1-2. (a) De acordo col Salmo 37:3, 4, parché quei che i ze pena maridadi i ga de fidarse in Geovà? (b) Cossa che ndaremo studiar?

VETO maridarte o sito pena maridà? Sicuro che te vol esser felice insieme cola persona che te ami. Ma quei che i ze maridadi i infronta dificoltà e i ga de far tante dessision importante. Le dessision che i fà e come i infronta le dificoltà ndarà farli gaver una vita felice, o nò. Se el omo e la dona i se fida in Geovà, lori i ndarà far le dessision giuste, i gavarà un bel matrimònio e una vita felice. Ma se no i fà quel che Geovà el dise, lori i ndarà infrontar tante dificoltà e no i sarà felici. — Ledi Salmo 37:3, 4. *

² Questo stùdio el ndarà giutar quei che i ze pena maridadi, ma anca el ndarà parlar dele dificoltà che tuti i maridadi i pol infrontar. Ndaremo studiar arquanti esempi de servi fedeli del passà che ndarà giutarne a far bone dessision nela vita e nel matrimònio. Ndaremo anca imparar sora esempi de fradei e sorele de ancoi.

3-4. Che dificoltà i pena maridadi i pol infrontar?

³ Pol esser che arquanti i seite a dir a quei che i ze pena maridadi che i ga de viver compagno ale altre persone. Par esémpio, pol esser che la fameia la spete che suito i gàpia fioi. Fursi i amighi o la fameia i ghe dise che i ga de comprar una casa e impienirla de robe bone.

⁴ Se quei che i ze maridadi i va drio a quel che queste persone le dise, lori i pol scominsiar a gaver tanti dèbiti. Alora, fursi ghe tocarà laorar de pi par pagar i dèbiti o parché i ga paura de perder el laoro. Cossita, pol esser che no i gavarà tempo par studiar la Bìblia, par la adorassion in fameia, par ndar ala predicassion e ale riunion. Par causa de questo, lori no i sarà boni de far el so meio nel laoro a Geovà.

5. Cossa che el esémpio de Klaus e Marisa el ne insegna?

⁵ Tanti esempi i mostra che, se metemo i soldi e altre robe in primo posto nela nostra vita, no semo mia felici. Vedemo cossa che el esémpio de Klaus e Marisa el pol insegnarne. * Quando i era pena maridadi, tuti i due i laorea par gaver tanti soldi e tante robe. Ma dopo de un tempo, lori i ga capio che no i era contenti. Klaus el ga dito: “Noantri gaveino tuto quel che ne ocorea, ma no penseino de far de pi par Geovà. Gaveino sempre tante robe de far e èrino sempre tanto preocupadi.” Se questo l’è drio suceder con ti, no stà desanimarte. Vedemo come el bel esémpio dei altri el pol giutarne. Prima, ndaremo veder cossa i paroni de fameia i pol imparar col esémpio del rè Geosafà.

6. Quando Geosafà el ga infrontà una dificoltà, come el ga fato quel che dise Proverbi 3:5, 6?

⁶ Se te sì tanto preocupà parché te ghè de tender dela to fameia, el esémpio de Geosafà el pol giutarte tanto. Geosafà l’era el rè dela nassion, alora, lu el gavea de laorar tanto par tender ben dela nassion. Come che lu l’è stà bon de farlo? Lu el ga fato su muri nele cità de Giudà e el ga parecià un esèrsito con pi de 1.160.000 soldadi. (2 Cró. 17:12-19) Dopo de un tempo, un grando esèrsito de amoniti, moabiti e òmini de Seir el ga volesto far guera contra lu. Par causa de questo, Geosafà, la so fameia e el pòpolo i podaria morir. (2 Cró. 20:1, 2) Cossa che Geosafà el ga fato? Lu el ga domandà el aiuto e la forsa de Geovà. La so orassion, che la ze in 2 Cróniche 20:5-12, la mostra che el se fidea tanto in Geovà. Geosafà el ga fato quel che dise Proverbi 3:5, 6. (Ledi.) * Come  Geovà el ga rispondesto la orassion de Geosafà?

7. Come che Geovà el ga rispondesto la orassion de Geosafà?

⁷ Par meso del levita Giaziel, Geovà el ga dito a Geosafà: “Ciapé el vostro posto, sté fermi e vardé come Geovà ve salvarà.” (2 Cró. 20:13-17) Sicuro che gnanca una nassion la fea guera de questa maniera, ma Geosafà el ga obedio parché l’è stà Geovà dirghelo. Quando i ze ndati davanti dei nemighi, Geosafà no’l ga metesto i meio soldadi davanti el esèrsito, ma i cantori. E Geovà el ga fato pròpio quel che el gavea prometesto, parché el esèrsito de Geosafà el ga vinsesto la guera. — 2 Cró. 20:18-23.

