Mi son nassesto nel ano de 1983. Quando mi gavea 10 ani, go scominsià a gaver tanto mal in tuto el corpo. Due ani dopo no era gnanca pi bon de móverme. Mi proea far forsa nele gambe ma no gavea pi forsa. De lì avanti, no son pi stato bon de caminar. Par causa del me problema de salute, no son mia vegnesto pi grando che un tosatel.

Due Testimònie de Geovà le me ga visità quando fea arquanti mesi che mi no ndea via de casa. Quando qualchedun vegnea là casa, mi proea scónderme. Ma in quel giorno, mi go acetà parlar con quele due done. Alora, una dele sorele che la se ciamea Florence la me ga domandà se mi volea imparar de pi e mi go dito che si. In questa prima vìsita, lore le me ga parlà sora el Paradiso e questo me ga fato ricordar de quel che go scoltà quando mi gavea sinque ani. In quel tempo, ghen’era un missionàrio, che el gavea nome Jethro. Lu l’era de star nel Suriname e una volta al mese el vegnea al nostro paeseto e el fea stùdio col me pare. Lu el me tratea tanto ben e me piasea tanto de lu. I me noni i me menea insieme nele riunion quando le era fate qua nel nostro paeseto.

Florence e el so sposo Justus i ga scominsià a far el stùdio con mi. Come mi no savea leder, lori i me ga insegnà e suito mi era belche drio leder. Un tempo dopo, Florence e Justus i me ga contà che lori i ze stati designadi par servir nel Suriname. Me ga despiasesto parché no ghen’era pi nissuni par far el stùdio con mi. Ma mi son restà tanto contento parché Geovà no’l se ga desmentegà de mi.

Poco tempo dopo, l’è rivà nel nostro paeseto un pioniero de nome Floyd. Lu el ga parlà con mi nel laoro de predicassion e el me ga domandà se mi volea far un stùdio dela Bìblia. Mi go scominsià a rider e lu el me ga dito: “Parché sito drio rider?”. Alora, mi ghe go dito che gavea belche stùdia el libreto O que Deus requer de nós e gavea scominsià a studiar el libro Conhecimento que conduz a Vida Eterna. * Ghe go anca contà parché che me go fermà de studiar e alora, lu el ga studià la Bìblia con mi. Ma anca lu l’è stà designà par laorar in nantro posto e no ghen’era pi nissun par farme el stùdio.

 Nel ano de 2004, Granville e Joshua, due pionieri spessiai i ze stati designadi par Orealla. Nel laoro de predicassion, lori i ga parlà con mi e i me ga domandà se mi volea studiar la Bìblia. Mi go ridesto e ghe go domandà se podéino studiar el libro Conhecimento dal scomìnsio. Mi volea veder se i ndea insegnarme la medèsima roba de quei altri. Granville el me ga dito che i era drio far riunion nel me paeseto. L’era belche 10 ani che mi no ndea via de casa, ma mi gavea tanta voia de ndar ale riunion. Alora, lu l’è vegnesto nela me casa, el me ga metesto nela carega de rode e el me ga menà fin al Salon del Regno.

El fradel Granville el me ga incoraià a partissipar dela Scola del Ministero Teocràtico. Lu el ga dito: “No te pol mia caminar, ma te pol parlar. Un giorno te vè far un discorso. Mi son sicuro de questo!” Queste parole le me ga incoraià tanto!

Go scominsià a laorar nela predicassion con Granville. Ma no l’era fàcile doperar la carega de rode, parché nela strada ghen’era massa busi. Alora go domandà a Granville de méterme nte una cariola e cossita noantri èrino boni de ndar in tuti posti. Son stato batesà in april de 2005 e dopo go scominsià a giutar cole publicassion e col son nele riunion.

No l’è stato fàcile par la me fameia quando in 2007, el me pare l’è morto nte un assidente de barco. Granville el ne ga consolà tanto parché el ga ledesto par noantri la speransa dela Bìblia e el ga pregà con noantri. Due ani dopo, l’è morto anca Granville in nantro assidente de barco. No l’è stato fàcile infrontar quela bruta situassion.

Tuti nela nostra congregassion i era tanto triste par causa dela morte de Granville e anca no gavéino gnanca un ansiano e sol un servo ministerial. No l’è stato fàcile, parché mi amea tanto el me amigo Granville. Lu l’era un amigo leal parché lu el se preocupea cola me salute e el me giutea a esser amigo de Geovà. Nela prima riunion, dopo dela so morte mi era quel che ledea la Sentinela. Mi son stato bon de leder sol i due primi paràgrafi e dopo go scominsià a piander e no son stato bon de finir de leder.

L’è stato tanto bel quando fradei de altre congregassion i ze vegnesti giutar la congregassion. Betel anca el ga mandà un pioniero spessial che se ciamea Kojo par giutarne. Son restà tanto contento quando la me mare e el me fradel i ga scominsià a studiar e i se ga batesà. Alora, in marso de 2015 son stato designà servo ministerial. Dopo de un tempo, go fato el me primo discorso e me go pensà dele parole de Granville: “Un giorno te vè far un discorso. Mi son sicuro de questo!” Mi era tanto grato e par quela me vegnea de rider e de piander!

Par meso del JW Broadcasting^® mi go cognossesto arquanti fradei che i infronta dificoltà come mi. Ancora che lori i gàpia un problema de salute, lori i seita a laorar par Geovà e i ze tanto contenti. Alora, go capio che anca mi podea far de pi par Geovà. Go dessidio esser pioniero regolar. Son restà tanto contento quando son stato designà come ansiano in setembre de 2019, nela me congregassion, che ghen’era intorno de 40 publicadori.

Son tanto grato ai fradei che i me ga fato el stùdio e che i me ga giutà a servir a Geovà! Mi ringràssio ancora de pi a Geovà, che no’l se ga desmentegà de mi.