1. Parché Gesù el ga domandà che Geovà el tendesse dei so dissìpoli?

NELA note vanti de morir, Gesù l’era drio pensar sora le dificoltà che i so dissìpoli i ndaria infrontar. Lu el amea tanto i so dissìpoli. Alora, lu el ga domandà che so Pare el tendesse de lori par causa de Sàtana. (Gioani 17:14, 15) Gesù el savea che suito el ndaria al cielo e che Sàtana el seitaria ndar drio del pòpolo de Dio. Par quela che lori i gavaria bisogno dela protession de Geovà.

2. Parché che semo sicuri che Geovà el ndarà risponder quando preghemo a lu?

² Geovà el ga fato quel che Gesù el ghe ga domandà parché lu lo ama. Se noantri obedimo a Geovà, lu el va amar anca a noantri. Quando preghemo a lu par domandar aiuto e protession, lu el ndarà risponder. Geovà l’è come un paron de fameia. Cossita, lu el ndarà sempre tender con tanto amor dei so fioi. Se lu no’l fesse questo le persone le podaria parlar mal del so nome. Sicuro che Geovà no’l vol che una roba de questa la suceda.

3. Parché che ancoi ghemo bisogno dela protession de Geovà?

³ Parché che ghemo tanto de bisogno dela protession de Geovà? Parché Sàtana l’è stato parà do del cielo e ‘l’è vegnesto ala Tera con granda ràbia’. (Apo. 12:12) Par esémpio, lu el ga fato tanti pensar che ndar contra le Testimònie de Geovà l’è una maniera de far un laoro a Dio. (Gioani 16:2) E ghen’è anca quei che no i crede in Dio e i vien contra noantri parché semo difarenti dele persone del mondo. Ma no ne  ocore gaver paura. Parché? Parché la Bìblia la dise che Geovà l’è fedele e lu el ndarà darne forsa e protession. (2 Tes. 3:3) Come che Geovà el ne dà protession? Ndaremo studiar due maniere.

4. De acordo con Efesi 6:13-17, come che Geovà el ne dà protession?

⁴ Geovà el ne ga dato la armadura che la pol protegerne de Sàtana. (Ledi Efesi 6:13-17. *) Noantri gavaremo protession sol se doperemo tute le robe dela armadura. Ma cossa che le ze queste robe? Ndemo imparar.

5. Cossa che l’è el sinturon dela verità e parché che ghemo de doperarlo?

⁵ El sinturon dela verità l’è le verità che ghen’è nela Parola de Dio, la Bìblia. Parché che ghemo de doperarlo? Par no esser imbroiadi par el pare dela busia, che l’è Sàtana. (Gioani 8:44) E romai fà miliari de ani che Sàtana el proa imbroiar tute le persone. (Apo. 12:9) Cossa che ghemo de far par doperar questo sinturon? Ghemo de imparar la verità sora Geovà, adorar a lu con spìrito e verità e far tuto polito. — Gioani 4:24; Efe. 4:25; Ebr. 13:18.

6. Cossa che la ze la corassa dela giustìssia, e parché che ghemo de doperarla?

⁶ Nel passà, un soldà el doperea la corassa par proteger el so cuor de una spada o de una fressa. Anca noantri ghemo de doperar la corassa dela giustìssia. Cossa che la ze? La ze i prinsipi de Geovà. Parché che ghemo de doperarla? Parché anca noantri ghemo bisogno de proteger el nostro cuor dele robe che Sàtana el dopera. (Pro. 4:23) Sàtana el proa farne amar le robe del mondo e cossita no servir sol a Geovà. (Tiago 4:4; 1 Gio. 2:15, 16) Ma come savemo, Geovà el vol che lo amemo e lo servimo de tuto el cuor. (Mat. 22:36, 37) E quando Sàtana el vede che no l’è bon de far questo, lu el proa farne desobedir a Geovà.

