1. Che dificoltà i servi de Geovà fursi i infronte?

SITO drio infrontar una dificoltà? Pol esser che un fradel el te gàpia disgustà. (Tiago 3:2) O pol esser che qualchedun nel to laoro o nela scola el te ride drio parché te sì una Testimònia de Geovà. (1 Pie. 4:3, 4) O fursi quei dela to fameia i vol che te te fermi de predicar e de ndar ale riunion. (Mat. 10:35, 36) Pol esser che, par causa dele to dificoltà, te pensi che l’è meio fermarte de servir a Geovà. Ma te pol esser sicuro che Geovà el te darà la forsa e la sabedoria par infrontar tute le dificoltà.

2. De acordo con Romani 15:4, come che leder la Bìblia pol giutarne?

² Geovà el ga assà scrito nela so Parola come che i so servi i ze stati boni de infrontar le dificoltà. Parché che el ga fato questo? Par insegnarne. Par quela che Geovà el ga parlà al apòstolo Paolo de scriver Romani 15:4 * (Ledi.) Noantri semo consoladi e ghemo speransa quando ledemo la Parola de Dio. Ma no ghemo de sol leder la Bìblia, ghemo de doperarla par cambiar la nostra maniera de pensar e quel che noantri sentimo. Se noantri ghemo bisogno de aiuto par dàrghene fora con un problema, cossa che podemo far? Podemo (1) pregar, (2) imaginar, (3) pensar sora e (4) meter in pràtica. In questo stùdio, ndaremo imparar sora cada una de queste robe. * Ndaremo anca imparar col esémpio de Davi e del apòstolo Paolo.

3. (a) Cossa che noantri ghemo de far vanti de scominsiar a leder la Bìblia? (b) Parché che ghemo de far questo?

 ³ (1) Prega a Geovà. Vanti de scominsiar a leder la Bìblia, noantri ghemo de domandar el aiuto de Geovà par catar el prinsìpio che ghemo de bisogno. Par esémpio, fursi noantri ghemo bisogno de un consìlio dela Bìblia par infrontar una dificoltà. Alora, ghemo de pregar a Geovà par esser boni de catar el consìlio che el ndarà giutarne a saver cossa che ghemo de far. — Fil. 4:6, 7; Tiago 1:5.

4. Cossa che pol giutarne a imparar ancora de pi dela Bìblia?

⁴ (2) Proa imaginar. Geovà el ne ga fato cola capassità de imaginar le robe. Par imparar de pi quando studiemo la Bìblia, ghemo de proar imaginar quel che semo drio leder. Par esémpio, ghemo de proar meterse nel posto del servo de Dio che semo drio studiar, proar veder le robe che el ga visto e sentir quel che el ga sentio.

5. (a) Cossa che vol dir pensar sora quel che ledemo? (b) Come che podemo farlo?

⁵ (3) Pensa sora. Pensar sora quel che ledemo vol dir proar capir ben quel che studiemo e anca capir come meterlo in pràtica. Quando pensemo sora, l’è pi fàcile capir che tute le informassion le ze de acordo, e a imparar ancora de pi sora la Bìblia. Se ledemo la Bìblia sensa pensarghe sora, saria come gaver le robe par far un bel magnar, ma no doperarle. Alora, quando semo drio leder la Bìblia, podemo domandarse: ‘Cossa che questo servo de Dio el ga fato par dàrghene fora col so problema? Come che Geovà lo ga giutà? Come che questo che go imparà ndarà giutarme a perseverar?’

6. Parché che ghemo de meter in pràtica quel che imparemo?

⁶ (4) Mete in pràtica. Gesù el ga dito che, se qualchedun no’l mete in pràtica quel che el impara, l’è come un omo che fà su una casa sora dela areia. Parché? Quando vien una tempesta, la casa no la ze mia bona de restar firme. (Mat. 7:24-27) Alora, lu el ga laorà par gnente. Questo anca sucede con noantri se preghemo, imaginemo, pensemo sora, ma no metemo in pràtica quel che imparemo. Cossita, quando infrontemo problemi, perseghission o dificoltà, no gavaremo una forte fede. Ma, quando metemo in pràtica quel che studiemo, saremo boni de far bone scólie, gavaremo pace e la nostra fede la sarà pi forte. (Isa. 48:17, 18) Adesso, ndaremo imparar cossa che ga sucedesto col rè Davi e come meter in pràtica le quatro robe che ghemo imparà.

7. Che esémpio ndaremo studiar adesso?

⁷ Te ghè belche perso la confiansa nte un amigo o parente par causa de qualcossa che el ga fato? Se questo te ga belche sucedesto, ricòrdate de quel che el rè Davi el ga fato quando Absalon lo ga tradio e el ga proà esser rè nel so posto. — 2 Sam. 15:5-14, 31; 18:6-14.

8. Cossa che te pol far par gaver el aiuto de Geovà?

⁸ (1) Prega. Vanti de leder la stòria de Davi, parla a Geovà come te te senti par causa de quel che la persona la ga fato contra ti. (Sal. 6:6-9) Alora, domanda el aiuto de Geovà par catar prinsipi dela Bìblia che te giute a saver cossa far.

