STÙDIO 46
Sicuro che Geovà el ndarà giutarne!
“Mi mai vao assarte e mai vao abandonarte.” — EBR. 13:5.
CÀNTICO 55 No temé, ò me amadi!
COSSA CHE NDAREMO IMPARAR? *
1. Che promessa pol giutarne quando noantri se sentimo soli o semo drio infrontar brute dificoltà?
TE GA belche sucedesto un bruto problema e te ghè pensà che no ghen’era nissun par giutarte? Tuti i ga belche sentio questo, anca i servi fedeli del passà. (1 Rè 19:14) Se te te ghè belche sentio cossita, ricòrdate dela promessa che Geovà el ga fato: “Mi mai vao assarte e mai vao abandonarte.” Alora, te podarè dir: “Geovà l’è quel che me giuta. No gavarò mia paura.” (Ebr. 13:5, 6) El apòstolo Paolo el ga scrito queste parole par i cristiani dela Giudea intorno del ano 61 d.C. Questo ne fà ricordar del Salmo 118:5-7. — Ledi. *
2. Cossa che ndaremo imparar in questo stùdio e parché che l’è importante ricordarse de questo?
2 Cossita come el salmista, Paolo el savea che Geovà lo giutea. Par esémpio, due ani vanti de Paolo scriver ai ebrei, lu l’era nte un viaio e el ga infrontà una bruta tempesta in meso del mar. (Ati 27:4, 15, 20) Geovà el ga mostrà che l’era sempre con Paolo! Adesso, ndaremo veder come che Geovà el ga giutà Paolo par meso de Gesù, dei àngeli, dei òmini che i gavea autorità e dei so fradei. Ricordarse de questo ndarà farne gaver de pi confiansa che Geovà el ndarà giutarne.
GHEMO EL AIUTO DE GESÙ E DEI ÀNGELI
3. (a) Cossa che ga sucedesto con Paolo? (b) Fursi che domanda lu el se ga fato?
3 Intorno del ano 56 d.C., le persone le ga menà via Paolo del témpio e le ga proà coparlo. Nel giorno dopo, quando lu l’era nel Sinèdrio, le persone le ga proà coparlo nantra volta. (Ati 21:30-32; 22:30; 23:6-10) Par causa de queste dificoltà, fursi Paolo el se ga domandà: ‘Fin quando me tocarà infrontar queste robe?’ Sicuro che Paolo el ghe ocorea de aiuto.
4. Che aiuto Paolo el ga ricevesto?
4 Che aiuto Paolo el ga ricevesto? Poco vanti de Paolo esser preso, “el Signor” Gesù el se ga fato veder a lu e el ga dito: “Fate coraio! Come ti te ghè dato testimònio de mi in Gerusalen, cossita te ghè de far compagno anca in Roma.” (Ati 23:11) Gesù el ga lodà Paolo par el laoro che lu el gavea fato in Gerusalen, el ga prometesto che el ndaria a Roma e el seitaria a far la predicassion. Sicuro che questo incoraiamento l’era quel che Paolo el gavea de bisogno. Cossita lu el ga bio de pi confiansa come un tosatel che l’è nei brassi del so pupà.
Nte una bruta tempesta nel mar, Geovà el dopera un àngelo par dir a tuti che i era nel barco che no i ndaria morir (Vedi el paràgrafo 5.)
5. Come che Geovà el ga doperà un àngelo par giutar a Paolo? (Vedi la ilustrassion dela capa.)
5 Che altre dificoltà Paolo el ga infrontà? Intorno de due ani dopo de quel che gavea sucedesto in Gerusalen, Paolo el ga infrontà una tempesta nel mar nel so viaio ala Itàlia. Tuti nel barco i catea che ndea morir parché la tempesta la era pròpio bruta. Paolo el gavea mia paura parché el ga dito a tuti quei che i era nel barco: “Questa note l’è vegnesto un àngelo del Dio de chi mi son e a chi mi dao adorassion e lu el me ga dito: ‘No stà mia gaver paura, Paolo. Ti te ghè de ndar davanti de César, e eco, Dio el ga garantio la vita de tuti che i ze drio viaiar con ti.’” Questo vol dir che Geovà el gavea doperà un àngelo par parlar nantra volta a Paolo che lu el ndaria a Roma. E Paolo l’è rivà a Roma, pròpio come che Geovà el ghe gavea dito. — Ati 27:20-25; 28:16.
