STÙDIO 12
CÀNTICO 82 ‘Assemo la luce slusar’
Stà distante dela scuridon e seita nela luce
‘Vanti, valtri eri scuridon, ma adesso valtri sì luce.’ — EFE. 5:8.
COSSA CHE NDAREMO IMPARAR?
In questo stùdio, ndaremo imparar sora la comparassion che Paolo el ga fato intrà la scuridon e la luce in Efesi 5.
1-2. (a) Ndove che Paolo l’era quando el ga scrito la carta ai efesi? (b) Che domande che ndaremo risponder in questo stùdio?
EL APÒSTOLO Paolo l’è stà prisionero nte una casa in Roma par un tempo. Ancora che lu no’l podesse ndar visitar i so fradei, lu el ghe ga mandà tante carte. Intrà i ani 60 o 61 dopo de Cristo, Paolo el ga scrito la carta ai efesi. — Efe. 1:1; 4:1.
2 Intorno de diese ani vanti, Paolo el gavea predicà e insegnà le bone notìssie in Èfeso. (Ati 19:1, 8-10; 20:20, 21) Par quela, lu el amea tanto i so cari fradei efesi e el volea giutarli a seitar fedeli a Geovà. Ma parché che Paolo el ga parlà ai fradei untadi sora la scuridon e la luce? Cossa che tuti noantri podemo imparar de questo consìlio? In questo stùdio ndaremo capir le risposte a queste domande.
DELA SCURIDON PAR LA LUCE
3. Che comparassion Paolo el ga fato nela so carta ai efesi?
3 Paolo el ga dito ai fradei de Èfeso: ‘Vanti, valtri eri scuridon, ma adesso valtri sì luce.’ (Efe. 5:8) Paolo el ga fato questa comparassion intrà la scuridon e la luce par parlar del grando cambiamento che i so fradei i gavea fato dopo de imparar la verità. Adesso, ndemo veder parché che lu el ga dito: “Vanti, valtri eri scuridon.”
4. Parché che i efesi i era in scuridon par causa dela religion falsa?
4 Scuridon par causa dela religion falsa. Dopo che i efesi i ga imparà la verità, lori i ze stati lìberi de creder nele busie dele religion false e nela magia. Nela cità de Èfeso, ghen’era el témpio dela dea Àrtemis. Questo témpio l’era pròpio grando e bel, e tante persone le disea che l’era una dele costrussion pi bele del mondo. In quel témpio, le persone le adorea ìdoli. Alora, ghen’era tanti che i fea e vendea imàgine dela dea Àrtemis. (Ati 19:23-27) E tante persone de quela cità le fea magia. — Ati 19:19.
5. Parché che i efesi i era in scuridon par causa dela imoralità?
5 Scuridon par causa dela imoralità. Le persone in Èfeso le pratichea tanta imoralità e no le sentia mia vergogna par quel che le fea. Nele festività religiose e nei teatri se parlea tanto sora imoralità sessual. (Efe. 5:3) Par quela, tanti efesi ‘no i savea pi quel che l’era sbalià’. (Efe. 4:17-19) Alora, i fradei efesi no i se nicordea dei so sbali e no i ghe badea mia quel che Geovà el sentia parché no i savea quel che lu el pensa che l’è giusto e sbalià. Par quela, Paolo el ga dito che ‘la mente de lori la era scura e lontan dela vita che Dio el dà’.
6. Parché che Paolo el ga dito ai efesi: “Adesso valtri sì luce”?
6 Ma arquante persone in Èfeso no le ga seità nela scuridon. Par quela, Paolo el ga dito: “Adesso che sì insieme al Signor, valtri sì luce.” (Efe. 5:8) Questi fradei i gavea acetà viver de acordo cola verità dela Bìblia. (Sal. 119:105) Lori i gavea assà la religion falsa e la imoralità. Cossita, i fea el so meio par adorar e contentar a Geovà e ‘far compagno a lu’. — Efe. 5:1.
