Quando semo drio leder questi versìcoli, fursi pensemo che ghen’è qualcossa de sbalià. Ma questi versìcoli i ze drio parlar de due òmini de nome Mefibosete. E podemo imparar una roba tanto importante quando studiemo quel che ga sucedesto con lori.

El rè Saul el gavea sete fioi e due fiole. El primo fiol l’era Gionatan e el secondo, Mefibosete. Mefibosete l’era fiol de Rispa, che la era una dele done de Saul. Ma Gionatan anca el ga bio un fiol de nome Mefibosete. Alora, el rè Saul el gavea un fiol de nome Mefibosete e Gionatan el gavea un fiol col medèsimo nome.

Quando Saul l’era rè, el ga proà copar tuti i gibeoniti che i era de star insieme col pòpolo de Israel. E lu l’è stà bon de copar arquanti de lori. Ma coparli l’è stà tanto sbalià. Parché? Parché nel tempo de Giosuè, quei che i tendea del pòpolo de Israel i gavea fato un acordo de pace coi gibeoniti. — Giosuè 9:3-27.

Quel acordo el gavea ancora valor nei giorni de Saul. Anca cossita, Saul no’l ga mia dato valor al acordo, e el ga proà finir fora coi gibeoniti. Par quela, Saul e la so fameia i gavea colpa de sangue. (2 Sam. 21:1) Dopo che Davi l’è deventà rè, i gibeoniti i ze ndati parlar con lu sora quel che gavea sucedesto. Davi el savea che Geovà sol el ndaria benedir la tera de Israel se lori i paghesse quel che Saul el gavea fato. Alora, i ga domandà ai gibeoniti cossa che lori i volea. Invesse de domandarghe soldi, i gibeoniti i ga domandà che Davi el ghe desse sete fioi de Saul par esser copadi. (Nùm. 35:30, 31) Davi el ga fato pròpio quel che i ghe gavea domandà. — 2 Sam. 21:2-6.

In quela època, Saul e Gionatan i era belche morti, ma el fiol de Gionatan, Mefibosete nò. Quando Mefibosete l’era toseto, l’è cascà in tera e l’è restà desgrassià. Alora, no l’è mia ndato insieme a Saul par copar i gibeoniti. Ghemo anca de ricordarse che Davi l’era amigo de Gionatan e el gavea fato un acordo con lu e la so fameia. (1 Sam. 18:1; 20:42) La Bìblia la dise: ‘El rè Davi el ga bio compassion de Mefibosete, fiol de Gionatan, fiol de Saul, par causa del acordo che el gavea fato con Gionatan, fiol de Saul, davanti a Geovà.’ — 2 Sam. 21:7.

Anca cossita, Davi el ga fato quel che i gibeoniti i ghe ga domandà. Lu el ghe ga dato i due fioi e i sinque neti de Saul . E, intrà de lori l’era Mefibosete, fiol de Saul. (2 Sam. 21:8, 9) Quel che Davi el ga fato ga finio cola colpa de sangue.

Questa stòria la ga una lession tanto importante. La lege de Dio la disea: ‘I fioi no i ga mia de morir par quel che el so pare el ga fato.’ (Deu. 24:16) Alora, se quei dela fameia de Saul no i gavesse colpa, Geovà no’l gavaria aprovà che i fusse morti. La lege anca la disea: “La persona la ga de esser copada sol par el so pròpio pecato.” Alora, capimo che i due fioi e i sinque neti de Saul i ga giutà de qualche maniera a proar finir fora coi gibeoniti. Par quela, lori i ze stati morti par via dei so propi pecati.

Con questa stòria, imparemo che nissuni pol far una roba sbaliada e dir che l’era sol drio far quel che i altri i ghe gavea domandà. Cada un de noantri el ga de renderghe conto de quel che fà. La Bìblia la dise che ghemo de star atenti par far tuto polito e star distante de quel che l’è sbalià. Cossita, tuto quel che femo ndarà ben. — Pro. 4:24-27; Efe. 5:15.