TANTI fradei che i se gavea cambià par nantro paese par laorar i ze tornadi par i paesi che i ze nassesti. Lori i ze tornadi par predicar in posti che ghen’era de pi bisogno. (Mat. 22:37-39) Che cambiamenti lori i ghe ga tocà far? Che benedission i ga ricevesto? Ndemo veder el esémpio de arquanti fradei de Camaron, che l’è un paese nel oeste dela Àfrica.

Nel ano de 1998, un fradel che el se ciama Onèsime l’è ndato via de Camaron e dopo de 14 ani lu l’è tornà indrio. Parché? Un giorno nela riunion el ga scoltà una ilustrassion sora el laoro de predicassion. El fradel el ga dito: “Due amighi i ze drio pescar in posti difarenti, ma un l’è drio ciapar de pi pessi che quelaltro. Cossa che el amigo che l’è drio ciapar manco pessi el gavaria de far? Sicuro che saria meio che lu el ndesse pescar insieme col so amigo.”

Quando Onèsime el ga scoltà questa ilustrassion, el ga pensà se lu el podaria tornar a viver nel paese de Camaron, parché lì lu el podaria giutar tanto nela predicassion. Ma lu l’è restà preocupà parché no’l savea se lu el saria bon de cambiar tuto quel che l’era bisogno par tornar indrio. Cossita, Onèsime l’è ndato de star 6 mesi nel paese de Camaron par veder se el saria bon de tornar. Alora in 2012, lu l’è ndato de star lì.

Onèsime el ga dito: “L’era tanto pi caldo e difarente del posto che mi era de star. Alora me ga tocà viver nantra volta con queste robe. Par esémpio, nel Salon del Regno, le careghe no le era bone.” Ma lu el dise: “Quando mi scoltea con atension la riunion, mi me desmenteghea dele bele careghe che ghen’era nel posto ndove mi era de star.”

Nel ano de 2013, Onèsime el se ga maridà con Gèraldine. Ela la gavea vivesto 9 ani nela Frància e la era pena rivada nel paese de Camaron. Lori i ga metesto el laoro a Geovà in primo posto e i ga ricevesto tante benedission. Onèsime el ga dito: “Noantri ghemo bio la oportunità de far la Scola de Vangelisadori del Regno e de vegner laorar in Betel. Nel ano passà, 20 studianti dela nostra congregassion i se ga batesà. Mi posso dir che adesso son nte un bel posto par ‘pescar’.” (Mar. 1:17, 18) Gèraldine anca la ga dito: “Mai gavéino pensà de ricever tante benedission.”

Judith la ze ndata de star nei Stati Unidi ma la volea far de pi par Geovà. Ela la ga dito: “Sempre che mi ndea visitar la me fameia in Camaron, mi tornea casa drio piander.  Me despiasea assar indrio i studi che mi gavea scominsià.” Ancora cossita, Judith no la era mia sicura par tornar a Camaron. Parché nei stati Unidi la guadagnea pi soldi e cossita la era bona de giutar nela salute de so pare. Ma Judith la se ga fidà in Geovà e la ze tornada a viver in Camaron. Ela la ga dito che ghe manchea quel che la gavea nei Stati Unidi. Alora, ela la ga domandà a Geovà che la giutesse a esser contenta con quel che la gavea lì e un casal de superintendenti anca la ga incoraiada.

Judith la ga dito: “Mi son restada tanto contenta parché in tre ani mi go giutà quatro persone a servir a Geovà.” Judith la ga scominsià come pioniera spessial e ancoi ela e el so sposo, che se ciama Sam-Castel, i ze superintendenti de sircuito. Ma e cossa che ga sucedesto col pare dela Judith? Un ospedal de nantro paese el ga pagà la so operassion e l’è ndato tuto ben.

Un fradel che se ciama Victor l’è ndato de star nel Canadà. Dopo che el ga ledesto nela Sentinela un assunto sora far la università, lu el ga scominsià a pensar in quel che lu l’era drio far. Alora, lu el ga dessidio fermarse de studiar nela università e el ga scominsià a far un corso. Victor el ga dito: “Questo me ga giutà a catar un laoro e anca esser pioniero.” Dopo de un tempo, lu el se ga maridà con Caroline e lori i ze ndati a Camaron e nte una visita a Betel lori i ze stati incoraiadi par ndar servir lì. Victor el ga dito: “Noantri no gavéino gnente par intrigarne. Noantri gavéino poche robe, alora l’è stato fàcile acetar el convite.” Caroline la gavea problemi de salute, ma ancora cossita, lori i ga dessidio ndar de star in Camaron.

