1-2. (a) Cossa che le parole de Gesù le ne insegna? (b) Parché che i dissìpoli i ga abandonà a Gesù? (Varda anca la ilustrassion.)

 GESÙ el ga dito ai so dissìpoli: “El spìrito el vol far quel che l’è giusto, ma la carne la ze fiaca.” a (Mat. 26:41b) Quel che Gesù el ga dito mostra che el capia che semo imperfeti e che podemo far sbali. Ma le so parole anca ne insegna che no ghemo mai de pensar che mai ndaremo sbaliar e che saremo sempre boni de far quel che l’è giusto. Anca parché Gesù el gavea dito queste parole un poco prima che i so dissìpoli i gavea dito che mai i ndaria abandonarlo. (Mat. 26:35) L’è vera che i dissìpoli i volea far una roba bona, ma no i se ga mia nicorti che, par causa de una dificoltà, lori i podaria suito perder la voia de far quel che l’è giusto. Par quela che Gesù el ga anca dito: “Seité esser atenti e seité far orassion par no cascar in tentassion.” — Mat. 26:41a.

² Cossa che i dissìpoli i ga fato quando Gesù l’è stà preso? Lori no i ga seità atenti e i ga abandonà a Gesù. Lori i ga fato pròpio quel che i gavea prometesto che mai i ndaria far. — Mat. 26:56.

3. (a) Parché che no ghemo de pensar che no ndaremo mai sbaliar? (b) Cossa che vederemo in questo stùdio?

³ No ghemo de pensar che mai ndaremo sbaliar e che saremo sempre boni de far quel che l’è giusto. Anca se no volemo assar Geovà disgustà, ne ocore capir che semo imperfeti e che  l’è tanto fàcile ndar drio una voia che la ze sbaliada. (Rom. 5:12; 7:21-23) Pol esser che ne vien fora qualcossa de colpo che ne fà gaver voia de far quel che l’è sbalià. Alora, cossa pol giutarne a seitar leai a Geovà e a Gesù? Ne ocore far quel che Gesù el ga dito e star sempre atenti. In questo stùdio, vederemo un per de robe che ghemo de star pròpio atenti parché le pol farne gaver voie sbaliade. Dopo, ndaremo veder come protegerse de queste voie sbaliade e come seitar atenti.

STÀ ATENTO ALE TO VOIE

4-5. Parché che ghemo de star atenti anca ai sbali pi pìcoli?

⁴ Ghen’è sbali che ne par pròpio pìcoli. Anca cossita, questi sbali i pol rovinar la nostra amicìssia con Geovà e portarne a far sbali ancora pi bruti.

⁵ Tuti noantri podemo gaver voia de far una roba che la ze sbaliada una volta o l’altra. Ma, pol esser che cada un de noantri ga de sforsarse tanto par dàrghene fora con una voia che la ze sbaliada o par no ndarghe drio a una maniera de pensar del mondo. Par esémpio, pol esser che qualchedun el ga de sforsarse tanto par no far imoralità sessual, no vardar pornografia o no far masturbassion. Arquanti i ga paura dele persone, altri i vol far tuto quel che i vol lori e altri i resta suito cativi par gnente. Par quela, i ga de sforsarse tanto par seitar a far quel che l’è giusto. Tiago el ga dito: “Cada un l’è proà par esser provocà e imbroià par la so pròpia voia.” — Tia. 1:14.

6. Cossa che ghemo de sforsarse de far?

⁶ Seto dir che voia sbaliada la ze fadiga par ti? No ghemo mai de pensar che no ghemo mia voie sbaliade e che saremo sempre boni de far le robe giuste. (1 Gio. 1:8) Paolo el ga dito che fin quei che i ga “le qualità de acordo col spìrito de Dio” i pol gaver voie sbaliade se no i stà mia atenti. (Gàl. 6:1) Par quela, ghemo de sforsarse par veder pròpio quel che ghemo rento el nostro cuor par capir le voie sbaliade che fursi ghemo. — 2 Cor. 13:5.

