STÙDIO 31
“Sìpie forti, firmi”
“Me fradei amadi, sìpie forti, firmi.” — 1 COR. 15:58.
CÀNTICO 124 Sempre leai
COSSA CHE NDAREMO IMPARAR? a
1-2. Parché che podemo dir che noantri ghemo de esser compagno a un prèdio? (1 Corinti 15:58)
NEL ANO 1978, un prèdio de 60 andari el ga scominsià a esser fato nela cità de Tokyo, nel Giapon. Fursi le persone le se domandea se quel prèdio el restaria in pié con tuti i teremoti che sucede là. Magari, ancora che quel prèdio el fusse pròpio firme, l’è stà fato de una maniera che el podaria moverse un pochetin par cada banda quando sucedesse un teremoto. Cossita, quel prèdio el seitaria in pié. Anca noantri ghemo de esser compagno. Come cossita?
2 Un servo de Geovà el ga de esser firme e echilibrà. Cossa che vol dir esser firme? Seitar leal e esser sempre ‘pronto par obedir’ a tute le lege de Geovà. (Ledi 1 Corinti 15:58. b) E cossa che vol dir esser ‘echilibrà’? Mai pensar che tute le robe le ga esser fate dela maniera che pensemo che l’è giusto gnanca pensar che podemo far tute le robe che volemo. (Tia. 3:17) In questo stùdio, ndaremo imparar cossa ghemo de far par seitar forti e firmi. Anca ndaremo veder sinque robe che Sàtana el dopera par intrigarne de obedir a Geovà e cossa podemo far par seitar firmi.
COME CHE PODEMO SEITAR FIRMI?
3. Che lege de Geovà ghen’è in Ati 15:28, 29?
3 Sol Geovà el ga el dirito de far lege, e lu sempre le fà de una maniera che l’è fàcile de capir. (Isa. 33:22) Par esémpio, el Corpo Governante del passà el ga dito cossa i primi dissìpoli de Gesù i gavaria de far par seitar firmi: (1) adorar sol a Geovà e mai adorar altri dèi, (2) obedir la lege de Geovà sora el sangue, e (3) no far mia imoralità sessual. (Ledi Ati 15:28, 29. c) Come che ancoi podemo seitar firmi e obedir a Geovà anca noantri?
4. Come che noantri mostremo che adoremo sol a Geovà? (Apocalisse 4:11)
4 Noantri adoremo sol a Geovà e mai adoremo altri dèi. Geovà el ga dito che i israeliti i gavaria de adorar sol a lu. (Deu. 5:6-10) Quando Sàtana el ga proà far Gesù desobedir a Dio, anca Gesù el ga dito che ghemo de adorar sol a Geovà. (Mat. 4:8-10) Par quela, noantri no adoremo mia imàgine gnanca tratemo lìderi religiosi, polìtichi, atleti, cantori o altre persone come se i fusse un dio. Invesse, noantri adoremo sol a Geovà, quel che el ga “creà tute le cose”. — Ledi Apocalisse 4:11. d
5. Parché che noantri no acetemo mia el sangue?
5 Noantri obedimo ala lege de Geovà de no acetar mia sangue. Parché? Parché Geovà el ga dito che el sangue l’è la vita dela persona, e la vita la ze un presente tanto pressioso che lu el ne ga dato. (Lev. 17:14) La prima volta che Geovà el ga dito che le persone le podaria magnar la carne dele bèstie, lu el ghe ga dito che no le podaria mia magnar el sangue. (Gén. 9:4) Dopo, quando Geovà el ga dato la Lege ai israeliti par meso de Moisè, lu el ga dito nantra volta che no i gavaria mia de magnar el sangue. (Lev. 17:10) E Geovà el ga doperà el Corpo Governante del passà par dirghe ai primi dissìpoli de Gesù che ‘no i gavaria de acetar el sangue’. (Ati 15:28, 29) Anca noantri sempre obedimo a questo comandamento quando ghemo de dessider che tipo de tratamento de salute ndaremo far. e
6. Cossa ghemo de far par viver dela maniera che Dio el dise che l’è giusto?
6 Noantri vivemo dela maniera che Dio el dise che l’è giusto. (Ebr. 13:4) El apòstolo Paolo el ga dito che ghemo de sforsarse par finir fora cole voie de far robe sbaliade. Par quela, mai ndaremo vardar o far qualcossa che podaria portarne a far imoralità sessual. (Col. 3:5; Giò 31:1) E se vien voia de far una roba sbaliada, suito cavemo via quel pensamento.
