Me pare l’era un pastor de una ciesa del Canadà. Par quela, tute le doméneghe lu el menea mi e me sorela ala scola dela ciesa, e ale 11 de matina, ndeino giutarlo a far laori che ghen’era lì. Dopo mesdì, ndeino insieme de me mare nel Salon del Regno. L’era pròpio fàcile veder la difarensa intrà tute due religion.

Me mare la ga parlà de quel che la era drio imparar dela Bìblia ai so cari amighi Bob e Marion Hutcheson. Dopo de un tempo, anca lori i ze deventadi Testimònie de Geovà. Nel ano 1958, lori i me ga menà insieme i so tre fioi ala Assemblea Internassional Vontade Divina, che la era de oto giorni, nela cità de Nova York. Adesso, mi sò che no l’è stà mia fàcile par lori menarme insieme, ma ndar a quela assemblea l’è un dei ricordi pi bei dela me vita.

Quando mi ero gióveno, mi vivea in colònia e me piasea tanto tender dele bèstie. Alora, mi volea far la università par esser veterinàrio. Dopo, me mare la ghe ga contà a un ansiano quel che mi pensea de far. Alora, lu el me ga giutà a ricordarme che semo nei “ùltimi giorni” e el me ga fato pensar come restaria la me amicìssia con Geovà se doperesse tanti ani dela me vita par far una università. (2 Tim. 3:1) Par quela, go  dessidio che no ndaria studiar par esser un veterinàrio.

Mi gnancora no savea mia cossa che ndaria far dopo dela scola. Anca se ndesse ala predicassion tute le stimane, no me piasea mia predicar e mai gavea pensà de esser un pioniero. In quel tempo, me pare e me zio, che no i era mia Testimònie de Geovà, i me ga dito de ndar laorar nte una empresa tanto granda in Toronto. Come me zio el gavea un laoro importante là, mi son ndato.

Quando mi ero in Toronto, mi laorea tanto e passea massa tempo insieme de persone che no le servia a Geovà. Par quela, mi no ndea tanto ale riunion gnanca ala predicassion. Mi vivea insieme del me nono, che no l’era mia Testimònia de Geovà, ma dopo che lu l’è morto, me ga tocà catar nantro posto par ndar de star.

Bob e Marion Hutcheson, quei che i me ga menà nela assemblea in 1958, i me ga convidà par ndar de star nela so casa. Lori i era come una fameia par mi e i me ga giutà a far pi forte la me amicìssia con Geovà. Alora, in 1960, mi e John, che l’era un dei so fioi, semo stati batesadi. John el ga scominsià a servir come pioniero, e el me ga incoraià a predicar de pi. I fradei dela congregassion i ga visto che ero drio sforsarme, e i me ga dato un laoro compagno a quel che el superintendente dela Riunion Vivemo e Insegnemo el fà ancoi.

Nel ano 1966, me go maridà con Randi Berge, una brava pioniera che la volea tanto servir ndove ghen’era de pi bisogno. Poco tempo dopo, el nostro superintendente de sircuito el ne ga incoraià a ndar giutar nte una congregassion in Orilia, Ontario. Alora, noantri semo ndati.

Pena dopo che semo rivadi in Orilia, go scominsià a servir come pioniero regolar. La voia che Randi la gavea de predicar me ga giutà a esser premoso de parlar sora la Bìblia ai altri. Dopo che me go sforsà par far un bel laoro come pioniero, go bio tanta alegria de doperar la Bìblia par giutar le persone a imparar sora Geovà.  Semo restadi tanto contenti de giutar un caro casal in Orilia a cambiar quel che ghe ocorea par esser servi de Geovà.

Quando semo ndati visitar Toronto, mi go catà Arnold MacNamara, che l’era un dei fradei che i tendea del Betel del Canadà. Lu el ne ga domandà se podarìssino servir come pionieri spessiai, e mi ghe go rispondesto: “Sicuro che si! Basta che no sia in Quebec!” Mi ero drio pensar compagno ale persone che no ghe piasea mia de Quebec, ndove i parlea francese. In quela època, tante persone in Quebec le era drio ndar contra el governo parché le volea che Quebec no’l fusse pi parte del Canadà.

El fradel Arnold el me ga dito: “Adesso Betel l’è drio mandar pionieri spessiai sol par Quebec.” Magari, mi savea che Randi la volea ndar servir là. Alora, suito go acetà. Dopo de un tempo, go visto che l’è stà una dele meio dessision dela nostra vita!

