STÙDIO 21
CÀNTICO 107 Geovà el ne insegna a amar
Come scòlier una persona par maridarte?
‘Chi che pol catar una brava dona? Ela la ga de pi valor che i corai.’ — PRO. 31:10.
COSSA CHE NDAREMO IMPARAR?
Ndaremo veder arquanti prinsipi bìblichi che te giutarà a catar una brava persona par maridarte e come tuti nela congregassion i pol giutar i fradei che i vol maridarse.
1-2. (a) Cossa che te ghè de capir prima de scominsiar smorosar qualchedun? (b) Cossa che vol dir smorosar qualchedun? (Varda “Par capir meio”.)
VUTO maridarte? Anca se una persona no ghe ocore maridarse par esser felice, tanti fradei e sorele gióveni o pi veci i vol maridarse. Ma te ghè de capir che prima de scominsiar a smorosar qualchedun, te ocore gaver una forte amicìssia con Geovà, cognosserte ben e esser bon de tender dela persona che te ndarè maridarte. a (1 Cor. 7:36) Cossita, sarà pi fàcile che te gàpia un bel matrimònio.
2 Ma, dele volte, no l’è mia fàcile catar una brava persona par maridarse. (Pro. 31:10) Anca se ghen’è qualchedun che te volarissi cognosser meio, pol esser che no l’è mia fàcile dirghe quel che te sì drio sentir. b In questo stùdio, vederemo arquante robe che ndarà giutarte a catar una brava persona par smorosar e cossa tuti nela congregassion i pol far par giutarte.
COME CHE TE POL CATAR UNA BRAVA PERSONA PAR MARIDARTE?
3. Cossa che te ghè de far vanti de proar catar una persona par smorosar?
3 Cossa che te ghè de far vanti de proar catar una persona par smorosar? Proa capir che qualità te speti che la gàpia. Se no te fè cossita, pol esser che no te te nicordi che qualchedun el saria bon par ti o che te scominsi smorosar qualchedun che dopo te vedi che no’l va mia ben. La persona che te vè smorosar la ga de servir a Geovà. (1 Cor. 7:39) Anca cossita, gnanca tuti i sarà boni par ti. Alora domandate: ‘Cossa che mi vui far nela me vita? Che qualità mi vui che la persona che penso de maridarme la gàpia? Sarà che son drio spetar che l’altra persona la sìpia perfeta?’
4. Cossa che arquanti fradei i domanda a Geovà?
4 Se te vol maridarte, l’è sicuro che te ghè belche pregà a Geovà par dighe quel che te vol. (Fil. 4:6) L’è vera che Geovà no’l promete catarte fora una persona par maridarte, ma lu el pol darte quel che te ocore e giutarte a far una bona dessision. Alora, seita a parlarghe sora quel che te senti, quel che te pensi e a domandarghe passiensa e sabedoria. (Sal. 62:8; Tia. 1:5) John, c che l’è un fradel nò maridà dei Stati Unidi, el ga dito: “Mi prego a Geovà par parlar sora le qualità che vui che una dona la gàpia e che el me giute a cognosser brave sorele. Mi anca ghe domando che el me giute a gaver qualità de un bravo sposo.” Tanya, una sorela del Sri Lanka, la ga dito: “Intanto che no me marido, mi domando che Geovà el me giute a seitar fedele e a esser felice.” Pol esser che te toca spetar de pi tempo de quel che te volarissi par maridarte. Ma Geovà el promete tenderte e darte el amor che te ocore. — Sal. 55:22.
5. De acordo con 1 Corinti 15:58, cossa che pol giutarte a catar una persona par smorosar? (Varda anca la ilustrassion.)
5 Cossa pol giutarte a catar una persona par smorosar? La Bìblia la dise: “Gàpie sempre tanto da far nel laoro del Signor”. (Ledi 1 Corinti 15:58. d) Alora, intanto che te fè el to meio nel laoro a Geovà, te ndarè far tanti amighi. Te podarè cognosser altre persone che no le ze maridade e che le ze drio far de pi par Geovà, come ti. E ricòrdate che se te fè el to meio a Geovà, te gavarè tanta alegria.