8. Cossa che i paroni de fameia i pol imparar col esémpio de Geosafà?

⁸ Se te sì un paron de fameia, te ghè de laorar tanto par giutar, proteger e tender dela to fameia. Quando te sì drio infrontar dificoltà, fìdate in Geovà e nò stà pensar che te pol dàrghene fora ti sol. Ricòrdate che Geosafà el se ga fidà in Geovà. Geovà no lo ga abandonà, e no’l ndarà abandonar gnanca a ti. (Sal. 37:28; Ebr. 13:5) Alora, prega a Geovà e prega anca cola to dona, stùdia la Bìblia e le publicassion e meti in pràtica quel che te impari. Pol esser che dopo che te fè una dessision, i altri i parle che te sì drio deventar mato, e che la to fameia la ga bisogno de soldi e de tante robe. Ma ricòrdate de Geosafà e fìdate in Geovà. Che altre robe quei che i ze maridadi i pol far par esser pròpio felici?

9. Cossa savemo sora el profeta Isaia e la so dona?

⁹ La roba pi importante dela vita de Isaia e dela so dona la era el laoro a Geovà. Isaia l’era un profeta, e la so dona la era una profetisa. (Isa. 8:1-4) Sicuro che lori i ze un bel esémpio parché i fea el so meio a Geovà.

10. Come studiar le professie dela Bìblia pol giutar i maridadi?

¹⁰ Quando quei che i ze maridadi i fà el so meio a Geovà, i ze drio far compagno a Isaia e la so dona. Cossa che pol giutarli a far el so meio a Geovà? Lori i ga de far pi forte la so fede in lu. Come? Lori i pol studiar le professie dela Bìblia e veder come sempre le se realisa. * (Tito 1:2) Dopo, lori i pol pensar come che i pol giutar a realisar queste professie. Par esémpio, lori i pol studiar la professia de Gesù sora la predicassion dele bone notìssie e pensar in maniere che i pol giutar a farla. (Mat. 24:14) Quando quei che i ze maridadi i stùdia le professie e i ze sicuri che sempre le se realisa, lori i volerà far el so meio a Geovà cada volta de pi.

11. Cossa che Àchila e Prissila i ze stati boni de far, e parché?

¹¹ Quei che i ze pena maridadi i pol imparar tanto col esémpio de Prissila e Àchila. Lori i era de star nela cità de Roma e i ze deventadi dissìpoli de Gesù. Lori i gavea una vita tanto bona  in quela cità. Ma el governador Clàudio el ga fato una lege che tuti i giudei i gavea de ndar via de Roma. Alora, lori i ga bio de assar indrio el posto che i era de star, ndar in serca de nantra casa e scominsiar nantra volta el so laoro de far tende. Lori i ze ndati de star in Corinto e lì, i ga laorà insieme con Paolo par giutar i fradei. Dopo, i ze ndati de star in altre cità che le gavea bisogno de aiuto nela predicassion. (Ati 18:18-21; Rom. 16:3-5) Sicuro che la so vita la ga cambià tante volte, ma i gavea una vita tanto bela e felice. Parché che Àchila e Prissila i ze stati boni de far tute queste robe? Parché anca se la so vita la cambiesse tanto, lori i seitea a meter el Regno in primo posto.

12. Parché quei che i ze maridadi i ga de dessider cossa i vol far a Geovà?

¹² Quei che i ze pena maridadi o che i vol maridarse i pol far come Prissila e Àchila quando i mete el Regno in primo posto nela so vita. Lori i pol dessider insieme cossa i vol far a Geovà e scominsiar a cambiar quel che ghe ocore par farlo. Cossita, sarà pi fàcile che i sinta el aiuto de Geovà nela so vita. (Ecl. 4:9, 12) Quando saria meio che i fesse questo? Quando i ze drio smorosar. Varda el esémpio de Russel e Elizabeth. Russel el ga dito: “Quando èrino drio smorosar, ghemo parlà sora quel che voleino far nel laoro a Geovà.” Elizabeth la ga dito: “Ghemo fato questo parché voleino che le nostre dessision pi avanti le ne giutesse a far quel che voleino a Geovà.” Par quela, Russel e Elizabeth i ze stati boni de ndar giutar nel laoro de predicassion nela Micronèsia.

