1-2. Che dificoltà arquanti fradei i infronta?

EL APÒSTOLO Paolo el ga dito a Timòteo: “Seita a predicar le bone notìssie.” (2 Tim. 4:5) Noantri se sforsemo tanto de far questo che Paolo el ga dito, ma infrontemo dificoltà. Par esémpio, arquanti fradei i ga de mostrar tanto coraio par predicar. (2 Tim. 4:2) Proa pensar nei fradei che i vive nei paesi che no i ga libertà par adorar a Geovà e par predicar. Questi fradei i seita a predicar anca che questo li fae ndar in preson!

² Tanti fradei i resta desanimadi par causa dele dificoltà che i infronta. Par esémpio, tanti i volaria far de pi nela predicassion, ma i ga de laorar tanto e tuto el giorno par dar quel che la so fameia la ga de bisogno. Alora, nel fin de stimana, lori i ze pròpio strachi e no i ga pi forsa. Altri no i ze mia boni de far quel che i volaria nela predicassion parché i ga una bruta malatia, i ze belche veci o no i pol mia ndar fora de casa. Arquanti fradei i sofre tanto parché i pensa che no i ga mia valor par Geovà. Varda quel che Mary, * una sorela che la vive nel Oriente Mèdio, la ga dito: “Me toca far tanto sforso par no pensar che no go valor. Alora resto pròpio straca, no son bona de far quel che me piaseria nela predicassion e me sento in colpa.”

3. Cossa che ndaremo veder in questo stùdio?

³ Geovà el promete darne forsa par infrontar tute le nostre dificoltà. Lu el ne giuta a infrontar i nostri problemi e a far el nostro meio nel laoro a lu. In questo stùdio, ndaremo veder come che lu el ga giutà Paolo e Timòteo a infrontar le so dificoltà e a far el so meio nela predicassion. Ndaremo anca imparar quel che el fà par giutarne ancoi.

4. Che dificoltà Paolo el ga infrontà?

⁴ Paolo el ga infrontà tante brute dificoltà. Par esémpio, lu el ga bio bisogno de forsa quando le persone le ghe ga dato  bote, le ghe ga dato sassade e lo ga metesto in preson. (2 Cor. 11:23-25) Paolo el gavea de far tanto sforso par no restar desanimà. (Rom. 7:18, 19, 24) Paolo anca el gavea de soportar “un spin nela carne” e el ga domandà a Geovà che lo cavesse via. — 2 Cor. 12:7, 8.

5. Cossa che Paolo l’è stà bon de far anca cole dificoltà?

⁵ Paolo el ga infrontà tante dificoltà, ma Geovà ghe ga dato forsa par seitar a predicar le bone notìssie. Par esémpio, Paolo l’è stà metesto in preson nte una casa in Roma. Alora, lu no’l podea ndar via de casa, ma el ga predicà a tanti lìderi giudei e fursi anca ale autorità del governo. (Ati 28:17; Fil. 4:21, 22) Paolo el ga anca predicà a tanti soldadi romani che i protegea le autorità e a quei che i ndea visitarlo. (Ati 28:30, 31; Fil. 1:13) In quel tempo, Paolo el ga scrito arquante carte che le ne giuta fin ancoi. Paolo l’è stà anca un bel esémpio par i fradei in Roma, parché la Bìblia la ga dito che questi fradei i ga bio de pi coraio par parlar sora la Parola de Dio. (Fil. 1:14) Anca che Paolo no’l podea far tuto quel che lu el volea, el fea sforso par far el so meio a Geovà e questo ga giutà tanto nel laoro de predicassion. — Fil. 1:12.

6. De acordo con 2 Corinti 12:9, 10, parché che Paolo l’è stà bon de far el so laoro par Geovà?

⁶ Paolo el savea che lu l’è stà bon de far tuto quel che el ga fato parché Geovà el ghe ga dato forsa e spìrito santo. Lu el savea che el poder de Dio l’era drio esser fato pi forte nele so fiachesse. (Ledi 2 Corinti 12:9, 10. *) Cossita, Paolo l’è stà bon de predicar e servir a Geovà del tuto, anca che l’era drio infrontar perseghission, preson e altre robe.

7. Che dificoltà Timòteo el ga bio de infrontar?

⁷ Timòteo el ga bio de fidarse che Geovà el ndaria giutarghe a far el so laoro. Par esémpio, Timòteo l’è ndato insieme con Paolo par predicar in posti distanti. Paolo anca el ghe ga domandà che el viaiesse par incoraiar le congregassion. (1 Cor. 4:17) Fursi Timòteo el pensea che no’l saria mia bon de far quele robe. Par quela che Paolo el ghe ga dito: “No stà assar che nissuni el te manche de rispeto  parché te sì gióveno.” (1 Tim. 4:12) In quela època, Timòteo anca el ga bio de infrontar un spin nela carne, parché el ‘restea tante volte malà’. (1 Tim. 5:23) Ma, Timòteo el savea che Geovà el ndaria giutarghe col so spìrito santo. Cossita, lu el gavaria la forsa par far la predicassion e giutar i fradei. — 2 Tim. 1:7.