Se te laori tanto par Geovà e te resti insieme de diversi fradei e sorele, te podarissi catar altri che i vol maridarse come ti (Varda el parágrafo 5.)
6. Cossa che te ghè de ricordarte se te vol maridarte?
6 Ma volemo dirte una roba: Se te sì drio ndar in serca de una persona par maridarte, no stà assar che questa roba la sìpia la pi importante dela to vita. (Fil. 1:10) Ricòrdate che no te ocore esser maridà par esser felice. Pitosto, par esser felice, te ocore gaver una forte amicìssia con Geovà. (Mat. 5:3) Intanto che no te sì maridà, te ghè de pi tempo par laorar par Geovà. (1 Cor. 7:32, 33) Alora, dopera ben questo tempo. Jessica, una sorela dei Stati Unidi, che la se ga maridà con quasi 40 ani, la ga dito: “Mi volea maridarme, ma no gavea gnancora catà nissuni. Alora, doperar tanto del me tempo nela predicassion me ga giutà a esser contenta.”
SFÒRSATE DE TORTE EL TEMPO PAR VARDAR COME LA PERSONA LA ZE
7. Parché che l’è bon vardar par un tempo come la persona la ze vanti de dirghe che te vol smorosarla? (Proverbi 13:16)
7 Cossa gheto de far se te pensi che una persona la te ndaria ben? Sarà che suito te toca corerghe drio? La Bìblia la dise che la persona che la ga sabedoria la pensa ben vanti de far qualcossa. (Ledi Proverbi 13:16. e) Alora, vanti de dir ala persona che te vol smorosarla, proa vardar quel che la fà, come la trata i altri e come la ze. Aschwin, un fradel dela Olanda, el ga dito: “Una ora te par che te sì passionà par una persona, ma suito quel che te senti va via. Alora, se prima te vardi ben come la persona la ze, no te ndarè scominsiar a smorosarla par causa de sentimenti che pol suito ndar via.” Pol esser che dopo che te capissi meio come la persona la ze, te te nicordi che no la te va mia ben.
8. Come che te pol capir se una persona la te va ben? (Varda anca la ilustrassion.)
8 Ma come che te pol capir se una persona la te va ben? Proa vardar quel che la fà, come la trata i altri, come che la ze nele riunion o quando ndé a spasso e come la ze la so amicìssia con Geovà. Te pol anca domandarte: ‘De cossa ghe piase ciacolar e chi zeli i so amighi?’ (Luc. 6:45) ‘Sarà che la vol far le medèsime robe nela vita che mi?’ Te pol anca parlar coi ansiani dela so congregassion o con bravi fradei che i la cognosse ben. (Pro. 20:18) Domandaghe cossa che i altri i pensa sora quela persona e che qualità la ga. (Rut. 2:11) Ma, intanto che te sì drio proar cognosserla meio, móstraghe rispeto e no stà proar saver tuto quel che la fà nela so vita.
Invesse de ndar suito dir ala persona i to sentimenti, varda come che la persona la ze par un tempo (Varda i paràgrafi 7 e 8.)
9. De cossa te toca esser sicuro vanti de parlar che te vol smorosar qualchedun?
9 Quanto tempo te toca spetar fin parlar cola persona che te vol smorosarla? Se te vè parlar con ela massa presto, pol esser che ela la pense che te sì una persona che no pensa ben vanti de far dessision. (Pro. 29:20) Ma se te la tiri massa longa, fursi ela la pol pensar che ti no te sè mia quel che te vol. (Ecl. 11:4) L’è vera che quando te dessidi cognosser un poco meio una persona, questo no vol dir che te toca esser sicuro che te vol maridarte con ela. Invesse, te toca esser sicuro che te sì pronto par maridarte e che te ghè capio che ela la ze una brava persona par maridarte.
10. Cossa te ghè de far se una persona la vol smorosarte ma ti no te vol mia?
10 Ma cossa far se una persona la vol smorosarte? Se no te ghè mia la medèsima voia, mostra par meso de come te la trati che no te vol smorosarla. Saria tanto bruto far finta de voler smorosar qualchedun se no te vol mia. — 1 Cor. 10:24; Efe. 4:25.
