1. Parché che semo contenti de far parte dela organisassion de Geovà?

 SEMO tanto contenti de far parte dela organisasison de Geovà in questi ùltimi giorni. La vita in questo mondo la ze cada volta pi difìcile. Ma Geovà ne giuta a gaver una fameia felice e el ne dà fradei e sorele che i ne incoraia. (Sal. 133:1; Efe. 5:33–6:1) Geovà anca el ne giuta a dàrghene fora coi nostri problemi e a esser felici.

2. Cossa che ghemo de far, e parché?

² Ma noantri ghemo de sforsarse tanto par seitar a servir a Geovà. Parché? Parché pol esser che dele volte i altri i ne disgusta o restemo disgustadi par causa dei nostri sbali. E restemo ancora pi disgustadi se seitemo a far i medèsimi sbali. Alora, cossa che noantri ghemo de far par seitar servir a Geovà quando (1) fradei o sorele i ne ofende, (2) nostro sposo o la nostra sposa ne disgusta, e (3) quando restemo disgustadi par causa dei nostri sbali? Ndaremo veder tre esempi dela Bìblia de persone che le ze state bone de dàrghene fora e cossa che podemo imparar.

SEITA A SERVIR A GEOVÀ QUANDO UN FRADEL O UNA SORELA TE OFENDE

3. Che dificoltà i servi de Dio i infronta?

³ La dificoltà. Arquanti fradei e sorele i ga personalità che no ne piase, i fà robe che ne assa disgustadi o i ne trata mal. Fin i ansiani i pol far sbali. Ghen’è de quei che i assa de fidarse nela organisassion de Dio par causa de queste robe. Alora, invesse de seitar a servir a Geovà in union coi fradei e le sorele, lori i se ferma de parlar con quei che li ga ofendesti o fin no i va pi ale reunion. (Sof. 3:9) Sarà che questa la ze una  roba bona de far? Vedemo quel che podemo imparar de un servo de Geovà del passà che el ga infrontà un problema cossita.

4. Che dificoltà Paolo el ga infrontà?

⁴ Un esémpio dela Bìblia. El apòstolo Paolo el savea che i fradei e le sorele i era imperfeti. Par esémpio, pena dopo che lu l’è rivà in Gersusalen, arquanti no i credea che lu el fusse deventà un dissìpolo de Gesù. (Ati 9:26) Dopo, arquanti i ga parlà robe brute sora lu par rovinar la so reputassion. (2 Cor. 10:10) Paolo anca el ga visto un ansiano far una bruta dessision che podaria esser un bruto esémpio par i altri. (Gàl. 2:11, 12) E Marco, un grando amigo de Paolo, lo ga disgustà tanto. (Ati 15:37, 38) Ma, invesse de no voler pi parlar o star insieme con quei fradei, Paolo el ga seità a darghe valor e a servir a Geovà de maniera fedele. Cossa che lo ga giutà a far cossita?

5. Cossa che ga giutà Paolo a perdonar e restar insieme dei so fradei e so sorele? (Colossensi 3:13, 14) (Varda anca la ilustrassion.)

⁵ Paulo el amea so fradei e sorele. Questo amor lo ga giutà a vardar le so qualità invesse dele so imperfession. Cossita, lu l’è stà bon de perdonar i altri e far quel che el ga dito in Colossensi 3:13, 14. a (Ledi.) Par esémpio, nel primo viaio che Paolo el ga fato par visitar le congregassion, Marco lo ga assà lu lu sol. Anca cossita, Paolo no l’è restà ofendesto. Come che lo savemo? Quando Paolo el ga scrito una carta ala congregassion de Colosso, lu el ga lodà a Marco e el ga dito che lu l’era “una fonte de grando consolo”. (Col. 4:10, 11) E quando che Paolo l’era in preson in Roma, lu el ga domandà a Marco de vegner giutarlo. (2 Tim. 4:11) Alora, semo sicuri che Paolo el perdonea i so fradei e el restea insieme de lori. Cossa che podemo imparar de Paolo?