Dopo de studiar francese par sol sinque stimane, mi, Randi e nantro casal ghemo fato un viaio fin Rimouski, intorno de 540 chilòmetri de Montreal. Noantri belche saveino che gaveino ancora tanto de imparar. Ma semo restadi pròpio sicuri de questo quando me ga tocà dar arquanti anunsi nte una riunion. Mi go dito che, nel pròssimo congresso, ghen saria tanti “fradei avestruz” invesse de dir “tanti fradei dela Àustria”.

In Rimouski, semo restadi nte una casa insieme del casal Huberdeaus, so due fiole e altre quatro sorele. El fradel e la sorela Huberdeaus i gavea ciapà quela casa e i altri pionieri che stea lì i giutea a pagarla. Noantri la ciameino de Casa Bianca, parché la era tuta bianca. Èrino de star sempre intrà 12 e 14 persone. Come mi e Randi èrino pionieri spessial, predicheino de matina, dopo mesdì e de sera. Alora, l’era tanto bel gaver sempre qualchedun che podesse vegner insieme, anca quando ndeino de sera e l’era pròpio fredo.

Semo deventadi pròpio amighi de quei bravi pionieri e èrino come una fameia. Dele volte, noantri se senteino darente el fogo o feino robe de magnar insieme. E come un dei fradei l’era mùsico, tante volte noantri canteino e baleino insieme sabo de sera.

Tante persone in Rimouski le volea imparar sora Geovà e in sinque ani, arquanti dei nostri studianti i ze stati batesadi. Alora, suito la congregassion la gavea belche 35 predicadori.

Quando èrino in Quebec, Geovà el ne ga insegnà a esser bravi predicadori. Noantri ghemo visto come lu el ne ga giutà nela predicassion e a gaver le robe che ne ocorea. Ghemo anca imparà a amar le persone che le parlea francese, la so léngua e la so cultura. Cossita, ghemo imparà a amar anca altre culture. — 2 Cor. 6:13.

Ma, de colpo, ne ga sucedesto una roba che no speteino mia. Betel el ne ga mandà ndar de star in Tracadie, darente de Nova Brunswick. L’è stà tanto fadiga par noantri parché gaveino pena fato i documenti par ndar de star in nantro apartamento e mi gavea un laoro de mesa giornada nte una scola. Anca semo restadi preocupadi parché èrino ancora drio far su el nostro Salon del Regno e arquanti dei nostri studianti i era pena deventadi predicadori.

 Ghemo pregà tanto quel fin de stimana e semo ndati cognosser Tracadie, che l’era tanto difarente de Rimouski. Ancora cossita, ghemo acetà parché l’era quel che Geovà el volea. Noantri se ghemo fidà in Geovà del tuto e lu el ne ga giutà a dàrghene fora con tute le dificoltà. (Mal. 3:10) Come Randi la gavea una forte amicìssia con Geovà, la pensea sempre nei altri e la era sempre contenta, l’è stà tanto pi fàcile cambiarse.

El fradel Robert Ross l’era el ùnico ansiano nela congregassion de Tracadie. Lu e la so dona Linda i era drio servir come pionieri in quel posto, e quando i ga bio el so fiol, i ga dessidio restar lì. Anca se i gavesse de tender de un tosatel, lori i ne ga incoraià tanto parché i ne ga ricevesto pròpio ben e i fea un bel laoro nela predicassion.

Dopo che ghemo servio in Tracadie par due ani, ne ga sucedesto nantra roba che no speteino mia. Semo stati convidadi par servir come superintendenti. Alora, ghemo servio par sete ani nel sircuito del inglese, e dopo, semo stati convidadi par servir nel sircuito del francese in Quebec. El nostro superintendente de distrito l’era Léonce Crépeault, che sempre el me lodea par causa dei me discorsi. Magari, dopo el me domandea: “Come che te podarissi insegnar de una maniera che va giutar ancora de pi ai fradei?” a Cossita son stà bon de insegnar ancora meio.

