1. Che bel esémpio Gesù el ga dato ai so dissìpoli, e cossa che lori i ga fato? (Vedi la ilustrassion dela prima pàgina.)

GESÙ l’era tanto contento de predicar e lu el volea che anca i so dissìpoli i fusse contenti de far questo laoro. (Gioani 4:35, 36) Intanto che Gesù l’era qua nela Tera, i so dissìpoli i ga fato un bel laoro nela predicassion. (Luc. 10:1, 5-11, 17) L’è vera che i dissìpoli i ze restadi desanimadi dopo che i nemighi i ga ciapà Gesù e i lo ga copà. (Gioani 16:32) Ma quando Gesù l’è stà ressussità, lu el ga incoraià i so dissìpoli a predicar. Alora, quando Gesù l’è ndato al cielo, lori i ze tornadi a far un bel laoro nela predicassion. I so nemighi fin i ga dito che lori i gavea predicà par tuta la Gerusalen. — Ati 5:28.

2. Come che Geovà el ga benedio la predicassion?

² Gesù el ga giutà i so dissìpoli del primo sècolo a far un bel laoro nela predicassion, e Geovà li ga benedio tanto. Alora, tante persone le ga volesto imparar sora quel che lori i era drio insegnar. Par esémpio, intorno de 3 mila persone le se ga batesà nel Pentecoste del ano 33, e cada volta pi persone le era drio deventar dissìpoli. (Ati 2:41; 6:7) Ma Gesù el ga dito che nei ùltimi giorni ancora de pi persone le ndaria scoltar le bone notìssie. — Gioani 14:12; Ati 1:8.

3-4. (a) Parché che arquanti i pensa che l’è fadiga predicar? (b) Cossa che ndaremo studiar?

³ Tuti noantri volemo seitar a predicar contenti. In tanti posti, l’è fàcile far questo parché le persone le vol studiar la Bìblia. Par esémpio, in arquanti posti, le persone le ga de spetar che una Testimònia de Geovà la possa giutarla a imparar dela Bìblia. Ma in arquanti posti, tanti predicadori i pensa che  l’è fadiga predicar parché le persone no le ze mai casa, e quando le ze casa, no le vol scoltar.

⁴ Se te sì de star nte un posto che l’è fadiga predicar, questo stùdio ndarà giutarte. Parché? Parché ndaremo veder cossa che arquanti fradei i ze drio far par catar de pi persone e seitar a predicar contenti, anca quando le persone no le vol mia scoltarli.

5. Che dificoltà tante Testimònie de Geovà le infronta?

⁵ Dele volte, no l’è mia fàcile catar le persone casa o esser boni de rivar fin lore. Par esémpio, tanti i ga de predicar in posti che no i ze boni de rivar fin le case dele persone, che ghen’è sempre qualchedun par protegerle e che sol i pol ndar rento se i ze convidadi. Altri predicadori i ze boni de rivar fin le case dele persone, ma no le cata mai casa. Altri predicadori i ga de viaiar tanto par proar predicar ale persone che le vive in posti pròpio distanti, ma no i sa se le catarà casa. Se te sì drio infrontar una de queste dificoltà, no stà mai desister. Cossa che te pol far par dàrghene fora con queste dificoltà e far un bel laoro nela predicassion?

6. Parché che la predicassion la ze come el laoro dei pescadori?

⁶ Gesù el ga dito che la predicassion la ze come pescar. (Mar. 1:17) Parché? Un pescador el pol laorar tanti giorni, ma no esser bon de ciapar gnanca un pesse. Anca cossita, lu no’l se ferma mia de pescar. Pitosto, el càmbia quel che el ga de bisogno. Par esémpio, el càmbia la ora, el posto e come l’è drio pescar. Noantri ghemo de far la medèsima roba nela predicassion. Vedemo arquante robe che podemo far.

7. Cossa che pol suceder se proemo predicar in tante ore difarente?

⁷ Proa parlar cole persone in tante ore difarente. Una ora o l’altra, le persone le ga de tornar casa. Alora, noantri saremo boni de parlar con lore se ndemo predicar nele ore che le ze casa. Par esémpio, tanti predicadori i ze boni de catar de pi persone dopo mesdì o ala sera. In queste ore, le persone le ze pi tranquile e le ga tempo par ciacolar. Fursi te pol far come un ansiano che el ga nome David. Lu el ga dito che dopo de predicar nte un posto, lu e el fradel che l’è insieme i torna par proar parlar cole persone che no i ze stati boni de catarle. Lu el ga dito: “L’è bel parché semo boni de parlar con tante persone.” *

8. De acordo con Eclesiasti 11:6, cossa che ghemo de far nela predicassion?

⁸ De acordo col testo de questo stùdio, ghemo de seitar a proar catar le persone. (Ledi Eclesiasti 11:6. *) L’è questo che David, che ghemo parlà prima, el ga capio. Dopo che el ga fato sforso par catar le persone casa, lu l’è stà bon de parlar con una de queste. Questa persona la ga dito: “L’è oto ani che son de star qua e gnanca una Testimònia de Geovà la gavea parlà con mi.” David anca el ga dito: “Mi go visto che quando se sforsemo par catar una persona casa, quasi sempre la scolta quel che volemo parlar sora la Bìblia.”

