1. Che bela roba ga sucedesto coi israeliti?

 DOPO che i israeliti i ze restadi tanti ani in Babilònia, Geovà el ga fato che Siro, el rè dela Pèrsia, li liberasse. El rè el ga dito che lori i podaria tornar a Gerusalen e far su la casa de Geovà nantra volta. (Esdra 1:1, 3) I israeliti i ze restadi tanto contenti parché i podaria tornar a adorar a Geovà come vanti.

2. Cossa che i israeliti i ze stati boni de far poco tempo dopo che i ze rivadi in Gerusalen?

² Nel ano de 537 vanti de Cristo, arquanti giudei i ze rivadi a Gerusalen, che la era la cità pi importante del regno de Giudà. Poco tempo dopo, i ga scominsià a far su el témpio. E intorno del ano 536 vanti de Cristo, i gavea belche finio el fondamento del témpio!

3. Cossa i nemighi dei israeliti i ga fato?

³ Ma poco tempo dopo, arquante persone le ga scominsià a proar fermar i israeliti de far su el témpio. Esdra 4:4 dise: ‘Alora, le persone dele nassion le seitea a desanimar i israeliti e lore le proea fermarli de far la costrussion.’ Ma ga sucedesto una roba pedo ancora. Nel ano 522 vanti de Cristo, Artasserse el ga scominsià a governar la Pèrsia. * Alora i nemighi dei israeliti i ga scrito una carta al rè Artasserse e i ghe ga dito che i israeliti i volea vegner contra lu. (Sal. 94:20; Esdra 4:11-16) El rè el ga credesto in questa busia e el ga fato che israeliti i se fermesse de far su el témpio. (Esdra 4:17-23) Alora, tuti i israeliti i ze restadi desanimadi. — Esdra 4:24.

4. Cossa Geovà el ga fato par giutar i giudei a seitar a far su el témpio? (Isaia 55:11)

 ⁴ Quei che no i adorea a Geovà e arquante persone del governo dela Pèrsia i ga proà fermar i giudei de far su el témpio. Ma Geovà el volea che lori i seitesse a farlo, e lu sempre el fà quel che el vol. (Ledi Isaia 55:11. *) Alora Geovà el ga fato che el profeta Zacaria el gavesse oto vision. Zacaria el gavea de parlar ai giudei sora queste vision, parché le ndaria giutarli a no gaver paura dei so nemighi e a seitar a far el laoro. La vision de nùmero sinque la era sora un candelabro e due oliver.

5. Cossa ndaremo imparar in questo stùdio?

⁵ Dele volte, tuti noantri restemo desanimadi. Alora la vision de Zacaria sora el candelabro e i oliver la giuta anca a noantri. In questo stùdio, ndaremo imparar come la vision de Zacaria la pol giutarne quando i nemighi i ne vien contra, quando qualcossa nela nostra vita la càmbia o quando la organisassion de Geovà la ne dise de far una roba che no capimo tanto ben.

6. Come che la vision de Zacaria 4:1-3 ga giutà i giudei? (Vedi la ilustrassion dela prima pàgina.)

⁶ Ledi Zacaria 4:1-3. * In questa vision, ghen’era due oliver che trea do òio nela scudela. Alora, par meso de due cani, el òio el rivea ale sete làmpade del candelabro. Come el òio mai el se fermea de ndar ale làmpade, lore mai le se smorsea. Alora, Zacaria el ga domandà al àngelo che ghe ga dato la vision: “Cossa vol dir tute queste robe?”. Geovà el ga parlà par meso del àngelo: “Nò con forsa militar e gnanca con poder dei òmini, ma col me spìrito, el dise Geovà dei esèrsiti.” (Zac. 4:4, 6) Alora el òio dela vision el volea dir el spìrito santo de Geovà, che l’è una forsa che no la se finisse. El spìrito santo de Geovà l’era tanto pi poderoso che tuto el poder che el governo dela Pèrsia el gavea. Questa vision la mostrea che i giudei i saria boni de far su el témpio col aiuto del spìrito santo de Geovà. La vision la ga giutà i giudei a fidarse in Geovà e a seitar a far su el témpio, anca che i so nemighi i proesse intrigarli. E lori i ze stati boni de far su el témpio!

7. Cossa ga giutà i giudei a finir de far su el témpio?

⁷ Nantra roba ga giutà tanto i giudei a finir de far su el témpio. Cossa la ze stata? Dario I el ga scominsià a governar la Pèrsia nel ano 520 vanti de Cristo. Dopo de due ani, lu el ga capio che la lege che Artasserse el gavea fato la era sbaliada. Alora, el ga dito che i giudei i era lìberi par finir de far su el témpio. (Esdra 6:1-3) El rè el ga anca dito che i pòpoli intorno de Gerusalen no i podaria intrigar i giudei de far su el témpio e i gavaria de giutarli coi soldi e altre robe. (Esdra 6:7-12) Sicuro che i giudei i ze restadi tanto contenti. Alora, nel ano 515 vanti de Cristo, i giudei i ze stati boni de finir de far su el témpio. — Esdra 6:15.