7. De che maniera semo compagni ai fradei de Èfeso?
7 La medèsima roba la ga sucedesto con noantri vanti de imparar la verità. Èrino in scuridon par causa dela religion falsa e dele robe sbaliade che feino. Pol esser che arquanti i fea feste dela religion falsa e altri fursi i gavea una vita imoral. Ma dopo che ghemo imparà quel che Geovà el dise che l’è giusto e sbalià, ghemo cambià la nostra vita. Ghemo scominsià a viver de una maniera che ghe piase a Geovà e adesso ghemo tante benedission. (Isa. 48:17) Ma anca se no l’è mia fàcile seitar a far quel che l’è giusto, ghemo de seitar distante dela scuridon e “far le robe come fioi dela luce”. Come che podemo farlo?
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
El consìlio amoroso de Paolo ai efesi pol giutarne tanto (Varda el paràgrafo 7.) i
STÀ LONTAN DELA SCURIDON
8. De acordo con Efesi 5:3-5, cossa che i efesi no i gavea mia de far?
8 Ledi Efesi 5:3-5. a Par star lontan dela scuridon dela imoralità sessual, i fradei efesi no i gavea de far gnente che disgustesse a Geovà. Par esémpio, lori no i gavea de far imoralità sessual gnanca parlar sora queste robe. Alora, Paolo el ghe ga ricordà che, se lori i se fermesse de far queste robe, i riceveria el Regno de Cristo e de Dio.
9. Parché che ghemo de star atenti a quel che vardemo, scoltemo e parlemo?
9 Anca noantri ghemo de seitar a sforsarse de mai far quel che l’è sbalià. (Efe. 5:11) Savemo che, se una persona la varda, la scolta e la parla sora robe imorai, l’è pi fàcile che la fae un pecato. (Gén. 3:6; Tia. 1:14, 15) Par esémpio, nte un paese, arquanti fradei i ze deventadi “amighi” nte un grupo de messagi nela internet. De scomìnsio, lori i parlea sora Geovà e sora la Bìblia. Ma, pin pianeto, i ga scominsià a parlar sora robe che disgusta a Geovà. Dopo, quel che lori i parlea de pi l’era sora imoralità sessual. Arquanti de questi fradei i ga dito che i ga fato imoralità sessual par causa de quel che i parlea.
10. Cossa che Sàtana el vol farne pensar? (Efesi 5:6)
10 El mondo de Sàtana el proa imbroiarne e farne creder che quel che Geovà el dise che l’è imoral e sporco no l’è mia sbalià. (2 Pie. 2:19) Questo no l’è mia de maraveiarse parché Sàtana sempre el ga proà intrigar le persone de capir quel che l’è giusto e sbalià. (Isa. 5:20; 2 Cor. 4:4) Par quela che nei filmi, nela television e nela internet, vedemo tante robe che le va contra quel che Geovà el dise che l’è giusto. Sàtana el proa farne pensar che no ghen sarà mia problemi e che saremo felici se femo robe sbaliade compagno a quele che tante persone le fà. — Ledi Efesi 5:6. b
11. Come che quel che ga sucedesto con Angela ne giuta a capir el consìlio de Efesi 5:7? (Varda anca la ilustrassion.)
11 Sàtana el vol che restemo insieme a persone che le ne intriga de adorar a Geovà. Par quela, Paolo el ga dito che no ghemo de star insieme con quei che i fà robe sbaliade. (Efe. 5:7) Ma difarente de noantri, i fradei efesi no i gavea la internet. Alora, ghemo de star ancora pi atenti parché podemo star insieme a persone che no le adora a Geovà, anca se i ze de star distante de noantri. Varda el esémpio de Angela c, una sorela che la ze de star nela Àsia. Ela la ga visto che le rede sossiai le ze pròpio una tràpola de Sàtana. Ela la ga dito: “Pin pianeto, quel che vedemo pol cambiar la nostra maniera de pensar. In poco tempo, mi no ghe badea mia se i me ‘amighi’ no i adorea a Geovà. Dopo, go scominsià a pensar che no ghen’era mia problema far robe che disgustea a Dio.” Cossa che la ga giutada? Con amor, i ansiani la ga giutada a cambiar quel che ghe ocorea. Angela la ga dito: “Adesso, invesse de restar su par la internet, mi dopero el me tempo par imparar de pi sora Geovà e sora quel che lu el vol.”
Se ghemo boni amighi, sarà pi fàcile seitar a far quel che l’è giusto (Varda el paràgrafo 11.)