8. Come che Geovà el ne dà forsa ancoi?

⁸ Ancoi, i servi de Geovà i ze boni de servir a lu par causa del poder che lu el ghe dà. (2 Cor. 4:7) Ndaremo veder che Geovà el ne dà forsa par meso dela orassion, dela Bìblia, dei fradei e dela predicassion.

9. Come che pregar a Geovà pol giutarne?

⁹ Gàpia forsa par meso dela orassion. Paolo el ne ga incoraià in Efesi 6:18 a seitar a pregar a Dio. L’è sicuro che Geovà el ne darà la forsa che ghemo de bisogno. Varda el esémpio de Jonnie, che l’è de star nela Bolìvia. Lu el ga sentio el aiuto de Geovà quando la so sposa e i so genitori i ze restadi tanto maladi nela medèsima època. La so mare la ze morta e sol dopo de tanto tempo la so dona e el so pare i ze restadi meio. Lu el dise: “Quando restea tanto ansioso, mi parlea pròpio quel che ero drio sentir a Geovà.” Varda el esémpio de Ronald, che l’è un ansiano dela Bolìvia. Lu el ga savesto che la so mare la gavea càncaro e un mese dopo, la ze morta. Cossa che lo ga giutà? Lu el ga dito: “Quando prego a Geovà, me sforso de parlar tuto quel che son drio sentir e pensar. Mi son sicuro che Geovà el me capisse e el me cognosse meio che mi stesso.” Dele volte, restemo tanto desanimadi par causa dei nostri problemi che gnanca savemo come parlar a Geovà quel che pensemo e sentimo. Ma anca cossita, Geovà el vol che preghemo a lu. — Rom. 8:26, 27.

10. De acordo con Ebrei 4:12, parché che l’è importante leder la Bìblia e pensarghe sora?

¹⁰ Gàpia forsa par meso dela Bìblia. Paolo el ledea la Parola de Dio par gaver forsa e consolo, e noantri ghemo de far compagno a lu. (Rom. 15:4) Alora, ghemo de sempre leder la Parola de Dio e pensarghe sora. Cossita, Geovà el ndarà darne el so spìrito santo par mostrar come la Bìblia la pol giutarne a infrontar una dificoltà. (Ledi Ebrei 4:12. *) Ronald, che ghemo parlà prima, el ga dito: “Lè stà tanto bon quando go scominsià leder la Bìblia tute le note. Mi penso sora le qualità de Geovà e sora el amor che el mostra ai so servi. Questo me giuta a gaver forsa.”

11. Come che la Bìblia la ga dato forsa par una sorela che la era tanto disgustada?

¹¹ Quando noantri pensemo sora quel che ledemo nela Bìblia, semo boni de veder le robe dela maniera giusta. Varda quel che ga sucedesto con una sorela. Ela la era tanto disgustada parché el so omo l’era morto. Alora, un ansiano el ga dito par ela leder el libro de Giò e ela la ga fato pròpio questo. Quando la ga scominsià a leder, la ga suito capio che la maniera de Giò pensar la era sbaliada. Ela la pensea: “Giò, no stà pensar sol nei problemi!” Alora, questa sorela la ga capio che la era drio far compagno a Giò. Cossita, leder la Bìblia la ghe ga giutà a cambiar la so maniera de pensar e gaver forsa par infrontar la morte del so omo.

12. Come che Geovà el ne dà forsa par meso dei fradei?

¹² Gàpia forsa par meso dei fradei. Paolo el ga dito ai so fradei: “Mi go tanta voia de visitarve par noantri incoraiarse un al altro.”  (Rom. 1:11, 12) Mary, la sorela che ghemo parlà prima, la ga dito che i fradei i ghe giuta tanto. Ela la ga dito: “Geovà el ga belche doperà fradei e sorele che gnanca i savea dele me dificoltà. Questi fradei i me ga scrito qualcossa o i me ga dito robe che me ga incoraià. L’era pròpio quel che mi gavea de bisogno. Nantra roba che me giuta l’è parlar sora quel che mi son drio sentir e pensar a sorele che le ga infrontà le medèsime robe che mi. Cossita, mi posso imparar con lore. E i ansiani sempre i me dise che son tanto importante par la congregassion.”

