1. Cossa che fursi se domandemo?

 L’È TANTO bel saver che Geovà el dà valor ai so servi qua nela Tera. La Bìblia la dise: “Geovà el resta contento col so pòpolo.” (Sal. 149:4) Ma pol esser che fursi se domandemo: ‘Sarà che Geovà el dà valor anca a mi?’ Tanti servi de Geovà del passà i fea fadiga creder che Geovà el ghe dea valor. — 1 Sam. 1:6-10; Giò 29:2, 4; Sal. 51:11.

2. Chi che ga valor par Geovà?

² La Bìblia la mostra che anca umani imperfeti i ga valor par Geovà. Chi? Quei che i ga fede in Gesù e i se batesa. (Gio. 3:16) Quando femo queste robe, mostremo che se ghemo ciamà grami dei nostri pecati e che ghemo fato la promessa de viver par far la volontà de Geovà. (Ati 2:38; 3:19) Geovà el resta tanto contento quando femo queste robe e mostremo che volemo esser so amighi. Se femo el nostro meio par far quel che ghemo prometesto a Geovà, lu el ne dà valor e el ne vede pròpio come so amighi. — Sal. 25:14.

3. Che domande ndaremo risponder in questo stùdio?

³ Parché che arquanti i pensa che Geovà no ghe dà mia valor? Come che Geovà el mostra che el dà valor a tuti i so servi? Come che podemo esser ancora pi sicuri che Geovà l’è contento con noantri?

PARCHÉ CHE ARQUANTI I PENSA CHE GEOVÀ NO GHE DÀ MIA VALOR?

4-5. Anca se sentimo che ghemo poco valor, de cossa che ghemo de ricordarse?

⁴ Pol esser che ancora de picinini ghemo scominsià a sentirse sensa valor. (Sal. 88:15) Un fradel de nome Adrián el ga dito: “Mi me go sempre sentio sensa valor. Me ricordo che  quando ero pìcolo, mi preghea che la me fameia la ndesse in Paradiso. Ma ero sicuro che mi mai saria bon de ndar.” Tony, che l’è un fradel che l’è stà slevà par una fameia che no la serve a Geovà, el ga dito: “Me pare e me mare no i me ga mai dito che i me volea ben e che i era contenti con mi. Par quela, pensea che no ero mai bon che basta.”

⁵ Cossa che podemo far se scominsiemo a pensar che no ghemo mia valor par Geovà? Ghemo de ricordarse che l’è stà lu che el ga volesto esser nostro amigo. (Gio. 6:44) Lu el cognosse quel che ghemo rento el cuor e el vede quel che ghemo de bon, anca se noantri no semo mia boni de veder. (1 Sam. 16:7; 2 Cró. 6:30) Alora, podemo fidarse in Geovà quando el dise che semo pressiosi par lu. — 1 Gio. 3:19, 20.

6. Come che el apòstolo Paolo el se sentia quando el pensea sora i pecati che el gavea fato?

⁶ Pol esser che se sentimo ancora in colpa par causa dele robe sbaliade che ghemo fato prima de imparar la verità. (1 Pie. 4:3) Anca servi fedeli de Geovà i ga de sforsarse par no ndarghe drio la voia de far qualcossa de sbalià. E ti? Dele volte, pénsito che Geovà no’l te ga mia perdonà? Alora, ricòrdate che anca servi fedeli del passà i se ga sentio cossita. Par esémpio, el apòstolo Paolo el se sentia un poro gramo quando el pensea sora i sbali che el gavea fato. (Rom. 7:24) Paolo el se gavea ciamà gramo dei so pecati e el se gavea batesà. Ancora cossita, lu el disea che l’era el ‘manco importante dei apòstoli’ e el ‘pedo pecador’. — 1 Cor. 15:9; 1 Tim. 1:15.