9. Cossa che ga sucedesto con Davi e Absalon?

⁹ (2) Imagina. Imagina cossa che ga sucedesto col rè Davi e come el se ga sentio. Prima, Absalon, fiol de Davi, el ga proà far el pòpolo piaserghe de pi a lu che a Davi. (2 Sam. 15:7) Dopo, Absalon el ga mandà persone a Israel par far el pòpolo acetarlo  come rè. Lu anca el ga fato Aitofel, el meio amigo de Davi e quel che lo giutea, restar dela so banda. Alora, Absalon el ga dito che lu l’era el novo rè e l’è ndato in serca de Davi par coparlo quando fursi Davi l’era tanto malà. (Sal. 41:1-9) Quando Davi el ga savesto de tuto questo, el ga scampà via de Gerusalen. Alora, el esèrsito de Absalon el ga infrontà el esèrsito del rè Davi e Absalon el ga perso la guera e l’è morto.

10. Cossa che Davi el podaria far?

¹⁰ Dopo, imagina cossa che Davi el ga sentio con tute le robe che le ghe ga sucedesto. Lu el amea Absalon e el se fidea in Aitofel. Ma queste persone lo ga tradio, lo ga disgustà tanto e le ga fin proà coparlo. Fursi, lu el podea pensar che tuti i so amighi i era dela banda de Absalon. Lu anca el podea proar scampar via, pensar sol in lu stesso o pensar che no’l saria pi bon de ndar avanti. Ma Davi no’l ga fato cossita. Invesse, lu l’è stato bon de dàrghene fora con quela situassion difìcile dela so vita. Come che lu l’è stato bon de far cossita?

11. Cossa che Davi el ga fato par dàrghene fora cola so dificoltà?

¹¹ (3) Pensa sora. Cossa che te pol imparar de quel che ga sucedesto con Davi? Proa risponder ala domanda: “Cossa che Davi el ga fato par dàrghene fora cola so dificoltà?” Lu el ga mostrà sabedoria. Come che savemo de questo? Lu no’l ga fato gnente sensa prima pensar, e gnanca l’è restà fermo sensa far gnente. Invesse, el ga pregà a Geovà e el ghe ga domandà aiuto. Lu anca el ga domandà aiuto dei so amighi e suito el ga metesto in pràtica quel che el gavea dessidio. Davi l’era tanto disgustà, ma no’l ga perso la confiansa nele persone e gnanca l’è restà inrabià. Lu el ga seità a fidarse in Geovà e nei so amighi.

12. Cossa che Geovà el ga fato par giutar a Davi?

¹² Come che Geovà el ga giutà a Davi? Se noantri studiemo la so stòria, vederemo che Geovà el ga dato la forsa che Davi el gavea de bisogno par ndar avanti. (Sal. 3:1-8, vedi anca la descrission del scomìnsio del verso.) Geovà el ga anca benedio quel che Davi el ga fato e el ga anca giutà i amighi leai de Davi quando lori i ga lotà par protegerlo.

13. De acordo con Mateo 18:15-17, se qualchedun el ne disgusta, cossa che podemo far?

¹³ (4) Mete in pràtica. Proa domandarte: ‘Come che posso imitar a Davi?’ Te ghè de suito far quel che pol par dàrghene fora cola to dificoltà. Arquante volte, te pol far quel che Gesù el ga dito in Mateo, capìtolo 18. In altre volte, te pol meter in pràtica el prinsìpio che ghen’è in questo consìlio. (Ledi Mateo 18:15-17. *) No stà far gnente sensa prima pensar e gnanca quando te sì disgustà. Ma, prega a Geovà e domàndaghe la sabedoria par dàrghene fora cola dificoltà e che el te giute a restar pi tranquilo. No stà pensar che no te pol pi fidarte nei to amighi. Pitosto, aceta el so aiuto. (Pro. 17:17) E el pi importante, mete in pràtica i consili che Geovà el te dà par meso dela Bìblia. — Pro. 3:5, 6.

14. Come che le parole in 2 Timòteo 1:12-16; 4:6-11, 17-22 le pol giutarte?

¹⁴ La to fameia no la ghe piase che te servi a Geovà? Sito de star nte un paese che no te  sì lìbero par adorar a Geovà? Se questo el sucede con ti, stùdia quel che l’è scrito in 2 Timòteo 1:12-16 e 4:6-11, 17-22. * Paolo el ga scrito queste parole quando l’era in preson e le te pol giutar tanto.

15. Cossa che te pol domandar a Geovà?

¹⁵ (1) Prega. Vanti de leder quel che ga sucedesto con Paolo, parla a Geovà dela dificoltà che te ghè e come che te te senti. Alora, te pol domandar a Geovà che el te mostre cossa che ga giutà a Paolo e cossa che pol giutarte.

