1. Parché che l’è importante pareciarse par le desgràssie?

 SE SEMO ben pareciadi, podemo salvar la nostra vita. Come cossita? Quei che i ze pareciadi vanti che suceda una desgràssia i pol seitar vivi e giutar i altri. Una organisassion nela Europa che la giuta le persone che le ga infrontà una desgràssia la dise: “Esser ben pareciadi salva la vita.”

2. Parché che ghemo de esser pareciadi par la granda tribolassion? (Mateo 24:44)

² Tante desgràssie le sucede de colpo e nissuni i ze drio spetarle. Anca la “granda tribolassion” la scominsiarà de colpo. (Mat. 24:21) Magari, tante persone le sarà drio spetarla. Parché? Parché intorno de 2 mila ani indrio, Gesù el gavea avisà che so dissìpoli i gavaria de esser pronti par questo giorno. (Ledi Mateo 24:44. b) Cossita, se semo ben pareciadi, sarà pi fàcile perseverar in questa època e giutar altri a far compagno. — Luc. 21:36.

3. Come che la perseveransa, la compassion e el amor i ndarà giutarte a esser pronto par la granda tribolassion?

³ Noantri gavaremo bisogno de tre robe che ndarà giutarne a esser pronti par la granda tribolassion: la perseveransa, la compassion e el amor. Par esémpio, proa pensa cossa veto far se te toca parlar del giulgamento de Geovà e le persone le te vien contra? (Apo. 16:21) Te gavarè bisogno de perseveransa par obedir a Geovà e fidarte che lu el ndarà protegerte. O cossa veto far se i fradei i perde arquante robe o fin tuto quel che i ga? (Aba. 3:17, 18) Te tocarà mostrar compassion par giutarli con quel che i ga de bisogno. Metemo dir che, dopo che el grupo de nassion el vien contra noantri, te toca viver insieme dei fradei nte un posto pròpio pìcolo. (Eze. 38:10-12) Alora, te ocorerà gaver un forte amor  par to fradei e sorele par infrontar quela època tanto fadiga.

4. De che maniera la Bìblia la mostra che ne ocore seitar a gaver perseveransa, compassion e amor?

⁴ La Bìblia la mostra che l’è importante seitar a gaver perseveransa, compassion e amor. Luca 21:19 dise: “Par causa dela vostra perseveransa, valtri gavaré la vita.” Colossensi 3:12 dise: ‘Gavé de vestirve de compassion.’ E 1 Tessalonissensi 4:9, 10 dise: ‘Dio el ve insegna a amar un al altro. Ma noantri ve domandemo de seitar a mostrar questo amor cada volta de pi.’ Tuti questi testi i ze stati scriti ai dissìpoli che belche i mostrea perseveransa, compassion e amor. Ancora cossita, lori i gavea de seitar a mostrar queste qualità, e noantri ghemo de far compagno. Alora, ndaremo veder come che i primi dissìpoli de Cristo i ga mostrà cada una de queste tre qualità. Dopo, ndaremo veder come che podemo far compagno a lori e esser pronti par la granda tribolassion.

5. Cossa che i primi dissìpoli de Gesù i ga fato par perseverar?

⁵ I primi dissìpoli i gavea de perseverar. (Ebr. 10:36) Lori i infrontea tuti i problemi che le altre persone le gavea, ma ghe tochea infrontar ancora altre dificoltà par causa dela so fede in Gesù. Tanti de lori i sofria perseghission dei lìderi religiosi giudei, dele autorità romane e fin dela so fameia. (Mat. 10:21) Dele volte, rento le congregassion, ghen’era i apòstati che i proea finir cola union intrà i fradei. (Ati 20:29, 30) Ma stesso cossita, quei dissìpoli i ga perseverà. (Apo. 2:3) Cossa gali fato? Lori i ga pensà sora esempi de perseveransa che ghen’era nele Scriture, come quel de Giò. (Tia. 5:10, 11) Lori anca i ga pregà par gaver forsa. (Ati 4:29-31) E lori i ga seità a pensar nele benedission che Geovà el ghe daria se i seitesse a far quel che l’era giusto. — Ati 5:41.