7. De cossa che podemo esser sicuri?

⁷ Se noantri se ghemo ciamà grami dei nostri pecati, Geovà el promete perdonarne. (Sal. 86:5) Alora, se te te ghè pròpio ciamà gramo, fìdate in quel che Geovà el te dise. Sìpia sicuro che lu el ndarà perdonarte. — Col. 2:13.

8-9. Come che podemo dàrghene fora col sentimento che no femo mai che basta par Geovà?

⁸ Noantri volemo far tuto quel che podemo nel servìssio a Geovà. Ma fursi pensemo che no femo mai che basta par contentarlo. Una sorela de nome Amanda la ga dito: “Mi sempre penso che par dar el me meio a Geovà me toca seitar a far cada volta de pi. Alora quando proo far de pi de quel che son bona e dopo no ghe rivo, mi resto disgustada e penso che anca Geovà l’è disgustà con mi.”

⁹ Cossa pol giutarne a dàrghene fora col sentimento che no femo mai che basta par Geovà? Ghemo de ricordarse che lu no’l ne domanda de far de pi de quel che semo boni. Se semo drio far el nostro meio par lu, lu el resta contento. Ghemo anca de pensarghe sora servi fedeli del passà che i ga fato el so meio par lu. Pensa sora el esémpio del apòstolo Paolo. Par tanti ani lu el ga viaià par predicar e el ga scominsià tante congregassion. Ma quando ga cambià la so vita, lu no l’è stà pi bon de far quel che el fea prima. Alora, sarà che Geovà el se ga fermà de darghe valor? Nò. Geovà el ga seità benedirlo parché Paolo el fea sempre el so meio. (Ati 28:30, 31) La medèsima roba la sucede anca con noantri ancoi. Quel che femo par Geovà nela nostra vita pol cambiar. Ma quel che l’è pi importante par lu l’è quel che ghemo rento el nostro cuor. Ndemo veder adesso come Geovà el ne mostra che el ne dà valor.

COME CHE GEOVÀ EL MOSTRA CHE EL NE DÀ VALOR?

10. Come che podemo “scoltar” Geovà dirne che ghemo valor par lu? (Gioani 16:27)

¹⁰ Lu el ne ga dato la Bìblia. Geovà el ga caro de mostar ai so servi che lu li ama e che el ghe  vol ben. La Bìblia la parla de due volte che el ghe ga dito a Gesù che lo amea e che el ghe dea valor. (Mat. 3:17; 17:5) Vuto che Geovà el diga anca a ti queste robe? Ricòrdate che lu no’l ndarà dìrtele del cielo. Invesse lu el dise che te ghè tanto valor par lu par meso dela Bìblia. Par esémpio, noantri podemo “scoltar” Geovà parlar quando ledemo le parole de Gesù nei Vangeli. (Ledi Gioani 16:27. a) Gesù el ga fato pròpio tuto compagno a so Pare. Alora, quando ledemo quel che Gesù el ga parlà ai so dissìpoli, podemo imaginar che Geovà el diria queste parole a noantri. — Gio. 15:9, 15.

11. Parché che infrontar dificoltà no vol mia dir che Geovà el se ga fermà de darne valor? (Tiago 1:12)

¹¹ Geovà el ne dà quel che ghemo de bisogno. Geovà l’è premoso de giutarne in tuto quel che ne ocore nela vita. Ma dele volte, lu el assa che infrontemo dele dificoltà, compagno ga sucedesto con Giò. (Giò 1:8-11) Ma no vol mia dir che Geovà el se ga fermà de darne valor. Quando semo drio infrontar problemi, semo boni de veder quanto Geovà el ne ama e che el ne giuta a dàrghene fora con tute le dificoltà. Podemo doperar queste situassion par mostrar che amemo tanto a Geovà e che se fidemo del tuto in lu. — Ledi Tiago 1:12. b

