1. De acordo con Mateo 24:9, parché savemo che saremo odiadi?

GEOVÀ el ga fato noantri par amar e sentir el amor dei altri. L’è par quela che restemo disgustadi e con paura quando qualchedun el ne òdia. Par esémpio, la sorela Georgina, che la ze de star nela Europa, la ga dito: “Quando mi gavea 14 ani, me mama la me odiea parché mi servia a Geovà. Questo me fea sentir tanto mal e mi pensea che mi no era una bona persona.” * E el fradel Danylo el ga dito: “I soldadi i me ga dato bote e i me ga dito su parché mi son una Testimònia de Geovà. Mi me go sentio tanto mal e spaurà.” L’è sicuro che restemo disgustadi quando semo odiadi par i altri, ma noantri belche savéino che questo ndaria suceder, parché Gesù lo gavea dito. — Ledi Mateo 24:9. *

2-3. Parché che le persone del mondo le ga òdio par quei che i serve a Geovà?

² Le persone del mondo le ne òdia parché no femo quel che lore le fà. (Gioani 15:17-19) Noantri rispetemo i governi umani, ma no ghe adoremo. Alora, no adoremo la bandiera e gnanca cantemo la mùsica ofissial del paese. Invesse, noantri adoremo sol a Geovà e servimo sol al so governo, quel che Sàtana e quei che i ghe va drio i dise che no l’è el giusto de far. (Gén. 3:1-5, 15) Noantri predichemo che sol el Regno de Dio el pol risolver i problemi dei umani e che el va finir fora con tuti i nemighi de Geovà. (Dan. 2:44; Apo. 19:19-21) Sicuro che queste le ze bone notìssie par i boni, ma le ze brute par i rugni. — Sal. 37:10, 11.

³ Le persone del mondo anca le ga òdio par quei che i serve a Geovà parché lori i obedisse a lu. Noantri semo boni de veder  la difarensa intrà quei che i obedisse a Dio e quei che no i obedisse. Par esémpio, quei che i serve a Geovà no i fà le robe sporche e imorai de questo mondo. Par quela che tanti i ghe ride drio e i dise che lori i ze sbaliadi. (1 Pie. 4:3, 4) Le persone del mondo le pensa come le persone de Sodoma e Gomora e savemo che Dio el ga destruto quele due cità. — Giuda 7.

4. Che qualità le pol giutarne quando i altri i òdia a noantri?

⁴ Cossa che pol giutarne quando i altri i ne òdia e i ne dise su? Una forte fede in Geovà. La fede la ze come un scudo che ne dà protession contra tuto quel che Sàtana el fà contra noantri. (Efe. 6:16) Noantri ghemo bisogno dela fede, ma anca del amor. Parché? Parché se ghemo amor no restemo suito cativi, e cossita saremo boni de seitar servir a Geovà anca che i altri i ne disguste. (1 Cor. 13:4-7, 13) Adesso, ndaremo veder come che el amor par Geovà, par i nostri fradei e par i nostri nemighi el pol giutarne quando i altri i òdia a noantri.

5. Come el amor che Gesù el gavea par el so Pare lo ga giutà?

⁵ Poco vanti dei nemighi de Gesù coparlo, lu el ga dito ai so seghidori che lu el amea el so Pare, par quela che el ghe obedia. (Gioani 14:31) Gesù el amea tanto el so Pare e questo lo ga fato pi forte par infrontar le dificoltà. Se noantri amemo a Geovà saremo boni de far come Gesù.