9. Cossa che arquanti predicadori i fà quando no i ze boni de catar le persone casa?

⁹ Proa predicar in difarenti posti. Quando i predicadori no i cata le persone casa, lori i  proa predicar in altri posti. Par esémpio, lori i ze boni de parlar con tante persone quando i predica par la strada o col careto de publicassion. Cossita, lori i ze boni de parlar cole persone che le ze de star in posti che no i pol mia ndar rento. Tanti predicadori anca i ga visto che le persone le vol discorer de pi e le aceta le publicassion quando i predica nele piasse e nel comèrsio. Floiran, che l’è un superintendente de sircuito nela Bolìvia, el ga dito: “Noantri predichemo ale persone nel comèrsio dela una ale tre dopo mesdì. In questa ora, lori i ga manco robe de far. Alora, l’è pi fàcile che i parle con noantri e semo boni de scominsiar studi bìblichi.”

10. Cossa che ancora te pol far par predicar ale persone?

¹⁰ Proa predicar de altre maniere. Metemo dir che ghemo belche proà parlar con una persona tante volte e in tante ore difarente, ma no semo stati boni de catarla. Sarà che ghen’è altra maniera de predicar a questa persona? Varda cossa che una sorela, che la ga nome Katarína, la ga dito: “Me piase de scriver carte ale persone che no son stata bona de catarle casa. Mi scrivo nele carte quel che me piaseria de parlar a lore.” Cossa che podemo imparar del so esémpio? Noantri ghemo de sforsarse par catar le persone casa, ma se no semo stati boni de far questo, ghemo de proar de altre maniere.

11. Parché che arquante persone no le vol scoltarne parlar sora la Bìblia?

¹¹ Arquante persone no le vol scoltarne nela predicassion. Parché? Lore no le capisse parché  che le ga bisogno de imparar sora Dio e sora la Bìblia. Tante no le crede in Dio parché le vede tanto sofrimento. Altre no le vol imparar sora la Bìblia, parché le vede che i lìderi religiosi i dise che i fà quel che ghen’è nela Bìblia, ma i fà tante robe sbaliade. Ancora altre le ze preocupade coi so laori, cole so fameie, i so problemi e le pensa che la Bìblia no la pol giutarghe. Alora, cossa che podemo far par seitar a predicar contenti anca quando le persone no le vol scoltarne?

12. Come Filipensi 2:4 pol giutarne nela predicassion?

¹² Mostra che te te preocupi cole persone. Tante persone le ga volesto scoltarne sol dopo che le ga visto che se preocupemo con lore. (Ledi Filipensi 2:4. *) Alora, ghemo de far questo parché le persone le vede quando se preocupemo con lore. Pol esser che lore no le se ricorde de quel che ghemo parlà, ma de come che le ghemo tratade. Anca quando le persone no le vol mia scoltar, mostremo che se preocupemo con lore par meso de quel che femo e de quel che parlemo. Varda cossa che David el ga dito: “Quando qualchedun el dise che no’l vol scoltarne, noantri metemo via la Bìblia o le publicassion e ghe disemo: ‘Me piaseria tanto saver parché che te pensi cossita.’”

13. Come che podemo saver cossa parlar cole persone?

¹³ Noantri mostremo che se preocupemo cole persone quando parlemo quel che ndarà giutarghe o ghe piaserà saver. Par esémpio, sarà che ghen’è qualcossa nela casa che mostra che la persona la ga fioi? Alora, podarìano parlar sora slevar su i fioi o gaver una fameia felice. O sarà che ghen’è tante robe par proteger la casa? Se si, podarìano parlar sora la paura che le persone le ga par causa dele robe brute che le sucede. Pol esser che la persona la ghe piaserà saver che queste robe no le ndarà pi suceder. Alora, sempre che qualchedun nela predicassion el ne scolta, ghemo de mostrar che i consili dela Bìblia i pol giutarghe. Katarína, che ghemo parlà prima, la ga dito: “Me sforso par ricordarme de come la Bìblia la ga cambià la me vita.” Cossita, Katarína la ze bona de parlar de maniera sicura, e questo ghe giuta a predicar ancora meio.

14. De acordo con Proverbi 27:17, come i predicadori i pol giutarse?

¹⁴ Impara coi altri. El apòstolo Paolo el ga insegnà a Timòteo come el gavea de predicar e insegnar. Lu anca el ga dito che Timòteo el gavea de giutar i altri a far compagno. (1 Cor. 4:17) Alora, quando predichemo, podemo  imparar tanto coi fradei che i ga de pi speriensa. (Ledi Proverbi 27:17. *) Varda el esémpio de un pioniero che el ga nome Shawn. Lu el predichea nele colonie, ma le persone in quel posto no le volea cambiar de religion. Come che lu l’è stà bon de seitar a predicar contento? Lu el ga dito: “Mi me sforsea de sempre laorar con nantro fradel. Cossita, dopereino el tempo intrà una casa e l’altra par giutarse a predicar meio. Par esémpio, ricordeino de quel che gaveino parlà cola ùltima persona. Cossita, èrino boni de veder quel che podarìano far meio.”