6. (a) Che dificoltà noantri ghemo de infrontar? (b) Che promessa che Gesù el ne ga fato?
6 Che aiuto noantri ricevemo? Tuti noantri infrontemo tante dificoltà. Par esémpio, quando more qualchedun dela nostra fameia o un amigo, fursi noantri sofrimo par ani. Altri i sofre parché i ze drio restar veci e altri i ga de infrontar la depression. La promessa che Gesù el ne ga fato la ne dà forsa. Lu el ga prometesto che lu el ne daria forsa e saria con noantri ‘tuti i giorni fin el fin de questo sistema de robe’. Questo vol dir che Gesù el ndarà giutarne anca nei giorni pi difìcili. — Mat. 28:20; 11:28-30.
I àngeli i ne giuta e i ne orienta nel laoro de predicassion (Vedi el paràgrafo 7.)
7. De acordo con Apocalisse 14:6, come che Geovà el ne giuta?
7 La Bìblia la dise che Geovà el ne giuta par meso dei àngeli. (Ebr. 1:7, 14) Par esémpio, i àngeli i ne giuta a predicar le “bone notìssie del Regno” ale persone de ‘tute le nassion, tribo e léngua’. — Mat. 24:13, 14; ledi Apocalisse 14:6. *
GHEMO EL AIUTO DE QUEI CHE I GA AUTORITÀ
8. Come che Geovà el ga doperà un comandante par giutar a Paolo?
8 Che aiuto Paolo el ga ricevesto? Nel ano 56, Gesù el gavea prometesto che Paolo el rivaria a Roma. Ma arquanti giudei in Gerusalen i volea copar a Paolo. Alora quando el comandante Clàudio Lìsias el ga savesto de questo, suito el ga mandà che arquanti soldadi i protegesse a Paolo. El comandante el ga dito che i soldadi i menesse Paolo fin Cesarea, che l’era intorno de 105 chilòmetri de Gerusalen. Quando Paolo l’è rivà là, el governador Felix el ga dito che Paolo el restesse nel palàssio de Erode. Cossita, i nemighi de Paolo no i podea far gnente a lu. — Ati 23:12-35.
9. Come che el governador Festo el ga giutà a Paolo?
9 Due ani dopo, Paolo l’era ancora preso in Cesarea. El novo governador l’era Festo e i giudei i volea che lu el mandesse Paolo a Gerusalen par esser giulgà, parché lori i volea coparlo par la strada. Ma fursi Festo el ga savesto de questo, alora lu no’l ga mia mandà Paolo. — Ati 24:27–25:5.
10. Cossa che Festo el ga fato quando Paolo el ga domandà par esser giulgà par César?
10 Nel giulgamento de Paolo in Cesarea, Festo, che el volea la ‘aprovassion dei giudei’, el ghe ga domandà: “Vuto ndar a Gerusalen e esser giulgà là?” Paolo el savea che se el ndesse a Gerusalen i ndaria coparlo, ma se el ndesse a Roma el continuaria vivo e el seitaria a predicar. Par quela el ga dito che el volea ndar a César, o sia, a Roma. Alora Festo el ga dito a Paolo che se el volea ndar a César, lu el ndaria a César. La risposta de Festo la ga protegesto Paolo dei so nemighi parché suito el saria in Roma, distante de lori. — Ati 25:6-12.
11. Che parole del profeta Isaia le ga incoraià a Paolo?
11 Poco vanti de Paolo far el so viaio ala Itàlia, fursi el se ga ricordà dele parole che el profeta Isaia el ga parlà ai nemighi de Geovà. Lu el ga dito: “Qualche roba che valtri pensé de far, no la ndarà mia ben! Podé parlar quel che valtri volé ma no la ndarà suceder, parché Dio l’è dela nostra banda!” (Isa. 8:10) Paolo l’era sicuro che Geovà el ndaria giutarlo. Cossita, lu el ga bio la forsa par infrontar le dificoltà.