6. Cossa che te ghè imparà de quel che Merita la ga fato par perseverar?

⁶ Cossa che pol giutarte a perseverar? Studiar e pensarghe sora esempi de perseveransa che ghen’è nela Bìblia e nele publicassion. L’è stà pròpio cossita che Merita, una sorela dela Albània, la ga fato quando la so fameia la ze vegnesta contra ela. Merita la ga dito: “Me ga incoraià tanto studiar sora el esémpio de Giò. Lu el ga sofrio tanto e no’l savea chi che l’era drio farlo sofrir. Ancora cossita, lu el ga dito: ‘Fin la me morte, mi mai vao assar de esser leal!’ (Giò 27:5) Mi me son nicorta che i me problemi no i ze gnente darente de quel che Giò el ga passà, e al manco mi sò chi che l’è drio farme sofrir.”

7. Anca se no te sì drio infrontar una bruta dificoltà adesso, cossa che te pol far?

⁷ Pol esser che adesso no te sì mia drio infrontar una bruta dificoltà. Ancora cossita, domanda el aiuto de Geovà se te infronti problemi pi pìcoli, se te te senti disgustà o se no te sè cossa far. Parché? Parché se te ghe conti a Geovà i to pensieri e te vè in serca del so aiuto, te farè pi forte la to perseveransa. (Fil. 4:6; 1 Tes. 5:17) E cossita, te sarè sicuro che Geovà el sa pròpio quel che te ghè de bisogno e che el ndarà giutarte anca quando vien fora dificoltà pi brute. — Sal. 27:1, 3.

8. Come che el esémpio de Mira el mostra che perseverar ancoi ne giutarà a perseverar anca nel futuro? (Tiago 1:2-4) (Varda anca la ilustrassion)

⁸ Parché che podemo dir che sarà pi fàcile perseverar nela granda tribolassion se seitemo fedeli a Geovà ancoi? (Rom. 5:3) Parché la perseveransa la farà pi forte la nostra fede de che Geovà el vol giutarne, e questa fede la ne giutarà a perseverar nele dificoltà che vegnarà fora pi avanti. (Ledi  Tiago 1:2-4. c) Tanti fradei i ga visto che i ze stati boni de perseverar parché i gavea belche fato cossita nel passà. L’è stà questo che ga sucedesto anca con Mira, una pioniera dela Albània. Ela la ga dito che, dele volte, la pensa che nissuni sofre tanto compagno ela. Magari, la proa ricordarse de come Geovà la ga giutada nei ùltimi 20 ani. Alora, Mira la dise a si stessa: ‘Seita fedele. No stà desmentegarte de tuti questi ani e de tuto el aiuto che Geovà el te ga dato.’ Anca ti te ghè de pensarghe sora come Geovà el te ga belche giutà a perseverar e fidarte che lu el vede el to sforso e ndarà ricompensarte. (Mat. 5:10-12) Cossita, quando vien fora la granda tribolassion, ti te savarè cossa far e te sarè dessidio a perseverar.

9. Come che la congregassion dela Antiochia dela Sìria la ga mostrà compassion?

⁹ Varda quel che ga sucedesto quando ghen’è stà una bruta fame nela Giudea. I fradei dela Antiochia dela Sìria i ga bio compassion quando i ga savesto quel che l’era drio suceder coi fradei nela Giudea. Alora, par causa dela so compassion, lori i ga volesto giutarli anca se la Giudea la era distante. (1 Gio. 3:17, 18) I fradei dela Antiochia i era dessididi de giutarli ‘de acordo con quel che cada un el podea, e i ga mandà ai fradei dela Giudea quel che i gavea de bisogno’. — Ati 11:27-30.