6. De acordo con Romani 5:3-5, come che i servi de Dio i se sente quando i ze odiadi par le persone del mondo?

⁶ I servi de Geovà sempre i ze stati boni de infrontar perseghission par causa del so amor par Geovà. Par esémpio, quando la pi importante autorità dei giudei la ga dito che i apòstoli i gavea de fermarse de predicar, lori i ga obedio ‘a Dio vanti che ai òmini’. (Ati 5:29; 1 Gio. 5:3) Anca i servi de Geovà ancoi i infronta perseghission de governi rugni e che i ga tanto poder. Ma lori i ze boni de seitar a far quel che Geovà el ghe domanda parché i ga tanto amor par lu. Alora, anca se el mondo el ne òdia, no restemo desanimadi, ma doperemo questa oportunità par obedir a Geovà. — Ati 5:41; ledi Romani 5:3-5. *

7. Cossa che ghemo de far quando no ghe piase ala nostra fameia che servimo a Geovà?

⁷ Pol esser che no ghe piase ala nostra fameia che noantri servimo a Geovà. Par esémpio, lori i pol pensar che semo drio esser imbroiadi par i altri o che semo drio deventar mati. (Vedi anca Marco 3:21.) Fursi lori i reste tanto cativi con noantri. Ma ghemo de ricordarse che Gesù el gavea belche dito: “I nemighi del omo i sarà quei dela so pròpia fameia.” (Mat. 10:36) Mai ghemo de tratar le persone dela nostra fameia come nostri nemighi. Noantri amemo cada volta de pi a Geovà, alora ghemo de amar cada volta de pi le persone. (Mat. 22:37-39) Ma ghemo de ricordarse che no ndaremo desobedir ale lege e ai prinsipi de Geovà sol par contentar le persone.

8-9. Cossa che ga giutà Georgina?

⁸ Georgina, che ghemo parlà vanti, la ze stata bona de dàrghene fora cola oposission dela so mama. Ela la ga dito: “Mi e me mama ghemo scominsià a studiar la Bìblia cole Testimònie de Geovà. Ma sei mesi dopo, quando mi  volea ndar ale riunion, ela la ga scominsià a parlar mal dele Testimònie de Geovà. La me mama la parlea con persone che le ze state Testimònia de Geovà e che le contea busie sora lore. Ela anca la me disea su, me tirea i cavei e butea via le publicassion. Quando go fato 15 ani, me go batesà e la me mama la ga proà fermarme de servir a Geovà. Ela me ga metesto nte un posto che tende dei gióveni che i ga bisogno de aiuto. Par esémpio, gióveni che i dopera droghe, che i ciava i altri e i copa. Mi restea tanto disgustada parché spetea che la me mama la me tendesse e la me amesse.”

⁹ Come che la Georgina la ze stata bona de dàrghene fora con quela situassion? Ela pròpio la ga dito: “Nel giorno che la me mama la ga proà fermarme de imparar sora Geovà, mi gavea pena finio de leder tuta la Bìblia. Alora, mi era sicura che gavea catà la verità e me sentia darente de Geovà. Mi sempre preghea a lu e lu el me scoltea. E nela època che mi era de star in quel posto par i gióveni, ghen’era una sorela che sempre la me convidea par studiar la Bìblia con ela. Me ga giutà tanto restar insieme coi fradei e le sorele, parché lori i me fea sentir dela so fameia. Alora, go sentio che Geovà l’è tanto pi forte che le persone che le òdia a noantri.”

10. Geovà el ne assa sicuri de che?

¹⁰ El apòstolo Paolo el ga scrito che gnente el pol “spartirne del amor de Dio che l’è in Cristo Gesù, nostro Signor”. (Rom. 8:38, 39) Alora, anca se semo drio infrontar dificoltà, podemo esser sicuri che Geovà l’è dela nostra banda e el ne darà la forsa e el consolo che ghemo de bisogno. Come ghemo visto nel esémpio dela sorela Georgina, Geovà el ndarà anca doperar i nostri fradei par giutarne.