Geovà el pol doperar le autorità dei governi par proteger i so servi, come el ga belche fato nel passà (Vedi el paràgrafo 12.)
12. (a) Come che Giùlio el ga tratà Paolo? (b) Cossa che Paolo fursi el se ga nicorto?
12 Nel ano 58 d.C., quando Paolo el ga scominsià el so viaio par la Itàlia, lu l’era ancora preso, alora el gavea sempre un soldà insieme. In quel viaio, questo soldà ciamà Giùlio el podea tratarlo tanto ben o tanto mal. Ma come che questo soldà lo ga tratà? Lu el ga tratà Paolo con bontà. Par esémpio, quando lori i se ga fermà nel viaio, Giùlio el ga assà che Paolo el “ndesse visitar i so amighi”. Lu el ga anca protegesto a Paolo quando i altri soldadi i volea copar tuti quei che i era presi nel barco. Giùlio l’era dessidio de proteger a Paolo. Cossita, Paolo l’era sicuro che Geovà l’era drio doperar quel soldà par protegerlo e giutarlo. — Ati 27:1-3, 42-44.
Vedi el paràgrafo 13.
13. Come che Geovà el pol doperar quei che i ga autorità?
13 Che aiuto noantri ricevemo? I umani i pol verder un canal par far la àqua ndar ndove lori i vol. Come Salomon el ga scrito, anca Geovà el pol far questo con el cuor dele persone. Lu el ga dito: “El cuor del rè l’è come àque ntele man de Geovà. Lu el ghe dà la diression che el vol.” (Pro. 21:1) Alora, par meso del so spìrito santo Geovà el pol doperar quei che i ga autorità come lu el vol. Cossita, quei che i ga autorità i pol far quel che l’è bon par el pòpolo de Dio. — Vedi anca Esdra 7:21, 25, 26.
14. De acordo con Ati 12:5, cossa che podemo domandar a Geovà?
14 Cossa che noantri podemo far? Noantri podemo domandar a Geovà che el giute i nostri fradei che i ze in preson. (Ledi Ati 12:5; * Ebr. 13:3) Podemo anca pregar “par i governi e tuti quei che i ga autorità” quando lori i va far una dessision sora la nostra adorassion a Geovà. (1 Tim. 2:1, 2, nota; Nee. 1:11) Podemo anca domandar a Geovà che el giute quei che i laora nele preson a tratar i nostri fradei con “bontà” compagno Giùlio el ga fato con Paolo. — Vedi la nota de stùdio in Ati 27:3.
GHEMO EL AIUTO DEI NOSTRI FRADEI
15-16. Come che Geovà el ga giutà a Paolo par meso de Aristarco e Luca?
15 Che aiuto Paolo el ga ricevesto? Quando Paolo l’era drio viaiar a Roma, lu el ga ricevesto tante volte el aiuto dei fradei. Ndemo veder arquanti de questi esempi.
16 Aristarco e Luca, che i era amighi de Paolo, i ga dessidio viaiar con lu fin Roma. * Ma la Bìblia no la dise che Gesù el ga prometesto a lori che i ndaria rivar a Roma con vita. Ancora cossita lori i ga volesto ndar e quando lori i era in meso de una tempesta i ga savesto che nissun ndaria morir. Fursi, quando Luca e Aristarco i ze ndati rento del barco, Paolo el ga ringrassià tanto a Geovà, parché li gavea mandà par giutarlo. — Ati 27:1, 2, 20-25.
17. Come che Geovà el ga giutà Paolo par meso dei so fradei?
17 Paolo el ga ricevesto el aiuto dei fradei tante volte. Par esémpio, quando lori i se ga fermà in Sìdon, Giùlio el ga assà che Paolo el visitesse i so amighi e i ricevesse el so aiuto. Dopo, nela cità de Putèoli, Paolo e i so amighi i ga catà fradei che i ga volesto che lori i restesse sete giorni lì. Paolo l’è stato giutà par questi fradei, ma podemo creder che anca lu el ga incoraià a lori cole so speriense. (Vedi anca Ati 15:2, 3.) Dopo, Paolo e i so amighi i ga seità col viaio. — Ati 27:3; 28:13, 14.