11. Cossa che te ghè de far se qualchedun el te domanda aiuto par catar una persona par maridarse?
11 In arquanti posti, i ze i genitori o altri che i scòlie con chi una persona la ndarà maridarse. In altri posti, l’è la fameia o i amighi che i proa catar una persona par quei che no i ze mia maridadi, e dopo, li giuta a cognosserse meio. Cossa che te ghè de far se un amigo o qualchedun dela to fameia el te domanda de giutarlo a catar una persona par maridarse? Prima, te toca pensar in quel che ghe piase e in quel che ghe ocore. Dopo che te cati una persona che te par che va ben par lu, proa cognosserla meio, saver quel che ghe ocore, quel che ghe piase e le so qualità. Proa anca capir come ze la so amicìssia con Geovà. Questo l’è pi importante che i soldi, stùdio, o quel che la ga nela vita. Ma ricòrdate che no te sarè mia ti a dessider se lori i ndarà maridarse o nò. — Gàl. 6:5.
COME TE POL PARLAR CHE TE VOL SMOROSAR UNA PERSONA?
12. Cossa che te ghè de far se te vol scominsiar smorosar qualchedun?
12 Cossa che te ghè de far se te vol scominsiar smorosar una persona? f Te pol dirghe che te vol parlar con ela par telèfono o nte un posto ndove ghen’è altre persone. Quando ve parlé, assa ciaro che te ghe vol ben e che te vol cognosserla meio. (1 Cor. 14:9) Se la persona la ga bisogno de tempo par pensar, daghe el tempo che ghe ocore. (Pro. 15:28) E, se la te dise che no la vol mia smorosarte, mostra rispeto par la so dessision e i so sentimenti.
13. Cossa che te pol far se una persona la te dise che la vol smorosarte? (Colossensi 4:6)
13 Cossa che te pol far se una persona la te dise che la vol smorosarte? Ricòrdate che par dirte una roba cossita la ga bio bisogno de coraio. Alora, mostra bontà e rispeto. (Ledi Colossensi 4:6. g) Faghe saver se te ghè bisogno de tempo par dessider, ma no stà meterghe tanto par darghe la risposta. (Pro. 13:12) Se ti no te vol mia smorosarla, assalo ciaro. Ma parlaghe de maniera bondosa. Varda cossa che Hans, un fradel dela Àustria, el ga fato quando una sorela la volea smorosarlo. Lu el ga dito: “Go assà ciaro che mi no volea mia smorosarla, ma de maniera bondosa. Mi ghe go parlà presto parché no volea che ela la pensesse che gavaria caro de smorosarla. Par quela son anca stato atento a come ndaria tratarla de lì avanti.” Ma, se ti te vol smorosar una persona, dighe i to sentimenti, e dessidé insieme come sarà quando scominsiaré a smorosar. L’è una roba importante de far parché, come valtri pensé de maniera difarente e sì stati slevadi de maniera difarente, pol esser che no speté la medèsima roba.
COME CHE PODEMO GIUTAR QUEI CHE NO I ZE MIA MARIDADI?
14. Come che podemo giutar quei che no i ze maridadi con quel che disemo?
14 Come che tuti noantri podemo incoraiar e giutar quei che i vol maridarse? Una roba importante l’è star atenti a quel che disemo. (Efe. 4:29) Podemo domandarse: ‘Seito dir a quei che no i ze maridadi robe che pol farli sentirse mal? Quando vedo che un fradel e una sorela che no i ze mia maridadi i ze drio ciacolar, penso suito che i vol smorosar?’ (1 Tim. 5:13) Hans, che ghemo parlà vanti, el ga dito: “Arquanti fradei i dise: ‘Parché che no te sì gnancora maridà? Deromai te sì vècio.’ Quando i parla cossita, i ne fà pensar che gavaremo valor sol se se maridemo.” Alora, no ghemo mai de dir robe che li fae sentir che ghe manca qualcossa o che i ze manco importanti de quei che i ze maridadi. Invesse, volemo lodar e incoraiar i nostri cari fradei e sorele che no i ze maridadi! — 1 Tes. 5:11.