6-7. De acordo con 1 Gioani 4:7, cossa che pol giutarne a seitar a amar i nostri fradei e sorele, anca se i ga imperfession?

⁶ Quel che imparemo. L’è tanto importante far compagno al nostro Pare, Geovà, che sempre el ne perdona. (Efe. 4:32–5:1.) Dio el ne ama anca se femo sbali. Lu el seita a esser nostro amigo e no’l se inràbia con noantri. (Sal. 103:9) E lu el vol che seitemo a amar i nostri fradei e sorele. (Ledi 1 Gioani 4:7. b)  Alora, se qualchedun el ne trata mal, se fidemo che lu no’l volea far aposta e che l’è drio sforsarse par far qual che l’è giusto. — Pro. 12:18.

⁷ Noantri semo pròpio darente del fin e ghemo de seitar a star insieme ai nostri fradei e sorele. La perseghission la pol deventar sempre pi bruta e podemo anca ndar in preson par via dela nostra fede. Se questo sucede, gavaremo bisogno dei nostri fradei e sorele come mai. (Pro. 17:17) Vedemo el esémpio de Josep, c un ansiano dela Spagna. Lu e altri fradei i ze ndati in preson insieme parché no i volea ndar al esérsito. Lu el ga dito: “Nela preson, se vive tuti insieme e l’è tanto fàcile intrigarse un col altro. Alora, ghemo bio de soportarse e perdonarse. Questo ne ga giutà a restar unidi e a protegerse dei altri che no i servia a Geovà. Una volta, altri presoneri i me ga fato mal, e son restà sensa poder mover el brasso. No ero pi bon de far gnente mi mi sol. Alora, un dei me fradei el ga lavà le me robe e el me ga tendesto de altre maniere. Quando gavea de pi bisogno, go visto el amor sinsero dei fradei.” Sicuro che adesso la ze la ora de risolver i problemi che ghemo coi fradei!

SEITA A SERVIR A GEOVÀ QUANDO TO SPOSO O TO SPOSA TE DISGUSTA

8. Che dificoltà quei che i ze maridadi i ga?

⁸ La dificoltà. Tuti quei che i ze maridadi i ga dificoltà. La Bìblia la dise che le persone maridade le gavarà problemi. (1 Cor. 7:28) Parché? Parché el matrimònio el mete insieme due persone difarente e imperfete. El omo e la dona ghe piase robe difarente, i ga la so personalità, i vien de posti difarenti e i ze stati slevadi de maniera difarente. Dele volte, i maridadi i vede robe de quelaltro che no gavea mia visto vanti de maridarse. Tute queste robe fà vegner fora problemi, e invesse de risolverli insieme, pol esser che un el dà la colpa a quelaltro. Tanti i pensa che i sarà felici se i se separa o i se divorsia. Ma sarà che far cossita l’è bon? d Ndemo imparar de una dona dela Bìblia che la ga seità a servir a Geovà, anca se el so omo l’era pròpio rugno.

9. Che dificoltà Abigail la ga infrontà?

⁹ Un esémpio dela Bìblia. Abigail la era maridada con Nabal. La Bìblia la dise che l’era un “omo stùpido e el se comportea mal”. (1 Sam. 25:3) L’era tanto fadiga viver con un omo cossita. Ma Abigail mai la ga proà catar una maniera par finir col so matrimònio. Par esémpio, una volta, Nabal el ga tratà mal Davi e i òmini con lu. Par quela, Davi, el futuro rè de Israel, el volea ndar copar Nabal. (1 Sam. 25:9-13) Abigail la ga savesto de quel che Davi el volea far. Invesse de scampar via e assar che lu el copesse Nabal, ela la ga dito a Davi de no farlo. (1 Sam. 25:23-27) Parché che Abigail la ga fato cossita?

