1-2. Cossa che una persona la ga de far vanti de batesarse?

 NEI ÙLTIMI sinque ani, de pi de un milion de persone le ze state batesade come Testimònie de Geovà. Arquanti i ga imparà la verità de quando i era toseti, compagno a Timòteo. (2 Tim. 3:14, 15) Invesse, altri i ga imparà sora Geovà dopo grandi o fin quando i era belche veci. Par esémpio, una dona belche vècia la ga studià la Bìblia e la ze stata batesada con 97 ani!

² Alora, se te sì drio studiar la Bìblia o se to pare e to mare i ze belche Testimònie de Geovà, pénsito de batesarte? Pensar cossita l’è tanto bel. In questo stùdio, ndaremo imparar cossa vol dir dedicar la vita a Geovà. Anca ndaremo veder parché che no te ocore gaver paura de dedicarte e batesarte se te senti che te sì belche pronto.

COSSA ZE LA DEDICASSION?

3. Parla de esempi dela Bìblia de persone che le era dedicade a Geovà.

³ Nela Bìblia, dedicassion vol dir esser scoliesto par Geovà par far un laoro santo. Tuti in Israel i era belche dedicadi a Geovà. Ancora cossita, arquanti israeliti i podea dedicarse a Geovà de una maniera ancora pi spessial. Par esémpio, Aron l’era stà scoliesto par Geovà par el importante laoro de esser el sasserdote prinsipal de Israel. Alora, lu el gavea una placheta de oro nel so turbante, che la era un “segnal sacro dela  so dedicassion”. (Lev. 8:9) Anca i nasirei i era dedicadi a Geovà de una maniera spessial. La parola “nasireo” in ebraico la vol dir “dedicà” o “scoliesto”. Alora, i nasirei i gavea de obedir a ancora altre orientassion che ghen’era nela Lege de Moisè. — Nùm. 6:2-8.

4. (a) Cossa che vol dir far la volontà de Geovà? (b) Cossa che vol dir una persona no contentar a ela stessa? (Varda anca la ilustrassion.)

⁴ Quando una persona la se dedica a Geovà, ela la desside ndar drio al esémpio de Gesù. Cossita, far la volontà de Geovà la deventa la roba pi importante dela so vita. E cossa vol dir far la volontà de Geovà? Gesù el ga dito: “Se qualchedun el vol esser me dissìpolo, lu no’l ga de contentar a lu stesso.” (Mat. 16:24) In greco, le parole “lu no’l ga de contentar a lu stesso” le pol esser traduside come “dir nò a lu stesso”. Alora, quando una persona la ze dedicada a Geovà, ela sempre la ga de dir nò a tuto quel che assa Dio disgustà, come par esémpio, la “imoralità sessual”. (Gàl. 5:19-21; 1 Cor. 6:18; 2 Cor. 5:14, 15) Ma sarà che questo vol dir che la so vita no la ze mia bona? Nò, parché quei che i ama a Geovà i sa che le so lege le ne protege. (Sal. 119:97; Isa. 48:17, 18) Varda quel che un fradel de nome Nicolas el ga dito: “Ghen’è de quei che i vede le lege de Geovà come una gàbia che semo rento e che no la ne assa far gnente. Invesse, podemo veder queste lege come una gàbia che ne protege dei perìcoli intorno.”

5. (a) Cossa che te ghè de far par dedicar la to vita a Geovà? (b) Quala che la ze la difarensa intrà la dedicassion e el batésimo? (Varda anca la ilustrassion.)

⁵ Cossa che te ghè de far par dedicar la to vita a Geovà? Te ghè de pregar a Geovà, dirghe che far la so volontà sarà la roba pi importante dela to vita e farghe la promessa de adorar sol a lu. In questa promessa, te disi che te ndarè amar a Geovà “con tuto el to  cuor, con tuta la to ànima, con tuta la to mente e con tuta la to forsa”. (Mar. 12:30) La to dedicassion la ze una promessa tanto importante, e Geovà el speta che te sìpia bon de far tuto quel che te ghè prometesto. (Ecl. 5:4, 5) Ma ghen’è una difarensa intrà la dedicassion e el batésimo. La dedicassion la ze fata sol intrà ti e Geovà. Invesse, el batésimo mostra ai altri che te sì belche stà dedicà a Geovà.

PARCHÉ DEDICAR LA TO VITA A GEOVÀ?

6. Parché che ghemo de dedicar la nostra vita a Geovà?

⁶ Ghemo de dedicarse a Geovà parché lo amemo. Questo amor l’è un sentimento tanto grando che vien de cognosser e capir quala che la ze la volontà de Dio. (Col. 1:9) Dopo che te ghè studià la Bìblia, te sì stà bon de capir (1) che ghen’è pròpio Dio, (2) che la Bìblia la ze la so Parola, e (3) che lu el dopera la so organisassion par far la so volontà.