12. Cossa che podemo imparar de quel che ga sucedesto con Dimitri?

¹² Varda quel che ga sucedesto con un fradel dela Àsia de nome Dimitri. Lu el ga perso el so laoro e no l’è stà bon de catarghene nantro par tanti mesi. Alora, el ga dessidio fidarse in Geovà e doperar de pi del so tempo par predicar. Dopo tanti mesi, lu no’l gavea gnancora catà un laoro e el se ga malà che no l’era gnanca pi bon de ndar fora del leto. Par quela, lu el ga scominsià a pensar che no’l gavea pi valor come sposo, pare e servo de Geovà. Alora, nte una matina, la so fiola la ga stampà un papel ndove l’era scrito quel che dise in Isaia 30:15: “Valtri gavaré forsa se resté tranquili e se valtri ve fidé in mi.” Alora, ela lo ga portà a so pare in leto e la ghe ga dito: “Pupà, quando te te senti desanimà, ricòrdate de questo testo.” Dimitri el se ga nicorto che Geovà l’era  drio dar ala so fameia robe de magnar, de meter su e un posto de star. Lu el ga dito: “Mi gavea sol de star calmo e fidarme in Dio.” Se anca ti te sì drio infrontar robe cossita, sìpia sicuro che Geovà el ndarà tender de ti e el ndarà giutarte a dàrghene fora.

13. Chi che Geovà el dopera par mostrar che ghemo valor par lu, e come?

¹³ Geovà el ne dà i nostri fradei e sorele. Lu el dopera i nostri fradei e sorele par mostrar che ghemo valor par lu. Par esémpio, Geovà li dopera par parlarne quel che ghemo de bisogno nel tempo giusto. Varda quel che ga sucedesto con una sorela dela Àsia quando la era drio infrontar tanti problemi. Ela la gavea perso el so laoro e ghe ze vegnesta una bruta malatia. Dopo, el so omo el ga fato un bruto pecato e no’l ga pi podesto esser un ansiano. La sorela la ga dito: “Mi no ero mia bona capir parché l’era drio suceder tute queste robe. Mi pensea che fursi gavea fato qualcossa de sbalià, o che Geovà no’l me dea pi valor.” Alora, ela la ga domandà che Geovà la giutesse a veder che l’era ancora contento con ela. E come che Geovà la ga giutada? Ela la ga dito: “I ansiani dela congregassion i ga parlà con mi e i me ga assà sicura che Geovà ancora el me amea.” Ma dopo un tempo, ela la ga domandà che Geovà ghe mostresse nantra volta che el ghe volea ben. Ela la ga dito: “Nel medèsimo giorno, mi go ricevesto una carta dei fradei e dele sorele dela congregassion. Intanto che ero drio leder quela carta, go visto che Geovà el me gavea scoltà.” Alora, podemo esser sicuri che Geovà el mostra che ghemo valor par lu par meso de quel che i nostri fradei e sorele i ne dise. — Sal. 10:17.

14. Come che Geovà el mostra che el ne dà valor?

¹⁴ Geovà anca el mostra che ghemo valor par lu quando el dopera fradei par darne  consili. Par esémpio, Geovà el ga doperà el apòstolo Paolo par scriver 14 carte par darghe consili firmi e con amor ai fradei de quel tempo. Parché che Geovà el ga fato che le parole de Paolo le fusse nela Bìblia? Par ricordarne che lu el ne ama tanto e che ‘el dissiplina quei che lu el ama’. (Pro. 3:11, 12) Alora, quando qualchedun el vien darte un consìlio dela Bìblia, no vol mia dir che Geovà l’è disgustà con ti. Pitosto, lu l’è drio mostrar che el te ama. (Ebr. 12:6) Vedemo adesso altre robe che mostra che Geovà el ne dà valor.

