando, anca el me amor par i altri el deventea ancora pi forte. Adesso, proo pensar nele dificoltà che le persone le ga e cossa che mi posso dir par tocar el so cuor. Quanto de pi penso sora quel che le ze drio infrontar, pi voia mi go de giutarle.” — Rom. 10:13-15.
GEOVÀ EL NE BENEDISSE QUANDO MOSTREMO AMOR AI ALTRI
Quando te giuti a qualchedun, pol esser che te sì drio giutar a tanti altri (Varda i paràgrafi 15 e 16.)
15-16. De acordo con quel che vedemo nela ilustrassion, che benedission ghemo quando mostremo amor ai altri?
15 Quando mostremo amor ai nostri fradei, giutemo anca altre persone. Par esémpio, nela pandemia del COVID 19, un fradel de nome Paolo e la so dona i ga proà insegnar arquante sorele pi vècie a doperar el selular o tablet par predicar. Una de queste sorele la pensea che l’era massa fadiga predicar cossita, ma la ze stata bona intivar. Alora, ela la ga convidà arquanti dela so fameia par assister ala Selebrassion, e 60 de lori i ga acetà el so convite e i ga vardà la riunion par meso de vìdeo. El sforso del fradel Paolo e dela so dona ga giutà quela sorela pi vècia e a arquante persone dela fameia de quela sorela. Dopo, ela la ga scrito a Paolo e la so dona: “Ve ringràssio par giutar noantri che semo vècie. Mai vao desmentegarme dela preocupassion de Geovà e del sforso che gavé fato.”
16 Quel che ga sucedesto col fradel Paolo ghe ga insegnà che mostrar amor l’è ancora pi importante che saver tanto o gaver tante abilità. Lu el ga dito: “Go laorà come superintendente de sircuito par un tempo. Ma ancoi son nicorto che, anca se i fradei e sorele no i se pensa de quel che go dito nei discorsi, lori i se ricorda de quel che go fato par giutarli.”
17. Cossa che ancora sucede quando mostremo amor ai altri?
17 Mostrar amor ai altri giuta anca noantri. Varda quel che ga sucedesto con Jonathan, un fradel dela Nova Zelàndia. Nte un sabo dopo mesdì, lu el ga visto un pioniero lu lu sol nela predicassion, ancora che fusse ben caldo. Alora, Jonathan el ga dessidio ndar predicar insieme a quel pioniero nei altri sabi dopo mesdì. Col tempo, Jonathan el ga visto che el so sforso ga giutà de pi a lu che a quelaltro fradel. Lu el ga dito: “In quela època, no me piasea tanto ndar predicar. Ma veder come quel pioniero el insegnea le persone e come el fea un bel laoro me ga fato piaserme tanto dela predicassion. Semo deventadi boni amighi e lu me ga giutà a gaver alegria nela predicassion, a far ancora pi forte la me amicìssia con Geovà e a gaver bele qualità.”
18. Cossa che Geovà el vol che femo?
18 Geovà el vol che el nostro amor par lu e par i altri el devente cada volta pi forte. Come ghemo imparà in questo stùdio, el nostro amor par Geovà el pol vegner pi forte se ledemo la Bìblia, ghe pensemo sora quel che ghemo imparà e preghemo a lu tuti i giorni. E el nostro amor par i fradei e sorele el pol vegner pi forte quando ndemo in serca de maniere de giutarli. Par causa del forte amor che ghemo, semo pi amighi de Geovà e dei fradei e sorele. Queste bele amicìssie le durarà par sempre!
CÀNTICO 109 Mostremo amor un al altro de cuor
a Tuti noantri ghemo de seitar a far cada volta meio la nostra adorassion a Geovà, no vol mia dir se fà pochi o tanti ani che semo batesadi. In questo stùdio, ndaremo veder come che noantri podemo far ancora pi grando el nostro amor a Geovà e ai altri. Intanto che te studi, pensaghe sora le robe che te sì belche stà bon de far e cossa che ancora te podarissi far par mostrar el to amor a Geovà e ai altri.
b (Efesi 5:1, 2) Alora, fé compagno a Dio, come fioi amadi, 2 e seité a gaver amor, cossita come anca el Cristo el ne ga amà e el ga dato la so vita par noantri come oferta e sacrifìssio, un bon profumo par Dio.
c Arquanti nomi i ze stati cambiadi.
d (Proverbi 19:17) Quei che i mostra favor ai poareti, i ghe dà in préstio a Geovà, e Lu el ndarà ricompensarli par quel che i ga fato.