7. Come che femo par doperar la corassa dela giustìssia?

⁷ Come che femo par doperar la corassa? Ghemo de capir che i prinsipi de Geovà i ze boni e viver de acordo con lori. (Sal. 97:10) Tanti i assa de far quel che Geovà el ghe domanda parché i pensa che l’è massa fadiga farlo. Ma una persona che la fà questo la ze come un soldà che el cava via la corassa in meso dela guera, parché el pensa che l’è massa fadiga portarla. Sicuro che un bon soldà mai el ndaria far questo. Noantri amemo tanto a Geovà e no pensemo che l’è massa fadiga far quel che el ne domanda, parché savemo che questo pol salvar la nostra vita. — 1 Gio. 5:3.

8. Cossa che vol dir gaver nei pié le sandàlie?

⁸ Paolo el ne ga incoraià a gaver nei pié le sandàlie dela disposission par predicar le bone notìssie dela pace. Questo vol dir gaver tanta voia de predicar sora le bone notìssie del Regno. Parché che ghemo de gaver nei pié le sandàlie? Parché quando parlemo ai altri, la nostra fede la resta pi forte. Noantri restemo tanto contenti de veder che i servi de Geovà i parla sora el Regno a tante persone. Par esémpio, lori i fà questo nel laoro, nela scola, de casa in casa e nel  comèrsio. Lori anca i parla coi parenti e con altre persone che i cognosse. Alora, se noantri no predichemo, saria come se fùssino sensa le sandàlie. Se un soldà el fea questo el podaria farghe mal ai pié, no’l saria pi bon de obedir ale òrdine del comandante e anca el podaria esser ciapà par el nemigo.

9. Parché che ghemo de doperar el grando scudo dela fede?

⁹ El grando scudo dela fede l’è la nostra fede in Geovà, o sìa, noantri se fidemo che Geovà el ndarà far quel che el ga prometesto. Parché che ghemo bisogno del grando scudo dela fede? Par protegerne de quel che Sàtana el proa far contra noantri. E se ghemo el scudo dela fede, no saremo imbroiadi par le busie dei apòstati e gnanca restaremo desanimadi quando qualchedun el ne dise su. La fede la ne giutarà a gaver forsa par seitar a obedir a Geovà anca quando i altri i proa farne desobedirlo. Noantri doperemo el scudo quando no femo le robe che Geovà el òdia nel laoro o nela scola. (1 Pie. 3:15) Doperemo el nostro scudo anca quando no acetemo un laoro che el podaria intrigar la nostra amicìssia con Geovà. (Ebr. 13:5, 6) E doperemo el scudo quando seitemo servir a Geovà anca quando infrontemo oposission. — 1 Tes. 2:2.

10. Cossa che l’è el capassete dela salvassion, e parché che ghemo de doperarlo?

 ¹⁰ El capassete dela salvassion l’è la speransa che Geovà el ne dà. Par esémpio, la speransa de viver par sempre, dela ressuression e de gaver la benedission de Geovà. (1 Tes. 5:8; 1 Tim. 4:10; Tito 1:1, 2) Come el capassete el dea protession ala testa del soldà, el capassete dela salvassion, o sia, la speransa la protege la nostra mente. Questa speransa la ne giuta a far tuto quel che podemo par ricever le promesse e la ne giuta a no restar desanimadi quando infrontemo problemi. Come che doperemo el capassete? Quando se fidemo in quel che Geovà el dise che l’è giusto e nò in altre robe, come par esémpio, nei soldi. — Sal. 26:2; 104:34; 1 Tim. 6:17.

11. Cossa che la ze la spada del spìrito, e parché che ghemo de doperarla?

¹¹ La spada del spìrito la ze la Parola de Dio, la Bìblia. Questa spada la ne giuta a capir quala che la ze la verità. Ela anca la giuta le persone a fermarse de creder nele busie de Sàtana e de far quel che l’è sbalià. (2 Cor. 10:4, 5; 2 Tim. 3:16, 17; Ebr. 4:12) Noantri imparemo a doperar ben la Bìblia, o la spada, quando la studiemo e quando doperemo quel che la organisassion de Geovà ne dà. (2 Tim. 2:15) Fin adesso, ghemo imparà che Geovà el ne dà protession par meso dela armadura spiritual. Adesso, vederemo de che nantra maniera lu el ne dà protession.