8. Parché no ghemo de desister quando i nemighi i ne vien contra?

 ⁸ Anca le Testimònie de Geovà le ga tanti nemighi che ghe vien contra. Par esémpio, arquanti governi i dise che lore no le pol mia predicar e gnanca adorar a Geovà. In arquanti posti, nostri fradei i ga de ndar ai tribunai par difender la so libertà. (Mat. 10:17, 18) Ma, dele volte, càmbia el governo, e lu el assa i fradei pi lìberi par adorar a Geovà, o i giuisi i desside qualcossa che giuta i fradei. Altri fradei i ga libertà par adorar a Geovà nel so paese, ma la so fameia la proa intrigarli. (Mat. 10:32-36) Dele volte, quando la fameia la vede che i seitarà a adorar a Geovà, la se ferma. O pol esser che le persone dela fameia che ghe vien contra, le devente Testimònia de Geovà. Alora, se te sì drio infrontar robe cossita, no stà mia desister! Sìpia coraioso e ricòrdate sempre che Geovà el ndarà giutarte par meso del so spìrito santo!

9. Parché che tanti giudei i ga piandesto quando i ga finio el fondamento del témpio?

⁹ Arquanti giudei che i era pi veci i ga piandesto quando el fondamento del témpio l’è stà finio. (Esdra 3:12) Parché? Parché lori i gavea visto el témpio de Salomon, e i ga pensà che el témpio che i era drio far su l’era poco e gnente. (Ageo 2:2, 3) Ma la vision de Zacaria la ghe ga giutà a restar contenti nantra volta. Come cossita?

10. Come che le parole del àngelo ga giutà i giudei a restar contenti nantra volta? (Zacaria 4:8-10)

¹⁰ Ledi Zacaria 4:8-10. * Nela vision, el àngelo el ga dito a Zacaria che i giudei i vederia el piombo nela man de Zorobabel, che l’era el governador dei giudei. El piombo l’è una feramenta doperada par veder se una roba la ze pròpio drita. Con quele parole, el àngelo el volea dir che questo témpio no l’era compagno a quel de Salomon, ma el saria finio nela ora giusta e el saria fato dela maniera che Geovà el volea. Alora, se Geovà l’era contento con quel témpio, anca lori i gavaria  de restar contenti. Quel che l’era pi importante par Geovà l’era che lori i lo adoresse dela maniera che el volea. Alora se lori i se sforsesse de far quel che l’è giusto, i restaria contenti nantra volta.

11. Che dificoltà arquanti servi de Geovà i infronta?

¹¹ Tanti de noantri i sofre quando càmbia qualcossa nela vita. Par esémpio, arquanti i ga fato un laoro nela organisassion par tanti ani, ma de colpo, ghe ga tocà scominsiar a far nantro. Altri i ga bio de fermarse de far el laoro che i fea e che ghe piasea tanto parché i ze vegnesti pi veci. Se una roba cossita la sucede con noantri, sicuro che restemo desanimadi. Fursi no ne piase o no capimo parché che questo ga sucedesto. Pol esser che seitemo a pensar che prima l’era pi bel e che restemo desanimadi parché ne par che femo poco par Geovà adesso. (Pro. 24:10) Se questo l’è drio suceder con ti, come la vision de Zacaria la pol giutarte?

12. Come la vision de Zacaria la pol giutarne quando qualcossa la càmbia nela nostra vita?

¹² Cossa che pol giutarne quando qualcossa nela nostra vita la càmbia? Ghemo de proar veder le robe come Geovà el vede. Ghemo de ricordarse che Geovà l’è drio far robe tanto bele e che noantri ancora semo drio giutarlo. (1 Cor. 3:9) Ghemo anca de ricordarse che Geovà el va ancora amarne. Alora se el laoro che feino nela organisassion de Geovà el ga cambià, no ghemo de seitar a pensar parché che questo ga sucedesto. Invesse de seitar vardar indrio, ghemo de pregar a Geovà e domandar che el ne giute a far el meio che podemo adesso. (Ecl. 7:10) L’è pròpio questo che imparemo dela vision che Zacaria el ga bio. Ghemo de seitar a vardar quel che semo boni de far. Cossita, anca che le robe le càmbie nela nostra vita, saremo boni de seitar a esser contenti e fedeli a Geovà.

