1-2. De acordo con Proverbi 4:25, cossa che ghemo de far? Daghe un esémpio.

PAR ESÉMPIO, una sorela de età la se ricorda dele bele robe del passà. Adesso, la so vita la ze pi difìcile, ma la seita far el so meio par Geovà. (1 Cor. 15:58) Tuti i giorni ela la pensa come che sarà viver coi amighi nel paradiso. Nantra sorela la se ricorda che qualchedun nela congregassion el ga fato qualcossa bruta a ela, ma no la ze pi disgustada. (Col. 3:13) Un fradel el se ricorda dei sbali del passà, ma el proa pensar come che lu el pol esser fedele de lì avanti. — Sal. 51:10.

² Cossa che questi tre fradei i fà? Lori i se ricorda de quel che ga sucedesto, ma no i seita pensar sol in questo. Invesse, lori i ‘varda par quel che l’è avanti’, par el futuro. — Ledi Proverbi 4:25. *

3. Parché che ghemo de ‘vardar par quel che l’è avanti’?

³ Parché che l’è importante ‘vardar par quel che l’è avanti’? Una persona no la ze bona de caminar nte una strada de maniera giusta se ela la seita vardar indrio. Cossita, noantri no saremo boni de far de pi par Geovà se vardemo sol par quel che ga belche sucedesto. — Luc. 9:62.

4. Cossa che ndaremo veder in questo stùdio?

⁴ In questo stùdio, ndaremo veder tre tràpole che le pol farne pensar sol nel passà. Le tràpole le ze queste: (1) voler che la nostra vita la sìpia come una volta, (2) seitar disgustadi coi altri e (3) seitar a sentir massa colpa. Ndemo veder come che i prinsipi dela Bìblia i pol giutarne a  desmentegarse dele robe che le ga belche sucedesto e pensarghe nel futuro. — Fil. 3:13.

5. De acordo con Eclesiasti 7:10, cossa che pol esser una tràpola?

⁵ Ledi Eclesiasti 7:10. * Questo versìcolo no’l dise che l’è sbalià domandar: “Parché che i giorni de sti ani i era boni de viver?”. Parché ricordarse dele bone robe l’è un presente de Geovà. Quel che el testo el dise l’è: “No stà mia dir, ‘parché che i giorni de sti ani i era meio che ancoi?’.” Alora, una tràpola la ze pensar che tuto quel che sucede ancoi l’è pedo che una volta. Nantra version dela Bìblia la dise: “No stà mai domandar: ‘Parché che una volta l’era tuto meio che ancoi?’. Parché far questa domanda no l’è mia bon.”

6. (a) Cossa che i israeliti i ga fato? (b) Parché che no l’è mia bon seitar a pensar che la vita la era meio una volta?

⁶ Pensa in quel che ga sucedesto coi israeliti. Dopo che i ze ndati via del Egito, suito i se ga desmentegà come che la era la vita là. Lori i era boni de ricordarse sol del magnar che ghen’era là. Lori i disea: “Ne manca tanto i pessi che magnéino sensa pagar gnente nel Egito, anca cocùmeri, angùrie, aio porò, seole e aio!” (Nùm. 11:5) Ma sarà che quel magnar l’era pròpio par gnente? Sicuro che nò, parché lori i era schiavi e i tribolea tanto. (Éso. 1:13, 14; 3:6-9) Ancora cossita, lori i se ga desmentegà de tute le dificoltà e i volea che la so vita la fusse come la era vanti. I israeliti i ga scoliesto pensar sol in quel che l’era bon e i se ga desmentegà de veder tuto quel che Geovà l’era drio far par lori. Geovà l’è restà tanto disgustà con lori. La medèsima roba la pol suceder con noantri. Alora, no l’è mia bon seitar a pensar che una volta la  nostra vita la era meio. Parché? Parché podemo cascar nela tràpola de pensar sol in quel che l’era bon e desmentegarse dele robe rugne. — Nùm. 11:10.

7. Cossa che ga giutà una sorela a vardar avanti?

⁷ Cossa che pol giutarne a no cascar in questa tràpola? Varda el esémpio de una sorela che la ga scominsià a servir nel Betel de Brooklyn in 1945. Un per de ani dopo, ela la se ga maridà con un betelita e lori due i ga servio lì par tanti ani. Ma in 1976, el so omo l’è restà malà. Ela la dise che vanti de lu morir, lu el ghe ga dato arquanti consili che la ga giutà tanto. Lu el ga dito: “Noantri ghemo bio un bel matrimònio, tante persone no le sa come che l’è questo. Ma no stà mia ricordarte sol de quel che ga belche sucedesto. El tempo el ndarà giutarte a restar meio. No stà mia deventar una persona trista e no stà mia farte pecà de ti stessa. Ringràssia le alegrie e le benedission che te ghè ricevesto . . . Le bone robe che se ricordemo le ze un presente de Geovà par noantri.” No l’è un bel consìlio?