15. Parché che ghemo de pregar a Dio quando ndemo predicar?

¹⁵ Prega a Geovà e domanda el so aiuto. Quando ndemo predicar, ghemo de domandar el aiuto de Geovà parché no semo boni de far gnente sensa el so spìrito santo. (Sal. 127:1; Luc. 11:13) Quando te preghi, parla pròpio quel che te ghè de bisogno. Par esémpio, te pol domandar che Geovà el te giute a catar qualchedun che el vol imparar sora lu. Ma dopo, te toca sforsarte par parlar con tuti quei che te cati.

16. Come che studiar la Bìblia pol giutarne a predicar ancora meio?

¹⁶ Fà sempre el to stùdio dela Bìblia. La Parola de Dio la dise che ghemo de esser pròpio sicuri de quala che la ze la volontà de Geovà. (Rom. 12:2) Ma come questo pol giutarne a esser bravi predicadori? Quando studiemo la Bìblia, cognossemo ancora meio a Geovà. Cossita, quando ndemo predicar, le persone le vederà che semo sicuri de quel che insegnemo. Katarína, che ghemo parlà prima, la ga dito: “Poco tempo indrio, mi go visto che gavea de far pi forte la me fede nele verità pi importante dela Bìblia. Alora, go studià ben le prove che Dio el ga creà tute le robe, che la Bìblia la ze pròpio la Parola de Dio e che lu el ga una organisassion qua nela Tera.” Katarína la ga dito che el stùdio dela Bìblia el ga fato pi forte la so fede e la ga giutada a esser pi contenta nela predicassion.

17. Parché che Gesù el ga seità a predicar contento?

¹⁷ Gesù el ga seità a predicar contento anca quando le persone no le volea scoltarlo. Parché? Parché lu el savea che lore le gavea bisogno de imparar sora Geovà e el volea giutar tante de lore a cognosser la verità sora el Regno. Lu anca el savea che dopo de un tempo fursi le volaria scoltarlo. Un esémpio de questo l’è stà la fameia de Gesù. Gesù el ga predicà tre ani e meso, ma gnanca un dei so fradei l’è deventà so dissìpolo. (Gioani 7:5) Ma dopo che lu l’è stà ressussità, lori i ze deventadi so dissìpoli. — Ati 1:14.

18. Parché che ghemo de seitar a predicar?

¹⁸ Noantri ghemo de seitar a predicar parché no savemo chi che ndarà deventar un servo de Geovà. Ghemo anca de ricordarse che arquanti ghe mete pi tempo che altri par imparar la verità. E anca savemo che quei che no i vol mia scoltar i pol cambiar dopo che i vede che vivemo de acordo cola Bìblia e semo contenti. — 1 Pie. 2:12.

19. De acordo con 1 Corinti 3:6, 7, cossa che ghemo de capir?

¹⁹ Noantri savemo che podemo piantar e darghe àqua, ma l’è Geovà che el fà el laoro pi importante nela predicassion. (Ledi 1 Corinti 3:6, 7. *) Getahun, che l’è un fradel che  el serve nela Etiòpia, el ga dito: “Par 20 ani, ghen’era sol mi come Testimònia de Geovà qua. Ma adesso ghen’è 14 predicadori e intorno de 32 persone le va ale riunion. Tredeze i ze belche batesadi, intrà questi, la me sposa e i nostri tre fioi.” Getahun l’è tanto contento parché el ga spetà con passiensa fin che Geovà el giutesse queste persone a far parte dela so organisassion! — Gioani 6:44.

20. Parché che podemo dir che femo parte de un grupo che salva le persone?

²⁰ Tute le persone le ze tanto importante par Geovà. Geovà el ne ga dato el privilègio de laorar col so Fiol e predicar a persone de tute le nassion. (Ageo 2:7) Podemo dir che quando ndemo ala predicassion, semo come un grupo che el laora par salvar le persone che le ze nte un barco drio sfondarse. Fursi no i ze mia tuti che i ndarà salvar a qualchedun, ma el laoro de tuti l’è importante. La medèsima roba la sucede nela predicassion. Noantri no savemo quante persone le va ancora imparar sora Geovà e esser salve del mondo de Sàtana. Ma savemo che Geovà el pol doperar a qualchedun de noantri par giutarghe. Andreas, che l’è de star nela Bolìvia, el ga dito: “Quando una persona la impara la verità e la se batesa, questo el prova che tuti i fradei i ga laorà insieme.” Noantri ghemo de pensar come lu. Alora, Geovà el ndarà benedirne e ndaremo seitar a predicar contenti.