10. Cossa che fursi ga giutà Abigail a seitar fedele anca con dificoltà nel so matrimònio?

¹⁰ Abigail la amea a Geovà e la vedea el matrimònio come una roba sacra, compagno a lu. L’è sicuro che ela la savea quel che Dio el gavea dito a Adon e Eva. (Gén. 2:24) Ela la volea contentar a Dio. Par quela, ela la ga fato presto tuto quel che la podea par no assar  che Davi el copesse Nabal e tuti quei nela so casa. Abigail la ga fin domandà scusa par robe che no la gavea mia fato. L’è sicuro che Geovà ghe piasea tanto de questa dona brava e coraiosa. Cossa che i maridadi i pol imparar del esémpio de Abigail?

11. (a) De acordo con Efesi 5:33, cossa che Geovà el vol che i maridadi i fae? (b) Cossa che imparemo del esémpio de Carmen? (Varda anca la ilustrassion.)

¹¹ Quel che imparemo. Geovà el vol che un sposo e una sposa i reste insieme anca se no l’è mia fàcile. Dio el ghe piase tanto quando el vede due maridadi che i se sforsa par risolver i problemi con amor e rispeto. (Ledi Efesi 5:33. e) Vedemo el esémpio de Carmen. Intorno de sei ani dopo che la se ga maridada, ela la ga scominsià a studiar la Bìblia cole Testimònie de Geovà e la se ga batesada. Carmen la ga dito: “El me omo no ghe ga piasesto la me dessision. Lu l’era inrabià parché mi guastea tanto tempo nele riunion, e el volea assarme.” Ma ela la ga seità col so matrimònio. Par 50 ani, ela la se ga sforsà de mostrar amor e rispeto. Carmen la ga dito: “Coi ani, go imparà che gavea de parlar a me omo con de pi bontà. Saver che el matrimònio l’è una roba sacra par Geovà me ga giutà a meterghela tuta par salvarlo. Come mi amea a Geovà, no go mai pensà de assar el me omo.” f Alora, se te ghè dificoltà nel to matrimònio, te pol fidarte che Geovà el ndarà giutarte a restar fedele.

SEITA SERVIR A GEOVÀ QUANDO TE SÌ DISGUSTÀ CON TI STESSO

12. Che dificoltà infrontemo se femo un bruto pecato?

¹² La dificoltà. Podemo restar tanto desanimadi quando noantri femo un pecato grave. La Bìblia la dise che i nostri pecati i ne assa col “cuor spacà e schissà”. (Sal. 51:17) Vedemo el esémpio del fradel Roberto. Par ani, lu el se ga sforsà tanto par deventar un servo ministerial. Ma, dopo, lu el ga fato un bruto pecato, e cossita, el ga visto che el gavea disgustà a Geovà. Roberto el ga dito: “Mi me sentia tanto mal par causa de quel che gavea fato. Seitea a piander e a pregar a Geovà. Mi pensea che Dio no’l ndaria pi scoltar le me orassion parché lo gavea disgustà.” Dela stessa maniera, se ghemo fato un bruto pecato, fursi se sentimo tanto mal che pensemo che Geovà no’l ne ga perdonà e che no meritemo pi servirlo. (Sal. 38:4) Se te te senti  cossita, varda un esémpio dela Bìblia che el ga seità servir a Geovà, anca se el ga fato un bruto pecato.