10. Come che podemo mostrar compassion ai nostri fradei quando sucede una desgràssia? (Varda anca la ilustrassion)

¹⁰ Tuti noantri podemo mostrar compassion ai nostri fradei ancoi quando sucede una desgràssia. Ma cossa che ti te pol far par giutar? Prega par questi fradei che i ze drio sofrir, giuta coi to donativi par la òpera mondial e fà presto domandarghe ai ansiani cossa che te pol far par giutarli. d (Pro. 17:17) Par esémpio, nel ano de 2020, de pi de 950 grupi ze stati fati par giutar quando ga sucedesto desgràssie. Lori i ga giutà i fradei che i gavea de bisogno nela pandemia del COVID-19. Questi grupi i ga giutà i fradei a far su nantra volta i Saloni del Regno e le so case, a gaver de magnar e tuto quel che ghe ocorea e li ga incoraidi a servir a Geovà. (Varda anca 2 Corinti 8:1-4) Volemo ringrassiar tanto questi cari fradei e sorele!

11. Come che mostrar compassion ai fradei ghe dà onor a Geovà?

¹¹ Quando mostremo compassion ai nostri fradei dopo de una desgràssia, altre persone le vede el nostro sforso. Varda quel che ga sucedesto nel ano 2019, dopo che el furacon Dorian el ga finio fora un Salon del Regno nele Bahamas. Intanto che i nostri fradei i era drio far su nantra volta el Salon, lori i ghe ga domandà al paron de una empresa quanto che ndaria costar far un per de laori nel Salon. Alora, lu el ghe ga rispondesto: “Mi go visto quel che sì drio far par i vostri amighi, e son restà maraveià. Par quela, mi vui giutar la vostra organisassion. Mi vao far el laoro par valtri, vao darve el material e anca le màchine sensa cobrar gnente.” Ghen’è tante persone nel mondo che no le cognosse le Testimònie de Geovà, ma le vede quel che femo par giutar un al altro. Par quela, restemo tanto  contenti de saver che quel che femo pol giutar le persone a rivarse darente de Geovà, che l’è tanto misericordioso. — Efe. 2:4.

12. Parché che ne ocorerà mostrar compassion nela granda tribolassion? (Apocalisse 13:16, 17)

¹² Parché che ne ocorerà mostrar compassion nela granda tribolassion? Parché la Bìblia la spiega che quei che no i giuta i governi i gavarà tanti problemi adesso e nela granda tribolassion. (Ledi Apocalisse 13:16, 17. e) Par quela, gavaremo de mostrar compassion parché pol esser che i fradei i ghe ocorerà del nostro aiuto par gaver quel che i ga de bisogno. Cossita, quando el nostro Rè Gesù Cristo el vegnarà par giulgar le persone, el ne convidarà par “ereditar el Regno”. — Mat. 25:34-40.

13. De acordo con Romani 15:7, come che i primi dissìpoli de Gesù i ga fato pi forte el amor intrà de lori?

¹³ Nel passà, le persone le savea che i primi dissìpoli de Cristo i ghe mostrea amor intrà de lori. Ma sarà che i pensea che l’era fàcile mostrar amor un al altro? Proa varda come l’era la congregassion in Roma. Tanti fradei i era giudei e i gavea imparà a obedir la Lege de Moisè. Magari, arquanti i ze stati vegnesti de altre nassion e i gavea costumi difarenti. Altri fradei i era schiavi e ghen’era quei che fursi i era paroni de schiavi. Alora, par giutar questi fradei a far pi forte el so amor un al altro, el apòstolo Paolo ghe ga dato el consìlio de ‘acetarse intrà de lori’. (Ledi Romani 15:7. f) Cossa el ga volesto dir? La parola “acetar” la vol dir ricever ben a qualchedun come se el fusse una persona dela fameia o un caro amigo. E l’è stà pròpio cossita che i fradei i ga fato. Invesse de assar che vegnesse fora problemi parché i era difarenti, lori i ga acetà un al altro. Par esémpio, Paolo el ghe ga dito a Filémon che el ricevesse ben a Onèsimo, che l’era un schiavo suo che l’era scampà via. (Filém. 17) Àchila e Prissila i ga ricevesto ben a Apolo, ancora che el gavesse de imparar de pi sora Gesù. — Ati 18:26.