13. Come che podemo incoraiarse un al altro nele riunion?

¹³ Le riunion le ze un bel posto par incoraiarse un al altro. Cossa che te pensi de proar incoraiar a qualchedun? Par esémpio, te pol dir a un fradel che te ghe vol ben o ringrassiarlo par el laoro che el fà. Varda el esémpio de un ansiano, che el ga nome Peter. Lu el ga dito a una sorela che la ze maridada con una persona che no la serve mia a Geovà: “Mi resto tanto incoraià de vederte qua. Te porti sempre insieme i to sei fioi e lori i ze sempre ben rangiadi e ben pareciadi par partissipar nela riunion.” La sorela la ze restada tanto contenta che la ga bio voia de piander. Ela la ghe ga dito: “Mi gavea pròpio bisogno de scoltar questo ancoi.”

14. Come che la predicassion la pol giutarne?

¹⁴ Gàpia forsa par meso dela predicassion. Quando parlemo dela Bìblia ai altri, semo incoraiadi anca se lori no i vol scoltar sora la Bìblia. (Pro. 11:25) Una sorela che la ga nome Stacy, la ga visto che la predicassion la pol giutarne tanto. Ela la ze restada tanto disgustada parché una persona dela so fameia la ze stata desassossiada. Ela la seitea a domandarse: “Sarà che mi podaria gaver fato ancora qualcossa par giutarghe?” Stacy no la era bona de pensar in nantra roba. Cossa che la ghe ga giutà? La predicassion. Cossita, la doperea el so tempo par pensar nele persone che la predichea. Ela la ga dito: “In quel tempo, Geovà el me ga giutà a gaver una studiante dela Bìblia che suito la ga metesto in pràtica quel che la era drio imparar. Questo me ga incoraià tanto. La predicassion la ze la roba che la me giuta de pi.”

15. Cossa che te ghè imparà de quel che Mary la ga dito?

¹⁵ Tanti i pensa che no i pol far de pi par Geovà par causa de qualcossa che l’è drio suceder nela so vita. Se te te senti cossita, ricòrdate che Geovà el resta contento quando te fè el to meio a lu. Varda nantra volta el esémpio de Mary. Quando la ze ndata giutar una congregassion de nantra léngua, la ga scominsià a pensar che no la era mia bona de giutar tanto. Ela la ga dito: “Quel che mi ero bona de far l’era far un pìcolo comentàrio, leder un testo, o darghe un foieto nela predicassion.” Mary la ze restada tanto disgustada parché la vedea che i altri i era boni de parlar ben la léngua e ela nò. Ma la ga cambià la so maniera de pensar. Ela la ga scominsià a veder che Geovà el podea doperarla anca che no la savesse parlar ben quela léngua. Mary la ga dito: “Le verità dela Bìblia le ze sémplisse e le pol giutar le persone a cambiar le so vite.”

16. Se no te pol ndar fora de casa, cossa che pol darte forsa?

¹⁶ Fursi no te pol ndar fora de casa, ma te piaseria far de pi nela predicassion. Te pol esser sicuro che Geovà el capisse quel che te sì drio infrontar, e lu el pol giutarte a predicar a quei che i te tende e ai dotori. No stà pensar in quel che te eri bon de far nel passà parché questo ndarà assarte desanimà. Proa anca veder  quel che Geovà l’è drio far par giutarte adesso. Cossita, te gavarè forsa par infrontar tute le dificoltà contento.

17. De acordo con Eclesiasti 11:6, parché che no ghemo de fermarse de predicar?

¹⁷ Parché che volemo seitar a predicar? Noantri no savemo quale semense che le ndarà far radise e vegner su. (Ledi Eclesiasti 11:6. *) Varda el esémpio dela sorela Bàrbara. Ela la ga de pi de 80 ani e la predica par meso del telèfono e dele carte. Alora, la ga mandà una carta e una revista La Sentinela de 1 de marso de 2014, che parlea: “Cossa che Dio l’è drio far par ti?” Bàrbara gnanca no la imaginea, ma la ga mandà questa carta a un casal che no l’era pi Testimònia de Geovà. Lori i ga ledesto la revista tante volte e el omo el ga sentio come se Geovà el fusse drio parlar con lu. Alora, lori i ga scominsià a ndar ale riunion nantra volta e i ze tornadi a esser Testimònie de Geovà dopo de 27 ani. L’è sicuro che Bàrbara la ze restada tanto contenta e incoraiada de veder quel che la carta la ga fato.

18. Cossa che ghemo de far par ricever la forsa de Dio?

¹⁸ Geovà el pol darne forsa de arquante maniere. Par esémpio, par meso dela orassion, dela Bìblia, dei fradei e dela predicassion. Noantri ghemo de doperar ben queste robe. Cossita, ndaremo mostrar che credemo che Geovà el vol giutarne e el pol far questo. Noantri semo sicuri che Geovà el vol “mostrar la so forsa a quei che i lo serve de tuto el cuor”. — 2 Cró. 16:9.