7. Cossa che i portoni dele cità nel passà i ne insegna?

⁷ Cossa ghemo de far dopo de capir le voie sbaliade che podarìssino gaver? Gaver ancora pi forsa de dàrghene fora cole voie sbaliade. Par giutarne a capir meio, pensa nele cità là del passà. La parte pi fiaca dele muràlie dele cità la era i portoni. Par quela, par proteger la cità, sempre ghen’era tanti guardi nei portoni. Questo ne insegna che ghemo de capir ndove saria i nostri portoni, o sia, ndove podaria scominsiar qualche voia sbaliada, e esser boni de protegerse. — 1 Cor. 9:27.

 COME CHE PODEMO PROTEGERSE DELE ROBE SBALIADE?

8-9. Cossa che el gióveno de Proverbi capìtolo 7 ghe tocaria gaver fato? (Proverbi 7:8, 9, 13, 14, 21)

⁸ Come che podemo protegerse par mai far un bruto pecato? Quel che ga sucedesto col gióveno de Proverbi 7 ne insegna una roba tanto importante. El versìcolo 22 el dise che el gióveno l’è ndato drio la dona “de colpo”. Ma sarà che l’è stà pròpio cossita? Nò, parché i versìcoli vanti i mostra che lu el ga fato un per de robe prima de far la imoralità.

⁹ Cossa che el gióveno el ga fato prima de far la imoralità? Quando l’era drio vegner note, el gióveno ‘el ga passà par una strada che ndea ndove la era la dona e l’è ndato par la banda dela so casa’. (Ledi Proverbi 7:8, 9. b) Dopo, quando lu el ga visto la dona, no l’è ndato via. Invesse, lu el ga assà che ela lo basesse e el ga scoltà quel che ela la ghe parlea. Ela la ghe ga contà che la gavea fato sacrifissi de pace fursi par farlo creder che la era una persona bona. (Ledi Proverbi 7:13, 14, c 21. d) Se el gióveno no’l gavesse fato tute queste robe, lu no’l gavaria bio la voia sbaliada gnanca no’l gavaria fato quel pecato.

10. Come che una persona la podaria far el medèsimo sbàlio del gióveno de Proverbi?

¹⁰ Quel che ga sucedesto col gióveno de Proverbi 7 pol suceder anca con noantri. Pol esser che dopo che una persona la ga fato un bruto pecato, ela la pense che ga sucedesto tuto de colpo. Fursi anca la dise: “Quando go visto l’era tuto belche fato.” Ma se la pensa in tuto quel che ga sucedesto, la va veder che la ga fato arquante brute dessision prima. Par esémpio, pol esser che questa persona la era drio ndar in volta con bruti amighi, la era drio divertirse con robe sbaliade, o la era drio vardar site o ndar rento posti che no i ze boni par servi de Geovà. O pol esser che la se ga fermà de pregar a Geovà, studiar la Bìblia, ndar ale riunion e ala predicassion. Cossita, compagno quel gióveno de Proverbi, no ga sucedesto tuto de colpo cossita. Invesse, questa persona la ga fato un per de dessision brute che la ga portada a far el pecato.

11. De cossa ghemo de star distanti se no volemo far un pecato?

¹¹ Cossa che imparemo de quel gióveno e quela dona imoral de Proverbi 7? Invesse de sforsarse sol par no gaver voie sbaliade, ghemo anca de star distanti dele robe che pol portarne a far un pecato. Proverbi 7:25 el dise sora quela dona imoral: ‘No stà far le robe che ela la fà.’ E Proverbi 5:3, 8 dise: ‘Stà distante dela dona. No stà rivar darente dela porta dela so casa.’ Alora, par protegerse de no far qualcossa de sbalià, ne ocore star distanti dele robe che pol portarne a far un pecato. e Par esémpio, pol esser che ghemo de star distanti de robe che no le ze sbaliade, ma che podaria darne voia de far un pecato. — Mat. 5:29, 30.