11. De acordo con Gioani 15:12, 13, cossa che podaria giutar i dissìpoli de Gesù? Daghe un esémpio.

¹¹ Nela note vanti de morir, Gesù el ga dito che i dissìpoli i gavea de amarse intrà de lori. (Ledi Gioani 15:12, 13. *) Gesù el savea che el amor el ndaria giutarli a restar unidi e infrontar el òdio dele persone del mondo. Varda el esémpio dela congregassion de Tessalònica. I fradei de quela congregassion i ze stati perseghidi, ma ancora cossita, i ze un esémpio de  lealtà e amor. (1 Tes. 1:3, 6, 7) Paolo el ga dito che i fradei de Tessalònica i gavaria de seitar a amarse “cada volta de pi”. (1 Tes. 4:9, 10) El amor el ndaria giutarli a ‘consolar quei che i ze desanimadi e dar apoio ai fiachi’. (1 Tes. 5:14) Questi fradei i ga fato quel che Paolo el gavea dito. Savemo de questo, parché nela so seconda carta, intorno de un ano dopo, Paolo el ga dito che el amor intrà de lori l’era ‘drio restar cada volta pi grando’. (2 Tes. 1:3-5) Alora, l’è stato el amor dei fradei de Tessalònica che li ga giutadi a infrontar le dificoltà e la perseghission.

12. Come che i fradei i ga mostrà che i amea un al altro nte un tempo de guera?

¹² Vedemo adesso quel che ga sucedesto con Danylo, che ghemo parlà vanti, e la so sposa. Lori i era de star nte una cità che ghen’era guera. Ma lu e la so dona i seitea a ndar ale riunion, a predicar dela meio maniera che i podea e anca a spartir el magnar coi altri fradei. Nte un giorno, i soldadi i ze rivadi darente de Danylo cole sciope. Danylo el ga dito: “Lori i volea che mi parlesse che mi no era pi Testimònia de Geovà. Ma quando mi go dito che no ndaria farlo, lori i me ga dato bote e i ga doperà una sciopa par far finta de coparme. I ga anca dito che i tornaria indrio par violentar la me dona. Dopo de questo, suito i fradei i ne ga metesti nte un tren par ndar a nantra cità. Mai vao desmentegarme de questi cari fradei! Quando semo rivadi in quel’altra cità, i fradei i ne ga dato de magnar e i ne ga giutà a catar un laoro e una casa. Dopo de un tempo, anca noantri ghemo podesto giutar quei altri fradei che i ghe tochea scampar via dele so cità par causa dela guera.” Quel che ga sucedesto con Danylo e la so sposa mostra che el amor el ne giuta a infrontar el òdio.

13. Come che el spìrito santo el ne giuta a infrontar el òdio dele persone?

¹³ Gesù el ga dito che i so seghidori i gavea de amar i so nemighi. (Mat. 5:44, 45) No l’è fàcile amar i nemighi, ma el spìrito santo de Dio el ne giuta a farlo. El spìrito santo el ne giutarà a gaver amor, passiensa, bontà, brandura e el autocontrolo. Queste qualità le ne giutarà a infrontar el òdio dele persone. (Gàl. 5:22, 23) Tanti che i odiea le Testimònie de Geovà i ga visto el so sposo, la so sposa, i fioi o i visin mostrar queste qualità e i ga cambià de idea. Arquanti i ze deventadi Testimònie de Geovà.  Alora, se te fà fadiga amar quei che i te òdia parché te servi a Geovà, domanda a Dio el spìrito santo par giutarte. (Luc. 11:13) E sìpia sicuro che quel che Dio el te domanda de far l’è sempre el meio. — Pro. 3:5-7.

14-15. Come che Romani 12:17-21 ga giutà Yasmeen a mostrar amor par el so sposo?

¹⁴ Vedemo el esémpio de Yasmeen, che la ze de star nel Oriente Mèdio. Al so sposo no ghe piasea che ela la fusse Testimònia de Geovà parché el catea che la era drio esser imbroiada. Par quela, el ga proà intrigarla de servir a Geovà. Lu el ghe ga dito su e el ga domandà a quei dela so fameia, a un lìder religioso e a un strion che i proesse dirghe che la disturbea la fameia cola so religion. Una volta, el sposo de Yasmeen l’è ndato al Salon del Regno in meso de una riunion par dirghe su ai fradei. Tante volte Yasmeen la piandea par causa de queste robe brute che el so sposo el ghe fea.