12. Cossa che noantri ghemo de bisogno e parché?

¹² Un bon soldà el sa che no’l sarà bon de vinser la guera lu sol, e che el ga de bisogno del aiuto dei altri soldadi. Anca noantri no saremo boni de guadagnar la guera contra Sàtana e quei che i ghe va drio se semo soli. Ghemo bisogno dei nostri fradei. Par quela che Geovà el ne ga dato una fameia tanto granda de fradei par giutarne. — 1 Pie. 2:17.

13. De acordo con Ebrei 10:24, 25, come le riunion le ne giuta?

¹³ Noantri ricevemo el aiuto dei nostri fradei quando ndemo ale riunion. (Ledi Ebrei 10:24, 25. *) Le riunion le ne dà coraio e forsa quando semo desanimadi. Par esémpio, i nostri fradei i ne incoraia par meso dei so comentari, dei discorsi e dele parte. Noantri anca restemo contenti de parlarse vanti e dopo dele riunion. (1 Tes. 5:14) Nele riunion, ghemo anca la alegria de giutarse un al altro. (Ati 20:35; Rom. 1:11, 12) E in queste riunion, imparemo a predicar e a insegnar meio. Par esémpio, imparemo a doperar ben le Prinsipai Publicassion e Vìdei par Insegnar. Par quela che l’è tanto importante pareciarse vanti, scoltar con atension le riunion e far quel che imparemo. Se femo queste robe, saremo boni soldadi de Cristo. — 2 Tim. 2:3.

14. Che nantro aiuto noantri ghemo?

¹⁴ Noantri ghemo anca el aiuto de milioni de àngeli poderosi. Proa imaginar quel che un àngelo el pol far. (Isa. 37:36) Adesso, imagina quel che un esèrsito de àngeli el pol far. Sicuro che una persona o un demònio no’l ga poder contra i àngeli. Fursi te ghè belche scoltà questo: ‘Tanti nemighi i pol vegner contra ti, ma se te sì dela banda de Geovà, sempre te ndarè vinser.’ (Giusi 6:16) Semo sicuri che questo l’è vera. Alora, quando te resti desanimà par causa de quel che un  parente o un colega el parla, ricòrdate che Geovà l’è dela to banda e el ndarà giutarte!

15. De acordo con Isaia 54:15, 17, parché che nissun sarà bon de fermar el pòpolo de Dio de predicar?

¹⁵ El mondo che l’è governà par Sàtana el ne òdia. Parché? Parché no femo parte dela polìtica, e gnanca dele guere. Noantri parlemo del nome de Dio, obedimo le so lege e predichemo che ghen sarà pace sol par meso del so Regno. Noantri anca parlemo che Sàtana l’è un busier e no’l vol che le persone le viva par sempre. (Gioani 8:44) Parlemo anca che suito el mondo de Sàtana el sarà destruto. Sàtana e quei che i ghe va drio i proa fermarne de predicar le bone notìssie. Ma, lori mai i sarà boni de far questo parché ghemo la protession de Geovà. — Ledi Isaia 54:15, * 17. *

16. Come che Geovà el ndarà salvar el so pòpolo nela granda tribolassion?

¹⁶ Cossa che suito ndarà suceder? Nela granda tribolassion, Geovà el ndarà salvarne de due maniere. Prima, quando lu el ndarà mandar i rè dela Tera destruser Babilònia, la Granda, che la ze tute le religion false. (Apo. 17:16-18; 18:2, 4) E seconda, quando lu el ndarà destruser el mondo de Sàtana nel Armagedon. — Apo. 7:9, 10; 16:14, 16.

17. Parché che ghemo de esser sempre amighi de Geovà?

¹⁷ Sàtana el fà robe brute contra noantri ancoi. Ma se seitemo a esser amighi de Geovà saremo lìberi de Sàtana parché el sarà destruto. (Rom. 16:20) Alora, ghemo de meter su tuta la armadura e mai cavarla via. Ghemo de far sempre quel che Geovà el dise, restar darente dei fradei e giutarghe. Cossita, podaremo esser sicuri che el nostro amoroso Pare Geovà el ndarà giutarne e el ndarà protegerne. — Isa. 41:10.