13. Che sbali e che bruto pecato el apòstolo Piero el ga fato?

¹³ Un esémpio dela Bìblia. Nela note vanti de Gesù morir, Piero el ga fato arquanti sbali fin un bruto pecato. Prima, lu l’è stà massa sicuro de lu stesso e el ga dito che, anca se i altri apòstoli i ndaria abandonar a Gesù, lu mai lo faria. (Mar. 14:27-29) Dopo, nel giardin de Getsémani, Piero el se ga indormensà invesse de seitar atento. (Mar. 14:32, 37-41) E quando una mùcia de gente ga proà ndar contra Gesù, Piero el ga scampà via. (Mar. 14:50) Dopo tuti questi sbali, Piero el ga fato un bruto pecato. Par tre volte, lu el ga dito che no’l cognossea a Gesù e el ga fin giurà. (Mar. 14:66-71) Cossa ga sucedesto quando Piero el ga visto che el gavea fato questo bruto pecato? Lu l’è restà tanto desanimà e el ga sofrio tanto. (Mar. 14:72) E lu l’è restà ancora pedo quando i ga copà el so amigo Gesù. Piero el se gavarà sentio un poro gramo!

14. Cossa che ga giutà Piero a seitar a servir a Geovà? (Varda la ilustrassion.)

¹⁴ Cossa che ga giutà Piero a seitar servir a Geovà? Invesse de voler restar lu lu sol, Piero l’è restà sempre insieme ai so fradei che i lo ga consolà e i lo ga sempre giutà. (Luc. 24:33) Quando Gesù l’è stà ressussità, lu el se ga mostrà a Piero e lo ga incoraià. (Luc. 24:34; 1 Cor. 15:5) Dopo, invesse che seitar parlar dei sbali de Piero, Gesù el ga dato al so caro amigo altre responsabilità. (Gio. 21:15-17) Anca se Piero el savesse che el gavea fato un bruto pecato, lu no’l se ga mai fermà de far quel che l’è giusto. Parché? Parché l’era sicuro che el so Signor Gesù ancora lo amea e i so fradei i ga seità a giutarlo. Cossa che podemo imparar del esémpio de Piero?

15. De acordo con Salmo 86:5 e Romani 8:38, 39, Geovà el vol che noantri semo sicuri de cossa? (Varda anca la ilustrassion.)

¹⁵ Quel che imparemo. Geovà el vol che noantri semo sicuri che lu el ne ama e che l’è pronto par perdonarne. (Ledi Salmo 86:5; g Romani 8:38, 39. h) Quando noantri pechemo, l’è normal sentirse in colpa. Ma no ghemo  mai de pensar che Geovà no’l ne ama pi o che no’l ndarà mai perdonarne. Invesse, ghemo de suito ndar in serca de aiuto. Roberto, che ghemo parlà vanti, el ga dito: “Quando go bio voia de far una roba sbaliada, me go fidà in mi stesso e go fato un pecato. Ma, dopo son ndato parlar coi ansiani e go sentio suito el amor de Geovà. Anca go sentio el amor dei ansiani. Lori i me ga giutà a creder che Geovà no’l me gavea mia abandonà.” Anca noantri ghemo de esser sicuri che Geovà el ne ama tanto e che el ne perdona se se ciamemo grami dei nostri pecati, domandemo aiuto e se sforsemo de no farli nantra volta. (1 Gio. 1:8, 9) Se semo sicuri che Geovà el ne ama e el vol perdonarne, no se fermaremo de servirlo anca se femo sbali.

16. Parché che volemo pròpio seitar a servir a Geovà?

¹⁶ Geovà el dà tanto valor al nostro sforso de servirlo in questi ùltimi giorni. Col so aiuto, noantri podemo seitar a servir a Geovà, anca se semo disgustadi coi nostri sbali o coi sbali dei altri. Noantri saremo anca boni de far pi forte el nostro amor par i fradei e sorele e de perdonarli se i ne ofende. Noantri podemo mostrar amor par Dio e rispeto par el matrimònio se femo del tuto par risolver i problemi che i vien fora. E anca se femo un pecato, seitaremo a esser sicuri del amor e del perdon de Geovà. Par quela, seitaremo a servirlo e ndaremo in serca del so aiuto. Podemo esser sicuri che Geovà el ne benedirà “se no stemo mia desister de far quel che l’è bon”. — Gàl. 6:9.