12. De acordo con Giò 31:1, cossa che Giò l’era dessidio de far, e parché che l’è stà bon par lu far questa dessision?

¹² Cossa pol giutarne a mai far un bruto pecato? Ghemo de esser dessididi a star sempre atenti. Giò el ga fato pròpio cossita. Lu el ga dito che el gavea fato ‘un acordo coi so oci’ de mai “vardar una vèrgine e pensar robe sbaliade”. (Ledi Giò 31:1. f) Come lu l’era dessidio de  mai far gnente de sbalià, lu l’è stà bon de mai far adultèrio. Alora, anca noantri ghemo de esser dessididi a mai far qualcossa che ne dà voia de far qualcossa de sbalià.

13. Parché che ghemo de star atenti a quel che pensemo? (Varda anca la ilustrassion.)

¹³ Noantri anca ghemo de star atenti a quel che pensemo. (Éso. 20:17) Arquanti i dise che no ghen’è mia problema de sol pensar in robe sbaliade se no te le fè. Ma parché che no l’è mia giusto pensar cossita? Se una persona la seita a pensar nte una roba che la ze sbaliada, la gavarà ancora pi voia de farla, e sarà ancora pi fadiga no far un pecato. L’è vera che una ora o l’altra, noantri gavaremo voie sbaliade, ma ghemo de suito fermarse de pensar in queste robe e scominsiar a pensar in robe giuste. Quando semo boni de controlar quel che pensemo, no gavaremo mia una granda voia de far un bruto pecato. — Fil. 4:8; Col. 3:2; Tia. 1:13-15.

14. Cossa ancora pol giutarne a mai far un pecato?

¹⁴ Cossa ancora pol giutarne a mai far un pecato? Ghemo de esser sicuri che obedir a Geovà l’è sempre la meio roba de far. Pol esser che l’è fadiga mai voler far o pensar in qualcossa de sbalià. Ma quando se sforsemo del tuto par sempre obedir a Geovà, ghemo pace e semo felici.

15. Come che gaver una forte voia de far quel che l’è giusto pol giutarne?

¹⁵ Noantri ghemo de sforsarse par gaver una forte voia de far quel che l’è giusto. Parché? Se noantri semo boni de ‘odiar quel che l’è rugno e amar quel che l’è bon’, saremo ancora pi dessididi de far quel che l’è giusto e de star distanti de tuto quel che pol portarne a far un pecato. (Amòs 5:15) E se ghemo una forte voia de far quel che l’è giusto, saremo boni de seitar leai a Geovà, anca quando de colpo vien fora una situassion che podaria farne sbaliar.

16. Come che far quel che ne giuta a amar ancora de pi a Geovà pol giutarne? (Varda anca la ilustrassion.)

¹⁶ Cossa pol giutarne a gaver una forte voia de far quel che l’è giusto? Ghemo de doperar  del nostro tempo par far robe che ne giutarà a amar ancora de pi a Geovà. Par esémpio, quando ndemo ale riunion e ala predicassion, femo ancora pi forte la nostra voia de assar Geovà contento e semo boni de star distanti de tuto quel che pol farne gaver voie sbaliade. (Mat. 28:19, 20; Ebr. 10:24, 25) E quando ledemo e studiemo la Bìblia e ghe pensemo sora, femo pi forte el nostro amor par quel che l’è giusto e odiemo ancora de pi quel che l’è rugno. (Gios. 1:8; Sal. 1:2, 3; 119:97, 101) Gesù el ga dito ai so dissìpoli: “Seité esser atenti e seité far orassion par no cascar in tentassion”. (Mat. 26:41) Ricòrdate che quando te preghi a Geovà, te assi che lu el te giute a gaver ancora de pi voia de far quel che l’è giusto. — Tia. 4:8.