8. Parché che l’è stà bon par la sorela meter in pràtica el consìlio del so sposo?

⁸ La nostra sorela la ze stata leal a Geovà fin la so morte, con 92 ani. Ela la ga metesto in pràtica el consìlio del so sposo. Parché che l’è stà bon par ela far questo? Vanti de morir, ela la ga dito: “Quando me ricordo dei 63 ani nel laoro a Geovà, posso dir che go bio una vita tanto bona.” Ela la ga dito ancora: “Mi son tanto felice parché mi fao parte de una granda fameia e go la bela speransa de viver coi me fradei, nel paradiso servindo a Geovà, el nostro Grandioso Creador, e ùnico vero Dio, par sempre.” * Sicuro che questa sorela la ze un bel esémpio de una persona che la varda avanti, par el futuro!

9. Quando che pol esser difìcile perdonar?

⁹ Ledi Levìtico 19:18. * L’è difìcile perdonar quando un fradel, un amigo o qualchedun dela nostra fameia el fà qualcossa che ne assa disgustadi. Par esémpio, una sorela la ga dito che nantra sorela la gavea ciavà i so soldi. Dopo, la sorela che la ga parlà questo la ga domandà scusa, ma quel’altra sorela no la ze stata bona desmentegarse de quel che gavea sucedesto. Pol esser che ne ga belche sucedesto una roba cossita e ghemo pensà che no sarìano boni de perdonar a qualchedun.

10. Cossa che pol giutarne quando restemo disgustadi con qualchedun?

¹⁰ Cossa che pol giutarne quando restemo disgustadi con qualchedun? Ghemo de ricordarse che Geovà el vede tuto. Alora, lu el sa de tuto quel che infrontemo e anca quel che i altri i fà contra noantri. (Ebr. 4:13) No ghe piase a lu veder noantri sofrir. (Isa. 63:9) Geovà el promete che el ndarà finir cola ingiustìssia. — Apo. 21:3, 4.

11. De acordo col esémpio dela sorela, parché che no ghemo de seitar disgustadi?

¹¹ Ghemo de ricordarse che ndaremo sentirse meio se perdonemo i sbali dei altri. La sorela che ghemo pena parlà la ga sentio questo, alora ela la ze stata bona de perdonar la sorela. Ela la ga visto che quando perdonemo i altri, anca Geovà el ne perdona. (Mat. 6:14) Sicuro che quel’altra sorela la gavea fato una roba sbaliada, ma ela la ga dessidio no restar disgustada. Cossita, la nostra sorela la ze restada contenta e la ze stata bona de far el so meio nel laoro a Geovà.

12. De acordo con 1 Gioani 3:19, 20, cossa che tuti noantri sentimo?

¹² Sicuro che tuti noantri volemo far quel che l’è giusto, ma “tuti noantri sbaliemo tante volte”. (Tiago 3:2; Rom. 7:21-23) Par quela che dele volte, tuti noantri sentimo colpa. (Ledi 1 Gioani 3:19, 20. *) Par esémpio, arquanti i sente colpa par le robe che i ga fato vanti de servir a Geovà. Altri i sente colpa par causa dei sbali che i ga fato dopo de batesarse. (Rom. 3:23) Sicuro che no ne piase de sentir colpa, ma questo el pol giutarne a far i cambiamenti par no far i medèsimi sbali. — Ebr. 12:12, 13.

13. Parché che l’è una tràpola sentir massa colpa?

¹³ Varda el esémpio de una sorela che la sentia tanta colpa par causa de sbali che ela la gavea fato. Ela la ga dito: “Mi pensea che no importea quel che mi fesse, mi no meritea gnente de Geovà.” Fursi, anca noantri sentimo massa colpa stesso che se ghemo ciamà grami e che Geovà el ne ga belche perdonà. Ma sentir massa colpa l’è come una tràpola. Parché? (Sal. 31:10; 38:3, 4) Parché noantri podemo abandonar a Geovà, anca che lu no’l ne gàpia abandonà. Sicuro che Sàtana el restaria contento se féssino questo. — Vedi anca 2 Corinti 2:5-7, 11.