7. Cossa che ghemo de far vanti de dedicar la nostra vita a Geovà?

⁷ Vanti de dedicarse a Geovà, una persona la ga de capir quel che la Bìblia la dise e meter in pràtica quel che la ga imparà. Anca la ga de sforsarse par parlar ai altri sora la so fede. (Mat. 28:19, 20) Cossita, el so amor par Geovà el restarà cada volta pi grando e la volarà adorar sol a lu. Anca ti te te senti cossita? Alora, se te ami tanto a Geovà, te volarè dedicarte e batesarte. E no te farè questa dessision sol par contentar el to pare, la to mare o la persona che la te insegna la Bìblia. Gnanca te volarè batesarte sol par far compagno ai to amighi.

8. Cossa che pol giutarne a voler dedicar la nostra vita a Geovà? (Salmo 116:12-14)

 ⁸ Se te pensi in tuto quel che Geovà el ga fato par ti, te volarè dedicar la to vita a lu. (Ledi Salmo 116:12-14. a) La Bìblia la dise che Geovà el ne dà “tuti i presenti boni e perfeti”. (Tia. 1:17) E la vita de Gesù l’è stà el presente pi grando che lu el ne ga dato. Parché? Parché l’è stà par causa de questo sacrifìssio che podemo esser amighi de Geovà e gaver la speransa de viver par sempre. (1 Gio. 4:9, 10, 19) Alora, se ghe demo valor a tuto quel che Geovà el ga belche fato e el ndarà far par noantri, sicuro che volaremo dedicar la nostra vita a lu e mostrar che lo amemo. (Deu. 16:17; 2 Cor. 5:15) E l’è questo che imparemo nel punto 4 dela lession 46, del libro Te pol viver felice par sempre!, ndove ghen’è el vìdeo de tre minuti col tìtolo Che presenti te pol dar a Dio?.

SITO PRONTO PAR DEDICARTE E BATESARTE?

9. Parché che no ghemo mia de far comparassion coi altri par dessider dedicarse a Geovà?

⁹ Pol esser che te pensi che no te sì gnancora pronto par dedicarte e batesarte. Fursi, ancora te ghè de cambiar un per de robe nela to vita o pol esser che la to fede la ga de esser ancora pi forte. (Col. 2:6, 7) Pol esser che te sì drio studiar la Bìblia fà poco tempo o fursi to pare e to mare i te ga insegnà sora Geovà ancora de picinin. Ma ricòrdate che cada persona la ze difarente una del’altra e la ndarà far questa dessision nela ora giusta. Alora, Invesse de far comparassion coi altri, proa star atento a quel che ti te ghè de cambiar e sfòrsate de far questi cambiamenti. — Gàl. 6:4, 5.

10. Cossa che te pol far se te pensi che no te sì gnancora pronto par dedicarte e batesarte? (Varda anca el quadro “ Cossa che te pol far se te sì stà slevà par pare e mare che i serve a Geovà?”.)

¹⁰ Ma se te nicordi che no te sì gnancora pronto par dedicar la to vita a Geovà, no stà desister de questa dessision. Alora, te pol pregar che Geovà el te giute a far i cambiamenti che te ocore. (Fil. 2:13; 3:16) E te pol esser sicuro che lu el ndarà scoltarte e giutarte. — 1 Gio. 5:14.

PARCHÉ CHE ARQUANTI I SE TIRA INDRIO?

11. De cossa che te pol esser sicuro?

¹¹ Arquanti i ze belche pronti par dedicarse e batesarse. Ancora cossita, i ga paura de farlo. Fursi lori i pensa: ‘E se dopo el batésimo mi fao un bruto pecato e son desassossià?’ Se te ghè questa paura, te pol esser sicuro che Geovà el ndarà dar tuto quel che te ocore par far quel che ghe piase. (Col. 1:10) Geovà anca el ndarà darte forsa par far quel che l’è giusto. Lu el ga belche giutà tante persone a esser fedele. (1 Cor. 10:13) Par quela che ghen’è poche persone che le ze desassossiade. Geovà sempre el ne dà quel che ne ocore par esser fedeli a lu.