Geovà el ne giuta par meso dei fradei, come ga sucedesto con Paolo (Vedi i paràgrafi 18 e 19.)
18. Parché che Paolo el ga ringrassià a Geovà?
18 Quando Paolo l’è rivà a Roma, fursi el se ga pensà che el gavea scrito tre ani vanti a questa congregassion che lu ‘l’era premoso de ndar véderli’. (Rom. 15:23) Paolo l’era un prisionero quando l’è ndato visitarli, ma lu l’è restà tanto contento quando el ga visto che i fradei i era lì par saludarlo. Quando Paolo li ga visti, ‘el ga ringrassià a Dio e l’è stato incoraià’. (Ati 28:15) El testo el dise che Paolo el ga ringrassià a Dio parché el savea che l’è stato lu che el gavea doperà questi fradei par giutarlo.
Vedi el paràgrafo 19.
19. De acordo con 1 Piero 4:10, come che Geovà el pol doperarne par giutar a un fradel?
19 Cossa che noantri podemo far? Fursi un fradel dela nostra congregassion l’è drio tribolar par causa de una malatia, el ga perso qualchedun nela morte o l’è drio infrontar nantra dificoltà. Noantri podemo domandar a Geovà che el ne giute a parlar o a far qualcossa che incoraia a questo fradel. Fursi quel che parlemo e quel che femo l’è pròpio quel che el nostro fradel el ga de bisogno. (Ledi 1 Piero 4:10. *) * Se noantri femo questo, lu el pol ricordarse dela promessa de Geovà: “Mi mai vao assarte e mai vao abandonarte.” Restemo tanto contenti quando podemo giutar un fradel!
20. Parché che semo sicuri che Geovà el ndarà giutarne?
20 Come Paolo e i so amighi, anca noantri infrontemo dificoltà. Ma noantri podemo esser sicuri che Geovà el ndarà giutarne. Parché? Parché lu el ne giuta par meso de Gesù, dei àngeli e lu el pol fin doperar le autorità. Geovà el pol doperar anca i nostri fradei par giutarne. Sicuro che questo el ga belche sucedesto con arquanti de noantri! Alora, semo de acordo cole parole de Paolo, che el ga dito: “Geovà l’è quel che me giuta, no gavarò mia paura. Cossa che pol farme i òmini?” — Ebr. 13:6.
CÀNTICO 38 Geovà el te farà forte
^ paràgrafo 5 In questo stùdio, ndaremo imparar de che tre maniere Geovà el ga giutà el apòstolo Paolo a infrontar le dificoltà. Quando imparemo de pi sora come Geovà el ga giutà ai so servi del passà, ghemo ancora de pi confiansa che lu el ndarà giutarne.
^ paràgrafo 1 (Salmo 118:5-7) Mi go ciamà a Giah nela me aflission. Giah el me ga rispondesto e el me ga metesto nte un posto sicuro. 6 Geovà l’è dela me banda, mi no gavarò paura. Cossa che el omo el pol farme? 7 Geovà l’è dela me banda par giutarme. Ndarò vardar contento par quei che i me òdia.
^ paràgrafo 7 (Apocalisse 14:6) E mi go visto nantro àngelo zolando in meso al cielo e el gavea bone notìssie eterne par proclamar a quei che i vive nela tera, a cada nassion, tribo, léngua e pòpolo.
^ paràgrafo 14 (Ati 12:5) Alora Piero l’era in preson, ma la congregassion la seitea a far forte sùpliche par Dio giutarlo.
^ paràgrafo 16 L’era belche arquanti mesi che Luca e Aristarco i viaiea con Paolo. E lori i ze restadi insieme con Paolo nel tempo che lu l’era preso in Roma. — Ati 16:10-12; 20:4; Col. 4:10, 14.
^ paràgrafo 19 (1 Piero 4:10) Cada un el ga de doperar la abilità che Dio el ghe ga dato par servir ai altri. Cossita, valtri ndaré doperar ben la bontà imèrita che Dio el mostra de arquante maniere.
