STÙDIO 28
CÀNTICO 89 Quei che i obedisse i sarà benedidi
Te ghè de capir la difarensa intrà la verità e le busie
“Gavé de star firmi, col vostro sinturon dela verità streto nela sintura.” — EFE. 6:14.
COSSA CHE NDAREMO IMPARAR?
Ndaremo imparar come saver la difarensa intrà la verità che ghemo imparà de Geovà e le busie del mondo de Sàtana.
1. Come che te te senti de cognosser la verità?
NOANTRI amemo la verità dela Bìblia. L’è stà questa verità che ne ga giutà a gaver fede in Geovà. (Rom. 10:17) Semo sicuri che Geovà el ga fato la congregassion e la ga fata deventar una ‘colona che tien su la verità’. (1 Tim. 3:15) E semo contenti de obedir a quei che ‘i lidera intrà de noantri’ parché i ne spiega le verità dela Bìblia e i ne dà orientassion par far quel che Dio el vol. — Ebr. 13:17.
2. De acordo con Tiago 5:19, cossa che podaria suceder anca dopo de acetar la verità?
2 L’è vera che ghemo belche acetà la verità e ghemo capio che ne ocore ndar drio la organisassion de Geovà. Anca cossita, ghemo de star atenti parché pol esser che abandonemo la verità. (Ledi Tiago 5:19. a) Sàtana el vol tanto che noantri se fermemo de fidarse nela Bìblia e nela organisassion de Dio. — Efe. 4:14.
3. Parché che ghemo de obedir ala verità? (Efesi 6:13, 14)
3 Ledi Efesi 6:13, 14. b Suito el Diaol el contarà tante busie par imbroiar tute le nassion e farle ndar contra Geovà. (Apo. 16:13, 14) Noantri anca savemo che Sàtana ghe la meterà tuta par ndar contra de noantri. (Apo. 12:9) Alora, l’è tanto importante capir quel che l’è vero e quel che l’è falso, e obedir ala verità. (Rom. 6:17; 1 Pie. 1:22) Sol cossita saremo boni de esser salvi nela granda tribolassion.
4. Cossa che ndaremo imparar in questo stùdio?
4 In questo stùdio, ndaremo imparar sora due qualità che ne ocore par capir la verità che la vien dela Bìblia e par acetar le orientassion che vien dela organisassion de Dio. Dopo, ndaremo veder tre robe che ghemo de far par seitar a obedir la verità.
QUALITÀ CHE NE OCORE PAR CAPIR LA VERITÀ
5. Come che gaver un grando rispeto par Geovà ne giuta a capir la verità?
5 Grando rispeto par Geovà. Quando ghemo un grando rispeto par Geovà, lo amemo tanto e no volemo far gnente che lo disguste. Noantri anca semo premosi de capir la difarensa del giusto e del sbalià e intrà quel che l’è vero e quel che l’è falso. Se femo cossita, contentemo a Geovà. (Pro. 2:3-6; Ebr. 5:14) Ancoi, tante persone le fà robe che disgusta Geovà. Alora, no ghemo mai de assar che la paura dei òmini la sìpia pi granda che el nostro amor par Geovà.
6. Come che la paura dei òmini ga fato che diese spioni israeliti no i credesse nela verità?
6 Se la nostra paura dei òmini la ze pi granda del nostro amor par Dio, podarìssino scominsiar a creder in qualcossa che la va contra la verità de Geovà. Vedemo el esémpio dei 12 spioni che i ze ndati vardar la tera che Geovà el gavea prometesto ai israeliti. Par 10 de questi spioni, la paura dei cananei la era pi granda che el so amor par Geovà. Lori i ghe ga dito ai altri israeliti: “No podemo mia ndar contra questo pòpolo, parché lori i ze pi forti de noantri.” (Nùm. 13:27-31) L’è vera che i cananei i era pi forti che i israeliti. Ma i israeliti i se gavea desmentegà che Geovà l’era pi forte che i cananei. I diese spioni i gavaria de pensarghe sora quel che Geovà el gavea pena fato par la nassion e ricordarse quel che lu el volea che la fesse de lì avanti. Alora, lori i saria boni de capir che el poder dei cananei no l’era gnente davanti el grando poder de Geovà. Difarente de quei spioni sensa fede, Giosuè e Calebe i volea contentar a Geovà. Lori i ga dito ai altri israeliti: “Se Geovà l’è contento con noantri, lu el ne farà ndar rento questa tera e ndarà darla a noantri.” — Nùm. 14:6-9.
7. Come che podemo gaver un grando rispeto par Geovà? (Varda anca la ilustrassion.)
7 Par gaver un grando amor e rispeto par Geovà, ghemo de pensarghe sora quel che ghe piase tute le volte che femo una dessision. (Sal. 16:8) Alora, quando te ledi la Bìblia, proa domandarte: ‘Se mi fusse stà in quela situassion, che dessision gavaria fato?’ Par esémpio, proa pensar che te eri un israelita e te gavessi scoltà quei diese spioni che i ga dito che no i saria mia boni de ndar rento la tera de Canaan. Cossa che te farissi? Sarà che el to amor par Geovà e la voia de contentarlo saria pi grandi che la to paura dei òmini? Tuti quei israeliti no i ga mia credesto in Giosuè e Calebe. Par quela, Geovà no li ga assadi ndar rento la Tera Prometesta. — Nùm. 14:10, 22, 23.
