TANTI i sa che i egipsi i doperea tanto el papiro par scriver. Anca i grechi e romani i scrivea nel papiro. * Ma pochi i sa che i doperea el papiro anca par far i barchi.

De pi de 2.500 ani indrio, el profeta Isaia el ga scrito che persone che le vivea darente dei rii dela Etiòpia, le mandea persone nei barchi de papiro coi messagi par altri posti. Dopo, el profeta Geremia el ga dito che, quando i soldadi dela Medo-Persa i ndesse rento la cità de Babilònia, lori i ndaria brusar i “barchi de papiro” par no assar che quei de Babilònia i scampesse via. — Isa. 18:1, 2; Ger. 51:32.

I studianti dela Bìblia i sa che la Bìblia la ze vegnesta de Dio. Par quela, lori belche i spetea che le peschise le fusse de acordo che i barchi i era pròpio fati de papiro in quela època. (2 Tim. 3:16) Ma cossa che i ga catà? I studiosi i ga catà tante robe che le mostra come che i era fati i barchi de papiro nel Egito.

Nele tombe del Egito, ghen’è i desegni che mostra come che lori i fea par tor su el papiro e far su i barchi. I òmini li taiea darente dele radise e li lighea in massi o faie. La cana del papiro la ga tre bande. Cossita, i restea ben postadi e tacadi un al altro quando lori i lighea tanti insieme. Un libro dela stòria del Egito mostra che i barchi i era longhi fin 17 metri con 10 a 12 remi in cada una dele bande.

L’era fàcile catar el papiro nel rio Nilo e de far i barchi. Anca quando el legno l’è deventà la roba pi doperada par far grandi barchi, pol esser che i pescadori e quei che i copea bèstie i ga seità a doperar pìcoli barchi fati de papiro.

I barchi de papiro i ze stati doperadi par le persone par tanto tempo. De acordo col scritor greco Plutarco, che el ga vivesto intrà el primo e el secondo sècolo dopo de Cristo, i pìcoli barchi de papiro ancora i era doperadi nei so giorni.