12. Cossa che ndarà giutarne a seitar a far quel che Geovà el dise che l’è giusto?
12 Savemo che la imoralità del mondo l’è una roba pròpio bruta e ghemo de sforsarse de no viver de questa maniera. (Efe. 4:19, 20) Alora, l’è importante domandarse: ‘Sarà che son drio sforsarme par no restar insieme a coleghi dela scola, del laoro o altri che no i adora a Geovà se no ocore mia? Go coraio par far quel che Geovà el dise che l’è giusto, anca se le persone le dise che no aceto quei che i ze difarenti?’ De acordo con 2 Timòteo 2:20-22, ghemo de scòlier ben i nostri amighi, anca se lori i ze fradei e sorele. Pol esser che arquanti de lori, fursi, no i ndarà giutarne a seitar fedeli a Geovà.
SEITÉ FAR “LE ROBE COME FIOI DELA LUCE”
13. Cossa che vol dir seitar a far le robe come “fioi dela luce”? (Efesi 5:7-9)
13 Paolo el ga dito ai efesi che i gavaria de restar lontan dela scuridon. Ma el ga dito anca che i gavaria de seitar a far “le robe come fioi dela luce”. (Ledi Efesi 5:7-9. d) Come cossita? Questo vol dir far sempre quel che l’è giusto, come dissìpoli de Gesù. Una roba che la pol giutarne l’è sempre studiar la Bìblia e le publicassion che ne giuta a capirla meio. Par quela, l’è pròpio importante star atenti al esémpio de Gesù e a tuto quel che lu el ne ga insegnà, parché lu l’è la luce del mondo. — Gio. 8:12; Pro. 6:23.
14. Come che el spìrito santo el pol giutarne?
14 Noantri ghemo bisogno del spìrito santo de Geovà par seitar esser “fioi dela luce”. Parché? Parché no l’è mia fàcile seitar a far quel che l’è giusto in meso a questo bruto mondo de ancoi. (1 Tes. 4:3-5, 7, 8) Tanti ancoi i pensa de una maniera difarente de quel che Geovà el pensa. Ma el spìrito santo pol giutarne a dàrghene fora cola maniera sbaliada de pensar de questo mondo. Geovà el pol darne forsa par seitar a far tuto quel che vien dela luce e che l’è bon, giusto e vero. — Efe. 5:9.
15. Cossa che ghemo de far par ricever spìrito santo? (Efesi 5:19, 20)
15 Gesù el ga dito che Geovà “el darà spìrito santo a quei che i ghe lo domanda”. (Luc. 11:13) Alora, ghemo de pregar a Geovà par domandar el so aiuto. Nantra maniera de ricever el spìrito santo de Geovà l’è quando lo lodemo nele nostre riunion insieme ai nostri fradei. (Ledi Efesi 5:19, 20. e) Sicuro che Geovà el ndarà doperar la so forsa par giutarne a far quel che l’è giusto.
16. De acordo con Efesi 5:10, 17, cossa che ndarà giutarne a far bone dessision?
16 Vanti de far una dessision importante, ghemo de capir “quala che la ze la volontà de Geovà” e dopo far quel che lu el vol. (Ledi Efesi 5:10, f 17. g) Quando catemo fora prinsipi dela Bìblia che i ne giuta, podemo capir quel che Geovà el pensa. Dopo, se metemo in pràtica quel che ghemo imparà podemo far bone dessision.
17. Cossa che ghemo de far par doperar el nostro tempo dela meio maniera? (Efesi 5:15, 16) (Varda anca la ilustrassion.)
17 Paolo el ga dito ai efesi che lori i gavea de doperar ben el so tempo. (Ledi Efesi 5:15, 16. h) Parché? Parché ‘el Perverso’, o sia, Sàtana, l’è el nostro nemigo. (1 Gio. 5:19) Lu el vol che doperemo nostro tempo con altre robe invesse de doperarlo par adorar a Geovà. Alora, ghemo de star atenti parché l’è tanto fàcile ndar drio ai soldi, studi e laori invesse de proar cambiar la vita par far de pi par Geovà. Ancora che queste robe no le sìpia mia sbaliade, no le ze mia pi importante che la nostra adorassion a Geovà. Quei che i va in serca de queste robe del mondo i mostra che i ze drio pensar compagno ale persone che no le serve a Dio. Alora, par seitar a “far le robe come fioi dela luce”, ‘ghemo de doperar el nostro tempo dela meio maniera’ e far quel che l’è pi importante.