14. Come che Anna e so omo i ga mostrà amor ai fradei?

¹⁴ Noantri anca podemo mostrar amor ai nostri fradei e sorele se passemo tempo insieme de lori e proemo esser so amighi. Cossita, anca lori i ndarà mostrar amor a noantri. (2 Cor. 6:11-13) L’è stà pròpio quel che Anna e so omo i ga fato. Pena dopo che i ze ndati de star nela Àfrica par servir come missionari, la pandemia del COVID-19 la ze vegnesta fora. Come che Anna e so omo i ga mostrà amor ai fradei? Come no i cognossea a nissuni e no i podea mia catarse coi fradei, lori i ga doperà la internet par ciamarli par vìdeo e mostrar che i volea cognosserli meio. Alora, quele fameie sempre ghe mandea messagi e li ciamea. Ma parché che Anna e so omo i ga fato cossita? Ela la ga dito: “Mi no vao mai desmentegarme del amor che i fradei i ga mostrà a mi e ala me fameia, anca quando èrino drio tribolar. El so esémpio me ga motivà a far compagno a lori.”

15. Cossa gheto imparà col esémpio de Vanessa sora mostrar amor ai fradei? (Varda anca la ilustrassion)

¹⁵ Tanti de noantri semo nte una congregassion ndove ghen’è fradei e sorele pròpio difarenti de noantri. Ma, podemo far pi forte el nostro amor par lori se proemo veder le so bele qualità. Varda el esémpio  dela sorela Vanessa, che la ze nela Nova Zelàndia. Ela la ga dito che ghe fea fadiga esser amiga de arquanti fradei e sorele dela so congregassion. Ma invesse de star distante de lori, ela la ga dessidio passar pi tempo insieme. Cossita, ela la ze stata bona de veder parché che Geovà li ama. Vanessa la ga dito: “Dopo che me omo l’è deventà superintendente de sircuito, noantri passemo tempo con persone tanto difarente de noantri, e adesso l’è pi fàcile star insieme a lore. Mi resto tanto contenta de veder come semo difarente un del altro e de saver che Geovà el ne ga scoliesto a tuti par adorarlo.” Alora, podemo mostrar che amemo i nostri fradei se proemo vederli compagno a Geovà li vede. — 2 Cor. 8:24.

16. Parché che sarà tanto importante amar i nostri fradei nela granda tribolassion? (Varda anca la ilustrassion)

¹⁶ Sarà tanto importante amar i nostri fradei e sorele nela granda tribolassion. Ma ndove ndaremo catar protession? Varda quel che Geovà el ga dito al so pòpolo quando esèrsiti i ga atacà Babilònia: “Ndé rento ai vostri quarti, me pòpolo, e seré le vostre porte de drio de valtri. Resté sconti una scianta, fin che quela ràbia la va via.” (Isa. 26:20) Quando vien fora la granda tribolassion, fursi anca noantri gavaremo de far quel che dise questo testo. Pol esser che questi “quarti” i ze le congregassion. Alora, gavaremo de seitar insieme ai nostri fradei par gaver la protession de Geovà. Par quela, ghemo de sforsarse adesso no sol par star insieme ai nostri fradei, ma par amarli. Cossita, saremo boni de seitar vivi!

17. Cossa che saremo boni de far nela granda tribolassion se se pareciemo adesso?

¹⁷ “El grando giorno de Geovà” el sarà una època pròpio fadiga par tute le persone. (Sof. 1:14, 15) Anca noantri ndaremo sofrir. Ma, se se pareciemo adesso, saremo boni de seitar calmi e giutar i altri. Alora, ndaremo perseverar, no importa le dificoltà che le vegnarà fora. Faremo el nostro meio par mostrar compassion e giutar i nostri fradei quando i sofre. E se imparemo a amar i nostri fradei adesso, saremo boni de star insieme a lori nela granda tribolassion. Alora, Geovà el ne darà la vita eterna nte un novo mondo ndove no ghen sarà pi desgràssie gnanca tribolassion. — Isa. 65:17.