12. Cossa che pol giutarte a no far quel che l’è sbalià?

¹² Tuti noantri dele volte ghemo voia de far robe sbaliade. (Tia. 1:14) Ma te sì ti che te dessidi quel che te ndarè far. Te sì ti che dessidi cossa far dela to vita. Ancora che arquante persone le dise che no podemo mia controlar quel che pensemo e quel che femo, te pol controlar la to voia de far robe sbaliade. Alora, sempre che te ghè una tentassion, te pol dessider far quel che l’è giusto. Cossa che pol giutarte? Prega a Geovà tuti i giorni,  ledi e stùdia sempre la Bìblia, va ale riunion e proa predicar ai altri sempre che te pol. Se te fè cossita, te gavarè la forsa che te ocore par seitar fedele a Geovà. E no stà mai desmentegarte che Geovà sempre el ndarà giutarte. — Gàl. 5:16.

13. Cossa che imparemo del esémpio de Giusepe?

¹³ L’è bon che te dessidi vanti quel che te farè se vien fora la voia de far robe sbaliade. Cossita, sarà pi fàcile seitar fedele a Geovà. La Bìblia la parla de tante persone che le era imperfete che le ze state bone de seitar leai. Vedemo el esémpio de Giusepe. La so dona de Potifar la ga proà butarse do con Giusepe arquante volte. Ma lu no’l ga mia volesto parché l’era sicuro de quel che el gavaria de far. Lu el ga dito: “Come che mi podaria far una bruta roba cossita e far un pecato contra Dio?” (Gén. 39:8-10) Sicuro che Giusepe el savea quel che el ndaria far vanti che la dona de Potifar la volesse butarse do con lu. Par quela che Giusepe l’è stà bon de seitar a far quel che l’è giusto.

14. Cossa ghemo de far par esser boni de dàrghene fora cola voia de far robe sbaliade?

¹⁴ Come che te pol far compagno a Giusepe? Te ghè de dessider adesso cossa te farè se vien fora la voia de far robe sbaliade. Impara a dir nò suito ale robe che Geovà no ghe piase. Cossita, quando vien fora la voia de far robe sbaliade, no te ndarè gnanca star lì pensar cossa far. (Sal. 97:10; 119:165) Cossita, te savarè cossa far e te sarè bon de seitar leal.

15. Come che te mostri che te sì drio far sforso par ‘ndar in serca de Geovà’? (Ebrei 11:6)

¹⁵ Pol esser che te sìpia sicuro che te ghè catà la verità e che te vol servir a Geovà. Ma no te te ghè gnancora dedicà e batesà. Alora, proa far compagno a Davi, che el ga suplicà a Geovà: “Ò Dio, varda con atension rento de mi e cognossi el me cuor. Vedi come che son e cognossi le me ansietà. Varda se rento de mi ghen’è robe che me mena a far el mal. E giutame ndar nela strada dela eternità.” (Sal. 139:23, 24) El to sforso de esser pronto par dedicarte e batesarte mostra che te sì drio ‘ndar in serca de Geovà’, e lu ndarà ricompensarte. — Ledi Ebrei 11:6. b

 DEVENTA CADA VOLTA PI AMIGO DE GEOVÀ

16-17. Come che quei che i ze stati slevadi nte una fameia de Testimònie de Geovà i pol rivarse darente a Dio? (Gioani 6:44)

¹⁶ Gesù el ga dito che l’è Geovà che fà che i so dissìpoli i vegna a lu. (Ledi Gioani 6:44. c) Pensa come l’è bel saver che Geovà el fà le persone vegner a lu, e che el ga fato cossita anca con ti. Lu el vede le bone robe in cada un dei so servi. La Bìblia la dise che lu el vede a cada un de lori come una “propietà spessial”, o sia, una persona tanto importante. (Deu. 7:6) Lu el pensa questo anca de ti!

¹⁷ Ma pol esser che te sìpia stà slevà nte una fameia che belche la servia a Geovà. Alora, fursi te pensi che te servi a Geovà sol par causa de to pare e to mare, e no parché Geovà el te ga fato vegner darente a lu. Ma ricòrdate che la Bìblia la dise: “Rivé darente de Dio e lu el rivarà darente de valtri.” (Tia. 4:8; 1 Cró. 28:9) Quando ti te rivi darente a Geovà, lu el riva darente a ti. Geovà no’l te vede sol come una persona che fà parte de un grupo. Invesse, lu l’è rivà darente de ti, anca se te sì stà slevà nte una fameia che belche lo servia. Quando te proi rivarte darente a Geovà, lu el fà quel che ledemo in Tiago 4:8. — Varda anca 2 Tessalonissensi 2:13.

18. Cossa che ndaremo veder nel pròssimo stùdio? (Salmo 40:8)

¹⁸ Quando te fè la to dedicassion a Geovà e te te batesi, te fè compagno a Gesù. Lu el fea de volentiera tuto quel che so Pare ghe domandea de far. (Ledi Salmo 40:8; d Ebr. 10:7) Nel pròssimo stùdio, ndaremo veder cossa che pol giutarte a seitar fedele a Geovà dopo del to batésimo.