SEITA ATENTO

17. Che problema Piero el gavea?

¹⁷ Ghen’è voie sbaliade che saremo boni de dàrghene fora. Ma ghen’è altre che seitaremo a sforsarse par tanto tempo. Varda quel che ga sucedesto col apòstolo Piero. Quando lu el ga dito tre volte che no’l cognossea mia a Gesù, lu el ga mostrà che el gavea paura dele persone. (Mat. 26:69-75) Dopo un tempo, pol esser che el ga pensà che l’era stà bon de dàrghene fora con questa paura parché el ga predicà con tanto coraio nel Sinèdrio. (Ati 5:27-29) Ma un per de ani dopo, lu l’è tornà a gaver paura del omo. Lu el se ga fermà de magnar insieme de quei che no i era giudei parché el gavea paura de quel che i giudei che “i difendea la sirconsision” i podaria pensar de lu. (Gàl. 2:11, 12) Pol esser che Piero el ga bio de sforsarse par dàrghene fora cola paura del omo par tuta la so vita.

18. Cossa che pol suceder con una voia che ne parea che no gaveino pi?

¹⁸ La medèsima roba pol suceder con noantri. Pol esser che ne par che semo belche stati boni de dàrghene fora con una voia sbaliada. Un fradel el ga dito: “Par diese ani, mi son stato bon de no vardar pornografia, e ero sicuro che no gavea pi questo problema. Ma, dele volte, me ze vegnesta la voia de vardarla.” Questo fradel no’l ga desistio de far quel che l’è giusto e el ga capio che fursi el gavaria de sforsarse par tuta la so vita. Col aiuto dela so dona e dei ansiani dela congregassion, lu el ga fato tuto  quel che ghe ocorea par star distante dela pornografia.

19. Cossa che podemo far se ancora no semo stati boni de dàrghene fora con una voia che la ze sbaliada?

¹⁹ Cossa che podemo far se ancora no semo stati boni de dàrghene fora con una voia che la ze sbaliada? Ghemo de far quel che Gesù el ga dito, o sia, seitar a esser atenti. E anca quando ne par che semo forti, ghemo de star distanti dele robe che pol darne voia de far quel che l’è sbalià. (1 Cor. 10:12) Ghemo anca de far le robe che ne ga belche giutà a dàrghene fora con questa voia sbaliada. Ricòrdate sempre quel che dise Proverbi 28:14: “Felice l’è el omo che l’è sempre atento.” — 2 Pie. 3:14.

LE BENEDISSION CHE GHEMO QUANDO STEMO SEMPRE ATENTI

20-21. (a) Che benedission ghemo quando seitemo atenti? (b) De acordo con 2 Corinti 4:7, cossa che Geovà el ndarà far se seitemo a sforsarse?

²⁰ Ghemo sempre de ricordarse che sforsarse par star sempre atenti l’è la meio roba che podemo far. Pol esser che un pecato el ne fà ‘goder i piaseri par un tempo’, ma ne ocore ricordarse che quando femo quel che Geovà el dise semo pi felici. (Ebr. 11:25; Sal. 19:8) Questo sucede parché Geovà el ne ga creà par obedirghe. (Gén. 1:27) Cossita, quando obedimo a Geovà, ghemo una cossiensa tranquila e la speransa de viver par sempre. — 1 Tim. 6:12; 2 Tim. 1:3; Giuda 20, 21.

²¹ L’è vera che la nostra “carne la ze fiaca”. Ma questo no vol mia dir che no saremo boni de dàrghene fora cole voie sbaliade. Parché? Parché Geovà el ga caro de darne tuta la forsa che ghemo de bisogno. (Ledi 2 Corinti 4:7. g) Questo testo el dise che Geovà el dà el poder pi grando del normal. Ma prima, noantri ghemo de doperar el nostro poder par dàrghene fora cole voie sbaliade. Podemo esser sicuri che Geovà el ndarà risponder ale nostre orassion e el ndarà darne la forsa che ne ocore. (1 Cor. 10:13) Alora, ricòrdate sempre che, col aiuto de Geovà, te sarè bon de seitar atento e de dàrghene fora cole voie sbaliade.