13. Parché che arquanti giudei i ga pensà che no la saria la meio roba tornar a far su el témpio?

¹³ Quando i giudei ancora no i era lìberi par far su el témpio, el somo sasserdote, Giosuè, e el governador Zorobabel i ga dito che i tornasse a far su el témpio. (Esdra 5:1, 2) Fursi arquanti giudei i ga  pensà che no la saria la meio roba de far. Lori i gavea paura che i nemighi i vedesse che i era drio tornar a far su el témpio e i proesse intrigarli. Cossa che ga giutà Zorobabel e Giosuè a esser sicuri che Geovà l’era drio giutarli?

14. De acordo con Zacaria 4:12, 14, cossa che Geovà el ga dito sora Giosuè e Zorobabel?

¹⁴ Ledi Zacaria 4:12, * 14. * Nela vision, el àngelo el ga dito a Zacaria che i due oliver i era i due untadi de Geovà, o sia, Giosuè e Zorobabel. El àngelo el ga anca dito che questi due òmini i era come che in pié dela banda del Signor, o sia, de Geovà. Questo vol dir che Geovà el se fidea tanto in questi òmini e l’era drio doperarli par tender del pòpolo. Par quela che el pòpolo el podea fidarse in quel che lori i ghe disea.

15. Come podemo dar valor a quel che Geovà el ne dise par meso dela Bìblia?

¹⁵ Geovà ancora l’è drio tender del so pòpolo. Una dele maniere che l’è drio farlo l’è par meso dela Bìblia. Lu el dopera la so Parola par dirne quel che ghemo de far par assarlo contento. Par quela, volemo dar tanto valor a quel che la Bìblia la dise. Come che podemo farlo? Ghemo de tor del nostro tempo par leder e pensar in quel che ledemo. Alora proa domandarte: ‘Quando mi ledo la Bìblia o nantra publicassion, mi penso sora quel che mi go ledesto? Quando son drio leder la Bìblia e no capisso qualcossa, vao in serca par saver de pi? (2 Pie. 3:16) O penso in altre robe intanto che son drio leder la Bìblia?’ Sol saremo boni de obedir a Geovà e farghe un bel laoro se tolemo del nostro tempo par pensar sora quel che lu el ne insegna. — 1 Tim. 4:15, 16.

16. Cossa pol giutarne a obedir al schiavo fedele e prudente anca quando no capimo ben quel che i ne domanda de far?

¹⁶ Geovà anca el dopera el schiavo fedele e prudente par tender del so pòpolo. (Mat. 24:45) Pol esser che el schiavo el ne domanda de far una roba che no capimo tanto ben. Par esémpio, pol esser che el ga dito che ghemo de pareciarse par una desgràssia che pensemo che mai la podaria suceder nel posto che semo de star. O pol  esser che el schiavo el ne ga domandà de tenderse tanto nela pandemia, ma pensemo che no ne tocaria tenderse tanto cossita. Alora, cossa pol giutarne? Ricordarse de come l’è stà bon par i israeliti far quel che Zorobabel e Giosuè ghe gavea dito. Podemo anca ricordarse de tanti altri esempi dela Bìblia che i ga sempre obedio a Geovà. Arquante volte, el pòpolo de Geovà no’l ga capio parché che lu l’era drio domandarghe de far qualcossa. Ma anca cossita, lori i ga obedio, e questo ga salvà la so vita. — Giuisi 7:7; 8:10.

17. Come che la vision de Zacaria la ga giutà i giudei?

¹⁷ La vision de nùmero sinque che Zacaria el ga bio la ze stata pìcola, ma la ga dato tanta forsa ai israeliti. La vision la ghe ga giutà a pensar dela medèsima maniera de Geovà sora el laoro e a adorarlo dela maniera giusta. Quando lori i ga fato quel che i ga imparà dela vision de Zacaria, i ga visto come Geovà l’era drio insegnarghe e protegerli. Alora, Geovà el ga doperà el so spìrito santo par giutar el pòpolo a seitar a far el so laoro e a restar contenti nantra volta. — Esdra 6:16.

18. Come che la vision de Zacaria la pol giutarte?

¹⁸ La vision che Zacaria el ga bio la pol giutarte tanto. Par esémpio, la pol darte forsa quando i nemighi i te vien contra, a seitar contento quando càmbia qualcossa nela to vita e a fidarte in quel che Geovà el dise. Cossa te ghè de far se te sì drio infrontar qualcossa cossita? Come Zacaria, varda le prove che Dio el tende del so pòpolo. Dopo, fìdate in Geovà e seita a adorarlo con tuto el cuor. (Mat. 22:37) Se te fè queste robe, Geovà el ndarà giutarte a servirlo par sempre. — Col. 1:10, 11.