¹⁵ I fradei i ghe dea forsa e consolo a Yasmeen nele riunion. I ansiani i la ga incoraià a meter in pràtica el consìlio de Romani 12:17-21. * (Ledi.) Yasmeen la ga dito: “No l’è stato fàcile far questo, ma go domandà aiuto a Geovà e go fato el meio che mi podea par far quel che la Bìblia la dise. Alora, quando el me omo el sporchea la cosina aposta, mi netea. Quando el me disea su, mi rispondea de una maniera tranquila. Quando lu el restea malà, mi lo tendea.”

16-17. Cossa che te ghè imparà col esémpio de Yasmeen?

¹⁶ Yasmeen la ga bio tante benedission parché la ga mostrà amor al so sposo. Ela la ga dito: “Adesso el me sposo el se fida de pi in mi parché el sa che mi digo sempre la verità. Lu el me scolta con atension quando parlo sora la Bìblia e semo intesi de viver in pace. Adesso l’è lu che el me dise de ndar ale riunion e semo pi felici parché qua casa ghen’è pace. Mi go ancora la speransa che el me sposo el gàpia voia de imparar la verità e el sirva a Geovà insieme con mi.”

¹⁷ El esémpio de Yasmeen el mostra che el amor “el soporta tute le robe, el ga speransa in tute le robe e el persevera in tute le robe”.  (1 Cor. 13:4, 7) El òdio el pol farne gaver paura e restar disgustadi. Ma el amor l’è pi forte parché el pol fermar i nostri nemighi de odiarne. El amor anca el fà Geovà contento. Ma stesso che le persone le seite odiarne, podemo esser felici. Come?

18. Parché che podemo esser felici anca quando semo odiadi?

¹⁸ Gesù el ga dito: “Valtri saré felici sempre che i altri i ve odiar.” (Luc. 6:22) No ghemo scoliesto esser odiadi, gnanca no ne piase questo. Ma podemo restar contenti. Parché? Primo, parché quando seitemo fedeli, ghemo la aprovassion de Geovà. (1 Pie. 4:13, 14) Secondo, la nostra fede la passa par un teste e la resta pi forte. (1 Pie. 1:7) Terso, ghemo la speransa dela vita eterna. — Rom. 2:6, 7.

19. Parché che i apòstoli i ze restadi contenti anca dopo de ciapar bote?

¹⁹ Dopo dela ressuression de Gesù, le persone le ga dito par i apòstoli fermarse de predicar e le ghe ga dato bote. Ma i apòstoli i ze restadi contenti. Parché? Parché i ga bio la oportunità de sofrir par causa del nome de Gesù. (Ati 5:40-42) Questo el mostra che el amor che i apòstoli i gavea par Gesù l’era pi grando che la paura dei so nemighi. E questo amor li ga fato seitar a predicar le bone notìssie. E ancoi, tanti fradei i seita servir a Geovà ancora che i infronte dificoltà. Lori i ze sicuri che Geovà mai el ndarà desmentegarse del so laoro e del amor che i mostra par el so nome. — Ebr. 6:10.

20. Cossa che ndaremo veder nel pròssimo stùdio?

²⁰ Fin el fin de questo mondo, le persone le ndarà odiarne. (Gioani 15:19) Ma no ne ocore gaver paura. Ndaremo veder nel pròssimo stùdio che Geovà el farà forte e el darà protession a quei che i ze leai. (2 Tes. 3:3) Alora, seitemo amar a Geovà, ai fradei e anca ai nostri nemighi. Cossita, noantri seitaremo unidi, saremo amighi de Geovà, ghe daremo onor al so nome e ndaremo provar che el amor l’è pi forte che el òdio.