7. Cossa ghemo de far, e parché?
7 Ghemo de ‘obedir a Geovà de tuto el cuor’ parché lu el vol. (Rom. 6:17) L’è vera che no podemo mia cambiar una lege de Geovà. Ma podemo esser sicuri che quel che Dio el ne domanda l’è sempre el meio par noantri. (Isa. 48:17, 18; 1 Cor. 6:9, 10) Par quela, se sforsemo de contentar a Geovà compagno al salmista, che el ga dito: ‘Go dessidio sempre obedir la to lege, fin el fin.’ (Sal. 119:112) Magari, Sàtana el proa intrigarne de obedir a Geovà. Come?
COME CHE SÀTANA EL PROA INTRIGARNE DE OBEDIR A GEOVÀ?
8. Come che Sàtana el dopera la perseghission par proar finir fora la nostra amicìssia con Geovà?
8 Perseghission. Sàtana el vol finir fora la nostra amicìssia con Geovà e la nostra voia de seitar firmi. (1 Pie. 5:8) Par quela, lu el dopera persone che le vien contra noantri par dirne su e fin par farne mal. Par esémpio, i primi dissìpoli de Gesù i ze stati perseghidi, i ga ciapà bote e arquanti i ze stati copadi parché i era dessididi de seitar a obedir a Geovà. (Ati 5:27, 28, 40; 7:54-60) Anca ancoi, Sàtana el dopera persone che le perseghe i nostri fradei e sorele in arquanti paesi, come nela Rùssia, ndove la perseghission del governo la ze pròpio bruta.
9. Parla de un esémpio che mostra che ghemo de star atenti cole tràpole de Sàtana.
9 Altre tràpole. Sàtana anca dopera “tràpole” par proar farne desobedir a Geovà. (Efe. 6:11) Varda quel che ga sucedesto con Bob, un fradel che l’era nel ospedal par far una sirurgia. Lu el ga dito ai dotori che no’l ndaria mia acetar sangue, e lori i era de acordo. Magari, nela note vanti la sirurgia, dopo che la fameia de Bob la era ndata via, un dei dotori l’è ndato parlar con lu. Quel dotor el ga dito che el pensea che no i ndaria doperar sangue nela sirurgia, ma che i lo gavaria lì pronto se ghe ocoresse. Fursi quel dotor el gavea pensà che Bob el ndaria cambiar de idea sensa la so fameia intorno. Invesse, Bob el ga seità firme e el ghe ga dito che mai ndaria acetar sangue.
10. Parché che no podemo pensar compagno ale persone che no le obedisse a Geovà? (1 Corinti 3:19, 20)
10 La maniera de pensar de quei che no i obedisse a Geovà. Tanti i pensa che la meio maniera de viver l’è far quel che i vol sensa badar a Dio. Se pensemo compagno a lori, anca noantri ndaremo desobedir a Geovà. (Ledi 1 Corinti 3:19, 20. f) Par esémpio, nel passà, arquanti dissìpoli de Gesù dele cità de Pèrgamo e Tiatira i ga scominsià a far imoralità e a adorar falsi dèi, compagno ale persone de quele cità. Par quela, Gesù el ghe ga dato un forte consìlio. (Apo. 2:14, 20) Pol esser che quei dela nostra fameia e altre persone che cognossemo i proa farne pensar che no ne ocore obedir a tuto quel che la Bìblia la dise e che podemo far quel che volemo. Fursi lori anca i dise che quando la Bìblia la ze stata scrita la vita la era tanto difarente e che l’è massa fadiga obedirla ancoi.
11. Cossa che no ghemo mia de far?
11 Ancoi Geovà el ne dà orientassion par meso dela Bìblia e dela so organisassion. Magari, pol esser che, dele volte, pensemo che ghemo bisogno de de pi orientassion de quele che ricevemo. Alora, fursi ne vien voia de far noantri stessi una règola. (1 Cor. 4:6) Ma ghemo de ricordarse che i lìderi religiosi dei giorni de Gesù i fea pròpio cossita. Par quela, l’era fadiga par le persone de quela època obedir ale lege che quei lìderi religiosi i fea. (Mat. 23:4) Semo sicuri che Geovà el ne dà tute le orientassion che ne ocore par meso dela so organisassion e dela Bìblia. Alora, mai ndaremo proar far règole par i nostri fradei e sorele. — Pro. 3:5-7.
12. Come che Sàtana el dopera storiete e busie?
12 Storiete e busie. Sàtana el dopera busie e anca tante robe che arquante persone le crede par imbroiarle e farle restar una contra l’altra. (Col. 2:8) Nela època dei apòstoli, ghen’era gente che disea che i dissìpoli de Gesù i gavea de obedir ala lege de Moisè, arquanti i insegnea costumi dei giudei che no ghen’era mia nele Scriture e altri i ndea drio idee dele persone. Cossita, tanti i ze restadi distante de Geovà, quel che el ga la vera sabedoria. Ancoi, Sàtana el dopera la television, ràdio, giornai e la internet par far le persone creder in storiete e in busie che tanti polìtichi i conta. L’è stà pròpio cossita nela pandemia del COVID-19. g Magari, le Testimònie de Geovà che le ze ndate drio le orientassion dela organisassion de Geovà no le ga sofrio par causa de queste storiete. — Mat. 24:45.