Victor e Caroline i ga scominsià el laoro de pionieri parché ghen’era tante persone che le volea imparar sora la Bìblia. Par un tempo, lori i ze stati boni de viver con quel che i gavea. Ma lori i ghe ga tocà tornar al Canadà e laorar par arquanti mesi par seitar col laoro de pioniero in Camaron. Che benedission lori i ga ricevesto? Lori i ga fato la Scola de Vangelisadori del Regno, i ga laorà come pionieri spessiai e adesso i serve nela costrussion. Victor el ga dito: “Assar indrio quel che noantri gavéino, ne ga fato sentir el aiuto de Geovà.”

Nel ano de 2002, Alain el studiea nte una università nela Alemagna. Un giorno lu el ga ledesto el foieto Jovens — Como Usarão Sua Vida? e questo lo ga fato pensar in quel che el ndaria far dela so vita. In 2006, lu el ga fato la Scola de Trenamento Ministerial e lu l’è stato designà par laorar in Camaron, ndove lu l’è nassesto.

Alain el ga catà un laoro in Camaron che no l’era bisogno laorar tuto el giorno. Dopo, lu el ga catà nantro laoro che el ciapea de pi soldi. Ma lu l’è restà preocupà parché questo el ga scominsià a intrigar el so laoro a Geovà. Alora, quando lu l’è stato convidà a laorar come pioniero spessial, suito el ga acetà. El so paron el ga dito che el ghe daria ancora de pi soldi, ma la so dessision la era de esser pioniero spessial. Dopo de un tempo, Alain el se ga maridà con Stèphanie, che la gavea vivesto nela Frància par arquanti ani. Che dificoltà ela la ga bio in Camaron?

 Stèphanie la ga dito: “Mi gavea arquanti problemi de salute, ma son ndata al dotor e son restada tanto meio.” Geovà el ga benedio tanto el sforso de questo casal. Alain el ga dito: “Quando ghemo predicà nte un posto che se ciama Katè, ghemo scominsià arquanti studi bìblichi. Noantri féino studi par telèfono e dopo de un tempo due studianti i se ga batesà e l’è stato verto un grupo lì.” Stèphanie anca la ga dito: “La alegria pi granda che ghen’è l’è giutar le persone a dedicarse a Geovà e qua noantri ghemo bio tante volte questa alegria.” Ancoi Alain e Stèphanie i laora come superintendenti de sircuito.

Giséle la se ga batesà quando la studiea nte una università nela Itàlia par esser dotora. Ela la gavea studià la Bìblia con un casal de pionieri e la restea maraveiada de veder che lori i gavea dessidio viver con poche robe par far de pi par Geovà. Cossita anca ela la ga bio voia de far de pi par Geovà. Alora, Giséle la ga scominsià a esser pioniera quando la era ancora drio studiar nela università.

Giséle la volea tornar a viver in Camaron par far de pi par Geovà, ma la era preocupada con tante robe. Ela la ga dito: “Mi no podaria pi ndar de star nela Itàlia, anca me tocaria star distante dei me amighi e dela me fameia.” Ancora cossita, ela la ze tornada a Camaron in maio de 2016. Un tempo dopo, la se ga maridà con Lèonce. Alora, el Betel de Camaron el ga dito che lori i podea ndar laorar in Ayos, che l’era una cità che la gavea de bisogno.

Come che l’era la vita de Giséle e Lèonce in Ayos? Giséle la se pensa: “Noantri podéino doperar poco el telèfono parché sempre ghe manchea luce. Mi gavea de far un fogo par far el magnar. Me tochea ndar tor àqua nte una fontana, ma lì l’era sempre pien de persone, alora ne tochea ndar de note. Noantri doperéino la cariola con una luce par sciarar la strada.” Come che lori i ze stati boni de infrontar tuto questo? Giséle la ga dito: “El spìrito santo de Geovà el ne ga giutà a ndar avanti. Mi e Lèonce sempre se ghemo giutà. E la nostra fameia e i nostri amighi i ne ga incoraià tanto e dele volte lori i ne ga giutà fin con soldi.”

Sarà che Giséle e Lèonce i ze restadi contenti de servir in Camaron? Giséle la ga dito: “Si! Sicuro che si. Nel scomìnsio no l’è stato fàcile. Ma noantri se ghemo fidà in Geovà e lo ghemo sentio pi darente. Dopo dele dificoltà, mi e Lèonce ghemo capio che ghemo fato quel che gavéino de far.” Lèonce e Giséle i ga fato la Scola de Vangelisadori del Regno e ancoi lori i laora come pionieri spessiai.

Un pescador el fà tuto quel che lu el pol par ciapar de pi pessi. Anca quei che i torna a viver ndove che i ze nassesti i fà tuto che i pol par predicar par de pi persone. Sicuro che Geovà mai el ndarà desmentegarse del so laoro e del amor che lori i ga mostrà a lu. (Nee. 5:19; Ebr. 6:10) Se el paese ndove te sì nassesto el ga de bisogno, sarà che te pol tornar indrio? Se te fè questo, sicuro che Geovà el ndarà benedirte tanto. — Pro. 10:22.