16. Cossa che ga sucedesto col apòstolo Paolo?

¹⁶ (2) Imagina. Proa meterte nel posto de Paolo. Lu l’è incadenà nte una preson in Roma. No l’è la prima volta che lu l’è in preson, ma in questa volta, lu el ga capio che el saria morto. Arquanti dei so amighi i lo gavea abandonà e lu l’era pròpio straco. — 2 Tim. 1:15.

17. Cossa che Paolo el podaria far?

¹⁷ Paolo el podaria pensar che, se lu no’l gavesse fato tanto par Geovà, lu no’l saria in preson. Lu anca el podaria restar inrabià coi òmini dela Àsia che i lo gavea abandonà e el podaria anca no fidarse pi nei so amighi. Ma lu no’l ga fato questo. Pitosto, lu l’era sicuro che i so amighi e Geovà i seitaria a giutarlo. Parché?

18. Cossa Paolo el ga fato par infrontar tute le dificoltà?

¹⁸ (3) Pensa sora. Podemo risponder ala domanda: “Cossa che Paolo el ga fato par dàrghene fora cola so dificoltà?” Anca che i volesse coparlo, Paolo el ga seità a far la roba pi importante: darghe onor a Geovà. Lu anca el ga pensà come incoraiar ai altri, e el ga mostrà che el se fidea in Geovà parché el ga seità a pregar a lu. (2 Tim. 1:3) Paolo no’l ga seità pensar nei fradei che i lo gavea abandonà. Invesse, lu l’era grato par la maniera amorosa che i so amighi i lo ga giutà. E no’l se ga fermà de studiar la Parola de Dio. (2 Tim. 3:16, 17; 4:13) Lu l’era pròpio sicuro che Geovà e Gesù i lo amea, che no i lo gavea abandonà e che i ndaria benedirlo par tuto el so laoro.

19. Come che Geovà el ga giutà a Paolo?

¹⁹ Geovà el gavea dito a Paolo che el ndaria infrontar tante dificoltà parché el seghia a Cristo. (Ati 21:11-13) Ma come che Geovà lo ga giutà? Lu el ga rispondesto ale orassion de Paolo e el ghe ga dato forsa. (2 Tim. 4:17) Geovà lo ga assà sicuro che el ndaria benedirlo par tuto el so laoro. Geovà anca el ga doperà tanti amighi par giutarlo in tuto quel che ghe ocorea.

20. De acordo con Romani 8:38, 39, come che podemo gaver fede compagno a Paolo?

²⁰ (4) Mete in pràtica. Cossita come Paolo, savemo che ndaremo infrontar perseghission par causa dela nostra fede. (Mar. 10:29, 30) Come che podemo imitar el so esémpio? Ghemo de seitar a pregar a Geovà e a studiar la so Parola e ricordarse che la roba pi importante l’è darghe onor a Geovà. Podemo esser sicuri che Geovà mai el ne abandonarà e gnente de quel che le persone le fae el pol finir col amor de Geovà par noantri. — Ledi Romani 8:38, 39; * Ebr. 13:5, 6.

21. Cossa che ga giutà Aya e Hector a infrontar le so dificoltà?

²¹ I esempi dela Bìblia i ne giuta a infrontar i problemi che ghemo. Par esémpio, una pioniera del Giapon, che la ga nome Aya, la conta che el esémpio de Giona la giuta a no gaver paura de predicar in posti pùblichi. Hector l’è un fradel dela Indonèsia e i so genitori no i serve mia a Geovà. Lu el ga dito che el esémpio de Rute lo giuta tanto a voler imparar cada volta de pi sora Geovà e a servirlo.

22. Come che te pol doperar ben i vìdei e la sèrie “Imite a Sua Fé”?

²² Ndove che podemo catar i esempi bìblichi par far pi forte la nostra fede? Noantri ghemo i drami bìblichi, le leture dramatisade bìbliche, i vìdei e anca la sèrie “Imite a Sua Fé” che i ne giuta a imparar ancora de pi dei servi de Dio del passà. * Alora, vanti de far el to stùdio dela Bìblia, domanda el aiuto de Geovà par capir quel che te studi e saver come meter in pràtica. Proa meterte nel posto del servo de Dio che te sì drio studiar, pensa in quel che lu el ga fato e in come Geovà lo ga giutà a infrontar la so dificoltà. Dopo, mete in pràtica quel che te ghè imparà. Ringràssia a Geovà par el so aiuto e sfòrsate par doperar quel che te ghè imparà par incoraiar e giutar anca ai altri.

23. De acordo con Isaia 41:10, 13, cossa che Geovà el promete?

²³ No l’è mia fàcile viver in questo mondo che l’è governà par Sàtana. (2 Tim. 3:1) Ma no ghemo mia de restar spauradi, gnanca ansiosi. Geovà el sa quel che infrontemo e lu el promete giutarne cola so “man drita de giustìssia”. (Ledi Isaia 41:10, * 13. *) Col aiuto de Geovà e dela Bìblia, gavaremo la forsa che ghemo de bisogno par infrontar tute le dificoltà.