Un dei laori pi bei che go bio nela vita l’è stà nel congresso internassional “Fé Vitoriosa”, nel ano 1978, in Montreal. Mi e altri fradei gavarìssino de far de magnar par 80 mila persone e tante robe le gavea cambià. Par esémpio, el tipo de magnar che ndarissino far, la maniera de farlo e le màchine che doperarìssino. Noantri gaveino intorno de 20 frigideri ben grandi, ma che dele volte, no i sfredea mia ben. Ghemo bio de laorar tanto par assar tuto parecià par el congresso, parché nel giorno prima, ghen’era stà un giugo in quel stàdio. Alora, noantri sol semo stati boni de scominsiar a laorar dopo de mesa note, e ne ocorea assar tuto pronto vanti di. Dopo tuto quel laoro, èrino pròpio strachi. Ma go imparà tanto con quei bravi fradei che i era insieme, parché i ga fato un bel laoro e era pròpio contenti. Noantri semo ancora amighi e se volemo tanto ben. Son restà tanto contento de esser ndato a  quel congresso in Quebec, ndove i fradei i gavea infrontà brute perseghission intrà i ani de 1940 e 1960!

Go imparà tanto anca de altri fradei che i ga giutà a far i congressi in Montreal, come el fradel David Splane, che ancoi el fà parte del Corpo Governante. Nte un ano, lu l’è stà scoliesto par esser superintendente del congresso. Magari, nel congresso de nantro ano, i me ga scoliesto a mi e lu el me ga giutà tanto a far quel laoro.

Mi e Randi ghemo servio come superintendenti par 36 ani. Alora, in 2011 mi son stà convidà par esser un maestro dela Scola par Ansiani de Congregassion. In due ani, noantri ghemo dormio in 75 leti difarenti. L’è vera che no l’è stà mia fàcile, ma Geovà el ne ga benedio tanto. Nel fin de cada stimana, i ansiani sempre i era tanto contenti de veder tuto quel che el Corpo Governante el fà par giutarli a esser pi amighi de Geovà.

Dopo, son deventà un maestro dela Scola de Vangelisadori del Regno. Vanti de scominsiar la scola, i fradei e le sorele sempre i restea preocupadi parché i gavea de studiar sete ore nela scola, dopo altre tre ore casa e far de quatro a sinque parte nela stimana. Par quela, mi e quelaltro maestro, ghe spiegheino che lori i saria boni de far tuto quel laoro se i gavesse el aiuto de Geovà. E sempre me ricordo de come lori i restea maraveiadi de veder che i era boni de far de pi de quel che i pensea quando i se fidea in Geovà.

Me mare sempre la ga mostrà bontà ale persone. Par quela, tanti dei so studianti i ze deventadi Testimònie de Geovà e anca me pare el ga cambià quel che pensea sora Geovà e i so servi. Tre giorni dopo che la ze morta, me pare l’è capità nte una riunion nel Salon del Regno e el ga seità a ndar ale riunion par 26 ani. Anca se el me pare no’l se ga mai batesà, i ansiani i me ga contà che lu l’era sempre el primo a rivar nele riunion.

La me mare la ze stata un bel esémpio par mi e par le me sorele, e la ne ga insegnà tanto ben. Tute le me tre sorele e i so òmini i ze bravi servi de Geovà. Una la ze nel Betel de Portugal e nantra nel Betel del Haiti.

Adesso, mi e Randi servimo come pionieri spessiai in Hamilton, Ontario. Quando èrino superintendenti de sircuito, ndeino ai studi e ale vìsite dei fradei. Ma adesso, restemo tanto contenti de veder i nostri studianti scominsiar a amar a Geovà. Noantri anca ghemo fato bele amicìssie in questa congregassion. E la nostra fede la resta ancora pi forte de veder come Geovà l’è sempre drio giutar questi fradei.

Sempre se ricordemo dela bontà che i fradei i ne ga mostrà. Anca noantri ghemo proà giutar e incoraiar i nostri fradei a far de pi par Geovà. (2 Cor. 7:6, 7) Par esémpio, una volta ghemo cognossesto una fameia che la dona, el fiol e la fiola i servia come pionieri. Mi ghe go domandà al pare se anca lu no’l volea esser un pioniero, e lu el me ga rispondesto che l’era belche drio giutar tre pionieri. Alora, mi ghe go domandà: “Pénsito che sito bon de tenderli meio che Geovà?” E ghe go dito che anca lu el podaria esser contento compagno ala so fameia. Dopo de sei mesi, lu el ga scominsià a laorar come pioniero.

Mi e Randi seitaremo a parlar dele robe maraveiose de Geovà a tuti, parché volemo che anca lori i sìpia felici de servir a lu. — Sal. 71:17, 18.