14. Come che podemo esser sicuri che Geovà ancora el ne ama?

¹⁴ Ma come che podemo esser sicuri che Geovà ancora el ne ama? Se noantri  se femo questa domanda, vol dir che semo una bona persona e che Geovà el pol perdonarne. Tanti ani indrio, una Sentinela la disea: ‘Pol esser che semo drio far el medèsimo sbàlio tante volte e pensemo che no semo mia boni de fermarse de farlo. Ma no stà restar desanimà e gnanca pensa che el to sbàlio no’l ga mia perdon. L’è pròpio questo che Sàtana el vol che ti te senti. Se te te senti cossita, vol dir che Geovà el pol perdonarte. Seita a domandar perdon a Geovà de maniera ùmile e sinsiera e che el te giute a cambiar. Fà come un fiol che el va in serca del so pare quando el ga dificoltà. Sìpia sicuro che Geovà el ndarà mostrar bontà imèrita e el te giutarà, no importa quante volte ti te domandi el so aiuto par causa dei medèsimi sbali.’

15-16. Cossa che questi fradei i ga sentio quando i ga visto che Geovà no li ga abandonà?

¹⁵ Tanti fradei i ze stati incoraiadi quando i ga visto che Geovà no’l ga abandonà a lori. Par esémpio, ani indrio ghe ga piasesto tanto a un fradel una speriensa dela sèrie “La Bìblia la càmbia la vita”. In questa speriensa, una sorela la ga dito che par causa de quel che gavea belche sucedesto con ela, la catea fadiga creder che Geovà la amesse. Ela la ga seità a pensar cossita arquanti ani dopo del so batésimo. Ma quando la ga pensà de pi sora el risgate, ela ga scominsià a creder che Geovà la amea. *

¹⁶ Come che questa speriensa la ga giutà el fradel? Lu el ga dito: “Quando mi era gióveno, l’è stato tanto difìcile fermarme de veder pornografia. Poco tempo indrio, mi go visto pornografia nantra volta. Alora, son ndato in serca del aiuto dei ansiani e lori i me ga mostrà che Geovà el me ama e el ga compassion. Ma dele volte l’è difìcile par mi creder che Geovà el me ama. Me ga giutà tanto leder la stòria de questa sorela. Adesso mi capisso che pensar che Geovà no’l pol mia perdonarme l’è el medèsimo che parlar che el sacrifìssio de Gesù no’l basta  par perdonar i pecati. Alora go metesto via questa speriensa par lederla e pensarghe sora sempre che mi go de bisogno.”

17. Parché che Paolo no’l ga cascà nela tràpola de sentir massa colpa?

¹⁷ Speriense come queste ne fà ricordar del apòstolo Paolo. Vanti de lu scominsiar a seghir a Cristo, lu el gavea fato tanti bruti sbali. Ma Paolo no’l ga mia cascà nela tràpola de sentir massa colpa, parché no’l seitea a pensar in tuto quel che el gavea fato. (1 Tim. 1:12-15) Lu el vedea el risgate come un presente de Geovà par lu. (Gàl. 2:20) Cossita, lu l’è stato bon de far el so meio par Geovà.

18. Cossa che ghemo imparà in questo stùdio?

¹⁸ In questo stùdio, ghemo imparà tre robe: (1) Le robe bone che ne ga belche sucedesto le ze benedission de Geovà. Ancora che ghemo bio una bona vita, la vita nel paradiso la sarà tanto meio. (2) Se noantri perdonemo a quei che i ne disgusta, saremo boni de ndar avanti. (3) Se noantri seitemo a sentir massa colpa, no saremo boni de servir a Geovà con alegria. Par quela che ghemo de far come Paolo e esser sicuri che Geovà el ne ga perdonà.

19. Parché che podemo esser sicuri che nel paradiso no ndaremo ricordarse dele robe rugne che le ga sucedesto?

¹⁹ Noantri ghemo la speransa de viver par sempre. Nel paradiso, no ndaremo mia ricordarse dele robe rugne che le ga belche sucedesto. La Bìblia la dise: “Le robe che ghen’era vanti no le sarà ricordade.” (Isa. 65:17) Sarà tanto bel veder quei che i ze de età vegner gióveni! (Giò 33:25) Alora, no stà ricordarte sol de quel che ga belche sucedesto, ma pensa in quel che ndarà suceder nel futuro e varda avanti!