15. (a) De acordo con Romani 15:2, cossa che ghemo de pensar vanti de giutar qualchedun par catar un moroso o una morosa? (b) Cossa che te ga piasesto del vìdeo? (Varda anca el ritrato.)
15 E se pensemo che un fradel e una sorela i podaria ndar ben insieme? La Bìblia la ne dise che ghemo de rispetar i sentimenti dei altri. (Ledi Romani 15:2. h) Arquante persone che no le ze maridade no le vol che altri i le giute par catar un moroso o una morosa, e noantri ghemo de rispetar quel che le vol. (2 Tes. 3:11) Altri i volaria aiuto, ma l’è meio spetar che lori i ne domande. i (Pro. 3:27) Invesse, altre persone che no le ze maridade le ghe piaseria che le giutessino a cognosser un fradel o una sorela, ma de maniera discreta, sensa che tuti i sàpia. Lydia, una sorela no maridada dela Alemagna, la dise: “Una roba bela de far l’è convidar el fradel e la sorela insieme a altre persone. Cossita lori i pol cognosserse e dessider se i se cata ben o nò.”
Quei che no i ze maridadi i ga la oportunità de cognosserse quando i ze insieme a altri fradei e sorele (Varda el paràgrafo 15.)
16. Cossa che quei che no i ze maridadi i ga de ricordarse?
16 Tuti quei che i ze maridadi o nò maridadi i pol esser felici! (Sal. 128:1) Alora, se te vol maridarte, ma no te ghè gnancora catà la persona giusta, dopera el tempo che te ghè par far el to meio a Geovà. Una sorela de Macao de nome Sin Yi la ga dito: “Quando penso nel tempo che gavaremo col nostro sposo o sposa nel Paradiso, el tempo che semo noantri soli ancoi l’è pròpio poco. Cossita mi proo darghe valor a questo tempo e doperarlo ben.” Ma, metemo dir che te ghè catà una persona che te piase e te ghè scominsià a smorosar. Cossa che te ghè de far? Nel pròssimo stùdio, ndaremo veder come che te pol doperar ben el tempo che te sì drio smorosar par giutarte a far una bona dessision.
CÀNTICO 137 Le done fedele del passà e le nostre sorele
a Par giutarte a capir se te sì pronto, varda el artìcolo “Namoro — Parte 1: Será que estou pronto para namorar?”, nel site jw.org.
b PAR CAPIR MEIO: In questo stùdio e nel pròssimo, quando parlemo sora smorosar, semo drio parlar de un omo e de una dona che i vol cognosserse meio par saver se i vol pròpio maridarse. Un omo e una dona i scomìnsia smorosar quando lori i mostra che i se vol ben un al altro e che i vol cognosserse meio par veder se i podaria maridarse. Lori i finisse de smorosar quando i se marida o quando i capisse che no va mia ben.
c Arquanti nomi i ze stati cambiadi.
d (1 Corinti 15:58) Par quela, me fradei amadi, sìpie forti, firmi. Gàpie sempre tanto da far nel laoro del Signor, e sàpie che tuto el vostro laoro par el Signor no l’è par gnente.
e (Proverbi 13:16) El omo che el ga sabedoria el ga imparà quel che l’è giusto e el fà bone dessision. Ma el stùpido el mostra a tuti che l’è bauco.
f In arquanti posti, l’è el fradel che el va domandar ala sorela de scominsiar a smorosar. Ma, anca una sorela la pol dessider de domandarghe a un fradel de smorosarlo. (Rut. 3:1-13) Par gaver de pi informassion, varda el artìcolo “Os Jovens Perguntam . . . Como contar-lhe tudo o que sinto por ele?” nela Despertai! de 22 de otobre de 2004.
g (Colossensi 4:6) Le vostre parole le ga de esser sempre bele, come che consade con sal. Cossita valtri ndaré saver come risponder a cada persona.
h (Romani 15:2) Tuti noantri ghemo de far contento el pròssimo par el so ben, par giutarlo a tirarse su.
i Varda el vìdeo Bravi lotadori par la fede — I nò maridadi, nel site jw.org.
