1-2. Parché che la to vita la deventa meio dopo del batésimo?

 UNA PERSONA la resta tanto contenta de batesarse e deventar parte dela fameia de Geovà. Cossita, ela la scomìnsia a gaver una amicìssia tanto pi forte con lu. Sicuro che ela la se sente compagno al rè Davi, che el ga dito: “Felice l’è quel che ti te scòli e che te porti darente de ti, par esser de star nei to cortivi.” — Sal. 65:4.

² Geovà el scòlie tanto ben quei che i ndarà far parte dela so fameia. Come ghemo visto nel stùdio prima, lu sol el scòlie persone che le volarà gaver una forte amicìssia con lu. (Tia. 4:8) Alora, quando te fè la to dedicassion a Geovà e te te batesi, te scominsi a gaver una amicìssia tanto bela con lu. E te pol esser sicuro che te ‘riceverè benedission fin che no te gàpia pi bisogno de gnente’. — Mal. 3:10; Ger. 17:7, 8.

3. Cossa che te ghè de far dopo che te te batesi? (Eclesiasti 5:4, 5)

³ Dopo del batésimo, te scominsi a doperar la to vita par servir a Geovà. Alora, te gavarè de sforsarte par seitar fedele, anca quando te vien voia de far qualcossa de sbalià o quando te infronti dificoltà. (Ledi Eclesiasti 5:4, 5. a) Come te deventi un dissìpolo de Gesù, te gavarè anca de sforsarte par far compagno a lu. (Mat. 28:19, 20; 1 Pie. 2:21) Questo stùdio el ndarà giutarte a ndarghe drio al so esémpio e a far quel che lu el ne ga domandà.

 SEITA A NDAR DRIO A GESÙ, ANCA COLE DIFICOLTÀ E COLA VOIA DE FAR ROBE SBALIADE

4. Cossa che Gesù el volea dir quando el ga dito che gavarìssino de ‘ciapar un pal de tortura’? (Luca 9:23)

⁴ Gesù el ga dito che i so dissìpoli i gavaria de ‘ciapar un pal de tortura tuti i giorni’. (Ledi Luca 9:23. b) Cossita capimo che dopo del batésimo, la nostra vita no la sarà mia fàcile. Ma sarà che Gesù el ga dito che sarìssino sempre drio tribolar? Nò! Invesse, lu el ga mostrà che gavarìssino benedission e anca dele dificoltà. E pol esser che arquante de queste dificoltà le ndaria farne sofrir tanto. — 2 Tim. 3:12.

5. Che promessa Gesù el ga fato ai so dissìpoli?

⁵ Pol esser che te ghè belche tribolà parché la to fameia la volea che te te fermessi de servir a Geovà. O fursi te ghè assà de guadagnar tanti soldi e tante robe par esser bon de meter el Regno in primo posto nela to vita. (Mat. 6:33) Se te ga sucedesto robe cossita, sìpia sicuro che Geovà el ga visto tute le bele robe che te ghè fato par lu. (Ebr. 6:10) Fursi te ghè visto nela to vita quel che Gesù el ga dito: “Nissun ga assà casa, fradei, sorele, mare, pare, fioi, o campi, par causa de mi e par causa dele bone notìssie, che no’l riceva sento volte de pi adesso, in questo tempo, case, fradei, sorele, mare, fioi, e campi, con perseghission, e nel mondo che el ga de vegner la vita eterna.” (Mar. 10:29, 30) Le benedission che te ghè ricevesto le ze tanto pi grande che quel che te ghè assà indrio, mia vera? — Sal. 37:4.

6. Parché che te toca seitar a sforsarte par dàrghene fora cole voie sbaliade anca dopo el batésimo?

⁶ Anca dopo el batésimo, te gavarè de sforsarte par dàrghene fora cola voia de far quel che l’è sbalià. (1 Gio. 2:16) Ricòrdate che, anca se te sì stà batesà, no te sì deventà perfeto. Alora, pol esser che dele volte, te ndarè sentirte compagno al apòstolo Paolo, che el ga dito: “Me piase tanto la lege de Dio, de acordo col omo che mi son par rento. Ma vedo nel me corpo nantra lege che la barufa contra la lege dela me mente, e la me mena prisionero dela lege del pecato che l’è nel me corpo.” (Rom. 7:22, 23) Pol esser che te resti desanimà se te vien voia de far robe sbaliade. Alora, pensa sora la promessa che te ghè fato a Geovà quando te te ghè dedicà a lu. Cossita, te gavarè forsa par seitar a far quel che ghe piase a lu. Pensar sora la to promessa a Geovà ndarà giutarte a gaver la forsa par dàrghene fora cola voia de far robe sbaliade. Come cossita?

7. Come che la nostra dedicassion a Geovà ndarà giutarne a seitar fedeli?

⁷ Dopo che te te batesi, te dessidi viver nò par far quel che te vol ti. Questo vol dir no ndar drio la voia de far robe sbaliade gnanca far qualcossa che disgusta a Geovà. (Mat. 16:24) Alora, quando te vien voia de far qualcossa de sbalià, no te ocore star lì pensar cossa che te ndarè far, parché belche te sè che te toca seitar leal a Geovà. Te ndarè far la medèsima dessision che Giò el ga fato. Anca quando lu l’era drio infrontar una bruta dificoltà, lu el ga dito: “Mi mai ndarò renunsiar ala me integrità!” — Giò 27:5.