13. Parché che ghemo de star atenti cole robe che pol farne desmentegarse de quel che l’è pi importante?
13 Robe che ne fà desmentegarse quel che l’è pi importante. Noantri ghemo de “star atenti ale robe che le ze pi importante”. (Fil. 1:9, 10) L’è vera che ne ocore magnar, bever, divertirse e laorar. Ma se no stemo atenti podemo doperar massa tempo con queste robe. Cossita, no gavaremo forsa gnanca voia de far quel che l’è pi importante. (Luc. 21:34, 35) Nantra roba che pol farne desmentegarse de quel che l’è pi importante l’è seitar a scoltar notìssie de quel che i governi e le persone i ze drio far nel mondo. Se no stemo atenti podemo fin pensar che un governo l’è meio de quelaltro. Come ghemo visto, Sàtana l’è drio doperar tante robe par proar farne desobedir a Geovà. Adesso, ndemo veder cossa ghemo de far par seitar firmi.
COSSA GHEMO DE FAR PAR SEITAR FIRMI?
Par seitar firme, pensa parché che te ghè dessidio dedicarte a Geovà e esser batesà, stùdia e pensaghe sora la Bìblia e fìdate in Geovà (Varda i paràgrafi 14 a 18.)
14. Cossa che pol giutarte a seitar firme?
14 Pensa parché te te ghè dedicà e te sì stà batesà. Vanti de dedicar la to vita a Geovà e esser batesà, te ghè cambià arquante robe. Quel che te ghè imparà te ga assà sicuro che te gavei la verità sora Geovà. Dopo, te ghè scominsià a ndar ale riunion e a parlar ai altri le robe che te eri drio imparar. Cossita, la to fede la ze restada pi forte e te te ghè ciamà gramo dele robe sbaliade che te gavei fato. Alora, te ghè assà de banda queste brute robe e te te ghè sforsà de far quel che ghe piase a Dio. Dopo, quando te ghè capio che Geovà el te gavea perdonà, te ghè sentio tanta pace. (Sal. 32:1, 2) Adesso che te te ghè dedicà e te sì stà batesà, sicuro che te vol sforsarte del tuto par seitar firme. — Mat. 7:13, 14.
15. Parché che l’è importante seitar a studiar e a pensarghe sora quel che la Bìblia la dise?
15 Stùdia la Bìblia e pensaghe sora. Quando studiemo la Bìblia e ghe pensemo sora quel che ghemo imparà, restemo firmi. Parché? Parché la nostra fede la resta pi forte e restemo pi sicuri che Geovà el sa quel che l’è meio par noantri. (Col. 2:6, 7) Saremo compagno a una pianta che la resta ben firme parché so radise le va fondo. Alora, se volemo seitar firmi, ghemo de far la nostra fede cada volta pi forte. Par quela, l’è importante pensar nele orientassion, nei consili e nela protession che Geovà el ga dato ai so servi nel passà. Par esémpio, Ezechiel el ga bio una vision de un àngelo che el mesurea el témpio. Questa vision la ga incoraià Ezechiel, e la ne insegna come obedir e adorar a Dio dela maniera giusta. h (Eze. 40:1-4; 43:10-12) Sarà tanto bon se noantri seitemo a studiar e a pensarghe sora tuto quel che ghen’è nela Bìblia, anca le robe che no le ze mia fàcile de capir.
16. Come che esser dessidio nel cuor ga giutà Bob? (Salmo 112:7)
16 Sìpia dessidio nel to cuor. El rè Davi el ga mostrà che el volea sempre amar a Geovà quando el ga dito: ‘Me cuor l’è firme ò Dio.’ (Sal. 57:7) Noantri ghemo de far compagno a Davi e fidarse del tuto in Geovà. (Ledi Salmo 112:7. i) Varda quel che ga sucedesto con Bob, che ghemo parlà prima. Quando i dotori i ghe ga dito che fursi i ndaria doperar sangue, Bob suito el ga dito che, se i pensesse de doperarlo, lu el ndaria via del ospedal. Dopo, lu el ga dito: “Mi ero pròpio sicuro de cossa gavaria de far, e no gavea mia paura de cossa che podaria suceder.”
Se ghemo una forte amicìssia con Geovà, saremo boni de seitar firmi e dàrghene fora con tute le dificoltà (Varda el paràgrafo 17.)