ALTRE ROBE CHE MOSTRA CHE GEOVÀ EL NE DÀ VALOR

15. A chi che Geovà el dà so spìrito santo, e parché che questo ne assa sicuri che Dio el ne dà valor?

¹⁵ Geovà el dà spìrito santo a quei che el ghe vol ben. (Mat. 12:18) Par giutarte a capir se te ghè valor par Geovà, domàndate: ‘Son bon de mostrar le qualità del fruto del spìrito santo de Dio nela me vita? Son bon de mostrar de pi passiensa adesso de quando go cognossesto la verità?’ Se te sì bon de mostrar cada volta de pi le qualità del spìrito santo, te pol esser sicuro che Geovà el te dà valor. — Varda el quadro  “El fruto del spìrito l’è . . . ”

16. (a) A chi che Geovà el dopera par predicar le bone notìssie? (1 Tessalonissensi 2:4) (b) Come che te te senti de saver questo?

¹⁶ Geovà el ga dato el laoro de predicar le bone notìssie a quei che lu el ghe dà valor. (Ledi 1 Tessalonissensi 2:4. c) Varda come che una sorela de nome Jocelyn la ze restada sicura de questo. Un giorno ela la se ga levà su de matina tanto desanimada. Ela la ga dito: “Mi no gavea mia forsa e me parea che no gavea pi valor. Ma mi ero pioniera e l’era el me giorno de ndar predicar. Alora, mi go pregà a Geovà e son ndata.” Quela matina, Jocelyn la ga parlà con Mary, che la era una dona tanto cara che la ga acetà studiar la Bìblia. Un per de mesi dopo, Mary la ga dito che la era drio pregar a Dio quando Jocelyn la gavea batesto nela so porta. Jocelyn la ga dito: “Mi go sentio come se Geovà el me disesse: ‘Mi te dao tanto valor’.” L’è vera che no tuti i volerà scoltarne nela predicassion, ma podemo esser sicuri che Geovà el resta contento quando se sforsemo de dar el nostro meio nela predicassion.

17. Cossa che te pol imparar con quel che Vicky la ga capio? (Salmo 5:12)

 ¹⁷ Geovà el ga dato el sacrifìssio del so Fiol par salvar a quei che lu el ghe dà valor. (1 Tim. 2:5, 6) Ma pol esser che anca se ghemo fede nel sacrifìssio de Gesù e semo batesadi, no semo boni creder che Geovà el ne dà valor. Alora, cossa che pol giutarne? Ghemo de ricordarse che no podemo mia fidarse nei nostri sentimenti. Invesse, ghemo de fidarse in Geovà. Lu el dise che quei che i ga fede nel sacrifìssio de Gesù i ze giusti par lu e Geovà el promete benedirli. (Ledi Salmo 5:12; d Rom. 3:26) Una sorela de nome Vicky la ga pensà sora el sacrifìssio de Gesù e la ga dito: “Geovà l’è drio mostrar passiensa con mi fà tanto tempo. Ma l’è come se mi fusse drio dir: ‘El to amor no l’è grando che basta. El sacrifìssio del to Fiol no basta mia par perdonar i me pecati.’” Dopo che Vicky la ga pensà sora el sacrifìssio de Gesù, ela la ga capio che Geovà el ghe dea valor. Se anca noantri pensemo sora el sacrifìssio che Gesù el ga fato, saremo sicuri che Geovà el ne ama e che el ne dà valor.

18. De cossa che podemo esser sicuri se seitemo a amar el nostro Pare Geovà?

¹⁸ Anca se se sforsemo de meter in pràtica quel che ghemo imparà in questo stùdio, pol esser che dele volte restemo desanimadi e se domandemo se Geovà el ne dà pròpio valor. Se se sentimo cossita ghemo de ricordarse che lu el dà valor a quei che i seita amarlo. (Tia. 1:12) Alora, seita sforsarte par esser cada volta pi amigo de Geovà e stà atento ale maniere che mostra che te ghè valor par lu. Sìpia sempre sicuro che Geovà no l’è distante de cada un de noantri. — Ati 17:27.