8. Come che pensarghe sora la to dedicassion a Geovà ndarà giutarte a tirarte indrio de far robe sbaliade?

⁸ Se te pensi sora la promessa che te ghè fato a Geovà, te gavarè forsa par dàrghene fora cola voia de far una roba che la ze sbaliada. Par esémpio, mai te ndarissi darghe de capir a una persona maridada che te ghè sentimenti par ela o che te ghè voia de smorosarla.  Pensar sora la promessa che te ghè fato a Geovà te giutarà a mai far una roba cossita. Alora, se te assi vegner fora sentimenti sbaliadi, sarà pi fadiga far quel che l’è giusto. Par quela, proa cavar via suito quei sentimenti. Cossita te sarè bon de tirarte indrio de far robe sbaliade. — Pro. 4:14, 15.

9. Come che pensarghe sora la to dedicassion pol giutarte a seitar meter Geovà in primo posto nela vita?

⁹ Cossa che te ndarissi far se te podessi gaver un laoro tanto bon, ma che el te intriga de ndar ale riunion? Sicuro che te saverissi suito cossa far. Parché? Parché te ghè fato la to dedicassion prima de questo laoro, e te ghè prometesto a Geovà che gnente, gnanca un laoro, ndaria intrigarte de ndar ale riunion. Par quela, no te vè gnanca gaver voia de acetar el laoro e dopo veder come seitar a meter Geovà in primo posto nela to vita. Proa pensar sora el esémpio de Gesù. Lu l’era dessidio che el ndaria far tuto quel che ghe piasea a Geovà. Compagno a lu, anca noantri ghemo de esser dessididi de no far gnente che disguste a Geovà. — Mat. 4:10; Gio. 8:29.

10. Come che Geovà el ndarà giutarte a seitar a ndar drio a Gesù dopo del batésimo?

¹⁰ Quel che te fè quando vien fora una dificoltà o la voia de far qualcossa de sbalià mostra se te vol pròpio ndar drio a Gesù. Te pol esser sicuro che Geovà el ndarà giutarte a dàrghene fora cole dificoltà. La Bìblia la dise: “Dio l’è fedele e no’l assarà che valtri sìpie provadi de pi de quel che podé soportar. Ma quando vegnarà la tentassion, lu anca el ve giutarà a darghene fora, e cossita valtri saré boni soportarla.” — 1 Cor. 10:13.

COSSA CHE TE GHÈ DE FAR PAR SEITAR NDAR DRIO A GESÙ?

11. Cossa che ndarà giutarte a seitar a ndar drio a Gesù? (Varda anca la ilustrassion.)

¹¹ Gesù el servia a Geovà de tuto el cuor, e sempre el preghea a lu. (Luc. 6:12) Cossita, lu  el ga seità a far pi forte la amicìssia intrà de lori. Se te vol seitar a ndar drio a Gesù, fà robe che le te giutarà a esser pi amigo de Geovà. La Bìblia la dise: “No importa la nostra situassion, ghemo belche fato meio de vanti, sia poco o tanto. Ancora cossita, seitemo ndar avanti dela medèsima maniera.” (Fil. 3:16) Te pol far compagno a tanti servi de Geovà ancoi che i se sforsa de far de pi par lu. Varda un per de robe che lori i ze drio far e che anca ti te podarissi pensar de far par Geovà. Noantri sempre scoltemo speriense de fradei che i ga fato la Scola de Vangelisadori o i ze ndati predicar ndove ghen’è de pi bisogno. Alora, proa pensar se anca ti te podarissi far robe cossita. (Ati 16:9) Ma, se no te pol mia far robe cossita adesso, no stà pensar che te ghè manco valor dei altri. Pitosto, ricòrdate che la roba pi importante la ze seitar a perseverar. (Mat. 10:22) Ricòrdate sempre che Geovà el vede la to situassion e el resta contento con quel che ti te pol far. Se te fè cossita, te sarè bon de seitar a ndar drio a Gesù dopo del batésimo. — Sal. 26:1.

12-13. Cossa che te ghè de far se no te ghè pi tanta voia come nel scomìnsio? (1 Corinti 9:16, 17) (Varda anca el quadro “ Sfòrsate par seitar nela carera”.)

¹² Pol esser che te te sì nicorto che no te sì mia drio pregar de cuor a Geovà o che no te ghè pi tanta voia de ndar predicar. Fursi te ghè anca visto che no te sì pi premoso de studiar la Bìblia come prima. Se te sucede questo dopo del batésimo, no stà pensar che no te ghè pi el spìrito santo de Geovà. Ricòrdate che noantri semo umani pecadori e quel che sentimo pol cambiar. Alora, cossa pol giutarte? Pensa nel esémpio del apòstolo Paolo. Ancora che el se sforsesse de far compagno a Gesù, dele volte, lu no’l gavea voia de far le robe che ghe tochea. (Ledi 1 Corinti 9:16, 17. c) Lu el ga dito: “Anca se lo fao sensa  voia, l’è una responsabilità che go ricevesto.” Cossita capimo che Paolo l’era dessidio de far la so adorassion a Geovà anca quando lu no’l gavea tanta voia.