13. De acordo col Salmo 28:7, cossa sucede quando se fidemo in Geovà?

¹³ Arquanti de quei che i ze maridadi i ga dessidio viver con manco robe e con manco soldi, come Russel e Elizabeth. Cossita, lori i pol far de pi nel laoro de predicassion. Quando i se sforsa insieme de far quel che i ga dessidio, ghe sucederà tante robe bone. Par esémpio, i vederà che Geovà l’è sempre drio  tenderli, la so fede in Geovà la restarà pi forte, e i sarà pi felici. — Ledi Salmo 28:7. *

14. Come el apòstolo Piero e la so dona i ga mostrà che i se fidea nela promessa de Mateo 6:25, 31-34?

¹⁴ Ledi Mateo 6:25, * 31-34. * Quei che i ze maridadi i pol imparar tanto del esémpio del apòstolo Piero e la so dona. Piero el peschea par ciapar i soldi che la so fameia la gavea de bisogno par viver. Sei mesi a un ano dopo de cognosser a Gesù, Piero el ga bio de far una dessision importante. Gesù lo ga convidà par ndar insieme a lu. Sicuro che questa no la ze stata una dessision fàcile, parché Piero el gavea de pensar anca nela so fameia. (Luc. 5:1-11) Ma Piero l’è ndato insieme a Gesù. Sicuro che la ze stata la meio dessision. Noantri anca credemo che la dona de Piero lo ga giutà a far questa dessision. La Bìblia la dise che, dopo che Gesù l’è stà ressussità, la ga viaià insieme con Piero arquante volte. (1 Cor. 9:5) Sicuro che Piero l’è stà bon de darghe boni consili ai maridadi par causa del bon esémpio dela so dona. (1 Pie. 3:1-7) Piero e la so dona i se ga fidà nela promessa de Geovà de tender de quei che i mete el Regno in primo posto nela vita.

15. Cossa che imparemo del esémpio de Tiago e Esther?

¹⁵ Anca quei che i ze maridadi a de pi tempo i pol pensar in maniere de far de pi par Geovà. Cossa pol giutarli? Una dele robe la ze imparar col esémpio dei altri. Par esémpio, lori i pol leder i artìcoli “Eles se Ofereceram”. Tiago e Esther, che i ze del Brasil, li ga ledesto e questo ghe ga dato tanta voia de giutar ndove ghen’era de pi bisogno. Tiago el ga dito: “Quando ghemo ledesto sora le benedission che i fradei i ga bio, anca noantri ghemo volesto sentir la medèsima roba.” Alora, nel ano de 2014, lori i ze ndati de star nel Paraguai e i ze drio giutar a predicar in portoghese. Esther la ga dito: “Ne piase tanto el testo de Efesi 3:20 parché lo ghemo visto suceder tante volte nela nostra vita.” In questa carta, Paolo el ga dito che Geovà el ndaria darne de pi che domandéssino. Savemo che questo l’è pròpio vero.

16. A chi quei pena maridadi i pol domandar consili?

¹⁶ Quei che i ze pena maridadi e che i vol far de pi par Geovà i pol domandar consili a quei che i ga belche imparà a fidarse in Geovà. Par esémpio, i pol domandar consili a quei che i ze maridadi e che, par ani, i dopera quasi tuto el so tempo nel laoro a Geovà. Se quei che i ze pena maridadi i fà questo, i  ze drio mostrar che i se fida in Geovà. (Pro. 22:17, 19) Lori anca i pol domandar consili ai ansiani sora far de pi par Geovà.

17. Cossa che ga sucedesto con Klaus e Marisa, e cossa imparemo con lori?

¹⁷ Pol esser che dessidimo far de pi par Geovà, ma le robe no le suceda come speteino. Varda el esémpio de Klaus e Marisa che ghemo parlà vanti. Dopo de tre ani de maridadi, lori i ze ndati de star nela Finlàndia par giutar a far su la filial del paese. Ma quando i ga savesto che i restaria là sol sei mesi, i ze restadi tanto disgustadi. Pena dopo, i ze stati convidadi a imparar la léngua àrabe. Ancoi, lori i ze tanto contenti de servir nela léngua àrabe in nantro paese. Marisa la ga dito: “Nel scomìnsio, ghemo bio paura de cambiar quel che ne ocorea e fidarse in Geovà. Ma Geovà el ne ga sempre giutà tanto. Par causa de questo, ancoi mi me fido ancora de pi in lu.” Questo esémpio el ne assa sicuri che, se noantri se fidemo in Geovà, lu el ndarà sempre benedirne.

18. Cossa i maridadi i pol far par seitar a meter el laoro a Geovà in primo posto nela vita?

¹⁸ El matrimònio l’è un presente de Geovà, e Geovà el vol che el omo e la dona i sìpia felici. (Mat. 19:5, 6; Pro. 5:18) Valtri sì drio far el vostro meio par mostrar che sì grati a Geovà par questo presente? Come sì drio doperar la vostra vita? Quel che pol giutarve l’è pregar a Geovà, ndar in serca de prinsipi dela Bìblia e meterli in pràtica. Cossita, valtri gavaré una vita tanto bela e felice parché saré drio meter el laoro a Geovà in primo posto nela vita!