Ti te crederissi in chi? (Varda el paràgrafo 7.)
8. Che qualità l’è importante gaver, e parché?
8 Umiltà. Geovà el mostra la verità a quei che i ze ùmili. (Mat. 11:25) Noantri semo ùmili e acetemo aiuto par imparar la verità. (Ati 8:30, 31) Ghemo de star atenti de mai esser orgoliosi. Parché? Parché se semo orgoliosi, scominsiemo a pensar che la nostra opinion la ze tanto importante quanto quel che la Bìblia e la organisassion de Geovà le dise.
9. Come che te pol seitar a esser ùmile?
9 Par seitar a esser ùmili, ghemo de ricordarse che semo pròpio pìcoli davanti de Geovà. (Sal. 8:3, 4) Anca ghemo de pregar che Geovà el ne giute a esser ùmili e a acetar quel che lu el ne insegna. Lu el ne giuta a capir quel che el pensa par meso dela Bìblia e dela so organisassion. Cossita capimo che queste robe le ga pi valor de quel che noantri pensemo. Quando te ledi la Bìblia, proa veder come Geovà el mostra che lu el ama la umiltà e el resta tanto disgustà quando qualchedun el ga orgòlio o el pensa che l’è pi importante che i altri. E stà ancora pi atento de esser ùmile quando te ricevi un laoro de far che te dà autorità e che i altri i te vede tanto.
COME CHE PODEMO SEITAR A OBEDIR ALA VERITÀ?
10. Chi che Geovà el ga doperà par darghe orientassion al so pòpolo?
10 Seita a fidarte nela organisassion de Geovà. Nel passà, Geovà el ga doperà Moisè, e dopo, Giosuè par darghe orientassion ai israeliti. (Gios. 1:16, 17) I israeliti i era benedidi quando i acetea la orientassion de Geovà. Sècoli dopo, Geovà el ga doperà i 12 apòstoli par darghe orientassion ala prima congregassion. (Ati 8:14, 15) Pi tardi, Geovà el ga doperà anca altri ansiani che i era lì in Gerusalen. Cossita, “le congregassion le restea cada volta pi forte nela fede e ghen’era de pi persone che credea a cada giorno” parché i dissìpoli de Gesù i acetea la orientassion de quei òmini. (Ati 16:4, 5) Nei giorni de ancoi, Geovà el benedisse anca noantri quando obedimo ale orientassion dela so organisassion. Ma come che lu el ndaria sentirse se no acetessino queste orientassion? Par risponder a questa domanda, ndemo veder quel che ga sucedesto quando i israeliti i era darente la Tera Prometesta.
11. Cossa che ga sucedesto con quei che no i ga acetà Moisè nel passà? (Varda anca la ilustrassion.)
11 Intanto che i israeliti i era drio ndar rento la Tera Prometesta, arquanti òmini importanti no i ga acetà Moisè come la persona che Geovà el gavea scoliesto. Lori i ga dito: ‘Tuto el pòpolo, nò sol Moisè, l’è santo, e Geovà l’è intrà de lori.’ (Nùm. 16:1-3) L’è vera che, par Geovà, tuto el pòpolo l’era santo. Ma lu el gavea scoliesto Moisè par dar orientassion al so pòpolo. (Nùm. 16:28) Quando quei israeliti no i ga acetà Moisè, no i ga acetà gnanca Geovà. Lori no i ga pensà in quel che Geovà el volea, ma sol i ga pensà in quel che lori i volea, che l’era gaver de pi autorità e farse veder. Par quela, Dio el ga copà quei òmini importanti e tanti altri che i pensea compagno de lori. (Nùm. 16:30-35, 41, 49) Dela stessa maniera, semo sicuri che anca ancoi Geovà no ghe piase de quei che no i mostra rispeto ala so organisassion.
Te restarissi dela banda de chi? (Varda el paràgrafo 11.)
12. Parché che podemo seitar a fidarse nela organisassion de Geovà?
12 Noantri podemo seitar a fidarse nela organisassion de Geovà. Parché? Dele volte, la so organisassion la capisse meio una verità dela Bìblia o che ghe ocore cambiar la maniera de far qualcossa. Quando questo sucede, quei che i tende dela organisassion i fà presto meter in pràtica i cambiamenti che ghe ocore. (Pro. 4:18) Lori i fà cossita parché la roba pi importante la ze contentar a Geovà. Lori anca i fà el so meio par far le dessision de acordo cola Bìblia. Sicuro che tute le Testimònie de Geovà le ga de far la medèsima roba.
13. Cossa che l’è el ‘esémpio de parole bone e vere’, e cossa che ghemo de far?
13 “Seita a ndar drio el esémpio de parole bone e vere.” (2 Tim. 1:13) El ‘esémpio de parole bone e vere’ l’è i insegnamenti che catemo nela Bìblia. (Gio. 17:17) Tuto quel che noantri credemo l’è de acordo con questi insegnamenti. La organisassion de Geovà la ne insegna che ghemo de esser sicuri che quel che credemo l’è de acordo cola Bìblia. Se femo cossita, Geovà el ne benedisse.