¹³ Alora, se te sì drio sentirte cossita, no stà ndarghe drio ai to sentimenti quando te vè far dessision. Invesse, fà quel che l’è giusto anca quando no te ghè mia tanta voia. Te vederè che se te seiti a far quel che l’è giusto, te scominsiarè a gaver voia. Nantra roba che pol giutarte a ndarghe drio a Gesù dopo del batésimo la ze studiar sempre la Bìblia, pregar, ndar ale riunion e ala predicassion. Quando i fradei e le sorele i vede che te sì drio sforsarte par servir a Geovà, lori i sarà tanto incoraiadi. — 1 Tes. 5:11.

STÀ ATENTO A COME CHE TE SÌ DRIO ADORAR A GEOVÀ

14. De acordo con 2 Corinti 13:5, cossa che te ghè de far, e parché?

¹⁴ Nantra roba che te ghè de far la ze veder come che te sì drio adorar a Geovà. (Ledi 2 Corinti 13:5. d) Par esémpio, proa veder se te sì drio pregar a Geovà tuti i giorni, se te sì drio leder e studiar la Bìblia, ndar ale riunion e ala predicassion. Dopo, proa pensar come che te podarissi far queste robe ancora meio. Domàndate: ‘Sonti bon de spiegar le robe pi importante che la Bìblia la insegna? Sarà che posso far qualcossa par gaver de pi voia de ndar predicar? Sonti drio dirghe tuto nele me orassion a Geovà, e sarà che le mostra che me fido pròpio in lu? Mi sempre vao ale riunion? Come che posso far comentari ancora meio e star ancora pi atento ale parte?’

15-16. Cossa gheto imparà col esémpio de Robert?

¹⁵ Te ghè anca de ndar in serca de saver le robe sbaliade che fursi te vien voia de far. Varda cossa che ga sucedesto con un fradel de nome Robert. Lu el ga dito: “Quando mi gavea 20 ani, una dona del me laoro la me ga dito de ndar ala so casa dopo che ndeino via. Ela la ga dito che restarìssino noantri soli e che saria tanto bel. De scomìnsio, mi go catà fora scuse par no ndar. Ma dopo son stà bon de dirghe de nò e ghe go anca spiegà parché che no ndaria mia.” Robert l’è stà bravo de no far gnente de sbalià. Ma quando el ga pensà sora quel che gavea sucedesto, lu el se ga nicorto  che el podaria gaver fato difarente. Lu el ga dito: “Mi me tocaria gaver dito suito de nò, cossita come Giusepe el ga dito ala dona de Potifar. (Gén. 39:7-9) Mi son restà spaurà parché l’è stà tanto fadiga dir nò. Questo me ga giutà a veder che me tochea far pi forte la me amicìssia con Geovà.”

¹⁶ Te pol far compagno a Robert e proar vardar pròpio quel che te sì drio sentir. Anca se te sì bon de dàrghene fora con una voia sbaliada, domàndate: ‘Sarà che ghe ga volesto massa tempo par dir nò?’ Se te vedi che te toca cambiar qualcossa, no stà sentirte in colpa. Invesse, resta contento parché te ghè visto quel che te toca cambiar. Alora, prega a Geovà e domàndaghe che el te dae forsa e voia de far quel che l’è giusto. — Sal. 139:23, 24.

17. Come che Robert el ga dato onor al nome de Geovà?

¹⁷ Noantri podemo imparar anca nantra roba de quel che ga sucedesto con Robert. Lu el ga dito: “Dopo che go dito nò a quela dona, ela la me ga dito: ‘Te sì stà bravo!’ Alora, mi ghe go domandà cossa che la volea dir. Ela la me ga spiegà che un amigo suo che l’era Testimònia de Geovà el ghe ga dito che tuti noantri adoremo a Geovà ma anca femo tante robe sbaliade sconte. Par quela, ela la ghe ga dito che la ndaria proar veder cossa che mi faria. Alora, son restà tanto contento de esser stà bon de darghe onor al nome de Geovà.”

18. Cossa che te vol sforsarte de far dopo del batésimo? (Varda anca el quadro “ Te piaserà tanto leder questo artìcolo”.)

¹⁸ Quando te ghè fato la to dedicassion a Geovà e te te ghè batesà, te ghè mostrà che te vol santificar el so nome, anca quando no l’è mia fàcile. Ricòrdate che Geovà el sa dele dificoltà che te infronti e dele voie sbaliade che te toca dàrghene fora. Alora, sìpia sicuro che lu el ndarà benedirte e darte so spìrito santo par giutarte a seitar a far quel che l’è giusto. (Luc. 11:11-13) Sicuro che col aiuto de Geovà te sarè bon de seitar a ndar drio a Gesù dopo del batésimo.