I fradei de Èfeso i se sforsea de predicar par doperar el so tempo dela meio maniera (Varda el paràgrafo 17.)
18. Cossa che Donald el ga fato par esser bon de doperar el so tempo dela meio maniera?
18 Cossa che ti te pol far? Stà atento a tuto quel che te pol far par laorar de pi par Geovà. Varda el esémpio de Donald, un fradel dela Àfrica. Lu el ga dito: “Go pensà sora quel che mi ero drio far e go domandà che Geovà el me giutesse a far de pi nela predicassion. Mi volea catar un laoro che me assesse gaver pi tempo par predicar. Col aiuto de Geovà, son stà bon de cambiar de laoro. Adesso, mi e la me dona semo drio servir a Geovà nel tempo integral insieme.”
19. Cossa che ghemo de far par seitar esser “fioi dela luce”?
19 Sicuro che la carta de Paolo ai efesi li ga giutadi tanto. E i so consili i pol giutarne anca a noantri. Come? Questi consili i ne giuta a scòlier ben i nostri amighi e pensar in quel che femo par divertirse. Quel che lu el ga scrito anca ne incoraia a seitar a studiar la Bìblia e a sempre meter in pràtica quel che imparemo. I consili de Paolo anca i ne mostra come l’è importante domandar spìrito santo a Geovà par gaver bele qualità. Se metemo in pràtica i consili de Paolo, faremo bone dessision che ghe piase a Geovà. Cossita, saremo distante dela scuridon e seitaremo nela luce!
COSSA CHE TE GHÈ IMPARÀ?
-
Cossa che vol dir la “scuridon” e la “luce” in Efesi 5:8?
-
Cossa che ghemo de far par star distante dela “scuridon”?
-
Cossa che ghemo de far par seitar a esser “fioi dela luce”?
CÀNTICO 95 Capimo cada volta meio la verità
a (Efesi 5:3-5) No sté gnanca parlar sora imoralità sessual, sora qualche tipo de impuressa e sora voler sempre de pi, parché l’è questo che se speta de quei che i serve a Dio. 4 No sté gnanca parlar sora panciane, fròtole sporche e comportamento che l’è una vergogna. Tute queste robe no le ze giuste. Invesse, gavé de ringrassiar a Dio. 5 Parché valtri savé pròpio ben che quei che i fà imoralità sessual, quei che no i ze puri, quei che i vol sempre de pi, che la ze la medèsima roba de esser idòlatri, lori no i riceverà in eredità el Regno del Cristo e de Dio.
b (Efesi 5:6) No sté assar che nissuni ve imbroie con parole sensa valor, parché l’è par via de queste robe che Dio el resta cativo con quei che no i ghe obedisse.
c Arquanti nomi i ze stati cambiadi.
d (Efesi 5:7-9) Alora, no sté far gnente insieme de lori. 8 Vanti, valtri eri scuridon, ma adesso che sì insieme al Signor, valtri sì luce. Seité a far le robe come fioi dela luce, 9 parché tuto quel che vien dela luce l’è bon, giusto e vero.
e (Efesi 5:19, 20) Parlé intrà de valtri con salmi, lodi a Dio e càntichi. Gavé de cantar e far mùsica de cuor a Geovà. 20 e sempre ringrassiar par tute le robe al nostro Dio e Pare, in nome del nostro Signor Gesù Cristo
f (Efesi 5:10) “Seité farve sicuri de quel che el Signor el aceta.”
g (Efesi 5:17) Par quela, fermeve de esser bauchi, ma gavé de capir quala che la ze la volontà de Geovà.
h (Efesi 5:15, 16) Alora, sté ben atenti par no far come i stùpidi, ma come quei che i ga sabedoria. 16 Gavé de doperar el vostro tempo dela meio maniera, parché i giorni i ze rugni.
i ILUSTRASSION: Una còpia de sti ani de una carta del apòstolo Paolo ai efesi.