17. Cossa che imparemo de quel che ga sucedesto con Bob? (Varda anca la ilustrassion)
17 Bob l’è stà bon de mantegnerse firme parché, vanti de ndar al ospedal, lu l’era dessidio a mai desobedir a Geovà. Cossa che imparemo del so esémpio? Prima, lu el volea contentar a Geovà. Seconda, lu el ga studià cossa la Bìblia e le nostre publicassion le dise sora la vita e el sangue. Tersa, lu l’era sicuro che quel che Geovà el ne domanda de far l’è sempre la meio roba. Se anca noantri femo cossita, saremo dessididi nel cuor a seitar firme, no importa cossa che suceda.
Barache e so òmini i va contra Sìsera e so esèrsito (Varda el paràgrafo 18.)
18. Come che el esémpio de Barache ne giuta a fidarse in Geovà? (Varda la ilustrassion dela prima pàgina.)
18 Fìdate in Geovà. Varda quel che ga sucedesto con un servo de Dio del passà de nome Barache. Geovà el ga dito che lu el gavaria de ndar contra el poderoso esèrsito de Sìsera. (Giui. 5:8) Ma, in quela època i israeliti no i era mia pronti par la guera parché no i gavea scudi gnanca lanse. Alora, la profetisa Dèbora la ga dito che Barache el gavea de lotar contra Sìsera e le so 900 carete de guera nte un posto piano. Ancora che fusse pi fàcile par el esèrsito de Sìsera lotar in quel posto, Barache el ga obedio. Alora, intanto che i israeliti i vegnea do del Monte Tabor, Geovà el ga fato vegner una forte spiovada. Cossita, le carete de guera de Sìsera no le era mia bone de ndar avanti parché ghen’era tanto baro in tera, e Barache e so esèrsito li ga vinsesti. (Giui. 4:1-7, 10, 13-16) Dela medèsima maniera, Geovà el ndarà giutarne se se fidemo in lu e nele orientassion che lu el ne dà par meso dela so organisassion. — Deu. 31:6.
SÌPIA DESSIDIO A SEITAR FIRME
19. Parché che ti te vol seitar firme?
19 Intanto che semo drio viver in questo mondo, ghemo de seitar a sforsarse par far quel che l’è giusto. (1 Tim. 6:11, 12; 2 Pie. 3:17) Alora, no stà assar che la perseghission, altre tràpole, la maniera de pensar de quei che no i obedisse a Dio, storiete, busie e robe che ne fà desmentegarse de quel che l’è pi importante ne intrighe de obedir a Geovà. (Efe. 4:14) Invesse, seita firme e forte, ama a Geovà e obedissi ale so orientassion. Magari, dele volte, ne toca cambiar la nostra maniera de pensar e de far le robe. Nel pròssimo stùdio, ndaremo imparar col bel esémpio de Geovà e de Gesù.
CÀNTICO 126 Sempre forti, firmi e atenti
a Ancora dela època de Adon e Eva, Sàtana el vol far tute le persone pensar che le pol dessider quel che l’è giusto e quel che l’è sbalià. Lu el vol che ndemo contra le lege de Geovà e le orientassion dela organisassion. Questo stùdio ndarà giutarne a esser dessididi a obedir a Geovà del tuto e mai ndar drio el mondo de Sàtana.
b (1 Corinti 15:58) Par quela, me fradei amadi, sìpie forti, firmi. Gàpie sempre tanto da far nel laoro del Signor, e sàpie che tuto el vostro laoro par el Signor no l’è par gnente.
c (Ati 15:28, 29) Parché al spìrito santo e a noantri ne par ben no darve pi peso, sol queste robe nessessarie: 29 seité no acetar le robe sacrificade ai idoli, el sangue, quel che l’è stà strangolà e la imoralità sessual. Se valtri no aceté queste robe, valtri ndaré prosperar. Steme ben!
d (Apocalisse 4:11) “Geovà, nostro Dio, ti te mèriti ricever la glòria, el onor e el poder, parché te ghè creà tute le cose, e par la to volontà le ze vegneste a esister e le ze state creade.”
e Par imparar de pi sora come che i servi de Dio i pol obedir ala lege de Geovà sora el sangue, varda la lession 39 del libro Te pol viver felice par sempre!.
f (1 Corinti 3:19, 20) Parché el saver de questo mondo no l’è gnente davanti de Dio, come l’è scrito: “Lu el fà el sàbio cascar nela so pròpia tràpola.” 20 E anca: “Geovà el sa che quel che i òmini de saver i pensa no val gnente.”
g Varda el artìcolo “Como se proteger de informações falsas” nel jw.org.
h Par imparar de pi, varda i capìtoli 13 e 14 del libro A Adoração Pura de Jeová É Restaurada!
i (Salmo 112:7) Lu no’l gavarà paura de brute notìssie. So cuor l’è forte, el se fida in Geovà.