14. Come che arquanti dissìpoli de Gesù i ga abandonà el “esémpio de parole bone e vere”?
14 Cossa che podaria suceder se noantri abandonessino el “esémpio de parole bone e vere”? Vedemo quel che ga sucedesto nel primo sècolo. Arquanti dissìpoli de Gesù i parlea in volta che el giorno de Geovà l’era rivà. Lori i gavea ricevesto una carta che disea questa informassion e i pensea che el apòstolo Paolo la gavea scrita. E invesse de torse el tempo par veder se quela carta la era pròpio vera, lori i ga credesto in quel che la disea e i ga fin parlà in volta sora questo. Se lori i se gavesse ricordà dele robe che Paolo ghe gavea insegnà quando l’era intrà de lori, no i saria imbroiadi. (2 Tes. 2:1-5) Par quela, Paolo el ga dato el consìlio a quei fradei de no creder in tuto quel che i scoltea. E par giutarli nel futuro, Paolo el ga finio la seconda carta ai tessalonissensi con queste parole: ‘Mi, Paolo, ve saludo. Son drio scriver cola me man, come sempre fao nele me carte. Mi scrivo pròpio cossita.’ — 2 Tes. 3:17.
15. Cossa che ne toca far par mai esser imbroiadi? Parla de un esémpio. (Varda anca la ilustrassion.)
15 Cossa che podemo imparar dele parole de Paolo ai tessalonissensi? Quando scoltemo qualcossa che no la ze de acordo con quel che ghemo imparà dela Bìblia o quando scoltemo una stòria che la ze tanto difarente de quel che ghemo scoltà fin adesso, ghemo de mostrar sabedoria. Nela època che ghen’era la Union Soviètica, i nostri nemighi i ga fato una carta che parea che la vegnesse dela Sede Mondial. La carta la disea che i fradei i gavaria de far nantra organisassion. Ma i fradei fedeli no i ze mia stati imbroiadi. Lori i ga capio che quel che la carta la disea no l’era de acordo con quel che i gavea imparà. Ancoi, quei che i ze contra la organisassion i dopera la internet e le rede sossiai par proar finir fora cola nostra union. Invesse de creder suito in queste stòrie, noantri ghemo de star atenti e veder se quel che scoltemo e ledemo l’è de acordo cole verità che ghemo imparà. — 2 Tes. 2:2; 1 Gio. 4:1.
No stà mia assarte imbroiar par quel che te par che l’è vero (Varda el paràgrafo 15.) d
16. De acordo con Romani 16:17, 18, cossa che ghemo de far se qualchedun el parla in volta robe che va contra la verità?
16 Resta insieme con quei che i ze leai a Geovà. Dio el vol che lo servimo in union coi nostri fradei e sorele. Noantri ndaremo restar unidi se obedimo ala verità. Quei che i parla in volta robe che va contra la verità i rovina la nostra union. Par quela che Dio el ne dise de ‘star distanti de lori’. Se restemo insieme a queste persone, podemo scominsiar a creder in robe che no le ze vere e abandonar a Geovà. — Ledi Romani 16:17, 18. c
17. Cossa che ndarà suceder se semo sicuri de quala che la ze la verità?
17 Quando capimo quala che la ze verità e metemo in pràtica quel che imparemo, noantri restemo pi darente de Geovà e ghemo una fede forte. (Efe. 4:15, 16) Anca no saremo imbroiadi par i insegnamenti falsi de Sàtana e saremo sicuri che Geovà el ne tenderà nela granda tribolassion. Alora, se semo sempre sicuri de quala che la ze la verità, el ‘Dio dela pace el sarà con noantri’. — Fil. 4:8, 9.
CÀNTICO 143 Sempre pronti e atenti!
a (Tiago 5:19) Me fradei, se un de valtri abandona la verità e qualchedun ve giuta a tornar,
b (Efesi 6:13, 14) Par quela che valtri gavé de meter su la armadura completa de Dio e pareciarve par esser boni de restar firmi e perseverar nei giorni rugni. 14 Gavé de star firmi, col vostro sinturon dela verità streto nela sintura, gavé de vestir la corassa dela giustìssia,
c (Romani 16:17, 18) Fradei, adesso mi ve incoraio a star atenti a quei che i vol spartirve e farve strabucar con quel che el va contra quel che gavé imparà. Sté distante de lori. 18 Parché questi òmini no i ze schiavi del Cristo, nostro Signor. Invesse, lori i ze schiavi dele so voie. Lori i seita a imbroiar quei che no i ze mia furbi par meso de parole bele e lode.
d ILUSTRASSION: Una ilustrassion che mostra quel che ga sucedesto ani indrio quando i nemighi dei fradei nela època dela Union Soviètica i ghe ga mandà una carta par farli creder che la era dela Sede Mondial. Ancoi, i nostri nemighi i dopera la internet par contar busie sora la organisassion de Geovà.
